Read Isu Aghě Kolòsî 3 Bible Online

Aghě Kolòsî 3 - Isu bible

Aghě Kolòsî 3

¹Zə̀kìy mə zɛ̀mə̀ ŋwò dzwoŋi bə̀ gha anə ipfə nə̀ Yesù. Yəə i də nəniy ghii, ghà kwu ani na yə̀ fòŋ təli anə ufyiə wə u də nəniy an-a-vələ anə lòʼo kə məŋkwiʼi kə Kə̀litò də nəniy ate anə ukwe u Kəzə̀ ùnyiə wiy.

²Ghà na yə̂ fòŋ təli anə ufyiə wə u də nəniy an-a-vələ, ghà kə na dzə̀ fôŋ təli tiy anə ufyiə wə u də fə ambvə̀dintsə.

³I nyiə̀ bvami də̀ kə yəə ghà mə pfə dòʼò anə yiə yə ghà də wày ani zəŋi ayiə yə aghee mbyi dzîy nəniy, muə̀ təli tiy də awò Zə̀kìy gha nə̀ Yesù wə̀ ù təm doʼò dzəŋi nə̀ Zə̀kìy.

⁴Ani buu Zə̀kìy nî dè fyi bə̂ nəniy Kə̀litò wə̀ ù zəŋə nə̀ ŋgà ki də utaw, awò àghě mbyi dzə̀m, ghà ni də nə̀ we, mwà sòʼò yəə à də̌ we.

⁵Ghà kwu ani dòʼò tsə yəə ghà mə pfə dòʼò ani zəŋi ayiə yə gûw tə iwè təli tiy liə nə̀ ghà ki zəŋə. Ndzòʼò àyiə yəə à də̀ kəlyaŋi, nə̀ môʼ tə̀ dzəə tiy, nə̀ ìliə yiy ani nə̀ŋì kyabi nə̀ àghù yìy, nə̀ ìliə yiy ani zəŋi ayiə àbɛbə yiy, nə̀ ani kəli umwîy. Ani kəli umwîy i də sòʼò ighəd yəə wò nì fwùlə mwòʼo miy.

⁶Zəkìy kî dè fòŋə̀ we ì ŋəmə yìy awò àghù yə̀ ghu də zuw way awò we bòʼ àyiə àbɛbə yə ghu zəŋi nəniy

⁷Ghà kə zəŋə tsə̀ sòʼò ŋwô ndzòʼò àyiə àbɛbə yə anə sòŋə fə ghà kə muə tsə nəniy anə uzə u ghù yə̀ ghu kə zəŋə tsə̂ soʼò nəniy ndzòʼò àyiə yə.

⁸A kwuni bû nyiə, ghà kwu ani nyəli màʼà ayiə ghè yə̀. Ghà kwu ani nyəli màʼà fòŋ tə̀ ŋəmə tiy, ghà kwu sòʼò way ani ŋge ŋəmə niiy yə nə̀ fòŋ tìy. Ghà kə liə dzə̀ ani zəŋi ayiə àbɛbə yiy azoŋə̀ àghù yìy. Ghà ki guw nia dzə ayiə yiy anə utuw u ghù. Ghà kə nyàʼì dzə̀ àghû yìy moo dzìy àyiə àbɛbə yiy awò aghè.

⁹Ghà kə guw dzə̀ anə iwè aŋwòə ghà maa nyəli màʼà imuə̀ ìwiy yə i kə də nəniy ìbɛbə yiy.

¹⁰Zə̀kìy maa zəŋi nə̀ ghà kəli tsə imùə̀ ìfyiə yiy. Ù namə fàʼà anə mùə̀ təli ani zəŋi tsə nə̀ ghà bû doʼò tsə yəə à də̌ we, anə yiə yə ghà də ani kəli dzwàb tsə wù wə̀ ù də nəniy we.

¹¹Abu wò kwu nəniy imùə̀ ìfyiə yə, wò kwu dzə̀ way kwuni kiy nə̀ wè lìy ù kwu nəniy imùə̀ ìfyiə i ghè yə̀ soʼo. Wè Dzû kwu dzə̀ way kwuni kiy nə̀ wù wə̀ ù də wǎy wè Dzû. Wù wə̀ ghu gwùmì na nəniy we, ù kwu dzə way kwuni kiy nə̀ wù wə̀ ghu də kamə gwumì na we. Wò kwu dzə̀ way kwuni kiy nə̀ wè ìnaʼ ì liy yiy moo nə̀ wù wə̀ tuw kə we kiy də kamə kə̀ fwiy. Kwə̂d kìy kwu dzə̀ way kwuni kiy nə̀ wù wə̀ ù də wày kəkwə̂d. Wè lìy kə̀ tsîy fyi dzə̂ àzə̀, à mày kə Kə̀litò ù tsìy fyi nəniy ufyiə udzə̀m.

¹²Zə̀kìy ŋge liə ŋwô gha, sày sòʼò ghà nə̀ ghà doʼò àghè i ghe. Yəə i də nəniy ghii, ghà kwu ani zəŋə yə ayiə àdzoŋə̀ yìy yəə à də̀ aghee Kəzə̀, dè yə̀ sòʼò fòŋ ìdzoŋə̀ yìy awò àghè liy. Ghà kəli tsə iwee ìbvamə yiy. Ghà kə môʼ dzə̀ nə̀ ghà tsîy fyi ŋwô aghê liy. Ghà ki kwee tsə soʼo fôŋ tìy.

