Read Isu Taytùs 1 Bible Online

Taytùs 1 - Isu bible

Taytùs 1

¹À ŋwàʼà kə̀ twà bə̀ mìə̀, Pôl. Mə də wè kə̀fàʼ ə̀ Kə̀zə̀, də̀ sòʼo wè ntwùm ə̀ Yesù Kə̀litò. Zə̀kìy sây kə miə, twum yə̀ mìə̀ nə̀ mə fây àghě Kə̀zə̀ ani zəŋi tsə nə̀ ghu nɛmə yə̂ anə ibɛmə yə ghu kwu nəniy. Ghu kəli dzwâb tsə soʼò ìtyi dè ìsoŋə̀ yə̀ i də nəniy kwùmə̀ yə̀ nə̀ Kə̀litò, ani zəŋi tsə nə̀ ghu mùə̀ tsə anə ayiə yə Zə̀kìy liə.

²Utwab wə̀ ntwùm ə̀ ìdzòŋə̀ yìy nyiə̀ nəniy awò àghù yìy, à də̀ u ghe u zəŋə tsə nəniy nə̀ ghu kəli imôʼ ìdzoŋə̀ yìy nə̀ ghu kî kyilə ŋwò imuə itsà yə̀ Zə̀kìy kə tɛb na nəniy â we ani bwam mbyi. Zə̀kìy guw dzə̀ wày.

³Zə̀kə̀ à də nəniy wù wə̀ ù bii fyiə nəniy ŋgaŋ, ù mə zəŋi nə̀ ŋgà kəli tsə ntwùm ìghè yə̀ anə sòŋə fə̀ dzoŋə̀ fìy, ù tsày tsə nəniy lâŋ kìy nə̀ mə naʼà ntwùm ə̀ ìghè yə̀.

⁴Mə ŋwàʼà kə̀ twà bə̀ â wò a Taytùs. Wò də̀ â mìə̀ yəə à də̌ wà, aŋwòə à kə fày mìə̀ wô nə̀ wò bɛmə â Kə̀litò. Mə gwùŋə̀ nə̀ Tè ŋgàŋ Kə̀zə̀, we nə̀ Yesù Kə̀litò wə̀ ù bii fyi nəniy ŋgaŋ, nə̀ ghu ki dê wò nə̀ fòŋə̀ ìdzòŋə̀ yìy ghu nyiə̀ soʼò wò nə̀ ìbvay yiy.

⁵Mə kə na səə tsə wô a Klît nə̀ wò fâʼ mâ kə fàʼ kə̀ kə kə doʼò səə nəniy awote. Wò sây na kə soʼò àghù yə̀ ghu kpe nəniy ani dòʼò utuw anə ndaw t-a-zə̀ tə̀ awote anə yiə yə mə kə tyi dzây â wò.

⁶I də nə̀, wù wə̀ ù də tuw kiy a ndàw Kə̀zə̀ kwu ani dòʼò tsə wù wə̀ ù də kwu way gə̂ŋ kə udzə kiy anə uwè, ù kwu kə nəniy wiy ùmòʼ, ù kwu ani dòʼò tsə wù wə̀ awa we yiy bɛmə nəniy Zə̀kìy, ghu kə doʼò dzə̀ yəə à də̀ nyâm tə mbvən tiy anə umwàmə u ghu, ghu kə doʼò sòʼò aghê ŋwunə yiy.

⁷Yəə wù wə̀ ù də tuw kiy a ndàw Kə̀zə̀ ù kwu nəniy ani faʼa yə fàʼ k-a-zə̀ kìy, ù kwu ani də wù wə̀ ù də kwu way gə̂ŋ kə udzə kiy anə uwè, ù kwu dzə̀ way ani də wù wə̀ ù tyiŋə yə̂ nəniy aghû yìy nə̀ ghu zəŋi yə̂ àyiə yə ù liə. Ù way ani də dzə wù wə̀ ù zə̀àŋə̀ ŋə̀mə̀ nəniy nə̀ fòŋ. Ù kwu dzə̀ way ani muə nlwù mìy kee tsə̀. Ù kwu dzə way ani də wù wə̀ ù liə nəniy ani ŋwaa. Ù kə doʼò dzə̌ wù wə̀ ù də ani zəŋi iyiə ìbɛbə yiy ani kəli ukhiy.

⁸Ŋgə̀d ə ndàw Kə̀zə̀ kwuni kwu ani ŋgwamə nia aghû yìy a ndaw we, liə sòʼò ìyiə yə i də nəniy ìdzoŋə̀ yìy. Ù kwu ani saʼa dzwabə tsə uwu we wiy, zəŋə sòʼò àyiə yə a də nəniy tsitsi, də̌ wù ù zwê wìy, də̀ sòʼo wù wə̀ ù pfələ zəŋə.

