Read Isu 1 Tèsàlonikà 5 Bible Online

1 Tèsàlonikà 5 - Isu bible

1 Tèsàlonikà 5

¹Awizə̂, mə kwu zəli dzə way ani twà dzày bə̀ â ghà soŋə fə moo tsukə fə Mwe ə̀ mbyi Yesù nì bè nəniy ate.

²Ghà kwu ŋwô nə̀ Mwe ə̀ mbyi nî màŋə̀ bvùŋə̀ bè yəə wù ùtsoŋə̀ nə̀ bvùŋə̀ bèe nə̀ ntsukə tiy.

³Soŋə fə aghê nî dzîy nəniy nə̀, “Ibvay yiy də ŋwô, a kwu dzə̀ way ani tsəŋ iyiə ìliy yiy.” Ghab kiy ni də kə̀ dwâm fyi nəway, ghu ni mâŋ kaʼ tsə kə ghii ani fii, yəə wìyəŋi nə̀ kaʼa tsə nəniy ani sə̀k wa. Aghê nî də wày ani tuu fyi dzə̀ anə ifii i ghè yə̀.

⁴Akwuni bû gha awizə̂ yamə, ghà muə dzə̀ way yəə à də̀ aghû yə̀ ghu də kwu way Zə̀kìy, à də̀ ighe, ntsuk fə ghè fə̀ nì də wǎy tàfə̀mì kə iyiə awò ghà, yəə wù nì tàfə̀mə̀ nəniy nə̀ wù ùtsoŋə̀ wìy mə bù.

⁵Gha dzə̀m, ghà də aghû yə̀ ghu zəŋə ayiə ghu yiy àdzə̀m yəə ghu zəŋə nə̀ ntsə̀ tìy nə̀ asə ə zwe ŋwò. Ŋgà muə dzə̀ way yəə à də̀ aghû yə̀ ghu zəŋə nəniy ayiə yiy anə kələm anə ayiə yə wù lìy də wày dzə ani kòʼ.

⁶Yəə i də nəniy ghii, ŋgà kə muə̀ dzə̀ yəə à də̀ aghû yə̀ ghu bvunə nəniy, ŋgà kwuni muə̀ tsə yəə à də̀ aghû yə̀ ghu də bvunə way, mòʼò yə̀ sòʼò àyiə yə a də nəniy tsitsi.

⁷Aghê bvunə nə̀ ntsukə tiy, à də̀ sòʼo nə̀ ntsukə tiy ghu muə kee kyabə tsə̂ nəniy nlwù mìy.

⁸Ŋgà kwuni də̀ aghee sə ə zwe yiy. Ibɛmə i ŋgàŋ nə̀ ìliə yə ŋgà kwu nəniy, i kwu ani dòʼò tsə awò ŋgàŋ yəə à də̀ baʼa fətsam. Imôʼ ìdzoŋə̀ yə̀ ŋgà kwu nəniy nə̀ Zə̀kìy mə bii fyi ŋgaŋ, i də yəə à də̌ ntyàŋì kə tsam.

⁹Zə̀kìy kə kə̀ sây kə dzə̂ ŋgaŋ nə̀ ŋgà ə fii anə fòŋ ə we ìŋəmə̀ yìy. Ù kə kwuni ŋgàŋ sây ani bii fyi ŋgaŋ abidzɛ̀mə̀ Mwe ə̀ mbyi ə̀ ŋgàŋ Yesù Kə̀litò.

¹⁰Kə̀litò kə pfə anə utuw ŋgàŋ, nə̀ abu ghe bû kə nə̀ ŋgà nam də̀ utaw moo nə̀ a mə pfə, ŋgà ki də ani dzəŋi mùə̀ nə̀ we anə nsòŋə indzə̀m.

¹¹Yəə i də nəniy ghii, ghà kwu ani kwe yə̀ fòŋ tə ghè liy yiy, ghà fây soʼò àghè liy yiy tə̀ ghu nɛmə yə̂ anə yiə yə ghà kaʼ dzə̂ ani zəŋə.

¹²Awizə̂, ghè bwoʼo bə̀ ghà nə̀ wo kiy nə̀ ghà ki nyiə tsə ŋkwiʼi miy awò ŋgəd tə dzəŋə kə aghě Kəzə̀ tə̀ ghu faʼà nəniy anə fwumi kəli, kyìŋə̀ ghà, nyiə̀ sòʼò ghà nə̀ ìtswù yìy ani mùə̀ tsə anə yiə yə aghê Kəzə̀ yìy kwu ani mùə̀ ate.

