Read Isu Aghě Kolòsî 2 Bible Online

Aghě Kolòsî 2 - Isu bible

Aghě Kolòsî 2

¹Mə liə nə̀ ghà kəli tsə yiə mə zwukə nəniy ate bòʼ ghà nə̀ àghě Kəzə̀ yə̀ ghu də nəniy a Làwdesìyà nə̀ aghù yə̀ àdzə̀m ghu də kamə kə̀ kôʼ kôʼ dzə miə.

²Mə ghii zəŋə ani kwe tsə fôŋ tə ghu anə ayiə yə ghu də ani dòʼò tsə anə fyiə kəmòʼ, kwu sòʼo ìliə azoŋə̀ àghè dzə̀m. Mə liə nə̀ ghu ndzə̂m kəli tsə ikwum yə̀ i bê nəniy abidzɛ̀mə̀ ìzuw kəli ìsoŋə̀ yìy tə̀ ghu ki də ani kəli dzwàb tsə nə̀ Kə̀litò də̌ nùw tə yiə tə Zə̀kìy kə byay na nəniy.

³À də̌ Kə̀litò, ù zəŋə nəniy nə̀ aghê kəli tsə utwab ùsoŋə̀ wə̀ Zə̀kìy kwu nəniy nə̀ ayiə yə Zə̀kìy kwu nəniy anə fôŋə̀ we.

⁴Mə dzîy bə̀ â ghà ani zəŋi tsə nə̀ kəə wù lìy nì nɛbə gha anə ayiə àdzii yiy, abu ayiə ghè yə̀ tsəm də kə yəə à də̌ àdzoŋə̀ yìy.

⁵Yəə mə də wày kə nə̀ ghà, mə moʼò ŋwò gha anə fôŋ yam. Mə ŋge dyoʼo ŋwò ani kəli nə̀ ghà muə anə ayiə yə ghà kwu ani mùə̀ ate, dyoʼo sòʼò ani kəli nə̀ ghà mə təmi dòʼo taw anə ibɛmə yə ghà kwu nəniy azoŋə̀ Kə̀litò.

⁶Yəə ghà bɛmə kə dzə Kə̀litò nə̀ ù dòʼò Mwe â ghà, ghà doʼò tsə fyiə kəmòʼ nə̀ we.

⁷Ghà kwu ani dòʼò tsə yəə à də̌ ŋkàʼ, nə̀ ghà mə zu na aghaŋə ghii azoŋə̀ Kə̀litò. Ghà ki tsəŋə zuw yə kə awò we tə̀ ghà nɛmə yə̂ anə ibɛmə ghii, anə ayiə yə ghu kə tyi dê nəniy awò ghà. Ghà ki nyiə yəə soʼo zòŋə̀ kìy awò Zə̀kìy anə ayiə dzə̀m.

⁸Abu aghê tyi dê ayiə àguw yiy awò ghà, kəə ghǎ nì byemə. Bəə ayiə yə ghu tyi dê a tsəb də kə yəə utwab wiy də ŋwô ate, ayiə ghè yə̀ kwuni də̀ ani zəŋi nə̀ ghà môŋ nây. Ayiə yə ghu tyi dê nəniy à màŋ də̀ utwab u wù mbyi. Ayiə ghè yə̀ kə̀ ŋwô bə̂ dzə̂ â Kə̀litò.

⁹Kə̀litò də̀ yəə à də̀ Kəzə̀ anə uwè u we ùdzə̀m.

¹⁰Yəə i də nəniy ghii, Zə̀kìy mə nyə̀ gha nə̀ ìmùə̀ ìsoŋə̀ yìy anə yiə yə ghà təm doʼò dzəŋi nə̀ Kə̀litò. Kə̀litò kwu kədaʼa azoŋə̀ ùdaʼa ùdzə̀m u saʼa nəniy.

¹¹Yəə ghà təm doʼò dzəŋi nə̀ Kə̀litò, Zə̀kìy mə gwùmì gha. Ù kə̀ kwuni gwumì dzə̂ gha anə yiə yə wè mbyi gwumə̀ nəniy wù ate. Ù gwùmì ghà abidzəmə̀ Kə̀litò anə yiə yə ù fày ŋwò fyi bə̂ gha anə daʼa kə ayiə àbɛbə kə kwu nəniy anə iwè nəli.

¹²Anə sòŋə fə ghu kə nyiə̀ gha nə̀ mwi m-à-zə̀ mìy, Zə̀kìy ə kələ dzəŋi yə̀ ghà nə̀ Kə̀litò, kàm zɛ̀mə̀ ŋwò dzwoŋi bə̀ sòʼò ghà nə̀ we. Zə̀kìy kə zɛ̀mə̀ ŋwò bə̀ ghà aŋwòə ghà kə bɛmə â we. Ghà kə bɛmə ŋwô nə̀ Zə̀kìy kwu kə daʼa, bɛmə sòʼò nə̀ Zə̀kìy kə zɛ̀mə̀ ŋwò dzwoŋi bə̀ Kə̀litò anə ipfə.

