Read Isu Hiblù 11 Bible Online

Hiblù 11 - Isu bible

Hiblù 11

¹Ibɛmə yiy də ani na tsə fòŋ anə ufyiə wə ŋgà də kòʼò dzə̀ wày. I də soʼo nəniy nə̀ ŋgà səmə̀ dzə̀ wày anə ayiə yə ŋgà moʼò nəniy nə̀ a nî fyiə ŋwò.

²Zə̀kìy kə bɛmə aghee səsə yə bòʼ fòŋ tə̀ ghu kə gaʼ na nəniy azoŋə̀ Kə̀zə̀.

³À də̀ abidzəmə̀ ibɛmə ŋgà zuw kəli tsə nə̀ Zə̀kìy kə mbyi yə̀ zwubì anə làŋ kə dzə̀ ə̀ we, ufyiə wə ŋgà koʼò nəniy ù kə zwùbì kə anə ufyiə wə ŋgà də kòʼò dzə̀ wày.

⁴À də̌ bòʼ ìbɛmə yə Ebèl kə kwu azoŋə̀ Zə̀kìy, u sà tsə fyiə kə̀soŋə̀ kìy nyiə̀ yə̀ â Zə̀kìy tsìy fyi tsə Kên. Zə̀kìy dzày tsə nə̀ ù də̌ wè tsitsi anə ufyiə ùdzoŋə̀ wə̀ ù kə sâ nəniy. À kə də̌ bòʼ ìbɛmə yə ù kə kwu nəniy u gaʼ na yə̀ fòŋ ə̀ we azoŋə̀ Zə̀kìy, abù yiə ù bòʼ pfə kə nəniy ghi, fàʼ kə we kiy namə dzə̀ŋə̀ kə ŋwò.

⁵À kə də̀ abidzəmə̀ ìbɛmə, Zə̀kìy kə nîy ŋwô kwoʼ kə nəniy Enòk an-a-vələ nə̀ ù də̌ ùtâw wìy. Ghu kaw kè yə̀ we aŋwòə Zə̀kìy maa nìy ŋwòə we. Awò Zə̀kìy ani nìy ŋwò kwoʼ nə̀ we, à kə də̌ nə̀ ù mə zəŋi ayiə yə Zə̀kìy liə nəniy.

⁶Abu wù də kwu way ibɛmə yiy, wù ù ghè wə̀ wày dzə ani zəŋi dzə̀ fòŋə̀ Kə̀zə̀ nə̀ ì dzwàb. Abu à də kə ndiə ù bè nəniy akə̀lə̀ Kə̀zə̀ ù kwu ani kəli tsə ibɛmə nə̀ Zə̀kìy də ŋwô, ù kəli tsə sòʼò ìbɛmə nə̀ Zə̀kìy niamə ŋwò aghû yə̀ ghu ndzəmə̀ khuu dzəd ani kòʼ we.

⁷À kə də̀ ibɛmə i kə zəŋi tsə nə̀ Nuwà zuw kəli tsə itswû yə̀ Zə̀kìy kə tswû yə̂ nəniy we ate kwùmə̀ yə̀ nə̀ ùfyiə wə ù kə də kamə kòʼò dzə̀ wày. Nuwà kə zuw yə̀ àyiə yə Zə̀kìy kə dzîy, u fyìə̀ tsə mfə̀n kə̀ nê kìy ani fày fyi isəd i ndaw iwe ate nə̀ ùwe u we wiy. Zə̀kǐy nyə̀ tsə mfəm anə mbyi na tsə Nuwà nə̀ à də̌ wù səsə wiy anə aghù yə̀ ghu nî mùə̀ nəniy muə̀ tə̀ tə də nəniy tsitsi bòʼ ìbɛmə yə ù kə kwu.

⁸À kə də abidzəmə̀ ibɛmə yiy Ablàhâm kə zuuw yə̂ awò Zə̀kìy, yəə Zə̀kìy kə toŋə tsə nəniy we dzày yə̀ nə̀ ù nyəli tsə loʼo kə ù kə muə nəniy ate, ù zù anə inaʼ yə ù na nəniy â we. U bvwami ŋwò yə̀ nə̀ ù bòʼò kwu dzə̀ wày loʼo kə ù zè nəniy ate.

⁹Bòʼ ìbɛmə yə Ablàhâm kə kwu nəniy â Zə̀kìy, u zù mùə̀ yə̀ anə inaʼ yə Zə̀kìy kə tɛb na yəə à də wù wə̀ ù bwìy tsìy nyi bə̂. Ù kə mùə̀ anə umfwùə. Ayzìk wà we ù kə muə tsə̀ sòʼò anə umfwùə, Dzàkôb wà Ayzìk ə mùə̀ sòʼò anə umfwùə, Zə̀kǐy tɛb tsə sòʼò ghu nə̀ tsə kə ù kə tɛb â Ablàhâm.

