Read Isu 1 Timotì 5 Bible Online

1 Timotì 5 - Isu bible

1 Timotì 5

¹A Timotì, kə̀ i taw dzə nə̀ dzə̀ azoŋə̀ wù wə̀ ù nɛmə tsîy fyi nəniy wô. I kwunə dzəŋə yə ayiə yiy â we anə yiə yə wò kwu ani dzəŋə ate nə̀ təli yiə̀. I dzəŋə yəə soʼo nə̀ àwa fəghàŋ yìy anə yiə wò kwu ani dzəŋə ate nə̀ àwizə̂ yiə̀ iŋə̀mə̀.

²I dzəŋə yəə nə̀ iyəŋi yə ghu nɛmə tsîy fyi nəniy wô anə yiə yə wò kwu anə dzə̀ŋi nə̀ zə̂ yiə̀, dzə̀ŋə̀ yə̀ sòʼò nə̀ àwa fəghàŋ iyəŋi yəə ghu də awizə̂ yiə̀. I zəŋə yə ghii nə̀ fòŋ yiə̀ ìzwê yìy.

³I nyiə yəə ŋkwiʼi miy awò iyəŋi mpfəsə yə ghu də kwu way aghê liy anə isəd i ndaw i ghu, ghu də utaw yəə ghu nə fây ghu. I nyiə yəə ifây yìy â ghu anə fyiə kə ghu laʼà nəniy.

⁴Abu yəŋə̀ mpfənsə kwuni kwu nəniy awa yiy moo awiwa, awa ghè yə̀ kwu ani kaʼ tsə dzə̀ isə ani yèmì azoŋə̀ àghè isəd i ndaw i ghu yiy anə ayiə yə nə̀ təli ghu yiy kə nîy nəniy iyemì azoŋə̀ ghu, à yù də̀ ayiə yə aghû yə̀ ghu bɛmə nəniy Zə̀kìy kwu nəniy ani fàʼ aŋwòə à də̀ ayiə yə a zəŋə nəniy nə̀ Zə̀kìy ki dyoʼo.

⁵Wìyəŋə̀ mpfənsə wə ù ba kpe nəniy yəə ghu ni yèmì azoŋə̀ we à də̌ ù wə̀ ù də kwu dzə̀ wày tɛmə̀ tìy moo wù lìy ù də ani yèmì azoŋə̀ we, ù kwu nəniy ibɛmə yiy â Zə̀kìy, ù tsə̀ŋ kwu kə ani gwùŋì â Zə̀kìy nə̀ ntsukə tiy, nə̀ ntsə̀ tìy, ŋwa yə̀ ìfày â Zə̀kìy.

⁶Yəŋə̀ mpfənsə wə ù kwuni kwu təŋ kə ani nyi uwee anə ufyiə u mbyi, ù pfə dòʼò ŋwò anə sə k-a-zə̀, yəə ù nam tsəb muə kə ŋwô.

⁷Nyìə yə̀ itswû yə̀ awò ghu tə̀ wè lìy ki də wày dzə ani dzày nə̀ aghee Kəzə̀ yìy zəŋə bɛbə ŋwò anə iyiə ìliy yiy.

⁸Aghû yə̀ ghu bɛmə Zə̀kìy, kwuni yèmə̀ wày azoŋə̀ tɛ̀mə̀ tə ghu tiy, à tsəm ba də̀ azoŋə̀ àghù yə̀ ghu də nəniy a ndàw ghu, ghu mə bvə̀ səə anə ibɛmə i ghu, bɛb tsìy fyi soʼò àghù yə̀ ghu də kamə bɛmə nəway Zə̀kìy.

⁹Kə̀ kwe dzə̀ izəd i yəŋə̀ mpfənsə wə anə azəd iyəŋi mpfəsə abu ù də kamə kpe nəway ŋəmə̀ tìy mə̀vəm in tyìfoŋ. Ù kwu ani bvami də kə wìyəŋi wə ù kə də kə nə̀ ŋə̀mə̀ we, kwu way wìŋəmə̀ ùlìy wìy a bee.

