Read Isu Hiblù 1 Bible Online

Hiblù 1 - Isu bible

Hiblù 1

¹Səsə, Zə̀kìy kə dzə̀ŋə̀ tsə̀ nə̀ nə̀ tě nə̀ tě ŋgàŋ ndə̀mə̀ nsoŋə anə dəmə̀ tə̀ dzədlə, nə̀ ù tsìy abidzəmə̀ àghě ntwùm ə̀ Kə̀zə̀.

²A kwuni bû nyiə anə ŋə̀mə̀ tə ŋgàŋ tə̀ mbyi swələ bə̂ nəniy ani mày, ù dzə̀ŋə̀ bə̀ nə̀ ŋgàŋ nə̀ ù tsìy abidzəmə̀ Wà we wə ù sày na nəniy nə̀ ù dòʼò kə̀tuw anə ufyiə udzə̀m. À də̀ sòʼò abidzəmə̀ we Zə̀kìy kə zwubì nəniy mbyi idzə̀m.

³Ù dè bə̀ nə̀ Zə̀kìy də wù ùsòŋə̀ wiy. Ù bvami də̀ sòʼò ighəd yəə à də̀ Kəzə̀ nə̀ ùwe u we wiy. Ù mə zəŋi anə daʼa kə dzə̀ ə̀ we kwu nəniy nə̀ ufyiə wə u də nəniy anə mbyi, u doʼò tsə anə ayiə yə u də nəniy ate. Abù ù bù zəŋi tsə dzə̂ nəniy nə̀ Zə̀kìy nîyzə̂ bɛb tə aghè dzə̀m, u ŋwò kwoʼ zù dòʼò tswi tsə anə ukwe ù nyiə u Zə̀kə̀ kə kwu nəniy daʼa kə kə tsîy fyi nəniy udaʼa udzə̀m.

⁴Yəə Zə̀kìy kə nǐy na kwoʼ kə Wà we ghii, i dè tsə nə̀ Wà we mə ŋge tsìy fyi tsə̀təndii t-a-zə̀ tìy, ighəd anə ayiə yə soʼo ù kə nyiə̀ tsə we nə̀ ìzəd yə i tsîy fyi nəniy azəd ə tsə̀təndii t-a-zə̀ tìy àdzə̀m.

⁵I də ghii aŋwòə Zə̀kìy kə kamə kə̀ dzây kôʼ dzə̂ â tsə̀ndii ə̀ we ùliy wiy a we nə, “Wò də wa nam, zii mə mə dòʼo Təli yiə̀.” Zə̀kìy kə kə̀ dzây soʼò ìyiə ìliy kwùmə̀ yə̀ nə̀ tsə̀ndii ùlìy nə̀ “Mə kî dyòʼò Təli yiə̀, wò ki də Wa nam.”

⁶Abù Zə̀kìy dziy kwuni twum bə̂ Wà we wə ù də nəniy səkiy anə mbyi, u dzày tsə nə̀, “Tsə̀təndii t-a-zə̀ tə̀ tə̀dzə̀m, tə kwu ani fwùlì we.”

⁷Kwùmə̀ yə̀ nə̀ tsə̀təndii t-a-zə̀ tìy, i twâ dòʼò anə ŋwàʼà k-a-zə̀ nə̀, “Zə̀kìy kə zəŋi tsə tsə̀təndii t-a-zə̀ nə̀ ghu doʼò tsə yəə à də̀ kəŋkwùŋì. Zəŋi tsə sòʼò àghě kəfàʼ a we ghu doʼò tsə yəə à də̀ unɛm u məmvə̀lə̀.”

⁸I kwuni twà dòʼò anə ŋwàʼà k-a-zə̀ nə̀ Zə̀kìy kə dzày tsə â Wà we a we nə, “Wô wə̀ wò də soʼo Zə̀kìy, ndàŋ ə̀ kə̀dòŋ yiə̀ kwu way imây yìy! Wò kì saʼa aghù yiə̀ anə isaʼ yə i də nəniy tsitsi.

⁹Wò liə ayiə yə aghê zəŋə nəniy nə̀ a də tsitsi, kwuni dzwəə nə̀ àyiə àbɛbə yə aghê zəŋə nəniy. À yù də̀ ighe miə Zə̀ kiə̀, mə sûw kyili na nəniy wô nə̀ wò kəli tsə kədwiʼi, anə ŋkwiʼi mə mə nyə̀ nəniy â wò nə̀ ìn tsìy fyi ìn mù mə nyiə̀ nəniy awò àghù yə̀ ghu faʼà fwumə nə̀ wò.”

¹⁰I twâ dòʼò sòʼò anə ŋwàʼà k-a-zə̀ nə̀, Zə̀kìy kə dzày yə̀ sòʼò awò Wà we, a we nə, “A Mwe ə̀ mbyi, wò kə də̀ ŋwô awò mbyi ni kaʼ tsə, wò ə zəŋi tsə kəmbvə̀dintsə wò zəŋi tsə sòʼò ùbyiwuŋ nə̀ àwo yiə̀ yìy.

¹¹Soŋə fiy nî bè ŋwò ufyiə ghè wə̀ ni də kàm wày dzə, a kwuni bû wò, wò kì mùə̀ tsà ŋwò; ufyiə ghè wə̀ nì bè dyòʼò bə̀ nə̀ u kâm kwu way fàʼ kìy yəə à də̌ ndzwu tə tə dzwə̂n dzə̂.

¹²Wò nì kwuə ŋwò kə ghu yəə à də̀ sâʼ kə ndzwu; wò kwuni kə ghu yəə wù nì kwunə nəniy ndzwu tə̀dzwunə tiy. Akwuni bû wô, wò nì kwuni kòʼ wày, wò nì mùə̀ tsà ŋwò.”

¹³À kə də̀ awò tsə̀ndii ìghâ yìy Zə̀kìy kə dzây kôʼ dzə̂ a we nə, “Dòʼo tswi tsə anə ukwe wam ùnyiə wiy ani zù kùm soŋə fə mə kî nìy nia bə̂ aghû yə̀ ghu dzwəə nə̀ wô a təŋə ifwe yiə̀ tə̀ wò gaʼ kə awuu yiə̀ a zòŋə̀ ghu ə?”

¹⁴Tsə̀təndii t-a-zə̀ tìy ba kwu fàʼ kə̀ ghaa kiy? Ghu faʼà awò Zə̀kìy. Zə̀kìy twumə bə̀ ghu nə̀ ghu bû fây àghù yə̀ ù nì bii fyiə nəniy ghu.