Read Isu 1 Timotì 2 Bible Online

1 Timotì 2 - Isu bible

1 Timotì 2

¹Iyiə isəsə yə mə liə nə̀ ghà zəŋi, à də̌ nə̀ ghà ki gwuŋə yə anə utuw ghè dzə̀m. Ghà gwuŋì yə̂ â Zə̀kìy nə̀ ù fày kə aghê àdzə̀m, ù lwì tsə sòʼò ghu. Ghà gwuŋì tsə nə̀ Zə̀kìy nyiə̀ ghà nə̀ ùfyiə wə ghà laʼà nəniy. Ghà nyiə̀ yə̂ soʼò kə̀zòŋə̀ â Zə̀kìy yəə ghà liə nəniy ghu ate.

²Ghà ki gwuŋə yə̂ â Zə̀kìy anə utuw udòŋ nə̀ aghù yə̀ ghu də nəniy anə ubwòʼ u fàʼ ùnê wìy ani zəŋi tsə nə̀ ŋgà ki muə anə ibvay nə̀ utswə̂d ùliy wiy way. Ŋgà ki də soʼo ani kəli ndzòʼò ùmwamə wə Zə̀kìy liə, nyə̀ sòʼò mə̀ŋkwiʼi â Zə̀kìy anə dzələ tədzə̀m.

³Ndzòʼò ìgwùŋì yə̀ à də̀ igwuŋì ìdzoŋə̀ yə̀, i zəŋə nə̀ fòŋə̀ Zə̀kə̀ kə bii fyi nəniy ŋgaŋ ki dzwabə.

⁴Zə̀kìy liə ani bii fyi aghê àdzə̀m, ghu kəli tsə soʼò àyiə yə a də nəniy àsoŋə̀ yìy.

⁵Zə̀kìy də kə kə̀mòʼ, wù də̀ sòʼo ùmòʼ ù nìy təmə nia dzəŋə bə̂ aghee mbyi yiy nə̀ Zə̀kìy. Wù ù ghè wə̀ də Yesù Kə̀litò.

⁶Ù kə nyə̀ yə̀ ùwee ani pfə anə utuw u ghè dzə̀m ani fày ŋwò fyi bə̀ ghu anə mfəm yə ghu kə kwu nəniy ani kəli. Yesù kə pfə anə sòŋə fə Zə̀kìy kə kôʼ tsə nə̀ à də̌ fə̀dzoŋə̀ fìy awò we ani bii fyi aghê àdzə̀m.

⁷À yù də̀ ighè Zə̀kìy sây kə nəniy miə nə̀ mə doʼò wè ntwùm ə̀ Yesù Kə̀litò, mə doʼò tsə soʼò àtyidè awò àghù yə̀ ghu də way aghee Dzû. Mə naʼà yə̂ ntwùm ìsòŋə̀ yə̀ kwùmə̀ yə̀ nə̀ Yesù. Mə guw dzə̀ wày gha, mə ndzəmə̀ dzìy ŋwò.

⁸Yəə i də nəniy ghii, abu ghè bû anə kədzəŋə ani bù fwùlì Kə̀zə̀, mə liə nə̀ iŋə̀mə̀ ki gwuŋə. À kwu ani də iŋə̀mə̀ yə̀ ghu muə nəniy muə̀ tə̀ tə də nəniy tsitsi anə sə k-a-zə̀. Bəə ghu gwuŋə̀ nəniy ghu na fyi kə awo àzwe yiy idoŋ[1], ghu kwu dzə̀ way ani də nə̀ fòŋ tə̀ ŋəmə tiy moo nə̀ ghu zwaʼà nə̀ àghè àliy yiy. Ghu kə sə̂m dzə̀ nə̀ Zə̀kìy kî zuw ŋwò igwuŋi ghu yiy.

⁹Mə liə sòʼo nə̀ iyəŋi dzə̀m ki dzəŋə kə ndzwu tə̀ dzoŋə̀ tìy. Ghu kə dzəŋì dzə̀ ndzwu tə tə ŋge dê nəniy ubə̂d u iwè u ghu ùliy wiy abee, ghu kə dzəŋì sòʼo ndzwu tə tə də ani nyiə̀ àghù nə̀ tuw kə̀ dələ kiy azoŋə̀ ghu. I yəŋi kə byiə dzə̌ ndzòʼò ùtuw wə ghu ŋge kwe nəniy ufoŋ wiy ate. Ghu kə dzəŋì dzə̀ ùfyiə ùmwa wə ghu zəŋi nəniy anə ivən ì taw yiy, moo atay mwaa yiy, moo ndzwu tə ivən ìtaw tiy.

¹⁰Iyəŋi kwuni kwu ani dee yə̀ umwamə ù dzòŋə̀ wìy aŋwòə à yù də̀ fyiə kə kə kî ndzə̀mə̀ dè bə̂ nəniy idzwâb i ghu yiy.

¹¹Abu ghu zû nəniy ani zù fwùlì Kə̀zə̀, iyəŋi bvami dòʼò tsə kə moŋ[2] ghu bvami tsə soʼò iwee a təŋə̀ àghù yə̀ ghu də nəniy utuw wiy awò ghu.

¹²Mə kə̀ bɛmə dzə̂ nə̀ iyəŋi ki tyi dê moo nə̀ ghu kwu kədaʼa azoŋə̀ iŋə̀mə̀. Iyəŋi kwu ani dòʼò tsə kə moŋ abu iŋə̀mə̀ tyi dê àyiə yiy.

¹³Mə ghi dzîy aŋwòə Zə̀kìy kə bwam kə Adàm isə, dyaŋi bwam kə Îf.

¹⁴Satàn kə kə̀ nɛb dzə̂ nəway Adàm, ù kə nɛb Îf, Îf ə zuw yə̀ â we, zəŋi tsə ibɛb.

¹⁵Zə̀kìy nî kwuni bii fyiə ŋwò iyəŋi yə ghu byikə nəniy awa yiy. Ù nì kwuni bii fyiə ghu abu ghu zû kə nə̀ sə kiy ani kəli tsə ibɛmə awò we, nə̀ abu ghu zû kə nə̀ səkiy ani dè ìliə awò àghù yìy. Ghu kwu ani tsəŋ muə kə muə̀ tə̀ zwe tiy, zəŋə yə̀ àyiə yə a də nəniy tsitsi.