Read Isu Hiblù 4 Bible Online

Hiblù 4 - Isu bible

Hiblù 4

¹Tɛb kə Zə̀kìy kə tɛb na nəniy nə̀ ŋgà zû nyi kwoʼ anə loʼo kə̀ zwaa kiy, kə nam də̀ ŋwô. Yəə i də nəniy aghii, Idzwâb nə̀ ŋgà nîy ìyèmì, tə̀ kəə wè lìy nə̀ bvə̂ sə anə yiə yə ù də ani dòʼò nə̀ ù kə̀ kəli nəway izwây yə̀ Zə̀kìy tɛb na nəniy.

²I də ghii aŋwòə ŋgà mə zuw ntwùm ìdzòŋə̀ yə̀ ghu naʼa nəniy â ŋgàŋ, ighəd anə yiə yə aghê àwiy yə̀ kə zuw soʼò nəniy. Yəə ghu kə zuw ntwum yə ghii, ghu kə kə̀ nîy dzə̂ nə̀ à də iyiə, aŋwòə ghu kə màŋ zuw màʼà ŋwò kə̀ kəli dzə̂ ìbɛmə yiy ate.

³Ŋgaŋ yə, ŋgà bɛmə nəniy nyiə, ŋgà də ŋwô ani tsìy nyi anə lòʼo kə zwaa kə Zə̀kìy tɛb na â ŋgàŋ, ighəd yəə Zə̀kìy kə dzày tsə nə̀, “Fòŋ kə ŋə̀m kə miə, mə nyi kə məŋkà nə̀ ghu nî tsìy nyi dzə̀ wày a lòʼo kə zwaa kiy.” Zə̀kìy kə dzày àyiə yə ghii nə̀ ù mə fàʼ mà kə fàʼ kə we kiy ani zwùbì mbyi.

⁴I twâ dòʼò sòʼò ŋwò anə ŋwàʼà k-a-zə̀ anə loʼo kə liy kiy kwùmə̀ yə̀ nə̀ tsuk fə fə zəŋə yə nəniy ntsukə miy insèmbe nə̀ “Zə̀kìy kə zwày tsə ŋwô anə ntsuk fə fə zəŋə yə̂ nəniy ntsuk miy insèmbe anə fàʼ kə̀ ù kə fâʼ nəniy.”

⁵I nam twâ doʼò soʼò anə ŋwàʼà k-a-zə̀ nə̀ Zə̀kìy kə dzày tsə nə̀, “Ghu nî tsìy nyi dzə̀ wày anə lòʼo kə mə kî nyìə̀ nəniy izwây yìy.”

⁶Yəə i də nəniy nə̀ aghê àliy yiy nî tsìy nyiə ŋwò a lòʼo kə̀ zwaa kə, aŋwòə aghû yə̀ ghu kə zuw nəniy ntwùm ə̀ ìdzòŋə̀ yə̀ səsə, ghu kə kə̀ nyi kwo dzə̂ a lòʼo kə̀ zwaa kiy aŋwòə ghu kə kə̀ bɛmə dzə̂ ntwùm ì ghà yə̀.

⁷À yù də̀ ighe Zə̀kìy kâm byay na tsə ntsuk fə̀ liy fiy, u toŋə tsə nə̀ à də̀ “Zii”. Ntàŋə̀ tə̀ŋə̀mə̀ mə tsìy yə ù kə dzây abidzəmə̀ Devìd, ghu twà na anə ŋwàʼà k-a-zə̀ nə̀, “Abu ghà zuw tsə ntwùmə Kə̀zə̀ zii, kəə gha nə̀ taw nia fôŋ tìy.”

⁸Abu à kə də nə̀ Dzuswà kə nìy zè nə̀ àghè anə lòʼo kə Zə̀kìy kə tɛb na nəniy, Zə̀kìy kə wày dzə ani kàm dzày fwuli ayiə kwùmə̀ yə̀ nə̀ ùtsuk ùzwaa ù ŋwô wìy.

