Read Isu Hiblù 2 Bible Online

Hiblù 2 - Isu bible

Hiblù 2

¹Yəə Wà Kə̀zə̀ kwu nəniy daʼa kiy anə ufyiə udzə̀m, i dê tsə nə̀ ŋgà kwu ani nìy dzwàb tsə iyemì anə ayiə yə ŋgà zuw nəniy kwùmə̀ yə̀ nə̀ Wà Kə̀zə̀, ani zəŋi tsə nə̀ ŋgà fə̂ ni môŋ nây.

²Ntwum yə tsə̀təndii t-a-zə̀ tìy kə naʼà nəniy awò nə̀ tě ŋgàŋ asəsə yiy, kwùmə̀ yə̀ nə̀ dzəd yə ŋgà kwu nəniy ani mùə̀ ate, ì kə dè bə̀ ŋwò nà à də̌ ìsoŋə̀ yìy. Zə̀kiy kə nyə̀ mfəm awò àghù yə̀ àdzə̀m ghu kə twe maʼà nəniy ntwùm ə̀ ìghà yə̀.

³I dê tsə nə̀ ŋgà way dzə ani tuu fyi anə mfəm yə Zə̀kìy nyiə̀ nəniy bəə ŋgà twe maʼà nəniy ntwùm ìsòŋə̀ yə̀ kwùmə̀ yə̀ nə̀ àyiə yə Zə̀kìy bii fyiə ŋgaŋ ate. Mwe ə̀ mbyi maa bòʼ nàʼa ntwum yə, aghû yə̀ ghu kə zuw ayiə yə ù dzày nəniy, ghu kə dè bə̀ ŋwò â ŋgàŋ nə̀ ayiə ghè yə̀ də̌ àsoŋə̀ yìy.

⁴Zə̀kìy mə ndzə̀m dè bə̀ sòʼò nə̀ ntwùm ə̀ ìghà yə̀ də̌ ìsoŋə̀ yìy abidzəmə̀ mali tə yiə nə̀ kwab tə yiə tə ù zəŋə anə ndə̀mə̀ tə̀dzələ, nə̀ àyiə yə ù zəŋi nəniy nə̀ aghê kəli tsə fyiə kə Zwàykə̀zwekiy nyiə̀ nəniy â àghù yìy anə ayiə yə Zə̀kìy liə nəniy.

⁵Ndzə̀m ndzə̀m, à wày dzə tsə̀təndii t-a-zə̀ ghu nî saʼa nəniy mbyi yə ì nì bê nəniy. Toŋə mbyi ìfyiə̀ yə̀ mə twâ dzìy bə̂ nəniy.

⁶I kwuni twà dòʼò anə lòʼo kə̀ liy kiy anə ŋwàʼà k-a-zə̀ nə̀, “A Zə̀kìy, wè mbyi ba də̌ kìə̀ wò sì nia isə yiy azoŋə̀ we, aghee mbyi yiy mâŋ də̀ aghû, wò yèmə̀ nəniy azoŋə̀ ghu.

⁷Wò zəŋi tsə ghu nə̀ tsə̀təndii t-a-zə̀ tìy nyaʼi tsîy fyi tsə we, wò mə zəŋi nə̀ ù doʼò wù ùsoŋə̀ wìy, nyə̀ tsə sòʼò we nə̀ ŋkwiʼi mə̀sòŋə̀ mìy.

⁸Wò mə zəŋi sòʼò nə̀ ù kəli tsə kədaʼa, nìy na bə̀ ufyiə udzə̀m a təŋə ifwe iwe.” Yəə ù dzày tsə nəniy nə̀ à də̀ “ufyiə udzə̀m”, i ghî də̌ nə̀ fyiə kə̀liy kiy kə̀ doʼò səə dzə̂ nə̀ kə way a təŋə̀ we. Àkwuni də̀ kə nə̀, a kamə kə̀ kôʼ dzə̂ ufyiə udzə̀m u zuw nəniy â we.