¹³Ghà ki kwee tsə fôŋ tìy nə̀ wù ùmoʼ umòʼ, nìyzə̀ ə̀ yə̀ sòʼò wù ùmoʼumòʼ abu ù zəŋi bɛb tsə nəniy iyiə ìliy yiy. Ghà kwu ani nìyzə̀ wù ùmoʼ umòʼ anə yiə yə Mwe ə̀ mbyi nîyzə̀ sòʼò nəniy ayiə ghii àbɛbə yiy.

¹⁴Anə yiə yə àdzə̀m, ghà kəli tsə iliə anə iwè nəli aŋwòə à də̀ iliə i zəŋə tsə nə̀ ufyiə udzə̀m wìy ki də anə fyiə kəmòʼ anə ayiə yə u kwu nəniy ani dòʼò ate.

¹⁵Wù ùmoʼ umòʼ anə uzə ghii də yəə à də̀ ubə̂d uwè u Kə̀litò. Zə̀kìy kə gha sây kə nə̀ ghà ki muə dzəŋi anə ibvay. Yəə i də nəniy ghii, ghà zəŋi tsə nə̀ ibvay yə i ŋwô bə̂ awò Kə̀litò, i nyiə bə̂ ghà nə̀ ìmòʼ ìdzoŋə̀ yìy, ghà ki nyiə soʼo Zə̀kìy nə̀ zòŋə̀ kìy anə ayiə dzə̀m.

¹⁶Ghà muə̀ tsə anə ayiə àsoŋə̀ yə̀ ntwùm ə̀ Kə̀litò ìsòŋə̀ yə̀ dzìy nəniy, ghà ki də ani tyi dè àyiə, dè yə̀ sòʼò dzəd awò wù ùmoʼ umòʼ anə utwab wə Kə̀litò nyə̀ nəniy. Ghà ki zɛmə yə ayiə yə a də nəniy anə ŋwàʼà kə təndzàŋə, zɛmə yə̀ sòʼò ndzàŋə tə̀ liy tiy nə̀ ndzàŋə tə Zwàykə̀zwekiy nyiə̀. Ghà ki nyiə yəə zòŋə̀ kìy awò Zə̀kìy anə ayiə yə àdzə̀m ù zəŋi nəniy.

¹⁷Ayiə dzə̀m ghà zəŋə nəniy, nə̀ à yuu ghà dzîy nəniy, ghà ki zəŋə tsə ayiə ghè yə̀ àdzə̀m yəə à də̀ aghû yə̀ ghu bɛmə nəniy awò Mwe ə̀ Mbyi Yesù, nyìə̀ yə̀ sòʼò kə̀zòŋə̀ awò Zə̀kìy abidzɛ̀mə̀ we.

¹⁸Gha, iyəŋi, ghà kwu ani zuw yə̀ awò àŋəm ghii yiy. À yù də̀ iyiə itsitsi yiy ghà kwu ani zəŋə aŋwòə ghà də aghee Mwe ə̀ mbyi.

¹⁹Gha, iŋə̀mə̀, ghà kwu ani liə yə̀ aghiy ghii. Ghà ki ŋgay dzə azoŋə̀ ghu.

²⁰Gha, anîsə̂, ghà ki zuw yə awò nə̀ zwə̂, zuw yə̀ sòʼò awò nə̀ tè aŋwòə à yù də iyiə yə i zəŋə nə̀ Mwe ə̀ mbyi ki dyoʼo.

²¹Gha, nə̀ tě wa nə̀ nə̀ zəə wa yiy, ghà kə zəŋi dzə̀ nə̀ awa ghii ŋə̂m nə̀ fôŋ tìy. Ghu də ani kaʼ yə̀ ani mòʼ nə̀ ghu way ani zəŋi kòʼ dzə̀ ìyiə ìliy yiy ghà də ani dwiʼi ate nə̀ ghu.

²²Gha yə ghà faʼà nəniy a təŋə̀ àghù yìy, i zuw yə nənìy awò aghě ghà yə̀ anə ayiə dzə̀m. Ghà kə kaʼi fàʼ dzwàb dzə̀ abu ghu də akə̀lə̀ ghà ani zəŋi tsə nə̀ ghu ki dyoʼo nə̀ ghà. Ghà kwuni kwu ani fàʼ dzwàb tsə fàʼ kəli aŋwòə ghà ndzə̀mə̀ zuw ŋwò â Mwe ə̀ mbyi.

²³Abu ghà faʼà kə kìə̀ kìy, fàʼa yə̀ nənìy nə̀ fòŋ təli tə dzə̀m yəə ghà faʼà awò Mwe ə̀ mbyi. Ghà kə môʼ dzə̀ nə̀ ghà faʼà awò wè mbyi.

²⁴Ghà kəli tsə nə̀ ghà kî kyilə ŋwò namə kə Mwe ə̀ Mbyi tɛb na nə̀ ghe kî nyìə̀ ŋwò awò aghě we yiy aŋwòə Kə̀litò ba də̌ wù wə̀ ghà faʼà nəniy a tə̀ŋə̀ we.

²⁵Aghû yə̀ ghu zəŋə ŋgwali tə yiə tiy, Zə̀kìy nî tsəə ghu anə ŋgwali tə yiə tə ghu tə ghu zəŋə nəniy, aŋwòə Zəkìy taʼa dzə̀ wày ukwa wiy anə isaʼ i we.