Read Isu 1 Timotì 6 Bible Online

1 Timotì 6 - Isu bible

1 Timotì 6

¹Aghû yə̀ ghu də nəniy ukwə̂d wìy, ghu kwu ani nyiə tsə ŋkwiʼi miy â àghù yə̀ ghu fàʼà nəniy a təŋə ghu, ani zəŋi tsə nə̀ aghê liy kə dzây dzə̀ ayiə àbɛbə kwùmə̀ yə̀ nə̀ ìzəd i Kəzə̀ yìy nə̀ anə ayiə yə ŋgà tyi dê nəniy.

²Ukwə̂d wə̀ u faʼà nəniy a təŋə nə̀ mwe yə ghu bɛmə nəniy Zə̀kìy, ghu kwu dzə̀ way ani kòʼ kè nə̀ mwe ghè yə̀ aŋwòə nə̀ mwe ghè yə̀ bɛmə ŋwoə Zə̀kìy. Ghu kwuni ba kwu ani fàʼ awò ghu anə ayiə àdzoŋə̀ aŋwòə nə̀ mwe u fàʼ ə ghu yiy bɛmə ŋwô awò Zə̀kìy, də̀ sòʼò aghû yə̀ aghee kəfàʼ a ghu yiy liə. À yù də̀ ayiə yə̀ wò kwu nəniy ani tyi dè, wò zəŋi tsə sòʼò nə̀ aghê ki faʼa yə ayiə ghè yə̀

³Aghê liy də ŋwô ghu tyi dê àyiə yiy a də byemə fwumə way nə̀ ìtyi dè ìsoŋə i Mwe ə̀ mbyi ə̀ ŋgàŋ Yesù Kə̀litò, byemə fwumə sòʼò way nə̀ àyiə yə aghee Kəzə̀ yìy tyi dê nəniy kwùmə̀ yə̀ nə̀ àyiə yə ŋgà kwu ani mùə̀ ate nə̀ Zə̀kìy.

⁴Ghu ghi màŋə̀ kwoʼo ìwe, kwu sòʼò way iyiə ìliy yiy. Ghu liə ani səay ayiə, zwàʼà sòʼò, ayiə ghè yə̀ də̀ yəə à də̀ idzâŋ ghu kwu nəniy. Ayiə ghè yə̀ zəŋə, ghu kwu nəniy ghòʼ kìy, byemə fwumə way nə̀ àghù yìy, ghu dzîy sòʼò àyiə àbɛbə yiy azoŋə̀ aghù yìy. Ghu kwu imôʼ ìbɛbə yiy azòŋə̀ wù ùmoʼ ùmòʼ.

⁵Ghu moʼò àyiə anə dzə̀d ìbɛbə̀ yìy aŋwòə ghu mə twe màʼà iyiə ìsoŋə̀ yìy. Ayiə ghè yə̀ mə zəŋi ghu, nə̀ ghu ki môʼ nə̀ ani bɛmə Kəzə̀ à də̌ dzəd â wù ani kəli ukhiy.

⁶I də nə̀ ani bɛmə awò Zə̀kìy, i zəŋə ŋwò nə̀ ŋgà doʼò yəə à də̀ aghê à kwumə yiy bəə ŋgà kwu nəniy dwiʼi kiy anə fyiə kə ŋgà kwu nəniy.

⁷Ŋgà kə ba bù nə̀ kìə̀ fə anə mbyi yə? Ŋgà kə kə̀ bû dzə̂ nə̀ fyiə kiy fə anə mbyi. Ŋgà nî ba nìy ŋwò kìə̀ fə anə mbyi ə? Ŋgà nî nìy dzə̀ wày fyiə kəli kiy fə anə mbyi a ŋwô nə̀ ghe kiy.

⁸Yəə i də nəniy ghii, bəə ŋgà kwu nəniy ufànyiə wiy ani nyi nə̀ ndzwu tiy ani dzə̀ŋì, ufyiə u ghè wə̀ ghî kpe dòʼò dzə̀ awò ŋgàŋ.

⁹Aghû yə̀ ghu kwuni liə nəniy ani dòʼò tsə aghê kwumə, ghu zù bvə̀ anə imwâmkòʼ. Ghu zù bvə̀ sòʼò anə ntsaʼ fə ndə̀mə̀ aghè àliʼa bvə̂ tsə̂ nəniy ate nə̀ àghù yə̀ ghu kwu təŋ kə ayiə àbɛbə yiy anə təfòŋ, Zə̀kìy ŋwukə naa soʼò nəniy ghu nə̀ dzəm.

¹⁰Aŋwòə ani ŋge kəli iliə anə ukhiy, i zəŋə nə̀ ghu zəŋi lelê tə ayiə àbɛbə tiy. Aghê liy ŋge liə ŋwò ani kəli ndə̀mə̀ ukhiy, i mə zəŋi ghu kàm kwu way ibɛmə yiy. I mə zəŋi sòʼò nə̀ ghu kəli ifwabi anə ndə̀mə̀ tə̀ dzə̀lə.

¹¹A kwuni bû wô a Timotì, wò də̌ wù wə̀ ù fàʼà awò Zə̀kìy. Yəə i də nəniy ghii, wò kwu dzə̀ way ani zəŋə ayiə àbɛbə yə, wò kwuni kwu ani zəŋə yəə ayiə yə a də nəniy tsitsi anə sə k-a-zə̀ kəli tsə umwamə u ghě Kə̀zə̀ wìy. Mùə tsə imùə̀ yə̀ i dzwabə nəniy awo Zə̀kìy. Wò gaʼ na yə̂ soʼò fòŋ azoŋə̀ Kə̀litò. Wò kəli tsə soʼò ìliə azoŋə̀ àghè liy yiy. I kyibə tsə ntswə̀d mə̀ ìm bè nəniy azoŋə̀ wò, bvamə zəŋə yə̀ àyiə.

