Read Isu 2 Tèsàlonikà 1 Bible Online

2 Tèsàlonikà 1 - Isu bible

2 Tèsàlonikà 1

¹À ŋwàʼà kə̀ twà bə̀ mìə̀ Pôl. Mə də fwumi nə̀ Saylàs nə̀, Timotì. Mə twâ bə̀ awò àghě dzəŋə kə aghě Kəzə̀ yə̀ anə inaʼ i Tèsàlonikà, ghu də nəniy anə fyiə kəmòʼ nə̀ Tà, Kə̀zə̀, də̀ sòʼò anə fyiə kəmòʼ nə̀ Mwe ə̀ mbyi Yesù Kə̀litò.

²Ghè gwùŋə̀ nə̀ Tè ŋgàŋ Kə̀zə̀, we nə̀ Mwe ə̀ Mbyi ə̀ ŋgàŋ Yesù Kə̀litò dè ghà nə̀ fòŋə̀ ìdzòŋə̀ yìy, ù nyiə̀ sòʼò ghà nə̀ ìbvay yiy.

³Awizə̂ ghələ, i də nə̀ ghè kwu ani nyə̀ kə̀zòŋə̀ awò Zə̀kìy anə nsòŋə indzə̀m bòʼ ghà. I də ŋwô tsitsi â ghə̀d ani nyə̀ kə̀zòŋə̀ awò Zə̀kìy anə utuw ghii aŋwòə ibɛmə ghii yiy ŋge niyemə ŋwò. Iliə yə ghà kwu soʼo awò àghè lìy yiy, i niyemə zè isə soʼo.

⁴À yù də̀ ighe ghè kwu ighaa yiy ani dziiy yə̂ awò àghè ndaw t-a-zə̀ tiy kwùmə̀ yə̀ nə̀ ghà. Ghè dzîy yə̀ â ghu yəə ghà kwê fôŋ tìy ate, tsə̀ŋ kwu kə sòʼò ìbɛmə, də̀ ghii nə̀ ghà tsîy anə məntswə̀d, fyaʼa sòʼò nə̀ ghà bvə̂ wày.

⁵Zə̀kìy dê bə̀ nə̀ ghe saʼa tsitsi anə ntswə̀d mə̀ ghà tsîy nəniy nyiə ate. Ù liə ani zəŋi tsə sòʼò ghà nə̀ ghà kpe doʼò tsə awò we ani saʼ mùə̀ təli, à də nəniy iyiə yə ghà fyaʼa nəniy ate.

⁶Zə̀kiy nî zəŋə àyiə yə a də nəniy tsitsi. Ù nî nyə̀ mfəm awò àghù yə̀ ghu zəŋə nə̀ ghà ki fyaʼa.

⁷Zə̀kìy nî zəŋə tsə nə̀ ghà kə kâm fii dzə̀, gha yə ghà fyaʼa nəniy nyiə. Anə sòŋə fə Mwe ə̀ mbyi, Yesù nì bù nəniy an-a-byiwuŋ nə̀ tsə̀təndii t-a-zə̀ tə̀soŋə̀ tìy.

⁸Ù nì bè nə̀ uvələ wiy ani bù nyə̀ mfəm awò àghù yə̀ ghu twe maʼà nəniy Zə̀kìy nə̀ à yuu ghu twe maʼà nəniy ntwùm ə̀ ìdzòŋə̀ yə̀ kwùmə̀ yə̀ nə̀ Yesù, Mwe ə̀ mbyi ə̀ ŋgàŋ.

⁹Zə̀kìy nî nyìə̀ ndzòʼò àghù yə̀ nə̀ mfəm yə ì dòʼò təŋ nəniy. Ghu ni dzàw doʼò fyi yə̂ nə̀ Mwe ə̀ mbyi anə ayiə yə ghu də wày anə kòʼ daʼa kə we nə̀ ìmwày i we yiy.

¹⁰Ani buu ù bù nəniy, a ntsuk fə ghè fə ù nî kəli məŋkwiʼi awò àghě we yiy, u nî kəli ukali awò àghù yə̀ ghu bɛmə nəniy, ghà ni də soʼo ate aŋwòə ghà bɛmə̀ ŋwoə ntwùm ə̀ Kə̀zə̀ yə̀ ghè naʼà nəniy awò ghà.

¹¹À də̀ ighe ghè gwùŋə̀ nəniy anə utuw ghii nsòŋə indzə̀m. Ghè dziy nə̀ Zə̀kìy zəŋi tsə gha, ghà muə̀ tsə ndzòʼò ìmùə̀ yə̀ ù kə sây nəniy gha nə̀ ghà mùə̀. Ghè gwùŋə̀ nə̀ Zə̀kìy nyiə̀ ghà nə̀ daʼa kiy ani zəŋi ayiə àdzoŋə̀ anə ibɛmə yə ghà kwu awò we.

¹²Abu ghà fâʼ nəniy ghii, ghà ki də ani zəŋi tə̀ aghê nyiə̀ ùkali awò Yesù. Yesù kî zəŋi tsə sòʼò nə̀ aghê nyiə̀ soʼò ghà nə̀ ŋkwiʼi miy. I kî fyiə ghii bòʼ fòŋə̀ ìdzòŋə̀ yə̀ Zə̀kìy dê awò ŋgàŋ we nə̀ Mwe ə̀ mbyi ŋgàŋ, Yesù Kə̀litò.