Read Isu Hiblù 13 Bible Online

Hiblù 13 - Isu bible

Hiblù 13

¹Ghà ki tsəŋə liə iwee nəli yiy yəə à də̀ awizə̂ anə i yiə i Kəzə̀.

²Ghà kì myiŋə tsə ani ŋgwam na dzwàb tsə aghû yə̀ ghu bwîy bê nəniy a ndaw təli. Aŋwòə aghê liy maa zəŋi ghii ghu ŋgwam na dàŋ tsə̀ tsə̀təndii t-a-zə̀ nə̀ ghu kwu way.

³Ghà ki moʼo tsə ani fày àghù yə̀ ghu də nəniy a ndàw ntsaʼ yəə wù ni dzày nə̀ ghà də sòʼo a ndàw ntsaʼ nə̀ ghu. Ghà ki myiŋə tsə soʼo aghû yə̀ ghu fyiʼa nəniy yəə wù ni dzây nə̀ ghà fyaʼa sòʼò ŋwò nə̀ ghu.

⁴Aghê àdzə̀m kwu ani nyə̀ tsə məŋkwiʼi anə iwè ìnìy yiy yìy anə dzə̀lə tədzə̀m. Kəə ŋəm nə̀ wiy nə̀ bwìy dzə̂ mwàŋ tìy, aŋwòə Zə̀kìy nî saʼa ŋwò aghû yə̀ ghu lyaŋə nəniy, nə̀ àghù yə̀ ghu bwîy nəniy mwàŋ tìy.

⁵Ghà kə ŋge kəli dzə̀ asə ə ukhiy yiy. Ghà ki dyoʼo nə̀ ùfyiə wə ghà kwu nəniy, aŋwòə Zə̀kìy mə dzày nə̀, “Mə kî bvə̀ màʼà kòʼ dzə̀ wày gha, mə kî nyəli màʼà kòʼ dzə̀ wày gha.”

⁶Ŋgà də nyiə ani dzày tsə nə̀ fòŋ tə̀ taw tiy anə yiə yə wù lìy kə dzây tsə nəniy nə̀, “Mwe ə̀ mbiy də wù wə̀ ù fìì nəniy miə, mə kî tsəŋə dzə̀ wày. Wù də̀ ani zəŋi mə̀ yiə nə̀ mìə̀ yə?”

⁷I myiŋə̀ tsə nənìy aghû ghi yə ghu kə də tsə utuw wiy, ghu kə niʼà tsə̂ nəniy ntwùm ə̀ Kə̀zə̀ â ghà, ghà myìŋi tsə imuə̀ yə̀ ghu kə muə tsə nəniy, tə̀ ghà ki dzwumə yəə wuu kə ibwìy kə ghu kiy anə yiə yə ghu kə bɛmə Zə̀kìy ate.

⁸Yesù Kə̀litò də̌ ù moʼò wə̀ ù kə də tsə nəniy ani kaʼ tsə, ù də soʼo nyiə, ù dòʼò təŋ soʼò nəniy.

⁹Kəə izwiʼi ìfyiə ìliy yiy i də nə̀ à wày dzə ntwùm ìdzòŋə̀ yìy, i nì mòŋə̀ myiʼà nəniy gha. I dzwabə̀ nə̀ fòŋ ə̀ wù ki taw fyiə yə, bòʼ fòŋ ìdzòŋə̀ yə̀ Zə̀kìy dê nəniy, nə̀ à wày dzə bòʼ ùlàŋ wə̀ u kwumə̀ yə̂ nə̀ ùfànyiə wiy, u də fììy dzə̀ wày aghû yə̀ ghu nia nəniy ulâŋ u ghà wə̀.

¹⁰Aghê ə̀ lwaʼa yə ghu faʼà nəniy anə lòʼo kə aghě Dzû yìy kə fwulə̀ nəniy Zə̀kìy ate, ghu kwu dzə̀ way daʼa kə̀ liy kiy ani nyi ufânyiə wə ghu sâ nəniy anə tà kə ŋgàŋ kə̀ Yesù kə zəŋi nyiə̀.

¹¹Wù ùlwaʼà ùnè ù aghě Dzû wìy kə zè nə̀ kàŋ tə tə nyàm tìy anə lòʼo kə̀ zwêzwe kiy, nə̀ tə də fyiə kə̀ suuw myaʼa kə ayiə àbɛbə yiy. Abù nyàm tə ghè tə̀, u fyi pìə̀ yə̀ anə ukè.

¹²À yù də ighe Yesù kə fyi yə̂ soʼò anə ukè pfə yə̀ awote, ani zəŋi tsə nə̀ kâŋ tə we tiy sûw tsə aghû, tə̀ ghu zwu doʼò tsə anə bɛb tə ghu.

