Read Isu Hiblù 7 Bible Online

Hiblù 7 - Isu bible

Hiblù 7

¹Mèkizedèk wə̀ kə də̀ kədòŋ anə inaʼi Salèm. U də̀ sòʼo wù ùlwaʼa wìy, fàʼà â Zə̀kə̀ kə tsîy fyi nəniy ufyiə udzə̀m. Ù kə kpe tsə nə̀ Ablàhâm anə dzəd nə̀ Ablàhâm bè dzwəŋə a ndaw ù təm nyi bə̂ nəniy udòŋ wìy ùkyàʼì anə tsam, ù lwì tsə Ablàhâm

²Ablàhâm ə dyaŋi dzàw tsə ufyiə wə ù bii kəli bə̂ anə tsam anə nsòŋi vəm, nìy kə bə̂d kə̀mòʼ nyə̀ yə̀ â Mèkizedèk. Izəd i Mèkizedèk yə̀, myìŋə̀ “Dòŋ kə̀ kə saʼa nəniy tsitsi,” yəə ù kə də nəniy dòŋ kə Salèm kìy, izəd i we yiy myìŋə̀ sòʼò nə̀ à də̂ “Dòŋ kə ibvay.”

³Iyiə ìliy yiy kə̀ twâ doʼò dzə̂ kwùmə̀ yə̀ nə̀ Tè ə̀ Mèkizedèk moo zə̂ we, moo nə̀ təli we a səsə yiy. Iyiə ìliy kə̀ twâ doʼò soʼò kwùmə̀ yə̀ nə̀ tsuk fə we fə̀ byikə fiy moo fə pfə fiy. Ù də̀ yəə à də̌ Wà Kə̀zə̀, ù mə dòʼò təŋ wù ùlwaʼà wìy a ndaw Kə̀zə̀.

⁴Gha mə kòʼ tsə nə̀ Mèkizedèk kə də̌ wù ùlwaʼà ùsoŋə̀ wìy. Ablàhâm, à kə də nəniy tè aghee Islàel, ù kə kwu ŋwô.À də̀ ighe ù kə nyiə̀ nəniy we nə̀ ùfyiə ùliy wiy anə ufyiə wə ù kə təm nyi bə̂ anə tsam.

⁵I də anə ulàŋ u Musîs nə̀ aghee Islàel yìy kwu ani dzàw tsə ufyiə wə ghu kyilə nəniy anə ubə̀d ù vəm ghu nyiə̀ yə̂ bə̀d kə̀mòʼ awò àghè àlwaʼa yə àdzə̀m anə awiwa a Levì, ghu də nəniy awizə̂ ə ghu, də̀ sòʼò awiwa Ablàhâm.

⁶Mèkizedèk kə kə̀ fyi dzə̂ anə tuu kə Levì, u nam nìy sòʼò bə̀d kə ufyiə kəmòʼ awò Ablàhâm anə ufyiə u we wə ù kə dzâw tsə anə ubə̀d ùvəm.

⁷A way dzə ani ndòʼò kàm myay dzə̀ nə̀ wù wə̀ ù lwì yə̂ nəniy, ù mə̀ tsìy fyi wù wə̀ ù nìy nəniy lwì kə̀ te kiy.

⁸Aghê lwaʼa yə àdzə̀m ghu kə nîy nəniy bə̂d kə ufyiə wə kə̀mòʼ anə ubə̀d ùvəm, à də̀ aghû yə̀ ghu də mùə̀ tsà wày. Abû Mèkizedèk, ù kə nîy soʼò nəniy bə̂d kə ufyiə kiy kə̀mòʼ anə ùbə̀d ùvəm, ù nì pfə dzə̀ wày anə yiə yə ŋwàʼà k-a-zə̀ kìy dzîy.

⁹Ŋgà də ani nam dzày nə̀ yəə Ablàhâm kə nyiə̀ nəniy bə̂d kə ufyiə kə kə̀mòʼ anə ufyiə wə ùvəm ù kə kwu nəniy, awò Mèkizedèk, i dê tsə nə̀ aghě Levì yə̀ ghu nîy tsə̂ nəniy ghu maa tsə.

