Read Isu 2 Tèsàlonikà 2 Bible Online

2 Tèsàlonikà 2 - Isu bible

2 Tèsàlonikà 2

¹Awizə̂ yamə, ghè liə ani dzày bə̀ ìyiə ìliy yiy â ghà kwùmə̀ yə̀ nə̀ soŋə fə Mwe ə̀ Mbyi ə̀ ŋgàŋ Yesù Kə̀litò nì bè dzwəŋə nəniy ate, nə̀ àyiə yə ù nì dzəŋə nia bə̂ ŋgaŋ ə dzə̀m nə̀ ŋgà doʼò nə̀ we. Ghè bwoʼ gha nə̀ wokiy nə̀,

²ghà kə fwəd dzə̀ anə mòʼ təli, ghà kə kəli dzə̀ ìtsəŋ ìliy yiy anə ayiə àguw yə aghê liy dzîy nə̀ ntsuk fə Mwe ə̀ mbyi kwu ani bù ate fə maa bù tsìy. Ghà kə bɛmə dzə̀ ayiə ghu à dzîy yiy. Bəə ghu dzîy kə nə̀ à dzày bə̀ Zwàykə̀zwekiy â ghu, moo ghu zuw awò wù lìy wìy nə̀ à kə dzày ghə̀d, moo ghu toŋə kòʼ anə ŋwàʼà kə̀ liy kiy ghè kə twâ na nəniy.

³Kəə wù lìy nì nɛbə gha anə dzə̀d ìlìy, aŋwòə soŋə fiy kî kpe tsə ŋwò, ndə̀mə̀ àghù ki twe maʼà ani zuw â Zə̀kìy. Â ntsuk fə ghè fə̀ ani bù, ani də soʼo nə̀ aghè mə̀ kaʼ ani kòʼ wù wə̀ ù ndzə̀m twe maʼà təŋ ani zuw awò Zə̀kìy. Wù ù ghè wə̀ də̌ wù wə̀ Zə̀kìy nî byɛbə myaʼà.

⁴Ani buu ù nì bù nəniy, ù ni kwoʼo uwee wiy, ù nî twe màʼà sòʼò ùfyiə wə̀ ùdzə̀m aghee tyoŋə nə̀ à də̀ Kəzə̀ moo fə̀zə̌, Ù twe màʼà sòʼò ufyiə ùzwe wə̀ ghu fwùlə̀ nəniy Zə̀kìy ate. Ù nî dyaŋi zù zìy na fyi yə̀ ifwe a ndàw Kə̀zə̀, ù ni bwoʼo idzwə yiy nə̀ ghe də Kəzə̀.

⁵Ghà kamə̀ myìŋə̀ wày nə̀ à yù də̀ ayiə yə mə kə dzây nəniy awò ghà anə sòŋə fə mə kə də nəniy nə̀ ghà yə̀?

⁶Ghà mbaŋ kwu ŋwô fyiə kə kə kwi na nəniy wù ù bɛbə̀ wə̀ nə̀ ù kə kam bù dzə̀ nyiə. Ù nì bè kə anə soŋə fə̀ Zə̀kìy sây na nəniy nə̀ ù bù ate.

⁷Satàn nè fàʼà kə itəŋ itə̀ŋ ani zəŋə nə̀ ndə̀mə̀ àghè ki zəŋə ayiə àbɛbə yiy. Àni may kə nə̀ Zə̀kìy mə nìy ŋwǒ wù wə̀ ù fè na nəniy dzəd nə̀ Satàn kə fâʼ dzə̀ anə ayiə yə ù liə.

⁸Aghê ni dyaŋi kôʼ wù ùbɛbə̀ ù ghè wə̀. Ani bu Mwe ə̀ mbyi Yesù nì kwuni bû, ù nî wiy màʼà wù ùbɛbə̀ ùghè wə̀. Ù nì fɛbə fyiə bə̀ tə̀ zuub anə idzwə ani wiy màʼà we. Ù byebi màʼà sòʼò we anə imwày ìsoŋə̀ yə̀ ù kwù nəniy.

