Read Isu 1 Timotì 4 Bible Online

1 Timotì 4 - Isu bible

1 Timotì 4

¹Zwàykə̀zwekiy mə dzày fyi te bə̀ awò ghə̀d nə̀ anə ntsukə mə̀ ìbàmə̀, aghê liy ni də kàm kwu way ibɛmə yiy awò Yesù. Ghu ni zuw yəə awò nsìy mə̀bɛbə̀ mìy, dzwùmə̀ yə̀ àyiə àtyi dee àguw yiy toŋə ayiə yə̀ nsìy mə̀ bɛbə mìy liə.

²Dzòʼò ìtyi dè ighè yə̀ bè abidzəmə̀ àghù yə̀ ghu ŋwamə zəŋə, guw sòʼò. Môʼ tə ghu tiy pfə dòʼò ŋwò.

³Nə̀ àtyi dè àguw yə̀ dzìy nə̀ i dzwabə̀ dzə̀ wày ani nìy wiy moo nìy ŋəm. Ghu tyi dè sòʼò nə̀ aghê kə nyi dzə̌ ndzòʼò mfànyiə mə̀lìy mìy. Zə̀kìy kə kwuni zəŋi na məmfànyiə nə̀ aghê nyi. Aghû yə̀ ghu bɛmə nəniy Kə̀litò, kwu sòʼò iyiə yə i də nəniy ìsoŋə̀ yìy, ghu kwu ani nyə̀ tsə dzə̀ zòŋə̀ k-a-zə̀ abu ghu dziy nyi.

⁴Ufyiə wə ùdzə̀m, Zə̀kìy zəŋi na nəniy, u dzwabə̀ ŋwò, kə̀li kiy way dzə ate a kwu ani twe màʼà. Yəə i də nəniy ghii abu wù liə ani nyi kə fyiə, u nyiə̀ tsə kəzòŋə̀ ate â Zə̀kìy.

⁵Ŋgà kə twe dzə̀ ufânyiə wiy aŋwòə dzə̀ ə̀ Kəzə̀ nə̀ ìgwùŋì yìy, zəŋə tsə nə̀ ufyiə u ghè wə̀ ə dòʼò tsə ùdzòŋə̀ wìy.

⁶Wò kwu ani tyi dè yə̀ àyiə yə mə dzây nəniy â wò, awò àghè liy yə ghu bɛmə nəniy Zə̀kìy, tə̀ wò ki də wè kə̀fàʼ ə Yesù Kə̀litò ùdzòŋə̀ wìy. Wò kwu ani ndəmi tsə uwee ani zwiʼi kəli fyi dzwàb kə ayiə àsoŋə̀ yə̀ a də nəniy anə dzə̀ Kə̀zə̀ yə̀ ì zəŋə nəniy nə̀ aghee kəli tsə ibɛmə awò Zə̀kìy, nə̀ ìtyi dè ìdzoŋə̀ yə̀ wò dzwùmì nəniy.

⁷Kə̀ na dzə̀ ìsə yiy anə nzə̀zə̌ mə ìn də kwu dzə̀ way iyiə ìliy yiy ani fày wò anə ìmùə̀ yiə̀ nə̀ Zə̀kìy. Wò kwu ani ndəmi tsə uwee ani kòʼ tsə nə̀ wò mùə̀ ŋwô anə ayiə yə Zə̀kìy liə.

⁸Idzwabə̀ ŋwò â wù ani nyəŋ kyabi moo bwad kəbə̀lə ani byay na tsə uwee u we nə̀ u ki taw dzwabə, I kî fìy ŋwòə we anə kə̀mə̀ fə fəsòŋə. I kwuni dzwàb tsìy fyi â wù ani byay tsə uwe ani mùə̀ tsə anə yiə yə Zə̀kìy liə nəniy, i kî ŋge fìy ŋwòə we anə ayiə dzə̀m. Wù ù ghè wə̀ kì kwu ani mùə̀ ndzòʼò ìmùə̀ yə̀ Zə̀kìy tɛb na nəniy anə imùə̀ yə̀ ŋgà muə nəniy nyiə moo anə imùə̀ yə̀ i də nəniy isə.

⁹Ayiə yə mə dzîy nəniy nyiə, bɛmə kə nə̀ ayiə yə̀ də̌ àsoŋə̀ yìy. Wò kəli tsə nə̀ a də àsoŋə̀ yìy.

¹⁰Ghè ghi də̀mə̀, fàʼà sòʼò nə̀ daʼakiy aŋwòə ghè gaʼ na fôŋ tələ azoŋə̀ Zə̀kə̀ kə muə nəniy, ù də soʼo wù wə̀ ù fày fyi nəniy aghê àdzə̀m. À ba də̌ à yuu ghu kwu ibɛmə yiy â we.

¹¹Wò kwu ani tyi dè yə̀ àyiə yə awò aghè dzə̀m nə̀ ghu ki zəŋə yə ayiə yə wò dzìy nəniy.

¹²Kə̀ bɛmə dzə̀ nə̀ wè lìy kòʼ kè wò aŋwòə wò də̌ wà fə̀ghàŋ. Kwuni dòʼo tsə tsəe kiy awò àghù yə̀ ghu bɛmə nəniy Kə̀litò anə ayiə yiə̀ àdziy yiy, nə̀ ayiə yiə̀ àzəŋə yiy, nə̀ iliə yə wò kwu azoŋə ghu, nə̀ ìbɛmə yə wò kwu awò Zə̀kìy, nə̀ yəə wò fàʼà təŋə kə ayiə yə a dê nəniy nə̀ wò də̌ wù ù zwê wìy.

¹³I tsəŋ kwu kə ani tyoŋə fyiə kə ŋwàʼà k-a-zə̀ kìy awò àghù yìy, tyi dè yə̀ â ghu anə ayiə yə ghu də ani zuw kəli tsə, ghu zəŋi yə̂ soʼò àyiə yə ntwùm ə̀ Kə̀litò dzìy nəniy.

¹⁴Kə̀ bwi na dzə̀ ani fàʼ anə namə kə Zə̀kìy kə nyiə̀ nəniy â wò anə sòŋə fə aghee kə dzây tsə ayiə yə Zə̀kìy kə dzây kwùmə̀ bə̀ nə̀ wò, ŋgəd tə dzəŋə kə aghě Kəzə̀ yǐy gaʼ tsə awò azoŋə̀ wò, lwì tsə̀ wô.

¹⁵Ndəmi tsə uwee wiy ani zəŋə yəə ayiə ghè yə̀ mə dzây tsə nəniy. I zəŋə yə ayiə ghè yə̀ nsòŋə indzə̀m tə̀ aghee dzə̀mə̀ ki də ani kòʼ yəə wò niɛmə yə̂ nəniy ate anə imùə̀ yiə̀.

¹⁶Nǐy tsə iyɛmì yìy anə imùə̀ yiə̀, wò nîy tsə soʼò ìyèmì anə ayiə yə wò tyi dê nəniy. I tsəŋ kwu kə ani zəŋi yə̀ àyiə yə mə dzây nəniy â wò. Abu wò zəŋi nəniy ghii, Zə̀kìy ki bii fyi wô, kə bii fyi soʼò àghù yə̀ ghu zuw nəniy ayiə yiə̀ àdziy yiy.