Read Isu 2 Timotì 4 Bible Online

2 Timotì 4 - Isu bible

2 Timotì 4

¹Mə dzîy bə̀ â wò anə sə k-a-zə̀ nə̀ anə sə kə Kə̀litò wə̀ ù nì bè nəniy ani bù saʼ anə uwè u kədòŋ, ù nì saʼa àghù yə̀ ghu də nəniy utaw nə̀ à yu ghu pfə dzə̂ nə̀,

²wò naʼà yə̂ ntwùm ə̀ Kə̀zə̀. Wò kwu ani tsəŋə zəŋə kə ghii abu aghè liə kə ŋwô ani zuw ayiə yə wò dzìy nəniy moo ghu də liə way. Wò kwu ani zəŋi tsə nə̀ aghê kôʼ kəli tsə nə̀ ayiə yə wò tyi dê a də àsoŋə̀ yìy. Wò kwu sòʼo ani kwà ghu anə ayiə àbɛbə yə ghu zəŋi nəniy. Wò ki kwe yə soʼo fôŋ tə ghu tiy. I zəŋə yə ayiə yə à dzə̀m nə̀ fòŋ ì kwê yìy.

³Soŋə fiy bê ŋwò aghê ki də liə way ani zuw ntwùm ə̀ ìdzòŋə̀ yìy, ghu ki fəd liə ani zuw ntwùm ə̀ ìŋwò yìy. Ghu ki kaw yə̂ nə̀ nə̀ àtyidè à ŋwô yìy ghu də ani tyi dè ghu nə̀ ndzòʼò àyiə yə fôŋ tìy ŋge swəə ghu ani zuw.

⁴Ghu ki twe maʼà ani nyiə̀ yə̀ kə̀tswuŋi anə ayiə àsoŋə yiy. Ghu ki kwuni liə ani zuw ayiə àguw yiy.

⁵Wò kwuni kwi tsə kə uwe niə wìy abu à tsəbə fyiə kə iyiə ì gha yiy nə̀ wò, wò təmi taw tsə soʼò abù à də kə ndzòʼò ùtswə̀d ù gha wiy. Wò kwu ani fàʼ nə̀ daʼa kiy ani nàʼà ntwùm ə̀ ì dzòŋə̀ yə̀. Yəə à də̌ wè ntwùm ə̀ Kə̀zə̀, wò kwu ani fàʼ mà tsə sòʼò fàʼ kə̀ Zə̀kìy nyiə̀ na nəniy â wò.

⁶I faʼa yə ghii aŋwòə soŋə fam fə̀ fənə kyoŋə fiy mə swəd. Imuə̀ yam yiy də̀ yəə à də̀ mənlwù ghu fəlì nyiə̀ yə̂ awò Zə̀kìy.

⁷Mə mə fàʼ awò Kə̀litò yəə à də̌ wù wə̀ ù nyəŋə nəniy ani dòʼò kə̀sə. Mə mə fàʼ mǎ fàʼ kə̀ Zə̀kìy kə liə nəniy nə̀ mə fâʼ. Mə zəŋi ayiə dzə̀m yəə à də̌ wù ù nyəŋə wə̀ ù nyəŋ zû kwùm nəniy anə lòʼo kə ù mə̀ kwu ani zù kwùm ate. Mə mə təmi taw anə ibɛmə yam, zuw sòʼò awo Kə̀litò.

⁸Mwe ə̀ mbyi ə ŋgàŋ, Yesù Kə̀litò wə̀ ù saʼa nəniy tsitsi, ù nì niamə ŋwò miə anə ntsuk fə isaʼ. Ù nì kaʼi namə dzə̀ wày miə, ù nì kwuni niamə sòʼò aghû yə̀ à dzə̀m ghu lyimə nəniy we nə̀ iliə yiy nə̀ ù bù dzwoŋi.

⁹A Timotì, kaw tsə dzəd ani zàŋì bù kòʼ miə̀.

¹⁰Mə ghî dzìy aŋwòə Demàs mə miə maʼà na sə, ù ŋge kwu iliə anə ufyiə u mbyi. Ù mə ŋwò zù a Tèsàlonikà. Klesens mə ŋwò zù anə inaʼi Gàlatìyà, Taytùs mə zù sòʼò a Dàlmatìyà.

