Read Isu Filemòn 1 Bible Online

Filemòn 1 - Isu bible

Filemòn 1

¹À ŋwàʼà kə twà bə̀ mìə̀, Pôl, wù wə̀ ghu fê na nəniy bòʼ ntwùm ə̀ ìdzòŋə̀ yə̀ mə nìʼà nəniy kwùmə̀ yə̀ nə̀ Yesù Kə̀litò. Mə də fwumi nə̀ àzə̀ ŋgàŋ Timotì. Mə twâ bə̀ awò wò, a Filemòn. Wò də̌ fwu ghələ ùsòŋə̀ wìy, də̀ sòʼo wè kə̀fàʼ ə̀ Kə̀litò anə ayiə yə ghè də.

²Mə twà yə̀ sòʼò awò Afìyà, àzə̀ ŋgàŋ uyəŋi ù bɛmə soʼò nəniy awò Zə̀kìy. Mə twà yə̀ sòʼò awò Àkipùs, sǔgôʼ ə ŋgàŋ, twà yə̀ sòʼò awò àghě Kəzə̀ yə̀ ghu bê dzəŋə nəniy a ndaw yiə̀, a Filemòn.

³Mə gwùŋə̀ nə̀ Tè ŋgàŋ, Kə̀zə̀ nə̀ Mwe ə̀ mbyi ə ŋgàŋ Yesù Kə̀litò, dè ghà nə̀ fòŋə̀ ìdzòŋə̀ yìy, ghu nyiə̀ soʼò ghà nə̀ ìbvay yiy.

⁴A Filemòn, àzə̀ wam ùsòŋə̀ wìy, sòŋə indzə̀m mə gwùŋə̀ nəniy mə kwe tsə ìzəd yiə̀ anə igwùŋì yə̀ mə gwuŋə̀ nəniy, nyìə̀ yə̀ sòʼò kə̀zòŋə̀ awò Zə̀ kam kiy.

⁵Mə nyiə̀ zòŋə̀ k-a-zə̀ aŋwòə mə zuw ŋwò yəə wò dè nəniy iliə yiy ate awò àghě Kəzə̀ yìy, kwu sòʼò ibɛmə awò Mwe ə̀ mbyi Yesù.

⁶Mə gwuŋə̀ nə̀ yəə wò təm doʼò dzəŋi nə̀ ghə̀d yəə à də̀ aghû yə̀ ghu bɛmə nəniy awò Kə̀litò, ibɛmə i ghè yə̀ kî zəŋi tsə wô nə̀ wò zuw kəli tsə ufyiə ùdzoŋə̀ wə̀ ùdzə̀m ŋgà kwu nəniy anə mùə̀ tə ŋgàŋ yəə ŋgà təm doʼò fwumi nə̀ Kə̀litò.

⁷A Filemòn àzə̀ wam ùsòŋə̀ wìy, Iliə yə wò kwu nəniy awò àghě Kəzə̀ yìy, i mə nyiə̀ miə nə̀ dwiʼi kə̀soŋə̀ kìy, i mə kwe sòʼo fòŋ yam. Fòŋə̀ ìdzòŋə̀ yə̀ wò dè nəniy awò àghě Kəzə̀ yìy ì mə zəŋi nə̀ ghu ki dyoʼo.

⁸Bòʼ ndzòʼò dzəd yə wò dè nəniy iliə yiy ate awò àghě Kəzə̀ yìy, mə mə̀ də̀ ŋwô ani dzày bə̀ àyiə yə wò kwu nəniy ani zəŋi anə dzə̀ ìtaw yìy. Yəə à də̌ wù wə ù bɛmə nəniy awò Kə̀litò, mə kî kwuni dzày dzə̀ wày.

⁹Mə kwuni dzìy dzə̀ wày nə̀ wò kwu ani zəŋi, mə bwoʼo bə̀ kə̀wo nə̀ wò zəŋi yə̂ bòʼ ìliə yə wò kwu nəniy awò àghě Kəzə̀ yìy. Miə Pôl, mə dzîy bə̀ àyiə yə â wò yəə à də dzwən kə wû də̀ sòʼo wè ndàw ntsaʼ bòʼ Kə̀litò.

¹⁰Mə bwoʼo bə̀ wò nə̀ wo kiy nə̀ wò dê fòŋə̀ ìdzòŋə̀ yìy awò Ònisimùs, wà ndàw Kə̀zə̀ wam. Mə maa tyi dè we nə̀ àyiə yiy kwùmə̀ yə̀ nə̀ Yesù yəə mə də nəniy a ndàw ntsaʼ, u bɛmə sòʼò â Yesù anə sòŋə fə ù kə də ndàw ntsaʼ nə̀ mìə̀.

