Read Isu 1 Tèsàlonikà 1 Bible Online

1 Tèsàlonikà 1 - Isu bible

1 Tèsàlonikà 1

¹À ŋwàʼà kə̀ twà bə̀ mìə̀ Pôl. Mə də fwumi nə̀ Saylàs nə̀, Timotì. Mə twâ bə̀ awò dzəŋə kə aghě Kəzə̀ yə̀ anə inaʼ i Tèsàlonikà, ghu də nəniy anə fyiə kəmòʼ nə̀ Tà, Kə̀zə̀, də̀ sòʼò anə fyiə kəmòʼ nə̀ Mwe ə̀ mbyi Yesù Kə̀litò. Ghè gwùŋə̀ nə̀ Zə̀kìy dê ghà nə̀ fòŋə̀ ìdzòŋə̀ yìy, ù nyiə̀ sòʼò ghà nə̀ ìbvay yiy.

²Ghè taw nyiə̀ kə̀zòŋə̀ awò Zə̀kìy anə utuw ghii, gwùŋə sòʼò anə utuw ghii anə nsòŋə indzə̀m ghè gwùŋə nəniy.

³Abu ghè gwùŋə̀ nəniy awò Tè ŋgàŋ, Kə̀zə̀, kwùmə̀ yə̀ nə̀ ghà, ghě mòʼò tsə àyiə yə ghà faʼà nəniy ate â Zə̀kìy à dê fyiə bə̂ nəniy ibɛmə ghii yiy, nə̀ yəə iliə ghii yiy zəŋə nə̀ ghà si faʼa nə̀ daʼa kiy, nə̀ àyiə yə imôʼ ghii yiy tiy təŋ kə azoŋə̀ Mwe ə̀ mbyi ə̀ ŋgàŋ Yesù Kə̀litò.

⁴Awizə̂ ghè kwu ŋwô nə̀ Zəkìy liə ŋwò gha, sày fyi bə̀ sòʼò ghà nə̀ ghà də aghê i ghe.

⁵Ghè kwu ghi aŋwòə ghè kə də̀ aghee səsə yiy ani nàʼà ntwùm ə̀ ìdzòŋə̀ yə̀ awò ghà. Ghè kə kə̀ kaʼi naʼà dzə̀ ntwùm ìghè yə̀ anə idzwə, ghè kə fàʼ sòʼò mali tə yiə anə daʼa kə Zwàykə̀zwekiy. Ghè kə dè bə̀ yəə ghè kwu nəniy ate nə̀ ntwùm ìdzòŋə̀ yə̀ də̌ ìsòŋə̀ yìy. Ghà kwu ŋwô ayiə yə ghè kə zəŋə tsə̂ anə sòŋə fə ghè kə muə nəniy nə̀ ghà. Ghè kə ghii mùə̀ ani fày kə gha.

⁶Abù ghè naʼà tsə nəniy ntwùm ə̀ Kə̀zə̀ awò ghà, ghà zwiʼi kəli kə ani mùə̀ anə ayiə yə ghè kə muə nəniy ate, nə̀ anə ayiə yə Mwe ə̀ mbyi kə muə nəniy ate. Ghà ə fii sòʼò aŋwòə aghê kə nyìə̀ ghà nə̀ utswə̀d wìy, Zwàykə̀zwekiy kwuni zəŋi tsə nə̀ ghà kəli kədwiʼi anə fòŋ təli.

⁷Yəə i kə fyi nəniy ghii, i zəŋi tsə nə̀ ghà dòʼò tsə kətsəe awò àghù yə̀ ghu kə bɛmə nəniy Zə̀kìy a mbwòʼ ə̀ Màsèdonìyà nə̀ à mbwòʼə̀ Àkayà.

⁸Ghà kə kə̀ kaʼì zəŋi dzə̂ nə̀ ntwùm ə̀ Mwe ə̀ mbyi səaŋì zù a mbwòʼ ə̀ Màsèdonìyà nə̀ a mbwòʼə̀ Àkayà, ayiə yə ghà kə kwuni zəŋi sòʼò nə̀ ùzòŋ ghii wiy foŋ tsîy yə̂ anə ndə̀mə̀ tə̀lòʼo kwùmə̀ yə̀ nə̀ ìbɛmə yə ghà kwu nəniy awò Zə̀kìy. Yəə i də nəniy ghii, ghè kâm wày ani dzày ìyiə ìliy yiy aŋwòə aghê mə zuw tsìy kpe.

⁹Aghê tsəŋə̀ dzìy kə àyiə yə ghà kə ŋgwam na nəniy ghəd anə sòŋə fə ghè kə bwîy bù nəniy akə̀lə̀ ghà, nə̀ àyiə yə ghà kə twe maʼà yə̂ ani fwùlì mə̀mwòʼo. Kaʼ yə̀ ani fàʼ awò Zə̀kə̀ soŋə̀ kə̀ kə muə nəniy.

¹⁰Ghu dzîy sòʼò ŋwò yəə ghà lyimə nəniy ibû dzoŋi i Wà Kə̀zə̀, toŋə Yesù wə̀ Zə̀kìy kə zɛ̂m ŋwò dzwoŋi bə̂ nəniy we anə ipfə. À də̌ we ù zəŋə nə̀ ŋgà kə fii dzə̀ anə mfəm yə Zə̀kìy kwu nəniy ani nyə̀ awò àghè bòʼ ayiə ghu àbɛbə yiy.