Read Isu 1 Tèsàlonikà 4 Bible Online

1 Tèsàlonikà 4 - Isu bible

1 Tèsàlonikà 4

¹Awizə̂ ghələ, ani dzày kəd tsə, ghè bwoʼo bə̀ ghà nə̀ wo kiy anə izəd i Mwe ə̀ mbyi Yesù nə̀ ghà mùə̀ tsə anə yiə yə Zə̀kìy liə anə yiə yə ghè tyi dê nəniy awò ghà. Ghè kwu ŋwô nə̀ ghà muə ŋwoə ghii. Ghà kwuni ndəmi tsə kə ìwee ani mùə̀ dzwàb tsə tsìy fyi yəə ghà muə nyiə ate.

²Ghà kwu ŋwô itswû yə̀ ghè kə tswû nəniy gha ate. Ayiə ghà yə̀ ghè kə tswû nəniy ghà ate, à kə də̀ ayiə yə Mwe ə̀ mbyi Yesù kə dzây nə̀ ghè dzây bə̂ awò ghà.

³Zə̀kìy liə nə̀ ghà ki zwe. Yəə i də nəniy ghii, gha kwu ani màʼà kə̀lyaŋi.

⁴Wù umoʼ umòʼ kwu ani kəli tsə yəə ù kwu ani mùə̀ tsə ate nə̀ wìy we anə ayiə zwe, nə̀ anə ayiə yə a kwu ŋkwiʼi miy.

⁵Ghà kə mùə̀ dzə̀ yəə à də̀ aghû yə̀ ghu də kwu way Zə̀kìy. Ghu ŋge kwu nəniy iliə yiy ani niŋə nə̀ àghè yìy.

⁶Wè lìy kwu dzə̀ way ani nə̀ŋì nə̀ wìyəŋi wə à də wày wìy we. À ki də nə̀ ù mə zəŋi bɛb anə yiə yə ù nìy fyiə kə à də wày kə we kiy. Ghè maa bòʼ dzày àyiə yə awò ghà, ghè namə dzìy bə̀ nyìə̀ awò ghà nə̀ ghà kəli tsə nə̀ Mwe ə̀ mbyi kî nyìə̀ ŋwô mfəm awò àghù yə̀ ghu zəŋə nəniy ndzòʼò àyiə yə,

⁷aŋwòə Zə̀kìy kə kə̀ twoŋə tsə dzə̂ ŋgaŋ nə̀ ŋgà muə̀ ìmùə̀ ìdzəə yiy, ù kə kwuni twoŋə tsə ŋgaŋ nə̀ ŋgà muə̀ ìmùə̀ ìzwe yiy.

⁸Yəə i də nəniy ghii, abu à də kə ndiə ù twe maʼà nəniy itswû yə̀, ù kə̀ twe maʼà dzə̂ nəway wè mbyi, ù ghii twe màʼà Zə̀kə̀ kə nyiə̀ nəniy gha nə̀ Zwàykə̀zwe kə we kiy.

⁹Ghè kâm way dzə ani twà dzày bə̀ àyiə â ghà kwùmə̀ yə̀ nə̀ ìliə yə ghà kwu nəniy ani kəli tsə awò àghè dzə̀m, aŋwòə Zə̀kìy ma tyi dè â ghà nə̀ ghà ki liə yə aghê dzə̀m.

¹⁰Ghà mə ndzə̀m dè iliə yiy awò àghě Kəzə̀ yə̀ àdzə̀m, ghu də nəniy a Màsèdonìyà. Awizə̂, ghè namə bwoʼo bə̀ kə gha nə̀ wokiy, nə̀ ghà ki tsəŋə dee yə kə iliə yiy anə ndə̀m.

¹¹Ghà kə bɛmə na dzə̀ ani maŋə bwiy bələ tsə ayiə yiy, nə̀ àghû yìy nsòŋə indzə̀m. Ghà kə kwe dzə̀ idzwə yiy anə ayiə ghè. Ghà kə zəŋi na tsə dzə̀ nə̀ ghà ki nyiə təŋə kə nə̀ à fàʼà àghè liy yiy. Ghà ki faʼa tsə soʼo nə̀ awò ghi yiy ighəd anə yiə yə ghè kə bôʼ tswù nəniy gha ate.

¹²Abu ghà zəŋə nəniy ndzòʼò àyiə yə ghii, ghà ki kəli məŋkwiʼi awò àghû yə̀ ghu də kamə kə̀ bɛmə nəway â Zə̀kìy. Ghà ki də soʼo lyimə zələ dzə̀ wày nə̀ wè lìy nyə̀ bə̀ ghà nə̀ fyiə kə ghà liə nəniy ani nyi.

¹³Awizə̂ yamə, ghè liə nə̀ ghà kəli tsə iyiə ìsoŋə̀ yə̀ i nî kwu ani fyi nə̀ àghě Kəzə̀ yə̀ ghu pfə ŋwô dzə̂, ani zəŋi tsə nə̀ ghà kə mwe dzə̀ yəə à də̀ aghû yə̀ ghu də kwu way imôʼ yìy nə̀ Zə̀kìy kî zəŋə ŋwò ayiə yə ù tɛb na nəniy.

¹⁴Ŋgà bɛmə ŋwô nə̀ Yesù Kə̀litò maa pfə, u zɛ̀mə̀ dzwoŋi kə anə ipfə. Ŋgà bɛmə sòʼò ŋwò nə̀ Zə̀kìy nî zɛ̀mə̀ kə ŋwò aghû yə̀ ghu kə pfə nəniy nə̀ ghu mə bɛmə Zə̀kìy anə yiə yə ù kə zɛ̂m kə nəniy Yesù ate.

¹⁵Ayiə yə ghè dzîy â ghà à də̀ ayiə yə Mwe ə̀ mbyi kə dê nəniy nə̀, ŋgaŋ yə ŋgà nî nam də nə̀ ŋgà kamə pfə anə sòŋə fə ù nî dzwəŋə bə̂ ate, ŋgà nî ŋwò kwoʼo dzə̀ wày idoŋ ani kway kwoʼ yə̀ we isə azoŋə àghù yə̀ ghu kə pfə nəniy nə̀ ghu mə bɛmə awò Zə̀kìy.

¹⁶I də nə̀, Zə̀kìy ni tsə̀à tsə kəlàŋ anə dzə̀ ìtâw yìy. Aghê ni zuw soʼò dzə̀ ə̀ tsə̀ndii ə̀ Kə̀zə̀ ìsòŋə̀ yìy, ghu ni twuŋ tsə isoŋ, Mwe ə̀ mbyi ni fyi tswi bə̂ soʼò nə̀ ùwee we wiy an-a-vələ, aghû yə̀ ghu pfə dzə̂ nə̀ ghu mə bɛmə Kə̀litò, ghu ni zɛmə̀ bə̂ isə.

¹⁷Ani bu ighè yə̀ tsìy ŋwò tsə, ŋgaŋ yə a nî nam də utaw, Zə̀kiy ni zəŋi tsə nə̀ ŋgà kwoʼ fwumi kə anə təmbàʼ nə̀ ghu ani zù kway yə̀ Mwe ə̀ mbyi Yesù idoŋ. Ŋgà ni də nə̀ Mwe ə̀ mbyi Yesù anə nsòŋə̀ indzə̀m.

¹⁸Yəə i də nəniy ghii, ghà kwu ani kwe fôŋ tə aghù anə dzə̀ ə̀ Mwe ə̀ mbyi.