Read Isu Aghě Kolòsî 4 Bible Online

Aghě Kolòsî 4 - Isu bible

Aghě Kolòsî 4

¹Gha, nə̀ mwe, ghà si zəŋə tsə ayiə yə a də nəniy tsitsi də̀ sòʼò àdzoŋə̀ awò àghù yə̀ ghu faʼà nəniy a təŋə̀ ghà. Ghà kəli tsə nə̀ ghà kwu sòʼò ŋwô Mwe ghii an-a-byiwuŋ.

²Ghà ndəmi tsə iwe ani gwùŋì, kəə fyiə kə̀li kiy nì zəŋə nə̀ ghà doʼò nə̀ ghà gwùŋə̀ wày. Ghà ki niy tsə iyɛmì yìy anə ayiə yə ghà dzîy nəniy, nyiə̀ yə̀ sòʼò kə̀zòŋə̀ awò Zə̀kìy.

³Ghà ki gwuŋə yəə soʼo anə utuw ghələ nə̀ Zə̀kìy nyiə̀ ghə̀d nə̀ bwòʼ kìy ani nàʼà ntwùm ə̀ we yə, twoŋə nùw tə yiə tə kwùmə̀ yə̀ nə̀ Kə̀litò, Zə̀kìy zəŋi nə̀ ghè kəli. Mə fə̀ də̀ a ndàw ntsaʼ aŋwòə mə kə nìʼà àyiə ghè yə̀.

⁴Ghà ki gwuŋə tsə nə̀ mə naʼà ntwùm ìghè yə̀ anə yiə mə kəli kwûm nəniy ani zəŋi tsə nə̀ aghê zuw kəli dzwâb tsə.

⁵Ghà nîy tsə iyɛmì anə ayiə ghii à dziy yiy nə̀ àyiə ghii à zəŋə, abu ghà də nəniy nə̀ àghù yə̀ ghu də kamə bɛmə nəway Zə̀kìy. Abu ghà də nə̀ ghu, ghǎ fàʼ tsə anə ayiə yə ghà kəli kwûm ani fày kə ghu tə̀ ghu kəli tsə iyiə ìsoŋə̀ yìy.

⁶Ayiə ghii à dziy kwu ani də àdzoŋə̀ yìy, də̀ sòʼò ani kwu wù anə unìə̀, ani zəŋi tsə nə̀ ghà ki də ani kəli tsə dzəd yə ghà də ani bə̀lì àghè dzə̀m ate.

⁷Àzə̀ ŋgàŋ ùdzòŋə̀ wìy, Tàykikùs, ù fàʼà dzwàbə̀ nəniy awò Mwe ə̀ mbyi, ù kì bè dzìy nyìə̀ bə̀ àyiə yə a fyi nəniy nə̀ mìə̀. Ù fàʼà fwumə fàʼ kə Mwe ə̀ mbyi nə̀ mìə̀.

⁸Mə twumə bə̀ we awò ghà nə̀ ù bù zəŋi tsə nə̀ ghà kəli ayiə yə a fyiə nəniy tə̀ ghà ki də ani kəli tsə yiə ghè də nəniy ate. Ù də̀ ani zəŋi sòʼò nə̀ ghà kəli tsə ighaa anə fòŋ təli.

⁹Ù kì bè fwumə nə̀ azə̀ ə̀ ŋgàŋ ghu tyoŋə we nə̀ à də̌ Ònisimùs. Ù də̀ sòʼo àzə̀ ŋgàŋ ù bɛmə nəniy awò Zə̀kìy, ghè gaʼ na nəniy fòŋ azoŋə̀ we, ù də̀ sòʼo anə dzəŋə kəli. We nə̀ Tàykikùs, ghu kî bè dzìy bə̀ àyiə yə̀ à dzə̀m a fyiə nəniy fə awò ghà.

¹⁰Àlistakùs, wə̀ ù də fwumi nə̀ mìə̀ a ndàw ntsaʼ ù tyoŋə zuw bə̀ sòʼò ghà we nə̀ Mâk wə̀ Bànabàs kə də nəniy tɛmə̀ we. (Mə maa dzày awò ghà nə̀ ghà ki ŋgwam na tsə Mâk abu ù bù nəniy.)

¹¹Yesù wə̀ ghu tyoŋə nəniy nə à də̀ Dzustùs, ù tyoŋə zuw bə̀ sòʼò ghà. À yù mày dzə̀ àghě Dzû yə̀ tuw ghu u ti ghu bɛmə nəniy Zə̀kìy, fàʼà fwumə sòʼò nə̀ mìə̀ ani zəŋi tsə nə̀ aghû yə̀ Zə̀kìy saʼa nəniy ghu, ghu dûw fyi yə̂. Ghu mə ŋge fày miə.

¹²Azə̀ ghii ghu twoŋə nə à də̌ Èpafàs, wè dzəŋə kəli, ù də soʼo wè kə̀fàʼ ə̀ Yesù Kə̀litò, ù tyoŋə zuw bə ghà. Ù tsə̀ŋə̀ zuw kə ani gwùŋì anə utuw ghii bwoʼo kə̀wo nə̀ Zə̀kìy zəŋi tsə nə̀ ghà təmi doʼò taw tsə anə ibɛmə ghii, yəə à də̀ aghû yə̀ ghu nɛmə doʼò dzə̂ anə ibɛmə i ghu nə̀ Zə̀kìy, zəŋə yə̀ sòʼò àyiə yə̀ à dzə̀m Zə̀kìy liə nəniy.

¹³Mə də ŋwô ani dzày nyiə̀ ìdzwə i we aŋwòə mə mə kǒʼ ntswə̀d mə̀ ù tsìy nəniy ate anə iyiə ghii, nə̀ anə iyiə i ghù yə̀ ghu də nəniy a Làwdesìyà nə̀ à yuu ghu muə nəniy a Hìlapolìs.

¹⁴Àzə̀ ŋgàŋ ùdzòŋə̀ wìy, Lukâs wə̀ ù byaŋə nəniy aghê àdzaŋə yiy, ù tyoŋə zuw bə̀ sòʼò ghà we nə Demàs.

¹⁵Mə bwoʼo kə̀wo, ghà toŋə zuw yə̂ awizə ə ŋgàŋ yə̀ ghu də nəniy a Làwdesìyà nə̀ Nimfà nə̀ àghě Kə̀zə̀ yə̀ ghu bê təmə fwumə a ndàw we.

¹⁶Abu ghà tyoŋə mâ kə dzəə ŋwàʼà kə̀, ghà ki twum yə̂ â àghě Kəzə̀ yə̀ ghu də nəniy a Làwdesìyà tə̀ ghu toŋə kôʼ kə sòʼò. Abu ghu twum bə̂ nəniy ŋwàʼà kə̀ mə kə twâ â ghu, ghà ki toŋə kə soʼò.

¹⁷Ghà dzây yə̂ â Àkipùs a we nə̀ ù də̀m tsə ani mày kə fàʼ kə Mwe ə̀ mbyi kə nyiə̀ na nə̀ ù fâʼ.

¹⁸À ìtoŋə zuw yə̀ twà tsə miə Pôl nə̀ wo kam kiy. Ghà kə zə̂ dzə̀ nə̀ mə də a ndàw ntsaʼ! Mə gwùŋə̀ nə̀ Zə̀kìy dê ghà nə̀ fòŋə̀ we ìdzòŋə̀ yìy.