Read Isu Hiblù 5 Bible Online

Hiblù 5 - Isu bible

Hiblù 5

¹Ŋgà kwu ŋwô nə̀ à də̀ Kəzə̀ kə sî nəniy wù ùlwaʼà ùnè wìy anə fwumi kə aghù nə̀ ù ki faʼa awò we anə utuw u ghù. Fàʼ kə we kiy də ani sà yə̀ tə̀nyàm, nyə̀ yə̀ sòʼò ùfyiə awò Zə̀kìy, anə ayiə àbɛbə yə ghu zəŋi nəniy.

²Ù kwu ŋwô ani zoŋ fàʼ nə̀ àghù yə̀ ghu də ani zəaŋì nɛb nyə̀ ghu, nə̀ à yuu ghu zə̌ zəŋə ayiə yiy, aŋwòə ù də̀ sòʼò wè mbyi.

³À yù də̀ ighe ù kwu nəniy ani sà yə̀ ùfyiə awò Zə̀kìy, tə̀ Zə̀kìy sûw maʼà ibɛb i we nə̀ bɛb tə aghè àliy yiy.

⁴Wù ù lìy wày dzə ani sày kə uwe uwe nə̀ ghe də wù ùlwaʼà ùnè wìy, À mày kə nə̀ a we sây Kə̀zə̀, yəə ù kə̀ sây nəniy Ɛlòn ate.

⁵À də̀ sòʼò ighəd nə̀ Kə̀litò. Ù kə kə̀ sây dzə̂ ùwe uwe wiy ani dòʼò wù ùlwaʼà ùnè wìy. À kwuni də̀ Kəzə̀ kə kə sây nəniy we anə sòŋə̀ fə Zə̀kìy kə dzày yə̀ a we nə, “Wò də Wa nam, zii mə mə dòʼo Təli yiə̀.”

⁶Ù kə dzày tsə sòʼò a lòʼo kə liy kiy anə ŋwàʼà k-a-zə̀ nə̀, “Wò mə dòʼò təŋ wù ùlwaʼà ùnè wìy, wò də̀ yəə à də̌ Mèkizedèk.”

⁷Anə sòŋə fə Yesù kə də nəniy fə anə kəmbvə̀dintsə, u gwuŋə̀ yə̀ nə̀ dzə̀ ì tâw yìy, nə̀ nsə mə̀ ìdìy mìy, awò Zə̀kìy kə kə də nəniy ani fày fyi we anə ipfə. Zə̀kìy zuw igwuŋì we, aŋwòə ù kə nìy nyə̀ yə̀ uwee uwe awò Zə̀kìy.

⁸Anə yiə yə Yesù kə də kə nəniy Wà Kəzə̀, ù maa zwiʼi kəli fyi kə ani zuw yə̀ awò Zə̀kìy abidzəmə̀ ntswə̀d mə̀ ù kə tsîy nəniy ate.

⁹Yəə i kə də nəniy ghii, Zə̀kìy Zəŋi tsə we u dòʼò tsə nə̀ ù kwu dzə̀ way utswə̂d ùliy wiy. U dòʼò bə̀ wù wə̀ ù də nəniy ani fàʼ awò aghû yə̀ ghu zuw yə̂ awò we, nyə̀ yə̀ sòʼò ghu nə̀ itsà yìy.

¹⁰Zə̀kìy kə sày na kə we nə̀ ù dòʼò wù ùlwaʼà ùnè wìy yəə à də̌ Mèkizedèk.

¹¹Ghè kwu ndə̀mə̀ tə ayiə ani dzày kwùmə̀ yə̀ nə̀ ìyiə yə, i kwuni taw ŋwò ani tyi dzày awò ghà aŋwòə ghà nge lay ŋwò ani zuw kəli.

¹²Ghǎ mə̀ də̀ ani tyi dè àyiə yə nyiə awò àghè liy yiy, ghà fə̂ kàmə̀ nam liə kə nə̀ wù lìy tyi dè fwuli bə̀ ghà nə̀ nyàŋə mə̀ àyiə mə anə ayiə Kəzə̀. Ghà nam də̀ yəə à də̀ awa àbwi yiy. Ghà kamə kpe dzə̂ ani nyi ufânyiə ù taw wiy, ghà kpe kə ani ŋwu aghe.

¹³Wù wə̀ ù namə ŋwuə aghe yiy, yəə à də̌ wà ù bwî wîy, ù kwu dzə̀ way ayiə yə a də nəniy tsitsi nə̀ àyiə yə a də wày tsitsi anə ayiə Kəzə̀.

¹⁴A kwuni bû ufânyiə ù taw wiy, u də awò àghù yə̀ ghu biy tsə dzə̂ anə ayiə Kəzə̀, aŋwòə ghu kwu ŋwô ùtwab wiy ani kəli tsə ayiə yə a də nəniy tsitsi nə̀ àyiə yə a də wày tsitsi.