¹⁰Ù kə nia way isə yiy ani mùə̀ anə umfwùə aŋwòə Ablàhâm kə lyimə inaʼ yə Zə̀kìy bwam nəniy tsə kə we kiy də̀ sòʼo wù wə̀ ù bwam nəniy inaʼ i ghà yə̀.

¹¹À kə də̌ bòʼ ìbɛmə yə Ablàhâm kə kwu nəniy, i kə zəŋi nə̀ ù kəli tsə kədaʼa ani boŋ byi bə̀ wa nə̀ ù mə ŋge dzwə̀n nə̀ wìy we Sèla də kəŋkà nə̀ ù mə dzwə̀n tsìy sòʼò ani byi. Ablàhâm kə bɛmə ŋwô nə̀ Zə̀kìy kî nia ŋwò tɛb kə we kiy.

¹²Yəə Ablàhâm kə tsəb də kə nə̀ ù mə ŋge dzwə̀n u kàm bù kəli bə̀ àwi wa ghu dùw tsə yəə à də̀ mənsǐbə̂d an-a-byiwuŋ, ghu dùw tsə sòʼò yəə à də kəsisi anə iŋgwùŋə i dzwî ì nè nè yìy.

¹³Aghû yə̀ ə mùə̀ bù pfə ŋwò àdzə̀m nə̀ ghu nam kwu kə ibɛmə anə fyiə kə Zə̀kìy kə tɛb na â ghu. Ghu pfə ŋwò nə̀ ghu kamə kəli dzə̂ ùfyiə wə Zə̀kìy kə tɛb na â ghu. Ghu maa kwuni kəli na nə̀ ufyiə u ghè wə̀ ùdzə̀m nì bè fyiə ŋwò, ghu ŋge dyoʼo nə̀ tɛb kə ghè kə̀ kì bè fyiə kə̀soŋə̀ kìy. Ghu kə kwu ŋwô nə̀ ghu bwîy bù ŋwò fə an-a-mbvə̀dintsə, ghu mâŋ dzǐy dzə̂ muə̀ tsə fə anə kə̀mə̀ fə fə sòŋə.

¹⁴Aghû yə̀ ghu dzîy tsə̂ nəniy ndzòʼò àyiə yə, i dê tsə nə̀ ghu ghî khu tsə̀ inaʼi yə ghu kî dzìy tsə nə̀ à də̀ inaʼ i ghu.

¹⁵Bəə à kə də nə̀ ghu kə mòʼò ìnaʼ yə ghu kə ŋwô fyiə bə̂ ate, ghu kə dzǐy kyilə ŋwòə dzəd ani zù dzwoŋi ibàm.

¹⁶Ghu kə kwuni mbvùŋə̀ kòʼò yə̀ inaʼ ìdzoŋə̀ yìy, Inaʼ ghè yə̀ i də an-a-vələ. À yù də ighe Zə̀kìy də də̀lə̀ dzə̀ wày nə̀ tuw kiy abu ghu tyoŋə tsə we nə̀ à də̌ Zə̀kə ghu, aŋwòə ù maa byay na inaʼ yiy â ghu.

¹⁷Bòʼ àyiə yə Ablàhâm kə bɛmə awò Zə̀kìy gaʼ na yə̀ fòŋ azoŋə̀ Zə̀kìy, ù maa nìy kə Ayzìk ani zù sà nyə̀ yə̀ â Zə̀kìy, anə sòŋə fə Zə̀kìy kə mwâm kòʼ tsə we. Ablàhâm kə də̌ wù wə̀ Zə̀kìy kə tɛb na nə̀ ù nì kyilə àwi wa anə idùw, abidzəmə̀ Ayzìk. U nam bɛmə kə ani sà yə̀ sòʼò sòʼ kə wà we â Zə̀kìy.

¹⁸Zə̀kìy maa dzày â Ablàhâm a we nə, “À də̀ abidzəmə̀ Ayzìk wò nì kyilə awi wa yə mə tɛb na nəniy.”

¹⁹Ablàhâm kə bɛmə kə ani sà Ayzìk aŋwòə ù kə kwu ŋwô nə̀ Zə̀kìy də ŋwô ani bwad zɛ̀m dzwoŋi bə̀ Ayzìk anə ipfə, a də ani dzày tsə nə̀, kwùmə̀ yə̀ nə̀ àyiə yə a kə fyi nəniy nə̀, Zə̀kìy maa zɛ̀mə̀ ŋwò bə̌ wà Ablàhâm anə ipfə nyə̀ dzwoŋi yə̀ â we.