⁹Soŋə fiy nam də̀ ŋwô aghee Kəzə̀ yìy nî nyiə kwoʼo anə lòʼo kə̀ zwaa kə Zə̀kìy kə tɛb nəniy, ghu zû zwây ighəd anə yiə yə Zə̀kìy kə zwây nəniy anə ntsuk fə fə kə zəŋi yə̂ nəniy ntàŋə̀ mə̀ ntsuk in sèmbè.

¹⁰Aghû yə̀ ghu nî tsîy nyiə kwoʼo a lòʼo kə izwə̀ày kə̀ Zə̀kìy na nəniy, ghu ni zwây soʼò anə ufàʼ wə̀ ghu kə faʼà tsə̂ nəniy, ighəd yə Zə̀kìy kə zwây anə fàʼ kə̀ ù kə faʼà nəniy.

¹¹Yəə i də nəniy ghii, ŋgà tôʼ ndəmi tsə iwee ani zù nyi yə̀ a lòʼo kə zwaa kə ghè kə̀, tə̀ wè lìy fə̀ ni ŋwuni tsə, ù bvə̀ səə tsə nə̀ ù kə̀ zû nyi kwoʼ awote, yəə à də̀ aghee səsə yə ghu kə ŋwuni nəniy, ghu dòʼò nə̀ ghu kə̀ zû nyi kwoʼ nəway anə lòʼo kə̀ zwaa kə.

¹²Dzə̀ ə̀ Kə̀zə̀ də̀ utaw ŋge kwu sòʼò kədaʼa ani fàʼ àyiə. Dzə̀ ìghè yə̀ twab tsìy fyi ŋwoə kwab yə ì twabə nəniy ubə̂d ùdzə̀m. Ì tsìy nyiə yə̀ anə mòʼ tə ŋgàŋ yəə kwab nì tsìy nyiə anə uzòŋ nə̀ ùvəb wiy. Dzə̀ ìghè yə̀ fwukə dè fyiə kə àyiə yə ŋgà moʼò nə̀ àyiə yə iwe i ŋgàŋ yìy liə nəniy ani zəŋi.

¹³Fyiə kə̀ liy kiy way dzə kə nûw doʼò nə̀ Zə̀kìy koʼò wày anə mbyi idzə̀m. Ù kòʼò myìà ŋwò ùfyiə wə ùdzə̀m u də nəniy anə mbyi. À də̀ sòʼò â we wù ùmoʼ umòʼ nì nyə̀ nəniy taŋ anə yiə yə ù kə zəŋi anə mbyi.

¹⁴Anə yiə yə ŋgà kwu nəniy wù ùlwaʼà ùnè wìy, à də nəniy Yesù, Wà Kə̀zə̀, ù zù tsìy nyi dzə̂ an-a-vələ, i dzwabə̀ nə̀ ŋgà təmi taw tsə anə ibɛmə yə ŋgà kwu nəniy azoŋə̀ we.

¹⁵Wù ùlwaʼà ùnè wə̀ ŋgà kwu nəniy, ù wày dzə wù wə̀ ù də kwoʼo way nə̀ mwuli kiy anə ayiə yə ŋgà lay te sə ate. Ŋgà kwuni kwu wù ùlwaʼà ùnè wə̀ ù kə tsîy nəniy anə lelê tə imwàm kòʼ, kə̀ zəŋi nəway ibɛb yiy.

¹⁶Yəə i də nəniy ghii, ŋgà kwu ani kəli tsə fôŋ tə̀ taw tiy ani zù a kə̀lə̀ kwe k-a-dòŋ k-a-zə̀, ani zəŋi tsə nə̀ Zə̀kìy ki dê fòŋ ə̀ we ìdzòŋə̀ yìy â ŋgàŋ. Bəə ŋgà zəŋi nəniy ghii, Zə̀kiy ki də ani kwoʼ nə̀ mwuli kiy azoŋə̀ ŋgàŋ, ù dè sòʼò ŋgàŋ nə̀ fòŋ ə̀ we ìdzòŋə̀ yìy ani fày ŋgàŋ anə sòŋə fə ŋga liə nəniy ifây yìy.