⁹Wù ùbɛbə̀ wə̀ nì bè nə̀ daʼa kə Satàn kìy. Ù ni zəŋə mali tə yiə tə̀ guw tiy nə̀ àyiə àzwumə idzwə àguw yiy.

¹⁰Ù nì be nɛbə àghù yə̀ ghu kwu ani zù pfə anə uvə̀lə̀. Ghu nî pfə aŋwòə ghu kə twe màʼà ŋwò ani liə iyiə ìsoŋə̀ yə̀ i də nəniy ani fày fyi ghu.

¹¹Yəə i də nəniy ghii, Zə̀kìy kî nia tsə ghu nə̀ ghu kəli tsə fôŋ tə̀ swəə tiy anə ayiə àguw yiy, tə̀ ghu ki zəaŋì bɛmə yə̂ ayiə àguw yiy. Ghu ki bɛmə yə̂ soʼò àyiə àguw ghè yə̀.

¹²Zə̀kìy nî nyiə̀ àghù yə̀ nə̀ mfəm ghu twe maʼà ani bɛmə iyiə ìsoŋə̀ yə̀ kwuni liə ani zəŋə ayiə àbɛbə yiy.

¹³Awizə̂ yamə, Mwe ə̀ Mbyi Yesù dzə̂m ŋge liə ŋwô gha. Ghè kwu ani nyə̀ zòŋə̀ k-a-zə̀ anə iliə yə Zə̀kìy kwu nəniy azoŋə̀ ghà. Zə̀kìy kə sày ghà nə̀ ghà doʼò tsə aghee səsə yiy â ìghe ani bii fyi anə daʼa kə Zwàykə̀zwekiy ani zəŋi tsə nə̀ ghà doʼò tsə aghê zwe yiy, zəŋi tsə sòʼò nə̀ ghà bɛmə yə̂ ìyiə yə i də nəniy ìsoŋə̀ yìy.

¹⁴Zə̀kìy kə fàʼ abidzəmə̀ ntwum yə ghè kə naʼà â ghà ani nìy bə̀ ghà tə̀ ghà bû kəli soʼò ìkwum i Mwe ə̀ Mbyi ə̀ ŋgàŋ Yesù Kə̀litò.

¹⁵Awizə̂ yamə, à yù də̀ ighe ghà kwu ani təmi taw tsə anə ibɛmə ghi â Zə̀kìy. Ghà ki dzwumə yəə ayiə yə ghè kə tyi dê nəniy â ghà anə sòŋə fə ghè kə də nəniy nə̀ ghà, nə̀ à yuu ghè kə tyi dê anə uŋwàʼà wə̀ ghè kə twâ nyə̀ bə̂ nəniy â ghà.

¹⁶Tè ŋgàŋ, Kə̀zə̀, ù liə ŋwô ŋgaŋ. Ù dè ŋgàŋ nə̀ fòŋ ə̀ we ìdzòŋə̀ yìy, ù mə zəŋi nə̀ ŋgà ki taw dzwabə, kwu sòʼò fôŋ tə̀ taw tiy anə nsòŋə indzə̀m. Ù mə nyiə̀ sòʼò ŋgàŋ nə̀ ìmòʼ ìdzoŋə̀ yìy anə imùə̀ yə̀ ù kə tɛb na nəniy â ŋgàŋ. Ghè gwuŋə̀ nə̀ tè ŋgàŋ, Kə̀zə̀,

¹⁷ù kwe bə̀ fòŋ təli, ù fày sòʼò ghà nsòŋi dzə̀m tə̀ ghà ki zəŋə, dzìy sòʼò àyiə yə a də nəniy àdzoŋə̀ yìy. Ghè gwuŋə̀ sòʼò nə̀ Mwe ə̀ Mbyi ə̀ ŋgàŋ, Yesù Kə̀litò ù fàʼ ìmoʼo yiy nə̀ ghà.