Read Isu 2 Timotì 1 Bible Online

2 Timotì 1 - Isu bible

2 Timotì 1

¹À ŋwàʼà kə̀ twà bə̀ mìə̀ Pôl. Mə də wè ntwùm ə̀ Yesù Kə̀litò, Zə̀kìy kə sày kə miə nə̀ mə doʼò wè ntwùm ə̀ Yesù, u nyə̀ tsə sòʼò mìə̀ nə̀ ìmùə̀ itsà yə̀ ù kə tɛb na nəniy ani nyə̀ awò mìə̀. Wù kyilə ìmùə̀ yə̀ abu ù təm doʼò dzəŋi nəniy nə̀ Yesù Kə̀litò.

²Mə twâ yə̀ awò Timotì wa nam ùsòŋə̀ wìy. Mə gwùŋə̀ nə̀ Zə̀kə̀ à də Tà, we nə̀ Mwe ə̀ mbyi ə̀ ŋgàŋ Yesù Kə̀litò nə̀ ghu dê wò nə̀ fòŋə̀ ìdzòŋə̀ yìy, nə̀ mwuli kə̀kwoʼo kiy, ghu nyiə̀ soʼò wò nə̀ ìbvay yiy.

³Mə nyiə̀ yə̀ kə̀zòŋə̀ awò Zə̀kìy bòʼ wò. Ù də̌ wù wə̀ nə̀ təli yam asəsə kə fwùlə̀ tsə̂. Mə taw kwe tsə̀ ŋwò wô anə igwùŋì yam abu mə gwùŋə̀ nəniy awò Zə̀kìy nə̀ ntsukə tiy nə̀ ntsə̀ tìy.

⁴Abu mə môʼ tsə nəniy idîy yiə̀ yìy, fòŋə swəə miə ani kòʼ wò aŋwòə i kî zəŋə tsə ŋwò miə nə̀ mə kəli kədwiʼi.

⁵Mə moʼò ŋwò ibɛmə ìsoŋə̀ yə̀ wò kə kwu nəniy azoŋə̀ Kə̀litò anə ayiə yə izə̀ yiə̀, Loyìs, we nə̀ zə̂ yiə̀ Yunìs kə kwu nəniy. Mə kwu nə̀ wò kwu ndzòʼò ìbɛmə i ghè yə̀ nyiə.

⁶Yəə i də nəniy ghii, mə zəŋə̀ bə̀ wò nə̀ wò ki faʼa yə anə namə kə Zə̀kìy kə nyiə̀ nəniy â wò anə sòŋə fə mə kə gaʼ bə̂ nəniy awò yamə azoŋə̀ wò ani lwì tsə wô.

⁷Zwàykə̀zwe kə Zə̀kìy nyiə̀ nəniy awò ŋgàŋ, kə zəŋə dzə̀ wày nə̀ ŋgà ki kwu itsəŋ yiy anə ə fòŋ tə ŋgàŋ. Kə kwuni zəŋə nə̀ ŋgà ki kwu daʼa kiy â Zə̀kìy, zəŋə sòʼò nə̀ a kəli tsə iliə azoŋə̀ àghè liy, zəŋə soʼò nə̀ ŋgà ki kwi tsə iwee iŋgàŋ yìy.

⁸Yəə i də nəniy ghii, kə̀ də̂d dzə̀ nə̀ tuw kiy ani dzày àyiə awò aghè liy kwùmə̀ yə̀ nə̀ Mwe ə̀ mbyi. Kə̀ də̂d sòʼò nə̀ tuw kiy azoŋə̀ mìə̀ yəə ghu fê na nəniy miə a ndàw ntsaʼ bòʼ we. Wò kwuni kwu ani fàʼ yə̀ anə daʼa kə Zə̀kìy nyiə̀ na â wò ani nàʼà ntwùm ə̀ Mwe ə̀ mbyi, wò bɛmə kə soʼò ani fii fwumi nə̀ mìə̀ ani nàʼà ntwùm ə̀ ìdzòŋə̀ yìy.

⁹Zə̀kìy kə bii fyi tsə ŋgaŋ, sày kə sòʼò ŋgàŋ nə̀ ŋgà doʼò tsə aghee we àzwe yiy. À kə wày dzə nə̀ ŋgà zəŋi iyiə ìdzòŋə̀ ìliy. Ù kə ghii zəŋi nə̀ i doʼò anə ayiə yə ù kə byay na nəniy anə fòŋə̀ we ìdzòŋə̀ yìy. Ù kə dè ŋgàŋ nə̀ fòŋə̀ we ìdzòŋə̀ yə̀ abidzəmə̀ Yesù Kə̀litò awò we ani bwam mbyi.

