Read Isu 2 Tèsàlonikà 3 Bible Online

2 Tèsàlonikà 3 - Isu bible

2 Tèsàlonikà 3

¹Ani dzày kəd tsə awizə̂, kə̀lə tsə nə̂ ghà, ghà ki gwuŋə tsə anə utuw ghələ, nə̀ ntwùm ə̀ Mwe ə̀ mbyi ki mbabə zee nə̀ səkiy ani zəŋi tsə nə̀ aghê liy yiy ki zuw soʼò ighəd anə yiə yə ghà kə zuw nəniy ate.

²Ghà ki gwuŋə tsə soʼo nə̀ Zə̀kìy nîy ŋwô fyi ghəd anə wo kə ghè bɛbə nə̀ anə wo kə ghù yə̀ ghu dzîy nəniy ayiə àbɛbə yiy azoŋə̀ ghə̀d. Aŋwòə à wày dzə aghê dzə̀m ghu bɛmə nəniy ntwùm ə̀ ìghè yə̀.

³Ghà kwuni zoʼo na yə̂ kə tə̀fòŋ azoŋə̀ Mwe ə̀ mbyi, aŋwòə ù fàʼà təŋə tsə̀ àyiə yə àdzə̀m ù kə tɛb na nəniy. Ù kì nyə̀ ghà nə̀ daʼa kiy, ù zəŋi tsə sòʼò nə̀ wù ùbɛbə̀ wə̀ kə zəŋi sòʼò gha nə̀ ìbɛb yiy.

⁴Mwe ə̀ mbyi mə zəŋi nə̀ ghè kəli tsə nə̀ ghà zəŋə ŋwò ayiə yə ghè kə tyi dê nəniy â ghà, zəŋi tsə sòʼò nə̀ ghè kəli tsə nə̀ ghà kî tsìy yə̀ kə nə̀ sə kiy ani zəŋi ayiə ghè yə̀.

⁵Mə gwùŋə̀ nə̀ Mwe ə̀ mbyi Yesù zəŋi tsə nə̀ ghà kəli tsə ndzòʼò ìliə yə Zə̀kìy kwu nəniy azoŋə̀ ghà. Ù dè sòʼò ghà nə̀ dzəd yə ghà də ani kwee soʼo fôŋ tìy ate anə ayiə yə Kə̀litò kə kwù nəniy fòŋ ate.

⁶Awizə̂ ghələ, ghè səŋə̀ kə̀tswuŋi â ghà anə daʼa kə Mwe ə̀ mbyi ə̀ ŋgàŋ Yesù Kə̀litò nyiə̀ na nəniy awò ghə̀d, nə̀ ghà kə doʼò fwumi dzə̀ nə̀ wù wə̀ ù twe nəniy ani fàʼ nə̀ ù mə bɛmə Zə̀kìy, twe sòʼò ani zuw itswû yə̀ ghè tswû nəniy gha ate.

⁷Gha ndzə̀m kwu dzwàb ŋwô nə̀ ghà kwu ani zəŋi ayiə yə ghè kə zəŋə. Ghè kə lay dzə wày yə ghè kə də fwumi nə̀ ghà.

⁸Ghè kə kə̀ nyi dzə̂ ufânyiə wiy â wù, dòʼò yə̀ kə̀ tsə nəway we. Ghè kə fàʼ nə̀ daʼa kiy, nə̀ ntsə̀ tìy, nə̀ ntsukə tiy aŋwòə ghè kə liə dzə̀ way nə̀ wè lìy tsə nyə̀ fyiə kələ kə̀liy kiy.

⁹Ghè kə tsəb kwu ŋwô daʼa kiy ani dzày nə̀ ghà fyi ghəd, ghě kə̀ kwuni dzây dzə̂ aŋwòə ghè kə liə ani dè tsə gha nə̀ tsəe kə ghà kwu nəniy ani dzwùmì.

¹⁰Yəə ghè kə də tsə nə̀ ghà, ghè kə dzìy tsə̀ â ghà nə̀, “Wù wə̀ ù twe nəniy ani fàʼ, kəə ghu nì byemə nə̀ ù nyi soʼò.”

¹¹Ghè ayiə yə ghii dzìy aŋwòə ghè zuw nə̀ aghê liy yiy də anə fwumi kəli ghu muə imuə ì lay yiy, twe ani fàʼ fyiə kə̀liy kiy anə iwè i ghu, kwuni màŋə zè tà nyiə anə ayiə ghè.

¹²Ghè kwâ bə̀ ndzòʼò àghù yə̀ ghu muə nəniy imuə̀ ìlay yiy, nə̀ ghu muə̀ tsə imuə̀ yə̀ ghu kwu nəniy ani mùə̀ bòʼ Mwe ə̀ mbyi ə̀ ŋgàŋ Yesù Kə̀litò, fàʼà yə̀ sòʼò kə ghu kə̀ nyiə kiy.

¹³Awizə̂ yamə, a kwuni bû gha, ghà kə bwi dzə̀ ani fàʼ àyiə yə a də àdzoŋə̀ yìy.

¹⁴Bəə wù twe ani zuw itswû yə̀ ghè twâ bə̂ â ghà anə ŋwàʼà kə̀, ghǎ tsə̀lì na tsə wù ùghè wə̀. Kəə ghǎ nì dyoʼò fwumə nəniy nə̀ ndzòʼò àghě ghè yə̀ ani zəŋi tsə nə̀ utuw də̂d tsə ghu anə ndzòʼò àyiə ghè yə̀.

¹⁵Kəə ghǎ nì kwuni zəŋə dzəə nə̀ we yəə à də̀ wù wə̀ ghà bâ nəniy, ghà ki kwuni dzəŋə tsə nə̀ we yəə à də̌ àzə̀ ghəli wə ù bɛmə nəniy Zə̀kìy.

¹⁶Mə gwùŋə̀ nə̀ Zə̀kə̀, kə nyiə̀ nəniy ibvay yiy, nə̀ ù nyìə̀ ghà nə̀ ìbvay yiy anə nsòŋə indzə̀m, nə̀ anə dzə̀lə tədzə̀m. Mwe ə̀ mbyi Yesù doʼò nə̀ ghà dzə̀m.

¹⁷À ìtoŋə zuw yə̀ à twà tsə miə nə̀ wo kam kiy nə̀, “Miə Pôl, mə twoŋə zuw bə̀ ghà.” À yù də̀ yəə mə twâ nəniy ayiə yiy ate, à yù də̀ kətsəe kə mə kwee tsə̂ anə uŋwàʼà wam.

¹⁸Mə gwùŋə nə̀ Mwe ə̀ mbyi ə ŋgàŋ Yesù Kə̀litò dè ghà nə̀ fòŋə̀ ìdzòŋə̀ yìy.