¹¹Mə fə bvami də̀ fwumi kə nə̀ Lukâs. Kaw tsə Mâk wò bû nə̀ we akə̀lə̀ mìə̀. Ù də̀ ŋwòə ani fày mìə̀ anə fàʼ k-a-zə̀.

¹²Mə mə twum zû Tàykikùs a Efesùs.

¹³Abu ghà bê nəniy, ghà ki maŋ bə̂ sàŋ yam mə na sə nəniy a ndàw Kapùs anə inaʼi Toyàs nə̀ ùŋwàʼà wam wiy. Abu wò də wày ani nìy mà bə̀ ùŋwàʼà u ghè wə̀ ù dzə̀m, wò ə nìy bə̀ kə ù wə ghu zəŋi anə gùw nyàm.

¹⁴Àlèzandà wə̀ ù kə də nəniy tsə̀ànàm, ù ma ŋge kaw miə nə̀ ùtswə̀d wìy anə ndə̀mə̀ ndə̀mə̀ tə tə dzə̀lə. Mwe ə̀ mbyi nî kwuni tsə dzwəŋə ŋwò we anə ayiə yə ù kə zəŋi nə̀ mìə̀.

¹⁵Wò nîy tsə soʼò ìyèmì nə̀ we, kə ù nə̀ khu wô nə̀ ùtswə̀d wìy aŋwòə ù kə ŋge twe màʼà ŋwò nə̀ daʼa kiy ayiə yə mə kə niʼa.

¹⁶Wè lìy kə kə̀ doʼò dzə̂ nə̀ mìə̀ anə sòŋə fə səsə fə mə kə kwu nəniy ani bàʼ mbaŋ anə fàʼ kam. Mə gwùŋə̀ nə̀ Zə̀kìy kə nyiə̀ dzə̂ ghu nə̀ mfəm bòʼ àyiə yə ghu kə zəŋi nə̀ mìə̀.

¹⁷Mwe ə̀ mbyi ə̀ kwuni də̀ kə nə̀ mìə̀, nyiə̀ sòʼò mìə̀ nə̀ daʼa kiy ani zəŋi tsə nə̀ mə ki də ani nàʼà ntwùm ə̀ Kə̀zə̀ awò àghù yə̀ ghu də wày aghee Dzû, ghu zwuli sòʼò ntwùm ìghè yə̀. Yəə i kə də nəniy ghii, Mwe ə̀ mbyi fày ŋwò fyi bə̀ mìə̀ anə utswə̀d ùsoŋə̀ wə̀.

¹⁸Mwe ə̀ mbyi nî bii fyiə ŋwò fyiə ŋwò miə̀ anə ayiə àbɛbə yiy, ù nìy zù sòʼò nə̀ mìə̀ anə lòʼo kə Zə̀kìy saʼa nəniy aghee we yiy ate anə ibvay. Ukali wiy də awò we anə nsòŋə indzə̀m. I doʼò kə ghii.

¹⁹Twoŋə zuw yə̀ nə Plìsilìyà nə̀ Àkwilà nə̀ àghù yə̀ ghu də a ndàw Ònèsìfolùs yìy.

²⁰Elastùs kə dòʼò a Kolin. Mə nasə sòʼò Tòfimùs, a Mìletùs aŋwòə ù dzàŋə̀ ŋwò.

²¹Zəŋi tsə kə nə ŋwô ghà ə bû kôʼ mìə nə̀ soŋə mbuw ùfəb fi kamə kə̀ kpe dzə. Yùbulùs nə̀ Pudèns nə̀ Laynùs nə̀ Klodìyà nə̀ àghě ndàw kə̀dzəŋə à liy yə dziy nə̀ a twoŋə zuw bə̂ soʼò ghà.

²²Mə gwùŋə̀ nə̀ Mwe ə̀ mbyi doʼò nə̀ ghà. Zə̀kìy dê soʼò ghà nə̀ fòŋə we ì dzoŋə̀ yìy.