Read Isu Taytùs 3 Bible Online

Taytùs 3 - Isu bible

Taytùs 3

¹Wò kwu ani zə̀ŋi yə̀ àghě Kəzə̀ nə̀ ghu ki zuw yəə awò àghù yə̀ ghu də nəniy utuw wiy, ghu ki zuw yə soʼo awò àghù yə̀ ghu saʼa nəniy inaʼ yiy nə̀ kəə ghu nə̀ ŋwunə dzə̂, ghu ki zəŋə yə soʼo ayiə àdzoŋə̀ yìy.

²Dzǎy yə̀ a ghu nə̀ ghu ki dziy dzə ayiə àbɛbə yiy azoŋə̀ wù lìy. Ghu kwuni kwu kə ani muə anə ibvay nə̀ àghè àdzə̀m, zəŋə yə̀ sòʼò ùfwu nə̀ ghu, taw dè yə̀ sòʼò ùmwamə ùdzoŋə̀ wìy awò àghè dzə̀m.

³Səsə, awò ghə̀d ani bù dòʼò àghě Kəzə̀, ghè kə də̀ tsə̀ aghê àliʼa yiy, ŋge ŋwunə sòʼò awò Zə̀kìy. Zəŋə àyiə àbɛbə yiy. Ghè kə də̀ yəə à də̀ ukwə̂d anə ayiə mbyi anə dzələ tə dzə̀m. Ghè kə də̀ aghê bɛbə yiy, də sòʼò aghee kəghòʼ. Aghê dzə̀mə bà ghə̀d, ghè bà sòʼò àghè dzə̀m.

⁴Zə̀ kə ŋgàŋ kə̀ ù kə bii fyi nəniy ŋgaŋ, u kwuni dè bə̀ ghə̀d nə̀ fòŋə̀ we ìdzòŋə̀ yìy nə̀ iliə yiy,

⁵bii fyi tsə ghəd. À kə wày dzə bòʼ ìyiə ìdzoŋə̀ ìliy yiy ghè kə zəŋi nəniy, ù kə ghəd kwuni bii fyi abidzəmə̀ Zwàykə̀zwe kə kə kə nyiə̀ nəniy ghəd nə̀ ìmùə̀ ìfyiə yiy, zəŋi tsə sòʼò nə̀ ghè doʼò tsə aghê fyiə yiy bòʼ mwuli kə we kə̀ kwoʼo kiy.

⁶Zə̀kìy kə zəŋi tsə nə̀ Zwàykə̀zwekiy bû azoŋə̀ ghə̀d abidzəmə̀ Yesù Kə̀litò wə̀ ù bii fyi nəniy ŋgaŋ,

⁷ani zəŋi tsə nə̀ ghe dê bə̂ fòŋə̀ we ìdzòŋə̀ yìy â ŋgàŋ anə ayiə yə Zə̀kìy də ani bɛmə kə ŋgaŋ nə̀ ŋgà də tsitsi anə sə kə we, ŋgà kəli tsə soʼò imôʼ ìdzoŋə̀ yìy nə̀ ŋgà kî kyilə ŋwò imùə̀ itsà yìy.

⁸Ayiə yə mə dzîy nəniy â wò à də̀ ayiə àsoŋə̀ yìy. Mə liə nə̀ wò ki tsəŋə dziy yə kə ŋwô awò àghù yìy nə̀ ghu dzwumì yə̂ ìtyi dè yə̀ ani zəŋi tsə nə̀ aghû yə ghu bɛmə nəniy Zə̀kìy, ghu nə̀ də ani nìy kə soŋə fə ghu ani fàʼ àyiə àdzoŋə̀ yìy ate, a dzwâbə̀ nəniy kwu sòʼò kəfàʼ awò àghè dzə̀m.

⁹Kə̀ kwuni təm fwumi dzə̀ nə̀ àghù yə̀ ghù dzîy nəniy ayiə àliʼa yiy kwùmə̀ yə̀ nə̀ àyiə àtyaŋə nə̀ tě ghu asəsə yiy, nə̀ àyiə zwaʼa yiy, kwùmə̀ yə̀ sòʼò nə̀ àyiə àtyi dee ulàŋ u Musîs wìy. Ndzoʼò ìzwì i ghè yə̀ kwu dzə way fàʼkìy, utwab wiy wày soʼo ate.

¹⁰I kwa tsə aghû yə̀ ghu zəŋə nə̀ aghê dzâw doʼò soŋə fə mòʼ moo nsòŋə imbè. Abu wò kwà tsə dzə̂ ghu, ghu namə zəŋə yə̂ kə ayiə ghè yə̀, kə̀ kəli dzə̀ iyiə ìliy yiy ani zəŋi nə̀ ghu.

¹¹Wò kwu ŋwòə nə̀ ndzòʼò àghě ghè yə̀ dzìy dzə̀ wày ayiə àsoŋə̀ yìy. Ayiə ghu àbɛbə dê bə̀ ŋwò nə̀ ghu mə saʼ wiy iwee ighu yiy.

¹²Abu mə twum bə̀ nəniy Atemàs akə̀lə̀ ghà, moo Tàykikùs, ghà ki kaw tsə dzəd ani bù kòʼ mìə̀ a Nìkopolìs aŋwòə mə kî də̌ awote anə soŋə fə mbùw ùfəb.

¹³Abu Zenàs, wù wə̀ ù saʼa nəniy nsaʼ tiy kî byay tsə nəniy uwe wiy ani ŋwò fyi bə̀ nə̀ Àpolòs, wò kî fày kə ghu anə yiə yə wò də nəniy ani fày ghu ate ani kòʼ tsə nə̀ ghu kəli ufyiə wə u dzə̀m ghu kwu nəniy ani kəli anə ibwìy i ghu.

¹⁴Aghê ŋgàŋ yìy kwu ani zwiʼi tsə ani nìy kə soŋə fə ghu, ghu zəŋə yə̂ àyiə yə a kwu nəniy fàʼ kìy dzwàbə sòʼò anə ayiə yə ghu də nəniy ani fày yə̀ àghè liy yiy ghu laʼà kê. Ghu kə muə̀ dzə̀ muə̀ tə̀ tə də kwu way fàʼ kìy.

¹⁵Aghû yə̀ mə də fwumi nə ghu, ghu twoŋə zuw bə̀ wò. Twoŋə zuw yə̀ àwizə̂ ŋgàŋ yə̀ ghu bɛmə soʼo Zə̀kìy. Mə gwùŋə̀ nə̀ Zə̀kìy dê ghà nə̀ fòŋə̀ we ì dzòŋə̀ yìy.