Read Isu Hiblù 10 Bible Online

Hiblù 10 - Isu bible

Hiblù 10

¹Ulâŋ u aghě Dzû wə̀ kə màŋ də̀ tsəe kə yiə àdzoŋə̀ yə̀ a kə namə bê nəniy. À yù də̀ iyiə i te yiy ghu kə sâ anə nsòŋi ndzə̀m ŋəmə̀ tə̀ ŋəmə̀, lâŋ kə ghà kə̀ də̌ mə̀yə ani zəŋi aghû yə̀ ghu kə liə ani zù a akə̀lə̀ Kə̀zə̀ nə̀ ghu doʼò tsə nə̀ ghu kwu way utswə̂d ù liy wiy ani kòʼ Kə̀zə̀ ə?

²Bəə à kə də nə̀ aghû yə̀ ghu fwulə̀ nəniy Zə̀kìy nə̀ ghu maa ndzə̀m dòʼò nə̀ ghu kwu way udzə wiy, ghu kə də kàmə̀ də̀lə̀ wày nə̀ tuw kiy anə ibɛb i ghu, ghu kə bwi na yə̂ ani sà ùfyiə.

³Yəə i kə də nəniy ghii, ufyiə wə ghu kə sâ nəniy u zəŋə nə̀ ghu ki moʼo tsə ayiə àbɛbə yə ghu kə zəŋə nəniy,

⁴aŋwòə kâŋ tə tə mbòŋ tə̀ nə̀ kàŋ tə təbyi tə̀ kə wày dzə ani sùw màʼà kòʼ ayiə àbɛbə yiy.

⁵À yù də ighe Kə̀litò kə bû fəə anə mbyi, u dzày yə̀ awò Zə̀kìy a we nə, “Wò mə bwi ufyiə ù saa wə nə̀ ùfyiə wə ghu nyiə̀ bə̂ awò wò, wò mə kwuni byay na uwe nam wiy ani sà nyə̀ â wò.

⁶Ufyiə ù sâ wə̀ kamə zəŋi dzə̂ nə̀ wò ki dyoʼo, u fyiə wə ghu nyiə̀ bə̂ nə̀ wò nìyzə̂ bɛb tə ghu u kamə zəŋi soʼò nə̀ wò ki dyoʼo.

⁷Mə dzày tsə nə̀, ‘Miə wə fə, a Zə̀kìy, mə mə bù ani fàʼ àyiə yə wò tsə̀m tsə nəniy, ighəd anə yiə yə i twâ doʼò ate anə ŋwàʼà kə ulàŋ nə̀ mə kî fàʼà ŋwò.’ ”

⁸Anə yiə yə ù kə boʼò dzày tsə nə̀, “Ufyiə wə ghu sâ nəniy, nə̀ nyàm tə̀ pyaʼa tə nə̀ ufyiə wə ghu nyiə̀ nəniy nə̀ wò nîyzə̂ bɛb tə ghu, nə̀ ufyiə wə ghu maŋə̀ nyiə̀ nəniy, u kamə zəŋi kôʼ dzə̂ wô a Zə̀kìy nə̀ wò ki dwoʼo.” (Yiə i tsəm boʼò də kə nə̀ ghu kə ùfyiə wə̀ nyə̀ anə làŋ kə Musîs, u namə zəŋə dzə̀ wày nə̀ wò ki dyoʼo.)

⁹U dzày fəli tsə awò Zə̀kìy nə̀, “Miə wo, a Zə̀kìy, mə kî fàʼà ŋwò ayiə yə wò tsə̀m tsə nəniy.” Yesù kə ghî dzìy ani dè tsə nə̀ Zə̀kìy mə kwuni dzəd ìwîy yə̀ ù kə nîyzə̀ ə̀ tsə̂ bɛb tiy ate, na bə̀ Kə̀litò yəə à də̌ wù wə̀ ù dziy sâ anə dzə̀d ìfyiə yə̀ ù kwu ani nìyzə̀ tə̀bɛb ate.

¹⁰À də̌ bòʼ ìyiə yə Yesù kə fâʼ tsə ayiə yə Zə̀kìy liə, a zəŋi nəniy nə̀ ŋgà zwu doʼò tsə abidzəmə̀ ùwee u Kə̀litò wə̀ ù kə sâ təŋ tsə inyi mòʼ awò àghè àdzə̀m.

¹¹Aghê àlwaʼa kə fàʼà tsə̀ kə fàʼ kə ghu ntsuk indzə̀m ani sà ùfyiə, ghu tsə̀ŋə̀ sà kwùnə̀ tsə̀ kə ŋwò ndə̀mə̀ nsòŋə, nə̀ ù bòʼò wày ani zəŋi nə̀ wù zwu dòʼò tsə anə bɛb tə we.