⁹Ù kwu ani bvami zəŋə yə̂ ayiə yə ntwùm ə̀ Kə̀zə̀ dzìy nəniy. Ntwùmə̀ ìghè yə̀ də ayiə yə wù də ani gaʼ na fòŋ ate, ì byemə dzəŋə yə̂ nə̀ àyiə yə ŋgà kə tyi dê. À yù də̌ dzəd yə̀ ù də nəniy ani fày àghè liy yiy ate abidzəmə̀ ìtyi dè ìsoŋə̀ yə̀. Ù ki də soʼo ani zəŋi nə̀ aghû yə̀ ghu twe miʼà nəniy ntùmə̀ ìsoŋə̀ yə̀ nə̀ ghu kəli tsə nə̀ ghu way dzə tsitsi.

¹⁰Ndə̀mə̀ àghù də ŋwô ghu də nyìə̀ dzə̀ wǎy ŋkwiʼi miy â ntwùm ə̀ Kə̀zə̀, dzìy sòʼò àyiə yə a də kwu dzə̀ way utwab wiy. Ghu khu tsə̀ sòʼò dzəd nə̀ aghê bɛmə bə̂ àyiə ghu àliʼa aghè yə̀. Àyiə yə̀ ba ŋge zəŋə àghě Dzû yə̀ ghu dzîy nəniy nə̀ ghu kwu ani gwùmì dzə̀ wù â we ani dòʼò wè Kə̀zə̀.

¹¹Wò kwu ani bwi na ghu nə̀ ghu kə kâm dzày dzə̀ ndzòʼò àyiə àliʼa ghè yə̀ aŋwòə ghu tyi dè àyiə yə ghu də kwu dzə̀ way ani tyi dè. Ayiə ghè yə̀ zəŋə nə̀ aghê liy yiy anə sələ tə ndaw nə̀, ghu ki səmə ani bɛmə ntwùm ìsòŋə̀ yìy. Aghû yə̀ ghii dzìy àyiə àliʼa yə nə̀ ghu khu tə̀ dzələ ani kəli ukhiy ate.

¹²Wè Klît ù lìy wìy, ghu kə dzîy nəniy nə̀ ù də̌ wè twùmə̀ Kə̀zə̀, ù maa dzày mà anə soŋə fə ù kə dzây tsə nəniy nə̀. “Aghee Klît yìy də aghê guw yiy, ghu kwu mwàmə mə̀ bɛbə̀ mìy yəə à də̀ nyâm tə mbvən tiy. Ghu də sòʼò aghee lay yiy, liə təŋ kə ani nyi.” Yəə i də nəniy ghii wò kwu ani dzə̀ŋì nə̀ ghu nə̀ ùtaw wiy ani zəŋi tsə nə̀ ghu nì də ani bɛmə yə̀ ntwùm ə̀ ìsòŋə̀ yə̀.

¹⁴Zəŋi tsə nə̀ ghu bwi na soʼò ani dzwùmì àyiə uzə̀ yə̀ aghě Dzû byìə̀ kə nəniy nə̀ a way dzə àsoŋə̀ yìy. Ghu bwi na soʼò ani zuw ayiə yə aghee mbyi yiy dzây na nəniy. Àyiə ghè yə̀ màŋ byìə̀ fyi kə aghû yə̀ ghu twe maʼà iyiə ìsoŋə̀ yìy.

¹⁵Ghu kəli tsə nə̀, wù wə̀ fòŋə̀ we zwe nəniy, ù kwu ŋwô àyiə yə àdzə̀m a də nəniy à zwe yiy. Aghû yə̀ fôŋ tə ghu tiy dzəə nəniy, iyiə ìliy yiy zwe dzə̀ wày anə səə kə ghu, ghu kə̀ bɛmə soʼò aŋwòə fôŋ tə ghu nə̀ mòʼ tə ghu tiy dzəə ŋwò.

¹⁶Ghu kwoʼo ìwe nə̀ ghu kwu ŋwô Zə̀kìy, ayiə ghu à zəŋə yiy kwuni dè nə̀ ghu kwu way we. Ghu bâ Kə̀zə̀, ŋwunə sòʼò â Zə̀kìy. Ghu zəŋə àyiə àdələ kə tuw yiy. Ghu kə̀ kpe dzə̂ soʼò ani zəŋi iyiə ìdzoŋə̀ ìliy yiy.