²⁰À kə də̀ ibɛmə i kə zəŋi tsə nə̀ Ayzìk dzày tsə awò Dzàkôb, nə̀ Isàw yəə Zə̀kiy kî lwì nəniy ghu ate nə̀ ghe mə pfə.

²¹À kə də̀ abidzəmə̀ ìbɛmə yiy Dzàkôb kə lwî tsə nəniy awa Yùsə̂f yìy yəə ù dziy pfə. Yəə ù lwì nəniy ghu, u zoʼo yə̀ anə ŋgwàlə̀ mbàŋ fwùlì tsə Kəzə̀.

²²Bòʼ ìbɛmə yə̀ Yùsə̂f kə kwu nəniy â Zə̀kìy yəə soŋə fə we fə̀ pfə fiy kə swələ bə̂, u dzày yə̀ àyiə kwùmə̀ yə̀ nə̀ awa Islàel, nə̀ ghu nî ŋwòə̀ fyiə bə̀ ŋwò anə inaʼ i Idzìp. U dzày na tsə sòʼò àyiə yə ghu nî zəŋə ate nə̀ ivən iwe yiy.

²³À kə də abidzəmə̀ ibɛmə yə nə̀ tě Musîs kə nûw na nəniy we anə təndzoŋə iti anə yəə ghu byi tsə we, aŋwòə ghu kòʼ tsə nə̀ ù də̌ wà ùdzòŋə̀ wìy. Ghu kə kə̀ tsəŋ soʼò ani twe màʼà làŋ k-a-dòŋ.

²⁴À kə zəŋi ibɛmə nə̀ Musîs twe màʼà nə̀ ghu kə toŋə dzə̀ ighe nə̀ ghe də wà Felò ùyəŋi wiy yəə Musîs kə nɛmə kə nəniy.

²⁵Ù kə kwuni bɛmə təŋ kə ani fii fwumi nə̀ àghě Kəzə̀ yìy, tsìy fyi ani dwiʼi anə ibɛb anə kə̀mə̀ fə fəsòŋə.

²⁶Ù kə bɛmə ŋwô nə̀ ghe kəli tuw kə̀dələ kìy bòʼ Kə̀litò, aŋwòə ù kə tsìy fyi ŋwô ikwum yə i də anə inaʼ i Idzìp, u lia yə̀ kə̂ namə kə̀soŋə̀ kə̀ kə də nəniy isə.

²⁷À kə də ibɛmə i kə zəŋi tsə Musîs nə̀ ù ŋwò fyi anə inaʼi Idzìp nə̀ ù tsəŋə way iyiə yə dòŋ kə Idzìp kìy kə də ani zəŋi nə̀ we. U kwù tsə fòŋ twe màʼà ani dzwoŋi ibàm yəə wù ni dzây nə̀ ù kòʼò yə̀ ŋwòə Zə̀kə̀ ŋgà də wày dzə ani kòʼ.

²⁸À kə də̀ abidzəmə̀ ibɛmə yiy Musîs kə kaʼ tsə nəniy ani byay na inyi i ŋkà mə̀tâzaʼà mìy, u dzày yə̀ awò aghě Islàel nə̀ ghu nîy kə təkâŋ ghu kyili kə anə utuw fə̀b mə̀ tə̀ndaw mə̀ ghu, tə̀ kəə tsə̀ndii ì pfə nə̀ wiy dzə̂ awa Islàel iŋə̀mə̀ asəsə yiy.

²⁹À kə də bòʼ ibɛmə yə aghě Islàel kə kwu awò Zə̀kìy, ghu dàŋ fyi yə̀ dzwì ìbaŋə̀ ì nè yə̀, bwìy tsìy yə̀ anə mbvə̀dintsə kə̀ zwum kiy. Abù aghee Idzìp yìy mboŋ dziy dâŋ soʼò dzwì ighè yə̀ ə kwuŋi màʼà tsìy tswi yə̀ ghu àdzə̀m.

³⁰À də ibɛmə i kə zəŋi nəniy nə̀ ubâʼ u mbà u Dzèlikò nə̀ u bvə̂ fyi tswi bə̂, yəə aghee Islàel kə bwîy tsîy kwùm yə̂ anə ntsukə i nsèmbe.

