Read Isu 2 Timotì 3 Bible Online

2 Timotì 3 - Isu bible

2 Timotì 3

¹Kəli tsə nə̀ ntswə̀d mìy nî ŋge də̀ ŋwô anə ntsukə mə̀ ìbàm mə̀.

²Aghê ni liə kə iwee ighu yiy, ŋge kwu sòʼò ìliə anə ukhiy, ghu ni ŋge kwoʼo iwee yiy, ghu ni nyaʼa aghê liy, ghu ni də zuw way awò nə̀ təli ghu nə̀ nə̀ zə̂ ə ghu. Ghu ni də nyìə̀ wǎy zòŋə̀ kìy anə iyiə ìliy yiy, kwu sòʼo way Zə̀kìy.

³Ghu ni də kwu dzə̀ way iliə yiy azoŋə̀ aghè liy, ghu ni də nìyzə̀ wày ayiə àbɛbə yə aghê liy zəŋi azòŋə ghu. Ghu ni ŋge dziy nia ayiə àguw yiy azoŋə̀ àghè liy yiy. Ghu ni də kwi tsə way iwee ighu yiy ani zəŋi yə̀ àyiə yə a də nəniy tsitsi. Ghu ni ŋge ŋwiy azòŋə awizə̂ yìy. Ghu ni ba ayiə yə a də nəniy àdzoŋə̀ yiy.

⁴Ghu ni nîy fê fyi yə̂ àghè liy awò aghù yə̀ ghu bâ nəniy ghu. Ghu ni də mòʼò dzwàbə̀ tsə dzə̀ wày iyiə yiy â ghu ani zəŋi yə̀. Ghu ni ŋge kwoʼo soʼo iwe yiy. Ghu ni ŋge liə ani nyi iwee anə ayiə mbyi kwuni liə dzə̀ wày Zə̀kìy.

⁵Ghu ni maŋə zəŋə dzìy ghu fwùlə̀ Kə̀zə̀ twe myàʼà sòʼò daʼa kə Zwày k-a-zə̀ kə̀ kə də ani fày ghu tə̀ ghu muə̀ tsə anə ayiə yə Zə̀kìy liə. Kəə wò nì kyilə iyiə ìliy yiy ani zəŋi nə̀ ghu

⁶Ghu àliy yiy ni zee anə ndaw tə ghè liy, niyebə yə̀ iyəŋi yə ghu liʼà, ghu də soʼo nə̀ ùtuw ù dələ wiy anə ayiə àbɛbə yə ghu zəŋi na nəniy, kwu sòʼò iliə anə ndə̀mə̀ ndə̀mə̀ təyiə tə̀bɛbə tiy.

⁷Iyəŋi yə̀ taw liə kə ani zwəʼə kyilə kə iyiə ifyiə yiy, ghu kwuni wày dzə ani zuw kəli ntwùm ə̀ Kə̀zə̀ ìsòŋə̀ yìy.

⁸Dzànes nə̀ Dzàmbles kə liə way ani zwələ â Musîs aŋwòə ghu kə dzwəə nə̀ we, à də̀ sòʼò ighəd aghû yə̀ dzwəə nəniy nə̀ ntwùm ə̀ Kə̀zə̀ ìsòŋə̀ yìy. Ghu kwu fôŋ tə̀ bɛbə tiy, fwələ sòʼò. Ghu mə bvə̀ sə sòʼò anə ibɛmə yə à də ìsoŋə̀ yìy.

⁹Ghu kî nɛbə dzə̀ wày aghee anə ndaŋk-a-ghab aŋwòə aghê àdzə̀m kî kòʼò kyilə ŋwò iliaʼi ghu yiy. À yù bvami də̌ ndzòʼò àyiə yə a kə fyi nəniy nə̀ Dzànès we nə̀ Dzàmblès.

