Read Isu 1 Timotì 3 Bible Online

1 Timotì 3 - Isu bible

1 Timotì 3

¹Abu wù kwu nəniy ighaa yiy ani dòʼò kə̀tuw a ndàw kə̀dzəŋə, i dè tsə nə̀ ù mə sày ani fàʼ fàʼ kə̀ kə kwu nəniy ŋkwiʼi miy.

²Wù wə̀ ù də nəniy tuw kiy anə dzəŋə kə aghě Kəzə̀, ù kwu ani muə ìmùə̀ ìdzoŋə̀ yìy anə ayiə yə wè liy də wày ani dzày ìyiə ì bɛbə yiy kwùmə̀ yə̀ nə̀ we, ù kwu ani kəli tsə kə wiy umòʼ, ù kwu ani kwi tsə uwee ani ayiə we àzəŋə yiy. Ù kwu ani saʼa dzwabə tsə ayiə yiy. Ù kwu ani də wù wə̀ aghê nyiə̀ nəniy we nə̀ ŋkwiʼi miy. Ù kwu ani ŋgwamə nia aghû yə̀ ghu bwîy bè nəniy a ndàw we. Ù kwu ani tyi dè dzwàb àyiə awò àghù yìy.

³Ù wày dzə ani də wù wə̀ ù muə kee nəniy nlwù mìy, ù kə doʼò dzə̌ wù wə̀ ù zə̀àŋə̀ ŋə̀mə̀ nəniy nə̀ fòŋ ŋwà sòʼò nə̀ àghû yìy. Ù kwuni kwu ani də wù wə̀ ù zoŋə zəŋə nəniy, zəŋə sòʼò nə̀ ibvay yiy ki də. Ù kə doʼò dzə̌ wù wə̀ ù ŋge kwu nəniy asə ə ukhiy wiy.

⁴Ù kwu ani də wù wə̀ ù də nəniy ani yèmì dzwàb anə isəd i ndaw i we. Ù zəŋə tsə nə̀ awa we ki bvamə tsə iwe ighu yiy, nyìə̀ sòʼò we nə̀ ŋkwiʼi miy anə ayiə dzə̀m.

⁵Abu ù də wày ani yèmì anə isə i ndaw i we, ù də̌ mə̀yə ani yèmì azoŋə̀ àghě Kəzə̀ yìy ə?

⁶Ù kwu ani də wù wə̀ ù nɛmə dzə̂ anə ibɛmə i we awò Zə̀kìy. Ani zəŋi tsə nə̀ ù kə kəli dzə̀ uwee ù kwoʼo wiy, Zə̀kìy fə̂ nə saʼ wiy we anə yiə yə ù saʼ wiy dzə̂ Satàn.

⁷Ù kwu ani dòʼò tsə anə ayiə yə̀ aghû yə̀ ghu də kamə bɛmə nəway Zə̀kìy, ghu də ani dzày nə̀ ù də̌ wù ùdzòŋə̀ wìy. Tə̀ wè lìy ki də wày ani dzày ìyiə ìliy ani də̀d màʼà tuw kə we, ani zəŋi tsə nə̀ àmbvə̂ntsə ki də wày ani bè kwi we.

⁸Aghû yə̀ ghu kpe ani fày a ndàw Kə̀zə̀, ghu kwu ani də aghû yə̀ aghê nyiə̀ nəniy ghu nə̀ ŋkwiʼi miy. Ayiə ghu à dzii yiy kwu ani də àsoŋə̀ yìy, ghu kwu dzə̀ way ani ŋge muə nlwù mə̀ taw mìy. Ghu kwu dzə̀ way ani dùw nə̀ isə yiy anə ayiə ukhiy.

⁹Ghu kwu ani də aghû yə̀ ghu bɛmə nəniy ayiə yə Zə̀kìy dê na kwùmə̀ yə̀ Kə̀litò nə̀ fòŋ tə ghu tiy tədzə̀m. Ghu kwu sòʼo ani nìy tsə iyɛmì nə̀ ghu kə zəŋi dzə̀ ìyiə ìbɛbə yiy.

¹⁰Aghee Kəzə̀ yìy kwu ani mwàmkòʼ tsə dzə̀ nə̀ ghu kpe kə ŋwò ani dòʼò tsə aghee kəfàʼ yə̀, abu ghu kôʼ tsə dzə̂ nə̀ ghu kwu way gə̂ŋ kə udzə kiy anə iwè, ghu fàʼ yə̀ kə ŋwò.

¹¹Aghiy ghu yiy kwu ani də aghû yə̀ aghê nyiə̀ nəniy ghu nə̀ ŋkwiʼi miy, ghu kə doʼò dzə̀ aghû yə̀ ghu dzî nəniy ayiə àbɛbə yiy azoŋə̀ àghè liy yiy, ghu kwu sòʼò ani kwi tsə iwe ighu anə ayiə ghu à zəŋə. Ghu kwu ani zəŋə ayiə yiy anə ayiə yə aghê də ani gaʼ na təfôŋ azoŋə̀ ghu.

¹²Wù wə̀ ù kpe ani fày a ndàw kə̀dzəŋə, ù kwu ani kəli tsə kə wiy umòʼ, ù ki də soʼo ani nìy dzwàb ìyèmì azoŋə̀ àwa we yiy nə̀ awa yə ghu də anə isəd i ndaw i we.

¹³Bəə aghee kə fàʼ yìy faʼà dzwàbə̀ nəniy a ndàw kə̀dzəŋə, aghê ki nyiə̀ ghu nə̀ ŋkwiʼi miy. I ki zəŋi tsə nə̀ ghu təmi taw tsə anə ibɛmə i ghu azoŋə̀ Yesù Kə̀litò ghu ki kəli tsə fôŋ tə̀ taw tiy ani dzày àyiə kwùmə̀ yə̀ nə̀ ìbɛmə yə ghu kwu nəniy azoŋə̀ Yesù.

¹⁴Yəə mə twâ bə̂ nəniy ŋwàʼà kə̀, mə zəŋi na fòŋ yam nə̀ mə kî kwùlə̀ bè kòʼò ŋwò wô.

¹⁵Abu mə fə̂d nəniy ikwe yiy, ŋwàʼà kə̀ kî fày nə̀ wò kəli tsə yəə aghee isəd i ndàw Kə̀zə̀ yìy kwu ani mùə̀ ate. Isəd i ndaw i ghè yə̀ də̌ ndàw Zə̀kə̀ kə muə nəniy. I də nəniy yəə à də̀ kənyə̀lə də̀ sòʼò yəə à də̀ tsə kə ndaw kə kə twâm kəli nəniy ntwùm ìsòŋə̀ yìy.

¹⁶Ayiə yə Zə̀kìy dê nəniy awò ŋgàŋ kwùmə yə̀ nə̀ Yesù Kə̀litò à ŋge də̀ ayiə àsoŋə̀ yìy, wè lìy wày dzə ani twe màʼà. Ghu kə byi bə̀ Kə̀litò anə uwè u wû mbyi, Zwàykə̀zwekiy dè bə̀ nə̀ ù də̀ tsitsi. Tsə̀təndii t-a-zə̀ tìy kòʼ we. Aghee tyi dè àyiə kwumə̀ yə̀ nə̀ we anə nàʼà tə̀ aghê kə də kwu way Zə̀kìy ate Ndə̀mə̀ aghee mbyi bɛmə sòʼò â we, Zə̀kǐy nìy kwoʼ kə sòʼò we an-a-vələ nə̀ ŋkwiʼi miy idzə̀m.