¹⁰À kwu ani də wìyəŋi wə aghê kwu nə̀ ù kwu umwamə ùdzoŋə̀ wìy, ù nìy kwoʼ bə̂ nəniy awa we yiy anə ayiə àdzoŋə̀ yìy, ŋgwamə nia àghù yə̀ ghu bwîy bê nəniy a ndàw we, bvami tsə uwee ani fàʼ àyiə àdzoŋə̀ yìy nə̀ àghě Kəzə̀ yìy, fìy àghù anə ntswə̀d mə̀ ghu. Nyə̀ yə̀ uwee uwe ani zəŋə yə kə ayiə àdzoŋə̀ àliy yiy.

¹¹Kə̀ kwe dzə̂ iyəŋi mpfənsə yə ghu nam də ghâŋ fìy anə azəd iyəŋi mpfənsə aŋwòə abu uliə u wìŋəmə̀ wìy kwi tsə nəniy ghu, ghu ki nam liə ani nìy ŋəm. I ki zəŋə ghu, ghu ki də wày ani kàm fàʼ dzə̀ awò Yesù anə ayiə yə ghu mə̀ kwu ani fàʼ.

¹²Abu ghu nîy nəniy aŋəmə, Zə̀kìy ki saʼ wiy ghu aŋwòə ghu kə̀ na nəway tɛb kə ghu kə nyiə̀ nəniy ani fàʼ awò Yesù.

¹³À kaʼi wày dzə ì yiy, ghu ki zəŋə ayiə àlay yiy, bwìy kyabə tsə ndaw tə̀ ndàw. Ghu ki kaʼ yə̂ soʼò ani dzii fɛm tiy, dzìy ndzòʼò àyiə yə ghu də kwu dzə̀ way ani dzày.

¹⁴Mə liə nə̀ iyəŋi mpfənsə yə ghu nam də ghâŋ fìy, nə̀ ghu nîy yə̂ àŋəm, ghu byi bə̂ àwa, ghu ki yemə tsə anə sələ təndaw tə ghu ani zəŋi tsə nə̀ wù wə̀ ù bà nəniy ŋgaŋ kə kəli dzə̀ bwoʼ kìy ani dzày àyiə àbɛbə yiy kwùmə̀ bə̀ nə̀ ŋgàŋ.

¹⁵Mə ayiə yə ghii dzìy aŋwòə iyəŋi àliy yiy ghu də nəniy ghâŋ fìy, ghu mə nyəli màʼà Zə̀kìy, ghu nyiə̀ dzwùmə̀ àyiə yə Satàn liə nə̀ ghu zəŋi.

¹⁶Abu wìyəŋi ùlìy wìy kwuni kwu nəniy yəŋə̀ mpfənsə anə isəd i ndaw iwe, u kwu ani yèmì tsə azoŋə̀ we, ù kə na dzə̀ we anə wo kə ghě Kəzə̀, ani zəŋi tsə nə̀ dzəŋə kə aghě Kəzə̀ yiy ki yemə tsə azoŋə̀ ise mpfənsə yə ghu də kwu way wù lìy ani yèmì azoŋə̀ ghu.

¹⁷Aghû yə̀ ghu bɛmə nəniy Zə̀kìy, ghu kwu ani nyiə tsə ŋkwiʼi miy awò àghù yə̀ ghu də nəniy utuw wiy anə dzəŋə kə aghě Kəzə̀, yèmə̀ dzwàbə̀ soʼò azoŋə̀ ghu. Ghu kwu sòʼò ani tsəə dzwabə tsə ghu. À tsəb ba də̌ ndzòʼò àghè utuw yə ghu faʼà nə̀ daʼa kiy ani tyi dè ntwùm ə̀ Kə̀zə̀, nìʼà yə̀ sòʼò.

