Read Isu Hiblù 8 Bible Online

Hiblù 8 - Isu bible

Hiblù 8

¹Iyiə yə ghè baa dzîy nəniy à də̌ nə̀, ŋgà kwu wù ùlwaʼà ùnè wìy, ù də nəniy anə ukwe ù nyiə̀ u ndàŋə̀ ì zwê ì Zə̀ k-a-vələ yiy.

²Ù fàʼà yəə à də̌ wù ùlwaʼà ùnè wìy anə lòʼo kə zwêzwe kə anə mfwùə kə à kə ndzə̂m biə kə nəniy Mwe ə̀ mbyi nə̀ ùwe u we wiy, à kə kə̀ byiə dzəə wù mbyi ùlìy.

³Aghê àlwaʼa ànê yə̀ àdzə̀m, Zə̀kìy kə sày na kə nəniy, fàʼ kə ghu kiy kə də̀ ani bù nyə̀ ùfyiə, ù sà nyə̀ sòʼò tə̀nyàm awò Zə̀kìy. I də sòʼo ighəd nə̀ wù ùlwaʼà ù ŋgàŋ ùnè wə̀ à də nəniy Yesù, ù kwu ani kəli kə sòʼò kə̀fyiə ani nyə̀ â Zə̀kìy.

⁴Bəə ù mə̀ nam də nəniy fə anə kəmbvə̀dintsə, ù kə dziy boʼò dyòʼò dzə̀ wày wù ùlwaʼà ùnè wìy, aŋwòə aghê àlwaʼa yiy kə də ŋwô ghu kə nyiə̀ nəniy ufyiə wiy anə yiə yə lâŋ kìy kə dzîy nəniy. À kwuni də̀ kə nə̀ fyiə kə ù sà nəniy kə kwu kə kwuni.

⁵Fàʼ kə̀ ghu kə faʼà yəə à də̀ aghê àlwaʼa yiy kə kə də̀ tsəe kə ayiə yə Yesù fàʼà nəniy an-a-vələ yəə à də̀ wù ùlwaʼà wìy. À də̀ ighəd anə yiə yə i kə də nə̀ Musîs. Yəə ù kə dziy byiə mfwùə kə̀ fwulə k-a-zə̀ kìy, Zə̀kiy dzày yə̀ a we nə, “Zəŋi tsə ayiə dzə̀m anə ayiə yə mə kə dê nəniy â wò anə u kàʼ u Sinày!”

⁶Zə̀kìy mə kwuni nyə̀ Yesù nə̀ fàʼ kə wù ùlwaʼà kə̀ kə tsîy fyi nəniy kə ghu kiy, ighəd soʼo anə yiə yə ŋkà mə̀ fyiə̀ mə̀ ù nyi na nəniy anə uzə u Kəzə̀ nə̀ àghè mbyi yiy, ìn tsìy fyi soʼò nəniy mə̀ wîy mìy, ŋkà mə̀ ŋwò bə̀ anə utɛb wə Zə̀kìy tɛb nəniy.

⁷Bəə à kə də nəniy nə̀ ŋkà mə̀ səsə mə̀ kə kwu way utswə̂d wìy, ghu kə wày dzə ani kàm zəŋi fwuli dzə̀ ŋkà mə̀ lìy mìy.

⁸I ghî dè tsə nə̀ Zə̀kìy maa kòʼ nə̀ ŋkà mə̀ səsə mə ù kə nyi nə̀ àghè wiy yə̀ kə làʼà ŋwò fyiə kə̀ liy kiy, anə soŋə fə ù kə dzày tsə nəniy nə̀, “Miə Mwe ə̀ Mbyi mə dziy nə̀, ntsukə mə̀ te miy kî bè ŋwò, mə ki nyi ŋkà mə̀ fyiə mìy nə̀ àghě Islàel yìy nə̀ aghě Dzùdiyà yìy soʼo[3].

⁹Ŋkà mə̀ kì dòʼò dzə̀ wày yəə à də̌ ŋkà mə̀ mə kə nyi nəniy nə̀ nə̀ təli ghu asəsə yə a sòŋə fə mə kə nîy ŋwô fyi bəə ghu anə inaʼ i Idzìp. Ghu kə kə̀ bvami zəŋi dzə̂ nəway ayiə yə a kə də anə tɛb kə mə nyiə̀ nəniy awò ghu, à də̀ iyiə ighè yə̀ mə kə də ndwàmə̀ nia dzə̀ wày isə yiy azòŋə̀ ghu.

¹⁰Ŋkà mə̀ fyiə̀ mə̀ də̌ ìmù mə kwu ani nyi nə̀ àghě Islàel yìy anə ntsukə mə ìn bèe nəniy. Miə Mwe ə̀ mbiy mə kî zəŋi tsə ghu, ghu ki moʼo ulâŋ wam wiy. Mə ki twâ na nyi yə̂ soʼò anə fòŋ tə ghu, mə ki də Zə̀ kə ghu kiy, ghu ki də aghû yamə.

¹¹Wù lìy ki də kàmə̀ tyi dzìy sòʼò wày ayiə yiy awò aghě ghu yiy moo dzìy yə̀ awò ghu nə̀ ghu kəli tsə Mwe ə̀ Mbyi, aŋwòə ghu dzə̀m ghu ki kwu miə, ani kaʼ ŋwò tsə anə ù wə̀ ù tɛb tsîy kwùm yə̀ anə ù nènè wə̀.

¹²Mə ki kwoʼ nə̀ mwuli kiy, mə nîyzə̂ soʼò àyiə ghu àbɛbə yiy, mə ki də kàmə̀ myìŋə̀ sòʼò wày ayiə yə ghu kə zəŋi bɛb nəniy.”

¹³Abu Zəkiy dzîy nəniy ayiə kwùmə̀ yə̀ nə̀ Ŋkà mə̀ fyiə̀ miy, i ghî dè tsə nə̀ ŋkà mə̀ wîy mìy kə də̀ ŋwô, ìn kàm kwu way fàʼ kìy. Abu fyiə ki dzwə̂n dzə̂ nəniy, kwu sòʼò way fàʼ kìy, ghu màʼà ŋwò yə̀.