³¹À kə də̀ ibɛmə i kə zəŋi nə̀ ghu kə wiy màʼà dzə̀ə, kpàlə̀ kə̀ ghu kə tyoŋə nə̀ à də̀ Lahàb, nə̀ àghù yə̀ ghu kə də zəŋə way ayiə yə Zə̀kìy liə, aŋwòə ù kə nìy na bə̀ àghù yə̀ ghu kə dziy zû baŋ kôʼ tə̀ loʼo anə wokə̀ dzoŋə kìy.

³²Mə də ani kàm dzày nə̀ indiə? Mə kwu way soŋə fiy ani dzày àyiə kwùmə̀ yə̀ nə̀ Gidìyòn, nə̀ Balàk, nə̀ Samsə̀n, nə̀ Geftà, nə̀ Devìd, nə̀ Samwèl, nə̀ aghě ntwùm ə̀ Kə̀zə̀ yìy.

³³Ghu kə ŋwày tsam nə̀ nàʼà tə̀dzəm tədzə̀m, təm nyi kə abidzəmə̀ ibɛmə ighu yiy. Ghu fàʼ tsə ani kòʼ nə̀ ayiə àdzə̀m ghu kə zəŋi nəniy a də tsitsi, kəli kə sòʼò fyiə kə Zə̀kìy kə tɛb na â ghu. Ghu àliy yiy boʼ ìbɛmə yə ghu kə kwu awò Zə̀kìy, ghu kəmə na adzwə unyàkhì.

³⁴Ghu àliy yiy bòʼ ibɛmə yə ghu kə kwu â Zə̀kìy, ghu nəm màʼà nɛm kə uvə̀lə̀ kə̀soŋə̀ kìy, tu fyi anə ipfə yəə ghu kə dziy wiy ghu anə kwab. Ghu kə də̀ tsə̀ aghê lay yiy Zə̀kìy zəŋi tsə ghu nə̀ ghu bû doʼò àghè taw yiy, ghu bù dòʼò àghè àsoŋə̀ anə tsam, təm nyi kə sǔgôʼ tə nàʼà tə̀liy tə, dzwùm ŋwò fyi yə̀ ghu.

³⁵À kə də̌ bòʼ ìbɛmə yə iyəŋi àliy kə kwu nəniy awò Zə̀kìy nə̀ ù kì zɛ̀mə̀ ŋwò dzwəŋə bə̀ ŋwò tɛmə̀ tə ghu tə̀liy tiy, u zɛ̀mə̀ ŋwò dzwoŋi bə̀ sòʼò ghu. Ghu bwad àliy yiy ghu kə twe nəniy nə̀ ghu nyilə myìʼà dzə̀ wǎy Zə̀kìy aŋwòə ghu kə kwu ŋwô nə̀ abu ghu pfə kə ŋwô, ghu kî kyilə ŋwò imuə̀ yə̀ itsîy fyi nəniy.

³⁶Ghu nyàʼì àliy, bwad sòʼò ghu, nìy àliy kwe təntsaʼ anə ikwe i ghu, na nyi yə̀ sòʼò ghu a ndàw ntsaʼ.

³⁷Ghu tyimi wiy màʼà àliy nə̀ àtay yiy, àliy ghu suu byèlì màʼà ghu anə ubə̀d ùbè anə Sǒ, ghu tsuk wiy màʼà àliy anə kwab. Ghu dzə̀ŋì bwìy tsə̀ nə̀ gùw təndzwù tìy nə̀ gùw tə təbyi tiy anə iwè bwìy kyabə tsə̀ nə̀ ghe tiy yəə à də̀ təndzwu. Ghu la tsə, aghee, fyimi kyabi tsə̀ ghu, tswə̀lə̀ sòʼò ghu.

³⁸Mbyi kə ndwàmə̀ dzwàbə̀ dzə̀ wày â ghu ani mùə̀ ate. Ghu làʼà kyabə tsə̀ a mbvə̀nə̀ kə̀sisi anə tədoŋə, mùə̀ kyabi tsə̀ anə utìy, mùə̀ sòʼò anə ubwòʼ a mbvə̀dintsə.

³⁹Yəə aghê kə tsəbə kyalə kə aghû yə̀ àdzə̀m anə ibɛmə i ghu, aghû yə̀ kə kə̀ kəli dzə̂ nəway fyiə kə Zə̀kìy kə tɛb na nəniy.

⁴⁰Zə̀kìy kə ghî zəŋi aŋwòə ù maa kàm byay na fyiə kə kə dzwâb tsîy fyi nəniy, nə̀ ghu nî kyilə fwumə nə̀ ŋgàŋ. À də̀ fyiə kə ghè kə̀ kə kî zəŋə tsə ŋgaŋ nə̀ ghu ani doʼò tsə nə̀ a kwu way utswə̂d ùliy wiy.