¹⁸Aŋwòə i twâ dòʼò anə ŋwàʼà k-a-zə̀ nə̀, “Wò kwu dzə̀ wày ani twe nə̀ mbòŋ ìvələ̀ yìy kə nyi abu wò və̀lə̀ nəniy nə̀ ìghe yiy.” I nam twà dòʼò sòʼò nə̀, “Aghee kəfàʼà kwu ani kəli kənamə anə fàʼ kə ghu.”

¹⁹Kəə wò nə̀ byemə nia dzə̂ nə̀ wù nìy bə̀ ŋgə̀lə̀ dzəŋə kə aghě Kəzə̀ nə̀ wò saʼ we anə iyiə ìliy yiy ù zəŋi bɛb nəniy. À mày kə nə̀ aghê bè moo aghê ti namə bè dzìy kə̀ ìyiə ìmoʼo yiy ŋgə̀d ìghè yə̀ zəŋi bɛb nəniy.

²⁰Abu aghû yə̀ ghu də nəniy utuw wiy anə dzəŋə kə aghě Kəzə̀ kwuni tsəŋə̀ zəŋə yə̂ kə ayiə àbɛbə yiy, wò kwu ani dzày yə̀ awò ghu nə̀ ghu zəŋə byɛbə ŋwò anə fwumi kə dzəŋə kə aghě Kəzə̀ àdzə̀m, ani zəŋi tsə nə̀ aghee utuw àliy yə̀ nì də ani zwiʼi kəli kə utwab ate anə ayiə ghu àzəŋə yiy.

²¹Mə ndzəmə̀ dzìy bə̀ ŋwò awò ghà anə sə k-a-zə̀ nə̀, anə sə kə Yesù Kə̀litò nə̀ anə sə kə tsə̀təndii t-a-zə̀, tə̀ zwe tiy, nə̀ wò na tsə itswû yə̀ mə nyiə̀ nəniy â wò ìdzə̀m. Kə̀ zəŋi sòʼò iyiə ìliy yiy â wù lìy nə̀ wò kòʼò kè we moo nə̀ wò koʼò ŋgwoʼo yə̀ we.

²²Kə̀ tsə̂k dzə̀ ani gaʼ awo yiə̀ azoŋə̀ wù ani nyiə̀ tsə we nə̀ daʼa kiy nə̀ ù dòʼò tsə wù kə̀tuw anə dzəŋə kə aghě Kəzə̀. Aŋwòə bəə à də nə̀ wù ù ghè wə̀ mə zəŋi ibɛb yiy, aghee də ani moʼo nə̀ wò bɛmə dzəŋi ŋwô nə̀ we anə ibɛb yə ù zəŋi nəniy. Kə̀ kəli dzə̀ iyiə ìliy yiy ani zəŋi nə̀ ìyiə yə i də nəniy iyiə ìbɛbə yiy.

²³Kə̀ kaʼi mu dzə̀ mwi, i muə yə soʼo nyoŋə fə mənlwù fìy ani fày kə wô anə utswə̀d wə̀ wò kwu nəniy anə unìə̀ nə̀ dzàŋə̀ tə̀ liy tə tə fyimə zələ wô.

²⁴Bɛb tə̀ liy tiy də ŋwô aghê zəŋə nəniy an-a-ne, aghê dzə̀m ə kòʼ saʼ aghû yə̀ ghu zəŋi nəniy. Bɛb tə̀ liy tiy kwuni də̀ ŋwô aghê nê zəŋə, tə ghè tə̀ nìy fə̀soŋə awò àghè ani kəli.

²⁵À də̀ sòʼò ighəd nə̀ àyiə àdzoŋə̀ yə̀ aghê zəŋə nəniy. Abu wù zəŋi tsə nəniy iyiə ìdzoŋə̀ yìy, aghee zə̀àŋì kòʼ kəli iyiə ìdzoŋə̀ ighè yə̀. Abu wù nù zəŋi nəniy iyiə ìdzoŋə̀ yìy, i nîy fə̀soŋə awò aghě ni kòʼ.