¹¹Izəd i Ònisimùs yìy myiŋə̀ nə̀ à də̀ “Kwu kə fàʼ” Yəə ù kə də bòʼ kwu kə way fàʼ kìy â wò, ù kwuni kwu ŋwô fàʼ kìy nyiə̀ â wò nə̀ â mìə̀.

¹²Mə twumə dzwəŋə bə̀ Ònisimùs â wò, ù də̀ yəə à də̀ bə̂d kə uwè kam. Mə ŋge liə ŋwoə we.

¹³Təə mə mə liə nə̀ ù dòʼò tsə fə nə̀ mìə̀ ani zəŋi tsə nə̀ ù nìy yə̀ bwòʼ kìə̀ ani fày mìə̀, mə nam kwuni də̀ a ndàw ntsaʼ.

¹⁴Mə kwuni tyiŋə dzə̀ wày wô nə̀ wò fây mìə̀. Mə liə nə̀ wò tsə̂m tsə nə̀ noŋə̀ wò ani zəŋi iyiə ìdzoŋə̀ yìy. Yəə i də nəniy ghii, mə kî zəŋi dzə̀ wày iyiə ìliy yiy, à mày kə nə̀ wò mə bɛmə.

¹⁵À nyə̀ ni də nə̀ Ònisimùs kə ŋwò tsə akə̀lə̀ wò anə kə̀mə̀ fə fəsòŋə ani zəŋi tsə nə̀ wò nə̀ də ani dòʼò nə̀ we anə nsòŋə indzə̀m.

¹⁶Ù kàm wày dzə kəkwə̂d nyiə. Ù mə kwuni tsìy fyi kwə̂d kìy. Ù də̌ àzə̀ ŋgà ùsòŋə̀ wìy anə ibɛmə i we awò Kə̀litò. Mə ŋge liə we, wò kwuni kwu ani liə we soʼo tsìy fyi yəə mə liə nəniy we ate. Wò liə we yəə à də̀ kəkwə̂d â wò, liə sòʼo we yəə à də̌ àzə̀ anə ibɛmə yə ù kwu â Mwe ə̀ mbyi.

¹⁷Ì yù dè tsə nə̀ abu wò kwu nəniy miə nə̀ mə də wù wə̀ wò fàʼà fwumə nə̀ we, wò ə gwam na tsə Ònesimùs anə yiə yə wò kwu ani gwam na miə ate.

¹⁸Abu ù kə zə̂ zəŋi bɛb wô nə̀ ìyiə ìliy yiy moo ù kwu nəniy wô nə̀ ndàŋ kə̀liy kiy, wǒ bəb bə̀ awò mìə̀.

¹⁹Mə twâ koŋə yə̀ ì yu nə̀ wo kam kiy. Miə Pôl, mə kî tsəə dzwəŋə bə̀ ŋwòə ndàŋ kə ghè kə̀. Kə̀ zə̂ dzə̀ nə̀ à kə nàʼà mìə ntwùm ə̀ Kə̀litò â wò â Zə̀kiy ni bii fyi wô, ì yîy də̀ yəə à də̀ kəndàŋ wò kwu nəniy â mìə̀.

²⁰Yəə i də nəniy ghii a àzə̀ wam Filemòn, kə̀lə â wò, fày kə miə ani kwe tsə fòŋ yam yəə à də̌ àzə̀ wam wə ù bɛmə nəniy Kə̀litò, wò nîy tsə nə̀ à də̌ dzəd wò fàʼà nəniy ate â Mwe ə̀ mbyi.

²¹Anə ayiə yə mə twâ bə̂ nəniy ŋwàʼà kə̀, mə kwu təŋ ŋwô nə̀ wò kì zəŋi ŋwò ayiə yə mə dzây nəniy. Mə kwu ŋwô nə̀ wò kì bòʼò zəŋə tsìy fyiə ŋwò ayiə yə mə twâ bə̂ â wò.

²²Mə kwu iyiə imòʼ ani dzày fwuli bə̀ â wò. Byay na tsə idzwə i ndaw yiy awò mìə̀ ani bù dòʼò ate aŋwòə Zə̀kìy kî zuw ŋwò ìgwùŋì ghii yiy, ù kî zəŋi tsə nə̀ mə bû dzwoŋi akə̀lə̀ ghà.

²³Èpafàs, ghu fê na fwumi nəniy we nə̀ mìə̀ bòʼ Yesù Kə̀litò, ù tyoŋə zuw bə̀ wò.

²⁴Mâk nə̀ Àlistakùs nə̀ Demàs nə̀ Lukâs, ghu faʼà fwumə nə̀ mìə̀, ghu tyoŋə zuw bə̀ sòʼò wò.

²⁵Mə gwuŋə̀ nə̀ Mwe ə̀ mbyi ŋgàŋ, Yesù Kə̀litò dè wò nə̀ fòŋə̀ ìdzòŋə̀ yìy.