¹²Wò kwu ani kwi taw tsə ibɛmə yə wò kwu nəniy azoŋə̀ Kə̀litò. Yəə i də nəniy ghii, wò kwu ani fàʼ anə ayiə yə wò kəli kwûm ani kəli imuə̀ itsà yə̀ Zə̀kìy kə toŋə wô nə̀ wò bû kəli. Zə̀kìy kə nyə̀ ìmuə̀ ighè yə̀ anə sòŋə fə wò kə dzây fyi bə̂ anə sə kə ndə̀mə̀ àghù nə̀ wò bɛmə ŋwô awò Kə̀litò nə̀ fòŋ yiə̀ ìdzə̀m.

¹³Mə dzìy bə̀ â wò anə sə kə Zə̀ kə̀ kə nyiə̀ nəniy imùə̀ yìy awò ufyiə udzə̀m nə̀ anə sə kə Yesù Kə̀litò wə̀ ù kə dzây fyi yə̂ ayiə àsoŋə̀ yìy anə sə kə Pontìyùs Paylèt,

¹⁴anə ayiə yə mə dzîy bə̂ nəniy â wò, nə̀ wò na tsə ayiə yə mə dzây nəniy â wò nə̀ wò doʼò tsə nə̀ wò kwu way gə̂ŋ kə udzə kiy anə uwè niə̀, zù kwùm soŋə fə Mwe ə̀ mbyi ə̀ ŋgàŋ Yesù Kə̀litò nì bè dzwəŋə nəniy ate.

¹⁵Kəli tsə nə̀ Zə̀kìy kî zəŋə tsə nə̀ Yesù bù dzwoŋi anə sòŋə fə ù byay na nəniy. Zə̀kə̀ aghee nyiə̀ nəniy we nə̀ ùkali wiy. Ù də nəniy wù wə̀ ù saʼa nəniy anə ayiə àsoŋə̀. Də̀ sòʼò Mwe ə̀ mbyi nə̀ dòŋ kìy awò àghè dzə̀m.

¹⁶À bvami mày kə Kəzə̀ kə nî də pfə dzə̀ wày, ù muə soʼo anə kàʼì tə̀ wè mbyi ùlìy wìy də wày dzə ani soŋ koŋə yə̀ akə̀lə̀ kàʼì tə ghè tə̀. Wè mbyi ù lìy kamə kôʼ kòʼ dzə̀ we. Wè mbyi ù lìy way dzə ani kòʼ we. Aghê nyiə̀ mə̀ŋkwiʼi awò Zə̀kìy, ù saʼa nə̀ daʼa kə̀soŋə̀ kìy anə nsòŋə indzə̀m! I doʼò kə ghii.

¹⁷Dzǎy yə̀ awò àghù yə̀ ghu kwumə nəniy anə ufyiə u mbyi nə̀ ghu kə kwiʼi dzə̀ iwee yiy. Ghu kə gaʼ na dzə̀ fôŋ tìy anə i kwum i ghu fə anə mbyi aŋwòə ndzòʼò ìkwum i ghè yə̀ nì dòʼò tsà dzə̀ wày. Ghu kwuni kwu ani gaʼ na yə fòŋ tə ghu azoŋə̀ Zə̀kə̀ ù nyìə̀ bə̂ ŋgaŋ nə̀ ùfyiə udzə̀m anə fòŋə̀ we ìdzoŋə̀ yìy nə̀ ŋgà ki nyiə iwee yiy ate.

¹⁸Tswǔ tsə ghu nə̀ ghu ki zəŋə tsə ayiə àdzoŋə̀ yìy. Dzəd yə ghu kwu ani kwum ate, à də̀ â ghu ani fàʼ yə̀ ndə̀mə̀ ndə̀mə̀ tə yiə tə̀dzoŋə̀ tìy. Ghu kwu sòʼò ani dzuu yə ufyiə wə ghu kwu nəniy awò àghè nə̀ fòŋ tə̀dzoŋə̀ tìy.

¹⁹Abu ghu zəŋə nəniy ghii à ki də yəə ghu nia yə̀ ufyiə ùsoŋə̀ wə an-a-vələ. I ki də yəə à də̀ tsəkəndaw kə̀taw kə kə də ani bòʼò kəli ufyiə wə u kwu nəniy ani bù tə̀ ghu ki də ani kəli imùə̀ ìsoŋə̀ yìy.

²⁰A Timotì, yèmi tsə anə fàʼ kə̀ Zə̀kìy nyiə̀ na nəniy â wò nə̀ wò fâʼ. Kə̀ zwuli dzə̀ awò àghù yə̀ ghu dzîy àyiə àliʼa yiy. A dê nəniy nə̀ aghû yə̀ ghu dzîy àyiə ghè yə̀ ghu tsəŋə dzə̀ way Zə̀kìy. Ghu liə soʼo ani zwaʼa anə ayiə àliʼa yiy dzìy à də̀ “Utwab” də̀ ghii nə̀ à kwuni də̀ ayiə àliʼa yiy.

²¹Aghê liy yiy mə bvə̀ te səə anə ibɛmə i ghu awò Yesù anə ayiə yə ghu bɛmə yə̂ nəniy ayiə àliʼa ghè yə̀. Mə gwùŋə̀ nə̀ Zə̀kìy dê ghà nə̀ fòŋə we ìdzoŋə̀ yìy.