Read Isu Taytùs 2 Bible Online

Taytùs 2 - Isu bible

Taytùs 2

¹A Taytùs, wò kwu ani tyi dee yə ayiə yə a də nəniy tsitsi anə ayiə yə ntwùm ə̀ Kə̀zə̀ dzìy nəniy.

²Tswùə yə̀ iŋə̀mə̀ yə̀ ghu dzwə̂n dòʼò nəniy ghu kə kwiʼi dzə̀ iwe i ghu yiy, ghu muə̀ tsə anə ayiə yə aghê də ani nyə̀ ghu nə̀ ŋkwiʼi miy. Ghu ki saʼa dzwabə tsə i we i ghu yiy. Ghu kəli tsə soʼò ìbɛmə ìsoŋə̀ yìy. Ghu kəli tsə soʼò ìliə azoŋə̀ àghè liy. Ghu kəli tsə soʼò fòŋ tə̀ taw tiy ani kwù fòŋ.

³Wò kwu sòʼo ani tswù yə̀ iyəŋi yə ghu dzwə̂n doʼò nə̀ ghu kəli tsə mwamə mə̀ dzoŋə̀ mìy yəə à də iyəŋi yə ghu bɛmə nəniy awò Zə̀kìy. Ghu kwu dzə̀ way ani dzày àyiə àbɛbə yiy kwùmə̀ yə̀ nə̀ àghè liy yiy, ghu kə doʼò dzə̀ iyəŋi yə ghu muə kee nəniy nlwù mìy. Ghu kwuni kwu ani tyi dè yə̀ dzəd yə aghê də ani mùə̀ ìmùə̀ ìdzoŋə̀ yìy ate.

⁴Abu ghu zəŋə nəniy ghii, ghu ki də ani bwa tyili bə̀ iyəŋi yə ghu nam də nəniy ghâŋ fìy nə̀ ghu kəli tsə iliə awò àŋəmə ghu yiy nə̀ àwa ghu yiy.

⁵Ghu tswû soʼò ghu nə̀ ghu ki saʼa tsə iwe i ghu yiy, də̀ sòʼò iyəŋi à zwe yiy. Ghu ki dee yə soʼo fôŋ tə̀ dzoŋə̀ tìy awò àghè liy. Ghu tswû soʼò ghu ani zəŋi tsə nə̀ ghu doʼò tsə iyəŋi yə̀ ghu də ani yèmì dzwàb anə ndaw tə ghu, nyiə̀ sòʼò mə̀ŋkwiʼi awò àŋəmə ghu yiy anə ayiə yə wù lìy də wày dzə ani dzày ìyiə ìbɛbə yiy ate kwùmə̀ yə̀ nə̀ ntwùm ə̀ Kə̀zə̀ yə̀ ghu tyi dê nəniy.

⁶Abû iŋə̀mə̀ yə̀ ghu də nəniy ghâŋ fìy, tswùə tsə sòʼo ghu nə̀ ghu ki saʼa dzwabə tsə iwe i ghu yiy.

⁷Wô a Taytùs, wò kwu ani dòʼò tsə kətsəe anə umwàmə yiə̀ ani fàʼ àyiə dzə̀m. Abu wò tyi dê nəniy ayiə yiy, i ndzəmə tyi yə nə̀ fòŋə yiə̀ ìdzə̀m.

⁸Abu wò tyi dzîy nəniy ayiə yiy, i dziy dzwabə tsə anə yiə yə wè lìy də wày ani səay dzə̀ ayiə yə wò dzày nəniy ani zəŋi tsə nə̀ utuw wiy də̂d tsə aghû yə̀ ghu twe myaʼà ani zuw ayiə yiə̀ à dziy yiy aŋwòə ghu kî wày dzə ani kəli iyiə ìbɛbə ìliy yiy ani dzày kwùmə̀ bə̀ nə̀ ŋgàŋ.

⁹Tswùə tsə ukwə̂d wìy nə̀ ghu ki zuw yə ayiə yə à dzə̀m nə̀ mwe ə̀ ghu yiy dzîy nəniy â ghu. Ghu ki zəŋə tsə nə̀ fôŋ tə ghu tiy ki dzwabə anə ayiə adzə̀m. Ghu ki byilə dzəə nə̀ mwe ghu yiy anə dzə̀ ìbɛbə̀ yìy.

¹⁰Ukwə̂d wìy kə tsoŋ dzə̀ ùfyiə u nə̀ mwe ghu yiy. Ghu kwuni kwu ani fàʼ àyiə àdzoŋə̀ yìy anə ayiə yə nə̀ mwe ghu yiy də ani gaʼ na bə̀ fòŋ tə ghu azoŋə̀ ghu ani zəŋi tsə nə̀ fàʼ kə̀ ghu faʼà nəniy kə nə̀ də ani zəŋi tsə nə̀ aghê ki nyiə̀ mə̀ŋkwiʼi anə ityi dè yə̀ kwùmə̀ yə̀ nə̀ Zə̀kə̀ kə bii fyiə nəniy ŋgaŋ.

¹¹Aŋwòə Zə̀kìy mə dè ŋgaŋ nə̀ fòŋə̀ we ìdzoŋə̀ yìy anə ayiə yə ù bù nəniy ani bii fyi aghê dzə̀m.

¹²Fòŋə̀ ìdzoŋə̀ yə̀ Zə̀kìy dê bə̂ nəniy awò ŋgàŋ, ì mə tyi dè â ŋgàŋ nə̀ ŋgà nyəli maʼà àyiə ŋgàŋ àbɛbə yiy, ŋgà kə na dzə̀ ìsə yiy anə ufyiə u mbyi, ŋgà muə̀ tsə muə̀ tə̀ dzoŋə̀ tìy, ŋgà muə̀ tsə sòʼo mùə̀ tə̀ tə də nəniy tsitsi anə sə k-a-zə̀ fə anə mbyi.

¹³Kə̀ zə̂ dzə̂ nə̀ ŋgà lyimə̂ tsuk fə̀soŋə̀ fə̀ Zə̀ kə ŋgàŋ, nə̀ wù wə̀ ù bii fyiə nəniy ŋgaŋ, toŋə Yesù Kə̀litò, ù nì bè dzwəŋə nəniy ate nə̀ daʼa kə̀soŋə̀ kìy nə̀ ìmwày ìsoŋə yìy.

¹⁴Yesù Kə̀litò kə sà yə̀ uwee u we ani bii fyi ŋgaŋ anə ayiə ŋgàŋ àbɛbə yiy, u zəŋi tsə sòʼò nə̀ ŋgà doʼò tsə aghê àzwe yiy ani zəŋi tsə nə̀ ŋgà doʼò tsə aghee we yə ghu kwu nəniy ighaa yiy ani zəŋi iyiə ìdzoŋə̀ yìy.

¹⁵À yù də̀ ayiə yə wò kwu nəniy ani tyi dè. I kwe yəə fôŋ tə ghù tìy kwà yə̀ sòʼò ghu anə daʼa kə wò kwu nəniy. Kə̀ bɛmə dzə̀ nə̀ wè lìy kòʼ kè wò anə aghě ghè yə̀.