¹⁰Zə̀kìy mə kwuni dè ŋgaŋ nə̀ fòŋə̀ we ìdzòŋə̀ anə ibù i Yesù Kə̀litò, wù wə̀ ù bii fyiə nəniy ŋgaŋ. Ù mə zəŋi sòʼò nə̀ ipfə yiy kə kâm kəli dzə̀ daʼa kiy azoŋə ŋgàŋ. Ù mə dè sòʼò nə̀ ŋgà də ŋwô ani kəli iwe yə i də pfə kòʼò tsə̀ dzə̀ wày, abidzɛ̀mə̀ ntwùm ə̀ ìdzòŋə̀ yə̀ Kə̀litò kə bû nəniy nə̀ ìghe yiy.

¹¹Zə̀kìy mə sày miə nə̀ mə doʼò wè ntwùm ə̀ Yesù nə̀ àtyidè ani nàʼà ntwùm ə̀ ìdzòŋə̀ yìy.

¹²À yù də̀ ighe mə fyaʼa nəniy nyiə anə ayiə yə mə fyaʼa ate. Mə kwuni kwu dzə̀ way tuw kə̀dələ kiy aŋwòə mə kwu ŋwoə wù wə̀ mə gaʼ na nəniy fòŋ azòŋə̀ we, mə kwu sòʼò ŋwô nə̀ ù də̀ ŋwô ani nìy ìyèmì anə fyiə kə mə nyiə̀ na nəniy awò we[1] nə̀ ù yɛmì ate ani zù kwùm a ntsuk fə ù nì dzwəŋə bə̂ nəniy ate.

¹³Kwi taw tsə ityi dè ìsoŋə̀ yə̀ mə tyi dê nəniy â wò, à də̀ kətsəe wò kwu ani dzwùmì yə̀ abu wò tyi dê nəniy ayiə yiy. Təmi dòʼo taw tsə sòʼo anə ibɛmə yə wò kwu awò Zə̀kìy nə̀ anə iliə yə wò kwu awò Zə̀kìy nə̀ awò aghè liy aŋwòə wò də̀ fyiə kəmòʼ nə̀ Yesù Kə̀litò.

¹⁴Zə̀kìy mə nyiə̀ wô nə̀ fyiə kə̀soŋə̀ kə̀ à də nəniy ntwùm ìdzòŋə̀ yìy, wò kwu ani nìy tsə iyemì ate. Zwàykə̀zwe kə kə muə nəniy azoŋə̀ ŋgàŋ, kə ki fây kə wô ani yèmì anə fyiə kə̀soŋə̀ kə ghè kə̀.

¹⁵Wò kwu ŋwô nə̀ mə dəmə̀ nə̀ àghù yə̀ ghu bɛmə nəniy Zə̀kìy a mbwòʼ ə̀ Esìyà ghu twe maʼà nəniy miə. Fìgelùs nə̀ Hemògenès, ghu də sòʼò anə aghù yə̀ ghu twe maʼà nəniy miə.

¹⁶Mə gwùŋə̀ nə̀ Mwe ə̀ mbyi dê mwuli kə̀kwoʼo kiy awò ìsəd i ndaw i Ònèsìfolùs yìy aŋwòə ù taw kwe tsə̀ fòŋ yam anə ndə̀mə̀ nsòŋə. Ù kə kə̀ kəli dzə̂ tuw kə̀ dələ kiy azoŋə̀ mìə̀ yəə mə kə də nəniy a ndàw ntsaʼ.

¹⁷Abù ù bù nəniy a Lûm, u kaw kyabi tsə̀ mìə̀ anə lòʼo tədzə̀m ani zù kwùm anə nsòŋə fə ù kə kaw kôʼ tsə nəniy miə ate.

¹⁸Mə gwuŋə̀ nə̀ Mwe ə̀ mbyi nî kwoʼ nə̀ mwuli kiy azoŋə̀ we anə ntsuk fə isaʼ. Wò ndzə̀m kwu ŋwô ndə̀mə̀ dzələ tə ù kə fây nəniy miə ate a Efesùs.