¹³Ghà kə bòʼ pfə dòʼò ŋwò anə sə k-a-zə̀ bòʼ àyiə ghii àbɛbə yiy. Ghà kə kwu sòʼo way lâŋ kìy, ghǎ zəŋə sòʼò àyiə yə gûw tə iwe nəli tiy kə liə. Zə̀kìy mə zəŋi nə̀ ghà doʼò ùtaw nə̀ Kə̀litò aŋwòə ù maa nìyzə̀ bɛb tə ŋgàŋ tìy tə̀ dzə̀m.

¹⁴Zə̀kìy maa tsə̀m ani dòʼò nə̀ ù kə̀ fâʼ dzə̂ nə̀ ŋgàŋ anə yiə yə lâŋ kìy kə dzîy nəniy. Ù maa nìy ŋwò mfəm yə ŋgà kə kwu nəniy ani kəli, fə̀d nìy na yə̀ azoŋə̀ Yesù nìy ba yə̀ we anə kàʼ fə təzəd.

¹⁵À yù də̌ dzəd yə Kə̀litò kə nîy ŋwò nəniy daʼa kiy ate awò ùdaʼa ùbɛbə wə̀ u kə saʼa nəniy. U zəŋi tsə sòʼò nə̀ ghu ki bwiy bəə a dzəmə̀ we nə̀ ghu mə kwù na awo ghu yiy, tə̀ aghê dzə̀m ki koʼo bə, ani dè tsə nə̀ ù mə təm nyi udaʼa wə.

¹⁶Yəə i də nəniy ghii, ghà kə bɛmə dzə̀ nə̀ wù lìy nyə̀ ghà nə̀ làŋ kìy anə fyiə kə ghà kwu ani nyi, moo anə fyiə kə̀ muə kiy, moo anə tsukə mə̀ fwùlə̀ m-a-zə̀ mìy an-a-ŋə̀m, moo inyi i ndzòŋə̀ ìfyiə yìy, moo anə ntsukə mə̀ zwaa mìy yə.

¹⁷Ulâŋ wə̀ kə màŋ də̀ kətsəe ani dè bə̀ fyiə kə kə kə ba kwu ani bù. Kə̀litò ba də̀ fyiə kə̀ soŋə̀ kə ghè kə̀.

¹⁸Ghà kə bɛmə dzə̀ nə̀ wè lìy nìy ŋwò namə kə à ndzə̀m də nəniy kə kəli kiy, kwoʼo ùwee nə̀ ghe ŋge tsìy fyi ŋwô aghê liy yiy, bòʼ àyiə yə ù kòʼo nəniy anə mə dzɛmə̀, ghu tsəŋə̀ dzìy kə nə̀ aghê ki bvamə iwee yiy anə yiə yə ghu moʼò, fwùlə̀ sòʼò tsə̀təndii t-a-zə̀. À màŋ də̀ môʼ tə ghu tə zəŋə nəniy nə̀ ghu ki kwoʼo iwe ighu yiy.

¹⁹Ghu kamə̀ zuw way â Kə̀litò, ù də nəniy tuwkiy anə ndàw Kə̀zə̀, à də nəniy uwee u we wiy. À də̌ Kə̀litò ù kwi kəli nəniy uwee u ghè wə̀ ùdzə̀m. Ù kwi kəli ùzòŋ uwè nə̀ ghaŋə tə uwè u ghè wə̀. Ù khu nyìə̀ ùwee u ghè wə̀ nə̀ ùfyiə wə u də ani zəŋi tsə nə̀ u ki niyemə anə ayiə yə Zə̀kìy liə nə̀ u nɛmə ate.

²⁰Ghà maa pfə nə̀ Kə̀litò. Ù maa bii ŋwò fyi gha anə awo udaʼa wə̀ u də nəniy fə anə mbyi, u kâm kwu dzə̀ way daʼa kə̀ liy kiy azoŋə̀ ghà. Ghà zəŋə kìə̀ yəə ghà də ighəd nə̀ àghè liy yə fə anə mbyi ə? Ghà nia nə̀ìndiə ulâŋ wìy yəə à də̌ ndzòʼò ùlàŋ wə̀ u dzîy nəniy nə̀,

²¹“Kə̀ kəli dzə̀ ufânyiə wə, kə̀ mwâm kòʼ dzə̀ ufânyiə wə nə̀ ìdzwə yiy, kə̀ bôʼ mwàm dyaŋi dzə̌ mfànyiə mə̀lìy mìy nə̀ àwo yiy.”

²²Ndzòʼò ùlàŋ u ghè wə̀ màŋ də̀ ulâŋ u ghě mbyi nə̀ ìtyi dè i ghě mbyi yiy kwùmə̀ yə̀ nə̀ ùfyiə wə u bê dyòʼò bə̂ nə̀ u kwu way fàʼ kìy bəə a fâʼ mà tsə nəniy ate.

²³Abu wù na nəniy ulâŋ wə̀, a tsəm də̀ kə yəə à ŋge də̀ iyiə ìdzoŋə̀ yìy wù kwu ani zəŋi. U də kə yəə u də ŋwô ani zəŋi nə̀ wù ŋge liə tsə Kəzə̀, ù ki ŋge bvamə soʼo uwe wiy, kwu sòʼò kədaʼa ani yèmì anə uwè u we. U kwuni ndzə̀m wày dzə ani fày ŋgàŋ nə̀ ŋgà kə zəŋi dzə̀ ayiə àbɛbə yə iwee iŋgàŋ yìy liə nəniy nə̀ ŋgà ki zəŋə.