¹⁰Aŋwòə Mèkizedèk kə nə̀ Ablàhâm kpe yə̀ nə̀ ghu kamə byi dzə̂ Levì. À kə də̌ nə̀ ghu kamə kə̀ môʼ dzə̂ ani byi Levì.

¹¹Yəə i kə də nəniy nə̀ lâŋ kə Musîs kìy dzîy nə̀ aghê lwaʼa kwu ani fyi bə̀ kə anə tu kə Levì, ufyiə wə aghê lwaʼa ghè yə̀ kə sâ nəniy, u kə wày dzə ani nìy ŋwò bɛb tə ŋgàŋ ani zəŋi tsə nə̀ ŋgà doʼò tsə nə̀ ŋgà kwu way utwə̂d wìy. Bəə ufyiə ù saa u ghè wə̀ kə də nəniy ani zəŋi nə̀ ŋgà doʼò tsə nə̀ ŋgà kwu way utswə̀d wìy, wù ù lwaʼà wǐy mə də kàm wày dzə ani bù. Wù ùlwaʼà wìy yə à də̌ Mèkizedèk nə̀ ù wày dzə̀ yəə à də̀ Ɛlòn.

¹²Bəə à kwuni də nə̀ ghu kwuni ŋwô tu kə aghê àlwaʼa yiy fyiə bə̂ nəniy ate, i dê tsə nə̀ ghu kwu ani kwuni sòʼò àyiə yə lâŋ kìy dzîy nəniy.

¹³Aŋwòə wù wə̀ ŋgà dzîy àyiə yiy kwùmə̀ yə̀ nə̀ we, ù fyi anə tu kə wù ùlwaʼà ùlìy wìy də kamə fyi kôʼ dzə̂ ate.

¹⁴I ndzə̂m də̀ mgbaŋ nə̀ Mwe ə̀ mbyi ə̀ ŋgàŋ fyi anə inaʼ i Dzudà. Musîs kə kə̀ dzây dzə̂ nə̀ wè ùlwaʼà ùlìy nì fyiə bə̀ ŋwò awo anə tu kə ghè kə̀.

¹⁵Iyiə ighè yə̀ mə baa bù dè fyi kə u we wiy aŋwòə wù ù lwaʼà ùlìy wìy mə bù, ù bvami də̀ kə yəə à də̌ Mèkizedèk.

¹⁶Ù mə dòʼo wù ùlwaʼà wìy a ndàw Kə̀zə̀, nə̀ ù kə̀ fyi dzə̂ anə tu kə lâŋ kìy dzîy nəniy nə̀ aghê àlwaʼa yiy kwu ani fyi ate, ù kwu nəniy daʼa kiy, imuə̀ iwe yiy də wày soʼo ani mày.

¹⁷Aŋwòə i twâ dòʼò anə ŋwàʼà k-a-zə̀ kwùmə̀ yə̀ nə̀ we nə̀, “Wò nì dyòʼò təŋə wù ù lwaʼà wìy yəə à də̌ Mèkizedèk.”

¹⁸Zə̀kìy maa nìy ŋwò Lâŋ kə̀ wiy kə ù kə nyiə̀ kwùmə̀ yə̀ nə̀ àghè lwaʼa yiy, aŋwòə kə kə kàm kwu way daʼa kiy kwu way fàʼ kìy soʼo.

¹⁹Aŋwòə lâŋ kə ghè kə̀ kə kə̀ zəŋi dzə̂ nəway iyiə ìliy yiy i də nəniy ani zəŋi tsə nə̀ aghê doʼò tsə nə̀ ghu kwu way utswə̂d wìy. Zə̀kìy mə kwuni nyə̀ ŋgaŋ nyiə nə̀ ìmòʼ ìfyiə yə i də ani nìy zù ŋgàŋ a kə̀lə̀ we.