¹³I dê tsə nə̀ ŋgà kwu ani zù akə̀lə̀ Yesù â we ani bii fyi ŋgaŋ, tə̀ a kəli soʼò tuw kə̀dələ kə ù kə kəli nəniy.

¹⁴A kwu ani zù akə̀lə̀ Yesù aŋwòə ŋgà kwu way inaʼ yiy fə an-a-mbvə̀dintsə. Ŋgà lia yə̀ kə ìnaʼ i ŋgàŋ ì nê yə̀ i namə bê nəniy isə.

¹⁵I dzwabə̀ nə̀ ŋgà ki tsəŋə nyiə yə ukali wiy â Zə̀kìy yiə à də̀ kəfyiə, a sâ yə̂ nəniy â Zə̀kìy, nə̀ a tsîy abidzəmə̀ Yesù. Ŋgà zû kə nə̀ səə kiy ani kyali we nə̀ ù də̀ Mwe ə̀ mbyi.

¹⁶Kəə ghǎ nə̀ nîyzə̂ ani zəŋi ayiə àdzoŋə̀, ghà ki fii tyilə yə soʼo iwe yiy, aŋwòə à də̌ ndzòʼò ìsà yə̀ i zəŋə nəniy fòŋə̀ Kə̀zə̀ dzwàbə̀ nəniy.

¹⁷I zuw yə nənìy â àghû yə̀ ghu də utuw ghii wiy, dzwùmə̀ yə̀ sòʼò àyiə yə ghu dzîy nəniy â ghà, fàʼ kə ghu kiy də ani yèmìy azoŋə̀ ghà aŋwòə à nì nyìə̀ ghu ntaŋ â Zə̀kìy anə fàʼ kə ghu. Abu ghà zuw yə̂ nəniy awò ghu, ghu ki faʼa fàʼ kə ghu kiy nə̀ dwiʼi kiy. Abu à də wày aghi, ghu ki faʼa nə̀ ìmwe yiy, i ki də wày ani fày ghà.

¹⁸I tsəŋ kwu kə nənìy ani gwùŋì anə utuw ghelə. Ghě kwu təŋ ŋwô nə̀ fôŋ tələ tiy zwe ŋwò. Ghè liə ani zəŋə yə kə ayiə yə a də nəniy tsitsi sòŋə i ndzə̀m.

¹⁹Mə bwoʼə bə̀ sòʼò ghà nə̀ wokiy nə̀ fòŋ yam ìdzə̀m nə̀ ghà ki gwuŋə nə̀ Zə̀kìy ki mbab twum dzwoŋi bə̂ mìə̀ â ghà.

²⁰Zə̀kìy mə zɛ̀mə̀ ŋwò dzwoŋi bə̀ mwe ə̀ mbyi ə̀ ŋgàŋ, Yesù anə ipfə. À də̌ we àbàʼàtə̀ndzù ùsòŋə̀ wìy abidzəmə̀ kàŋ tə we tə ù byay na tsə nəniy ŋkà mə̀ ìn dòʼò təŋ nəniy anə nsòŋə indzə̀m. Mə gwuŋə̀ nə̀ Zə̀kə̀ kə nyiə̀ nəniy ibvay yiy nə̀ ù nyìə̀ ghà nə̀ ùfyiə ù dzoŋə̀ wə̀ ùdzə̀m, awò ghà ani zəŋi ayiə yə ù liə nəniy. Mə gwuŋə̀ sòʼò nə̀ Zə̀kìy fâʼ àyiə yə a dzwabə̀ nəniy a sə̀ we azoŋə̀ ŋgàŋ abidzəmə̀ Yesù Kə̀litò. Ukali wiy doʼò awò Yesù anə nsòŋə indzə̀m. I də kə ghii.

²²Mə bwoʼ gha nə̀ wokiy awizə̂ yamə nə̀ ghà kwumi tsə utuw ani zuw kəmə̀ fə ayiə yə mə twâ bə̂ nəniy ani ŋwùmì bə̀ iwe nəli.

²³Mə liə nə̀ ghà kəli tsə nə̀ àzə̀ ə̀ ŋgàŋ wə̀ ghu tyoŋə nə̀ à də Timotì, ù mə fyi bə̀ a ndàw ntsaʼ. Abu ù bù kwùm bə̂ nəniy, mə kî bè ŋwò nə̀ we ani bù kòʼ ghà.

²⁴Ghà toŋə zuw aghû yə̀ ghu də nəniy utuw ghi wiy, nə̀ aghě Kəzə̀ àdzə̀m. Aghě Kəzə̀ yə̀ ghu də nəniy anə inaʼ i Italì ghu dziy a twuŋə zuw bə̂ soʼò ghà.

²⁵Mə gwuŋə̀ nə̀ Zə̀kìy dê ghà nə̀ fòŋə̀ we ìdzòŋə̀ yìy.