¹³Ghà ki nyiə tsə ghu nə̀ ŋkwiʼi miy, dè tsə sòʼò ghu nə̀ ìliə yiy bòʼ fàʼ kə̀ ghu faʼà nəniy. Ghà zəŋi tsə nə̀ ibvay yiy ki də anə fwumi kəli.

¹⁴Awizə̂, ghè bwoʼ gha nə̀ wo kiy nə̀ ghà dzây yə̂ awò àghù yə̀ ghu lay, nə̀ ghu si faʼa yə, à yuu ghu tsəŋə nəniy, ghà fây kə ghu tə̀ ghu kəli tsə fôŋ tə̀ taw tiy. Ghà fây kə soʼò àghù yə̀ ghu də taw way. Ghà ki kwee tsə fôŋ tìy nə̀ àghè dzə̀m.

¹⁵Ghà kə bɛmə na dzə̀ nə̀ wè lìy ki niy kə iyiə ìbɛbə yiy u tsə tsìy yə̀ ìbɛb ate. Ghà ki kwuni zəŋə yə ayiə àdzoŋə̀ yìy anə nsòŋə indzə̀m anə iwè nəli nə̀ awò àghè dzə̀m.

¹⁶Ghà ki taw dyoʼo,

¹⁷gwùŋə anə nsòŋə indzə̀m.

¹⁸Ghà ki nyiə yə zòŋə̀ kìy â Zə̀kìy anə ayiə dzə̀m, aŋwòə à yù də̀ ayiə yə Zə̀kìy liə nə̀ ghà ki zəŋə anə yiə yə ghà təm doʼò fwumi nəniy nə̀ Yesù Kə̀litò.

¹⁹Ghà kə zəŋi dzə̀ nə̀ Zwàykə̀zwekiy bwi ani kàm fàʼ azoŋə̀ ghà.

²⁰Ghà kə kôʼ kè dzə̌ ntwùm ə̀ Kə̀zə̀ yə̀ wè ntwùm ə̀ Kə̀zə̀ dzìy bə̂ nəniy nə̀ ì ŋwò bə̀ â Zə̀kìy.

²¹Ghà kwuni kwu ani kaw kəli fyi kə nə̀ ntwùm ì ghè yə̀ də̀ ŋwoə ìsòŋə̀ yìy ə̀. Bəə ì də nəniy ìsòŋə̀ yìy ghǎ bɛmə yə̀.

²²Ghà twe maʼà àyiə bɛbə àdzə̀m.

²³Mə gwùŋə̀ nə̀ Zə̀kə̀ kə nyiə̀ nəniy ibvay yiy, nə̀ kə zəŋi tsə iwee nəli i ki zwe. Ù zəŋi tsə sòʼò nə̀ iwe nəli idzə̀m nə̀ fòŋ təli tiy doʼò tsə nə̀ tə kwu dzə̀ way utswə̂d wìy zù kwùm anə sòŋə fə Mwe ə̀ mbyi ə̀ ŋgàŋ, Yesù Kə̀litò nì bè dzwəŋə ate.

²⁴Zə̀ kə̀ kə toŋə tsə nəniy gha nə̀ ghà doʼò àghě we, ù kì zəŋə ŋwò nə̀ ayiə yə̀ fyi àsoŋə̀ yìy aŋwòə ù taw nia tsə̀ ŋwò tɛb kə we kiy.

²⁵Awizə̂, ghà ki gwuŋə tsə soʼo anə utuw ghələ.

²⁶Ghà toŋə zuw yə̂ àghě Kəzə̀ àdzə̀m anə fòŋ ìdzoŋə̀ yìy.

²⁷Mə dzîy bə̀ awò ghà nə̀ ghà kwu ani toŋə kə ŋwàʼà kə̀ tə̀ aghee Kəzə̀ àdzə̀m zuw tsə aŋwòə à də̀ iyiə yə Mwe ə̀ mbyi Yesù liə nə̀ ghà zəŋi.

²⁸Mə gwuŋə̀ nə̀ Mwe ə̀ mbyi ə̀ ŋgàŋ, Yesù Kə̀litò ù dè ghà nə̀ fòŋə we ìdzoŋə̀ yìy.