²⁰Aghû yə̀ ghu kə də aghê àlwaʼa yiy səsə, ghu kə màŋə̀ kaʼa yə̀ kə fàʼ kə ghu nə̀ ghu kə̀ nyi ŋkà mìy nə̀ Zə̀kìy, a kwuni bù wù ùlwaʼà wə̀ nyiə, ù kə maa nyi ŋkà mìy nə̀ Zə̀kìy.

²¹Abù Yesù kwuni doʼò bə̂ nəniy wù ùlwàʼà wìy anə ŋkà mə̀ Zə̀kìy kə nyi kə nəniy dzày tsə ate â we nə̀, “Mwe ə̀ mbyi mə nyi ŋkà mìy nə̀ ù nì kàm kwuni dzə̀ way fòŋ ə̀ we nə̀, ‘Wò mə dòʼò təŋ wù ùlwàʼà wìy.’ ”

²²Ŋkà mə̀ Zə̀kìy kə nyi kə nəniy nyiə, ìn mə zəŋi Yesù mə dòʼò yəə à də̀ fyiə kə ghu bû zoʼo na bə̂ anə ŋkà mə̀ fyiə mə̀, ani dè tsə nə̀ ŋkà mə̀ fyiə mə̀ tsìy fyi ŋwoə ŋkà mə̀ wîy mə̀.

²³Anə byìə kə̀ wiy kiy aghê àlwaʼa yiy kə kwu ani də anə ndə̀m, aŋwòə ipfə yiy kə byemə way nə̀ fàʼ kə ghu kiy zû sə kə̀ sə.

²⁴Akwuni bû Yesù ù muə təŋ ŋwô anə fàʼ kə we, yiə à də̌ wù ùlwaʼa wìy, aŋwòə ù nì pfə dzə̀ wày.

²⁵I ghii də̀ aŋwòə Yesù də̀ ŋwô nyiə ani bii fyi aghû yə̀ ghu bê nəniy a kə̀lə̀ Zə̀kìy nə̀ ghu tsîy bə̀ abidzəmə̀ we. Aŋwòə yiə ù muə nəniy ù tsə̀ŋ kwu kə ani bwoʼ kəwo â Zə̀kìy anə utuw u ghù.

²⁶I kə dzwàbə̀ ŋwò â ŋgàŋ ani kəli wù ùlwaʼà ùnè wìy yəə à də̀ Yesù, aŋwòə ù də̌ wù ù zwê wìy, ù kwu way utswə̂d wìy soʼo, ù kamə zəŋi kôʼ soʼò ibɛb yiy. Ù kwu kə kwuni nə̀ àghě mbyi yiy aŋwòə ghu də aghê bɛbə yiy. Zə̀kiy nìy na kwoʼ này kə we an-a-vələ.

²⁷Yesù wày dzə yəə à də̀ aghê àlwaʼa ànê yə̀ ghu kə sâ tsə dzə̂ ìtwoʼ ùfyiə u ghu wiy isə anə ibɛb i ghu, tə̀ ghu sì sà yə̀ ùfyiə wə aghê bû nə̀ ù ghè wìy ani bù sà anə bɛb tə ghu ntsuk indzə̀m. Ù kə sà yə̀ itwoʼ iwe soŋə fəmòʼ anə soŋə fə ù kə sâ yə̂ nəniy uwe u we wiy anə utuw aghè dzə̀m.

²⁸Anə làŋ kə Musîs ghu kə sìy kə àghù yə̀ ghu kə də wày dzə nə̀ ghu kwu way utswə̂d wìy nə̀ ghu doʼò àghê àlwaʼa yiy. Zə̀kìy kwuni nyi kə məŋkà nə̀ lâŋ kìy mə tsìy ŋwò, sày na tsə Wà we wə ù kə də kwu way ibɛb yiy nə̀ ù dòʼò wù ùlwaʼà ùnè wìy anə nsòŋə indzə̀m.