¹²Abù Kə̀litò kwuni sà yə̂ dzə̂ ùwee u we wiy yəə à də̀ fyiə kə̀ saa kə kə doʼò təŋ nəniy, u sà tsə kə soŋə fə mòʼ anə bɛb tə ghè dzə̀m. U dyaŋi zù dòʼò tswi tsə anə ukwe u Kə̀zə̀ ù nyiə wiy.

¹³Ù nyə̀ lyimə kə nə̀ Zə̀kìy nîy bə̂ àghù yə̀ ghu dzwəə nəniy we a təŋi ifwe i we, ghe gaʼ kə awuu azoŋə̀ ghu.

¹⁴Yəə ù kə sâ tsə nəniy uwee uwe wiy soŋə fəmòʼ u zəŋi tsə aghû yə̀ ù sùw màʼà dzə̂ ghu nə̀ ghu doʼò tsə nə̀ ghu kwu way utswə̂d wìy anə nsòŋə indzə̀m.

¹⁵Zwàykə̀zwekiy dê sòʼò â ŋgàŋ nə̀ iyiə yə̀ də̌ ìsoŋə̀ yìy. Mwe ə̀ Mbyi kə səsə kiy dzây tsə nə̀,

¹⁶“À yù də̀ tɛb kə fyiə kiy mə kî zəŋə tsə nə̀ àghù yamə, abu soŋə fiy kpe tsə. Mə ki kwe na nyi yə̂ ùlàŋ wam anə fòŋ tə ghu, mə twâ na yə̂ soʼò anə mòʼ tə ghu.”

¹⁷U dzày kwe fwuli tsə sòʼò nə̀, “Mə kî nìyzə̀ ə̀ ŋwò bɛb tə ghu tiy, mə ki də kàmə̀ myìŋì dzə̀ wày ayiə àbɛbə yə ghu zəŋi nəniy.”

¹⁸I dê tsə nə̀ bəə Zə̀kìy nîyzə̀ tsə nəniy ibɛb yiy, wù kàm kwu dzə̀ way ani sà fyiə kə̀liy kiy anə ibɛb ighè yə̀.

¹⁹Awizə̂, yəə Yesù kə sà kâŋ tə we tiy bòʼ ŋgàŋ, ŋgà mə kəli fôŋ tə̀ taw tiy nyiə, ani zù nyi kwoʼ dyaŋi yə̀ a Lòʼo kə̀ zwêzwe kə.

²⁰Ipfə i Yesù yìy kə fwiy kə bə̂d kəndzwu kə kə fê na nəniy lòʼo kə̀ zwêzwe kə ani dè bə̀ dzə̀d ìfyiə yìy â ŋgàŋ ani zù ate akə̀lə̀ Kə̀zə̀.

²¹Yəə ŋgà kəli dzə̂ wè ùlwaʼà ù nènè wìy a ndàw Kə̀zə̀,

²²I dzwâbə̀ nə̀ ŋgà zû a kə̀lə̀ Kə̀zə̀ nə̀ àyiə àsoŋə̀ anə fôŋ, nə̀ ŋgà mə gaʼ na mà fôŋ tìy azoŋə̀ we, nə̀ fòŋ tə̀ zwe tiy ani dè tsə nə̀ wù lìy kàm wày dzə ani dzày nə̀ ŋgà mə zəŋi bɛb, nə̀ iwee yə ghu sûw màʼà dzə̂ anə mwi mə̀ zwêzwe mìy.

²³Ŋgà təmi taw tsə kə anə ayiə yə ŋgà dzîy nəniy nə̀ ŋgà mə gaʼ na mà fôŋ tìy awò Zə̀kìy, aŋwòə Zə̀kə̀ kə tɛb na nəniy ŋgaŋ, ù wày dzə ani bvə̀ màʼà kòʼ ŋgàŋ.

²⁴Ŋgà ki ndzəmə moʼo tsə dzələ tə ŋgà də ani ŋwùmə̀ kə aghê ate ani liə yə̀ iwee, zəŋə yə̀ sòʼò ayiə àdzoŋə̀ yìy.

²⁵Kəə ŋgǎ nì nyilə myaʼà ùmwamə ù təmə dzəŋə wə, anə yiə yə aghê àliy zəŋə nəniy, ŋgà ki kwuni tsəŋə kwe ndwuŋə yəə fôŋ tə awizə̂ ŋgàŋə̀, ŋgà ki tsəŋə zəŋə zee kə isə aŋwòə tsuk fə Mwe ə̀ mbyi dziy bû saʼ mbyi ate, fə mə təb mà.

²⁶Abu ŋgà tsəmə̀ zəŋə yə̂ kə ayiə àbɛbə nə̀ ŋgà mə ndzə̀m kəli tsə utwab wiy anə ayiə Kə̀zə̀ àsoŋə̀ yə̀, fyiə kə saa kə̀liy kiy kâm wày soʼo a lòʼo kə̀liy kiy ani nìy ŋwò ìbɛb ighè yə̀.

