Read Isu Hiblù 6 Bible Online

Hiblù 6 - Isu bible

Hiblù 6

¹Yəə i də nəniy ghii, ŋgà kwu ani nyəli màʼà nyàŋə mə̀ yiə kwùmə̀ yə̀ nə̀ Kə̀litò. Ŋgà kwuni kwu ani ndəmi tsə iwe anə ayiə yə a də ani zəŋi tsə nə̀ ŋgà nɛmə kpe dòʼò tsə anə ibɛmə i ŋgàŋ azoŋə̀ Yesù. Ŋgà kə doʼò dzə̀ aghû yə̀ ghu liə nə̀ ghu tyi dê nyàŋə mə̀ yiə mə ìn də nəniy yəə à də̀ tsə kə ndaw anə ibɛbə yə ghu kwu. Ŋgà kyemì ŋwô bə̂ anə imòʼ yə̀ nə̀ fàʼ kə̀dzoŋə̀ kìy də ŋwô ani bii fyi ŋgaŋ. Ŋgà kwuni kwu ani kəli tsə ibɛmə â Zə̀kìy.

²Ŋgà kâm kwu sòʼò way ani tsəŋə tyi dee yə kə ayiə kwùmə̀ yə̀ nə̀ ìnìy i mwi m-à-zə̀ mìy, moo kwùmə̀ yə̀ nə̀ àyiə gaʼa awo yiy azoŋə̀ àghù yìy, moo àyiə zɛmə dzwəŋə yiy anə ipfə, moo kwùmə̀ yə̀ nə̀ àyiə yə Zə̀kìy nî saʼa aghû yìy ate tə̀ ghu kəli itsâ.

³Ŋgà zû kə nə̀ sə kiy ani nɛmə zù isə. Bəə Zə̀kìy bɛmə dzə̂ nəniy.

⁴Wè lìy kàm wày dzə ù də ani nìy nyi dzwoŋi bə̀ àghù yə̀ ghu bvə̀ fyi dzə̂ anə ibɛmə i ghu â Zə̀kìy, ghu maa ndòʼò kəli sòʼò ùnamə wə u ŋwô bə̂ an-a-vələ, kəli tsə sòʼò Zwàykə̀zwekiy kə kə fîy nəniy aghee Kəzə̀ yìy.

⁵Ghu mə mgbaŋ mwàmkòʼ yəə ayiə Kə̀zə̀ yìy dzwabə̀ nəniy ate, yəə ghu mwàmkòʼ dzə̂ nyiə, ghu kwu ŋwô yəə Zə̀kìy nî dè daʼa kə ù kwu nəniy anə mbyì ìfyiə yə̀ ì bè nəniy.

⁶Ghu kàm nam bvə̀ dzwoŋi yə̀ anə ibɛb i ghu. I ghî dè tsə nə̀ ghu namə twe myàʼà yə̀ kə Wà Kə̀zə̀, kàmə̀ namə baa kwùnə̀ yə̀ kə we anə kàʼ fə tənzəd anə ayiə ghu àzəŋə yiy, nyə̀ yə̀ we nə̀ tuw kə̀ dələ kiy nə̀ ndaa.

⁷Zə̀kìy kî lwì aghě Kəzə̀ yə̀ ù nyə̀ dzə̂ nəniy ghu nə̀ ndə̀mə̀ ndə̀mə̀ tə ufyiə tiy, ghu zəŋə soʼò àyiə àdzoŋə̀ yìy ighəd anə ayiə yə Zə̀kìy lwî nəniy mbvə̀dintsə kə iwe yiy niʼà nəniy ate, zəŋə ùfànyiə wə u zuu doʼò nəniy ate nə̀ u ki niyɛmə nyìə̀ ìfày awò wù ùswum.

⁸Akwuni bû nəniy loʼo kə fàb tìy zəkə doʼò ate nə̀ kwab k-a-ghè kìy, kə kwu dzə̀ way fàʼ kìy, kə də ani kəli kəntyiə. Ghu kwu kə ani sàŋ màʼà tə̀ ghu piə̀ anə uvə̀lə̀.

⁹Awizə̂ yamə, bəə ghè boʼò dzìy kə nəniy ayiə ghii, ghè kwu ŋwô nə̀ ghà way dzə anə ndzòʼò ayiə te yiy. Ghè kwu sòʼò ŋwô nə̀ ghà də aghû yə̀ Zə̀kìy bii fyi dzə̂ nəniy.