¹⁰A Timotì, wò kwu ŋwô àyiə yə àdzə̀m mə tyi dê nəniy, wò kwu sòʼò ŋwô ndzòʼò ùmwamə wə mə kwu nəniy. Wò kwu ŋwô fyiə kə mə liə ani zəŋi anə imùə̀ yam, nə̀ ìbɛmə yə mə kwu nəniy azoŋə̀ Kə̀litò. Wò mə kòʼ yəə mə kwê nəniy fòŋ ate, wò kwu ŋwô ìliə yə mə kwu nəniy awò Zə̀kìy nə̀ awò àghè liy yiy, wò kwu sòʼò ŋwô yəə mə zê kə ate nə̀ səkiy anə fàʼ kam bəə mə tsəb də kə anə utswə̀d.

¹¹Wò kwu ŋwô yəə aghê kə kaw nəniy miə ate nə̀ lelê tə məntswə̀d tìy anə inaʼi Antìyòk, nə̀ ìnaʼi Ìkonìyùm, nə̀ ìnaʼi Listlà yiy. Mə kə ŋge fii ŋwô anə ntswə̀d mə̀ ghè mə̀. Mwe ə̀ mbyi ə kwuni fày fyi kə miə anə ntswə̀d mə̀ ghè mə̀ ìndzə̀m.

¹²Ndə̀m ndzə̀m, aghû yə̀ àdzə̀m ghu də nəniy anə fyiə kəmòʼ nə̀ Yesù Kə̀litò ghu liə soʼo nəniy ani mùə̀ tsə anə ayiə yə Zə̀kìy liə, aghê liy kî khu ŋwò ghu nə̀ ntswə̀d mìy.

¹³Aghê bɛbə yə, nə̀ àghù yə̀ ghu ŋwamə zəŋə nəniy dzìy ghu də aghê àdzoŋə̀ yìy, də̌ ghii nə̀ ghu way dzə aghè àdzoŋə̀ yìy, ghu nî dyòʼò tsə àghè àbɛbə yiy ghii ghu bɛb tsîy tsə yəə ghu də nəniy nyiə ate, anə yiə yə ghu nɛbə kyabə tsə̂ nəniy aghû yiy nyiə, aghê nî nɛbə sòʼò ghu ighəd.

¹⁴A kwuni bû wô, wò kwu ani zù kə nə̀ sə kiy ani kəli tsə ibɛmə anə ayiə yə wò zwiʼi kəli kə nəniy nə̀ à də̀ ayiə àsoŋə̀ yìy aŋwòə wò kwu ŋwô aghû yə̀ ghu kə tyi dê nəniy ayiə ghè yə̀ â wò.

¹⁵Wò kə kəli ayiə yə ŋwàʼà k-a-zə̀ kìy dzîy nə̀ wò nam də̌ ànìsə̀. Ayiə ghè yə̀ də̌ ani fày wò nə̀ wò zuw kəli tsə yəə Zə̀kìy də ani bii fyi ŋgaŋ ate abidzəmə̀ ìbɛmə yə ŋgà kwu nəniy azoŋə̀ Yesù Kə̀litò.

¹⁶Ayiə dzə̀m ŋwàʼà k-a-zə̀ kìy dzîy nəniy, a ŋwô bə̀ â Zə̀kìy. Ayiə ghè yə̀ fìy ani tyi dè ìyiə yə i də nəniy ìsoŋə̀ yìy awò àghù yìy, a fî sòʼò ani zəŋi tsə nə̀ aghê kôʼ àyiə yə ghu zə̂ zəŋi nəniy, fìì sòʼò ani bwatyili aghû anə ayiə yə ghu zəŋi bɛb nəniy, tyi dè sòʼò nə̀ a zəŋi ayiə yə a də nəniy tsitsi.

¹⁷Ani zəŋi tsə nə̀ wè kə̀fàʼ ə̀ Kə̀zə̀ byay tsə uwe ani fàʼ fàʼ kə̀ ù kwu nəniy ani fàʼ nə̀ ù làʼà dzə̀ wày fyiə kə̀liy kiy ani fàʼ àyiə àdzoŋə̀ yə̀ àdzə̀m ù kwu ani fàʼ.