²⁷À kì mày kə â ŋgàŋ ani ləmə isaʼ i Kəzə̀ yìy anə itsəŋ nə̀ uvə̀lə̀ wə aghû yə ghu də liə way Zə̀kìy ghu nî fwuə nəniy ate.

²⁸Bəə wù kə zaʼa tsə nəniy lâŋ kə Musîs kìy, ghu kwu ani wiy we nə̀ ghu kə̀ kwoʼ nəway nə̀ mwulikiy, abu ghu saʼ tsə wô aghê à bè moo à ti bɛmə kə nə̀ wò mə zaʼ.

²⁹Ghà môʼ tsə ndzòʼò fyày fyày kə mfəm kə kə kî bè nəniy azoŋə̀ àghù yə̀ ghu koʼò kee Wà Kə̀zə̀, kòʼò kè kàŋ tə tɛb kə̀ fyiə kə tə kə sûw maʼà bɛb tə ghu tiy, yəə à wày fyiə kə̀ liy kiy, ghu maŋə̀ nyàʼà nəniy Zwàykə̀zwe kə Zə̀kə̀ kə dê nəniy ghu nə̀ fòŋ ìdzoŋə̀ yiy.

³⁰I də aghii aŋwòə a kwu ŋwoə wù wə̀ ù kə dzây tsə nəniy nə̀, “À kì ŋwà dzwəŋə yə̀ mìə̀, mə kî tsəə dzwəŋə yə̀ ìbɛb i ghu” dzày tsə sòʼò nə̀, “Mwe ə̀ mbyi nî saʼa ŋwò aghê we yiy.”

³¹À tòʼò də̌ fyày fyày kə iyiə â Zə̀kə̀ kə kwu nəniy daʼa kiy tsìy fyi ufyiə udzə̀m ani nyə̀ wù nə̀ mfəm.

³²Ghà môʼ dzwoŋi yə̂ yəə ghà kə bôʼ zuw kəli nəniy ntwùm ə̀ Kə̀zə̀ ate. Ghà kə tsìy anə ndə̀mə̀ ndə̀mə̀ tə məntswə̀d, ghǎ kwuni nam gaʼ na kə tə̀fòŋ azoŋə̀ Kə̀zə̀.

³³Aghê kə nyàʼà ghà nə̀ ndaa, bwalə gha, ghǎ namə dzìy kə nə̀ ghà pfə dzəŋə nə̀ àghù yə̀ ghu fyaʼa soʼò yəə à də̀ gha.

³⁴Ghǎ mwe dzəŋə nə̀ àghù yə̀ ghu də a ndàw ntsaʼ, ghu bii ŋwò ùfyiə ghii, ghǎ kwuni səaŋə yə̀ kə ŋwò aŋwòə ghà kə kwu ŋwô nə̀ ghà kwu fyiə kə kə dzwâb tsìy fyi nəniy nə̀ kə dyòʼò tsà ŋwò.

³⁵Kəə ghǎ nə̀ kamə̀ bvə̂ səə nəniy, ghà kəli tsə fôŋ tə̀ taw tiy aŋwòə ghà nîy kilə ŋwò namə kə̀soŋə̀ kìy ate.

³⁶Ghà ki tsəŋ kwu kə ani kwù tə̀fòŋ ani zəŋi tsə nə̀ ghà fâʼ àyiə yə Zə̀kìy liə nəniy, tə̀ ghà ki kəli fyiə kə ù tɛb na nəniy.

³⁷Aŋwòə ŋwàʼà k-a-zə̀ kìy mə dzày nə̀, “Anə fəkə̀mə̀ kə ghi a ki kòʼ wù wə̀ ù kwu nəniy ani bù, ù bè nəniy nə̀ ù ìkwe yiy kə̀ fə̂d nəway.

³⁸Aghû yam yə ghu də nəniy tsitsi ghu kwu ani bvami tsə̀ŋ gaʼ na kə tsə kə fôŋ tə ghu azoŋə̀ mìə̀, tə̀ ghu ki muə, mə kî kwuni dyoʼo sòʼò wày nə̀ wù wə̀ ù tuu bvə̂ dzwoŋi yə̂ ibàm.”

³⁹Yəə ŋwàʼà k-a-zə̀ kìy dzây nəniy ghii, ŋgà kwuni wày dzə tee à də̀ aghû yə̀ ghu tuu bvə̂ dzwoŋi dzə̂ mòŋ zù anə dzəd yə ghu nî nìì nəniy ate an-a-nsə̀àŋì, ŋgà kwuni də̀ aghû yə̀ ŋgà gaʼ naa fôŋ tìy azoŋə̀ Zə̀kìy, ŋgà kî nyiə ŋwò tuw kiy.