¹⁰Zə̀kìy way dzə ani bvə̀ màʼà dzə̀ ndə̀mə̀ kwab k-a-fàʼ kəli kə ghii, ù wày soʼo ani nìyzə̀ dzə̀ ndzòʼò ìliə yə ghà dê awò we, anə yiə yə ghà twamə̀ yə̂ sòʼò aghee we yiy, namə zè kə nə̀ sə kiy ani twàm.

¹¹Ghè dîy nə̀ wù ùmoʼ umòʼ anə uzə ghii ki tsəŋ kwu kə ighaa ìsoŋə̀ yìy anə fyiə kə ghà zəŋə nəniy ani zù kùm soŋə fə ghà kî kyilə nəniy fyiə kə ghà limə nəniy awò Zə̀kìy.

¹²Ghè liə dzə̀ wày nə̀ ghà ki də aghê lay yiy. Ghè kwuni liə nə̀ ghà ki bwiy yə yəə à də̀ aghû yə̀ ghu bɛmə nəniy Zə̀kìy isə, ghu lyimə, kwè sòʼò tə̀fòŋ ani kəli fyiə kə Zə̀kìy tɛb na awò ghu.

¹³Anə sòŋə fə Zə̀kìy kə nyiə̀ tɛb kiy awò Ablàhâm, wè lìy kə wày dzə ù kə tsìy fyi nəniy Zə̀kìy yəə Zə̀kìy ni kâ yə̂ ìzəd i wù ù ghè wə̀, Zə̀kìy kə kà kə anə izəd i we.

¹⁴Yəə ù kə kâ nəniy, u dzày tsə nə̀, “Mə tɛb na nə̀ mə kî lwì tsə wò, in nyiə̀ wò nə̀ ndə̀mə̀ àwi wa.”

¹⁵Ablàhâm ə kwè fòŋ lyimə̂ tɛb kə Zə̀kìy kə tɛb na nəniy, zù kùm soŋə fə tɛb kə ghè kə̀ kə bû fyi kə nəniy kə̀soŋə̀ kìy.

¹⁶Abu wù dziy kwuni nyi məŋkà, u nyiə yə̀ anə izəd i wù wə̀ ù tsìy fyi nəniy we, ŋkàmə̀ ghà mə̌ kwu kədaʼa ani nəm naa idzəŋì yə̀ i kwoʼo bə̂ nəniy.

¹⁷Zə̀kìy kə nyi ŋkà mə̀ ghii anə izəd i we, ani zəŋi tsə nə̀ aghû yə̀ ghu kəli dzə̂ nəniy fyiə kə ù kə tɛb naa nəniy, ghu kəli tsə nə̀ ghe way dzə ani kwuni fòŋ ìghe.

¹⁸Ufyiə wə ghi ùbè, ŋkàmə̀, nə̀ tɛb kə, u way dzə ani kwuni kòʼ, u dê bə̀ ŋwò nə̀ Zə̀kìy guw tsə̀ dzə̀ wày. Tə̀ ŋgaŋ yə ŋgà tuu zû dzə̂ a təŋə̀ we, ŋgà ki kwu fôŋ tə̀ taw tiy ani təmi taw tsə anə tɛb kə ù tɛb na nəniy.

¹⁹Imôʼ yə̀ ŋgà kwu nəniy nə̀ ayiə yə̀ kì fyiə ŋwò, i zoʼo dòʼò anə tɛb kə ghè kə̀. A səmə̀ kè dzə̀ wày anə ayiə yə a moʼò nə̀ a kî fyiə ŋwò, aŋwòə ŋgà kwu ŋwô nə̀ ŋgà kî zè tsìy nyiə kwoʼo ŋwò anə loʼo kə̀ zwe kə. Imôʼ i ghè yə̀ mə zù tsìy nyi kwoʼ a lòʼo kə̀ zwêzwe kiy, kə doʼò nyi yə̂ a dzəmə̀ kòŋ kə̀ an-a-vələ.

²⁰Yesù mə zù tsìy nyi awo anə ibàm i ŋgàŋ. Ù mə dòʼò təŋ wù ùlwaʼà ù ŋgàŋ ùnè wìy yəə à də̌ Mèkizedèk.