Read Isu 1 Tèsàlonikà 3 Bible Online

1 Tèsàlonikà 3 - Isu bible

1 Tèsàlonikà 3

¹Ghè kə kàm wày dzə ani kwi tə fôŋ nə̀ ghè koʼò wày gha. Ghě kòʼ tsə nə̀ idzwabə̀ awò mìə̀ nə̀ Saylàs ani dòʼò səə tsə a Atèns.

²Ghě twum bə̀ Timotì, àzə̀ ə̀ ŋgàŋ wə̀ ù dzəŋə faʼà nəniy fàʼ k-a-zə̀ kìy nə̀ ghə̀d, ani nàʼà ntwùm ìdzòŋə̀ yə̀ kwùmə̀ yə̀ nə̀ Kə̀litò. Ghè kə twum bə̀ we nə̀ ù bù zəŋi tsə nə̀ ghà si kwu ibɛmə ìsoŋə̀ yìy, ù bù zəŋi tsə sòʼò nə̀ ghà kəli tsə fôŋ tə̀ taw tiy,

³ani zəŋi tsə nə̀ ntswə̀d mìy kə zəŋi dzə̀ nə̀ wù lìy bvə̀ doʼò yə̀ anə ibɛmə i we. Ghà kwu ŋwô nə̀ Zə̀kìy maa byay na nə̀ ŋgaŋ yə a bɛmə nəniy â we nə̀ ŋgà tsîy anə ndzòʼò ntswə̀d mə̀ ghè mə̀,

⁴aŋwòə soŋə fə ghè kə də nəniy nə̀ ghà, ghè maa dzày zìì na bə̀ â ghà nə̀ ghè nî fyaʼa ŋwò. Ghà kwu ŋwô nə̀ ghè maa ndzə̀m fii.

⁵Mə kə kwi kè ŋwòə fòŋ ani dòʼò nə̀ mə koʼò wày gha. À də̀ ighe mə kə kôʼ tsə nə̀ idzwabə̀ ŋwò â mìə̀ ani twum bə̀ Timotì. Mə kə twum bə̀ we nə̀ ù bù kòʼ nə̀ ibɛmə ghii yiy də mə̀yə. Mə kə tsəŋə nə̀ Satàn kì mwàmə̀ kòʼò ŋwò gha ani zəŋi nə̀ fàʼ kələ kiy doʼò kə̀ŋwôŋwò.

⁶Timotì mə bù dzwoŋi nyiə. Ù bù dzwoŋi nə̀ ntùm ìdzòŋə̀ yìy kwùmə̀ yə̀ nə̀ ibɛmə yə ghà kwu nəniy â Zə̀kìy nə̀ ìliə yə ghà kwu soʼo â àghè liy yiy. Ù dzày sòʼò nə̀ ghà kwu môʼ tə̀dzoŋə̀ tìy a zoŋə̀ ghə̀d, liə sòʼò ani kòʼ ghə̀d anə ayiə yə ghè liə soʼo nəniy ani kòʼ ghà.

⁷Awizə̂ yamə, yəə ghè kwu kə ndə̀mə̀ ndə̀mə̀ tə məntswə̀d tìy, fyaʼa sòʼò, ibɛmə yə ghà kwu nəniy, i kwê fòŋ tələ,

⁸aŋwòə ibɛmə yə ghà kwu nəniy awò Mwe ə̀ mbyi, i mə zəŋə ghè nyiə̀ də̀ yəə à də̀ aghû yə̀ ghu kâm doʼò dzwoŋi bə̂ àtaw yiy.

⁹Ghè nyiə̀ kə̀zòŋə̀ nyiə â Zə̀kìy bòʼ ghà. Ghè nyiə̀ zòŋə̀ k-a-zə̀ anə ayiə yə ghà zəŋi nəniy nə̀ ghè ki dyoʼo anə sə k-a-zə̀.

¹⁰Ghè ndzəmə̀ gwùŋə̀ nə̀ fòŋ tələ tiy tə̀dzə̀m nə̀ ntsukə tiy, nə̀ ntsə̀ tìy dzìy nə̀ Zə̀kìy fây nə̀ ghè bû kôʼ fəli gha. Ghè fây soʼò anə zəŋi tsə nə̀ ibɛmə ghəli yiy taw tsîy tsə yəə i də nəniy ate nyiə.

¹¹Ghè gwùŋə̀ nə̀ tè ŋgàŋ, Kə̀zə̀, nə̀ Mwe ə̀ Mbyi ŋgàŋ, Yesù, nə̀ ghu fây ghə̀d nə̀ ghè bû kôʼ ghà.

¹²Mə gwuŋə̀ nə̀ Mwe ə̀ Mbyi zəŋi tsə nə̀ iliə yə̀ ghà kwu anə iwè nəli, nə̀ azoŋə̀ àghè dzə̀m, i nɛmə yə̂. I bû doʼò tsə soʼò yəə à də̌ iliə yə ghè kwu nəniy azoŋə̀ ghà.

¹³Bəə i doʼò nəniy ghii, soŋə fə Mwe ə̀ Mbyi ə̀ ŋgàŋ, Yesù, nì bè nəniy nə̀ àghě we yiy, ù nî zəŋi tsə ghà ni zwe, kwu way utswə̂d wìy soʼo anə sə k-a-zə̀, Tè ŋgàŋ.