⁹A kwuni kwu ŋwô Yesù wə̀ ù kwu nəniy daʼa kiy anə ufyiə udzə̀m, Zə̀kìy kə zəŋi tsə nə̀ tsə̀təndii t-a-zə̀ tìy nyaʼi tsîy fyi tsə Yesù anə kə̀mə̀ fə fə sòŋə, ani zəŋi tsə nə̀ ù bù pfə anə utuw ghè dzə̀m. U fii bù pfə anə sòŋə fə ghè fə̀, anə yiə yə Zə̀kìy kə byay na nəniy ani dè fòŋ ə̀ we ìdzòŋə̀ yìy â ŋgàŋ. Zə̀kìy mə kwuni nyìə we nə̀ ŋkwiʼi mə̀sòŋə̀ mìy, tsuk tsə we yəə à də̀ kədòŋ.

¹⁰À də̀ Kəzə̀ kə zəŋi nəniy ufyiə udzə̀m, yèmə̀ sòʼò ate. I kə ndzə̀m kpe ŋwô nə̀ ù zəŋi tsə̀ nə̀ Yesù dòʼò tsə nə̀ ù kwu dzə̀ way utswə̂d ù liy wiy, awò we ani zəŋi tsə nə̀ ndə̀mə̀ àghè bû kəli soʼò ndzòʼò ŋkwiʼi mə ù kwu nəniy. Aŋwòə à də̀ Yesù ù kə tsîy yə̂ isə ani dè àghè dzə̀m nə̀ dzəd yə Zə̀kìy də ani bii fyi ghu ate.

¹¹Ù mə sùw màʼà fyi bə̀ aghû yìy anə bɛb tə ghu. Ghu dzə̀m kwu kə Təli ùmòʼ nə̀ we. À yù də̀ ighe Yesù də də̀lə̀ dzə̀ wày nə̀ tuw kiy ani tyoŋə ghu nə̀ à də̀ awizə ə we.

¹²A sòŋə fə̀ liy fiy, Yesù ə dzày yə̀ awò Zə̀kìy a we nə, “Mə kî nìʼà yə̀ wù wə̀ wò də nəniy we awò àwizə̂ yamə, mə ki kyalə wô anə dzəŋə kə ghu.”

¹³U dzày yə sòʼò nə̀, “Mə kî gaʼa nia yə̀ fòŋ yam awò Zə̀kìy.” U nam kàm dzày fəli tsə nə̀, “Mə də fə nə̀ àghù yə̀ Zə̀kìy nyiə̀ nəniy awò mìə̀.”

¹⁴Yəə aghee mbyi yiy kwu nəniy iwe yiy, Yesù kə dòʼò bə̀ sòʼò wè mbyi yəə à də̌ ghu. Àmbvə̂ntsə kwu kədaʼa ani zəŋi tsə nə̀ aghê ki tsəŋə ani pfə. Yesù kə kwuni bù dòʼò bə̀ wè mbyi ani zəŋi tsə nə̀ a ki buu ghe pfə tsə, ipfə i we yiy ki zəŋi tsə nə̀ àmbvə̂ntsə lay sə tsə,

¹⁵tə̀ ù bii fyi ŋwò bə̀ sòʼò àghù yə̀ ghu fə̂d dzə̂ ukwə̂d wìy anə mùə̀ tə ghu tə̀ dzə̀m, ghu tsəŋə nəniy ipfə yiy.

¹⁶A kwu sòʼò ŋwô nə̀ ù kə kə̀ pfə dzə̂ ani bii fyi tsə̀təndii tə. Ù kə kwuni pfə ani bù bii fyi awi wa Ablàhâm.

¹⁷À yù də̀ ighe ù kə fə̂d bə̂ yəə à də̀ awizə̂ ə we ani dòʼò tsə wù ùlwaʼà ùnè wìy â ghu, ù kwu nəniy mwuli kiy ani fàʼ yə̀ fàʼ k-a-zə̀ nə̀ fòŋ ə̀ we idzə̀m nə̀ Zə̀kìy nì də anə sùw màʼà bɛb tə ghù

¹⁸Ù də̀ ŋwô ani fày àghù yə̀ ghu tsîy nəniy anə imwàm kòʼ, aŋwòə u maa fii sòʼò ghu mwàm kòʼ sòʼo, we.