Read Isu Hiblù 9 Bible Online

Hiblù 9 - Isu bible

Hiblù 9

¹Ŋkà mə̀ səsə mə Zə̀kìy kə zəŋi, ìn kə kwu ulâŋ u dê bə̂ àyiə yə ghu kə kwu ani fwulə Zə̀kìy ate, kwu sòʼò loʼo kə̀ zwêzwe kə̀ fwùlə k-a-zə̀ kìy.

²Ghu kə byiə na kə kəmfwùə, dzàw na tsə anə adzwə bè. Ghu tyoŋə ìdzwə yə i kə də nəniy a bee nə̀ à də̌ “Loʼo kə̀ zwe kiy”, fyiə kə̀ tyilə nia kə təkàʼì kìy kə də awote, nə̀ tyiə kə ghu kə nia tsə̂ nəniy bak-a-zə̀ kìy ate.

³Loʼo kə ghu kə tyoŋə nə̀ à də̀ loʼo kə̀ zwe kiy, kə kə də̀ a dzəmə̀ bə̀d kəndzwu kə kə kə dzâw na utaw u ghà wə̀.

⁴Loʼo kə̀ kə kwu kətà nə̀ ghu pìʼà ufyiə ù lyimə wiy ate. Ghu kə zəŋi na anə ufyiə ùtsə wə ghu tyoŋə nə̀ à də̀ gôl[4]. Təta kə məŋkà kə̀ kə bwàm dòʼò anə gôl, kə də̀ sòʼò awote ndaw, kə kwu ŋgùw yə̀ ghu kə zəŋi anə̀ gôl i kwe dòʼò ate nə̀ ùba wə u kə tswaʼi tswi bə̂ anə an-a-vələ u kwe dòʼò anə ŋgùw yə̀. Ŋgwàlə̀ mbàŋ ə̀ Ɛlòn yə̀ Zə̀kìy kə zəŋi tsə nə̀ i ki zuuw, ì kə kwe dòʼò sòʼò anə Təta kə ulàŋ kə̀, nə̀ ùbìy u atay wiy ùbè ulâŋ wìy kə twâ doʼò ate.

⁵Ghu zəŋi na tsə ufyiə ù liy wiy u kə kwu nəniy ghâw tìy, ù gaʼ dòʼò anə Təta kə məŋkà kə̀, dè nə̀ Zə̀kìy də awote, nə̀ ghâw tə ghu tiy mə fwiy dòʼò fyi kə idoŋ anə lòʼo kə Zə̀kìy dyoʼò nəniy ate ani nìyzə̀ bɛb tə aghù. A kâm wày dzə ani dzày mà bə̀ nyàŋə nyâŋ nyâŋ mə̀ àyiə mə̀ ghà mə̀.

⁶Abù ùfyiə wə ùdzə̀m, byay doʼò mà dzə̂ anə ayiə yə ghii, aghê àlwaʼa yə̀ kə laŋə zè nyiə kwoʼo tsə̀ kə anə utàw wə̀ u kə də bee ntsuk indzə̀m ani zù zəŋi fàʼ kə ghu.

⁷À kwuni mày kə wù ùlwaʼà ùnè wə̀ ù kwu nəniy ani nyi kwoʼ anə idzwə i fôŋ yə̀, soŋə fəmòʼ kə anə kəŋə̀m. Ù kə tsìy nyiə kwoʼo yə̀ nə̀ kàŋ tìy u nyə̀ yə̀ awò Zə̀kìy, nə̀ Zə̀kìy nîyzə̂ ibɛb i we nə̀ bɛb tə aghè liy yə ghu zəŋi soʼò nə̀ ghu kwu way.

⁸Yəə i kə də nəniy ghii, Zwàykə̀zwekiy kə dè təŋə bə̀ nə̀ dzəd yə ì zè nəniy a lòʼo kə̀ zwêzwe kiy ì kə kamə fwiy dzə̂, aŋwòə taw fə bee fə̀ kə nam tiy ŋwô.

⁹À kə yù də̀ tsəe kə kə dê bə̂ soŋə fə ŋgà də nyiə ate. I ghî myìŋə̀ nə̀ ufyiə wə ghu kə nyiə̀ nəniy awò Zə̀kìy nə̀ nyàm tə̀ ghu kə sâ yə̂ awò Zə̀kìy, u kə wày dzə ani zəŋi dzə̀ fôŋ tə aghù yə̀ ghu kə fwulə̀ nəniy Zə̀kìy nə̀ tə doʼò tsə tə̀ zwe tiy anə sə k-a-zə̀.

¹⁰Ayiə yə̀ kə màŋə̀ kwùmə̀ yə̀ kə nə̀ ùlàŋ wə̀ u lia nəniy ayiə ufànyiə wiy, nə̀ nlwù mə̀ muə̀ mìy, nə̀ lelê tə ayiə à suw zwe tsə iwè yìy nə̀ àyiə yə byiə kiy kə dzîy nəniy, i lyimə tsə̂ soŋə fə Zə̀kìy kî zəŋə tsə nəniy iyiə yə i dzwâb tsìy fyi nəniy.

¹¹Abù Yesù bù nəniy yəə à də̌ wù ùlwaʼà ùnè wìy zəŋə àyiə àdzoŋə̀ yə̀ a də nəniy nyiə. Utaw wə ù fàʼà nəniy ate u tsîy fyi ŋwô utaw u səsə wə. U kwu dzə̀ way utswə̂d ùliy wiy. À kə̀ zəŋi dzəə wè mbyi utuw u ghè wə̀. I dê tsə nə̀ utaw ughè wə̀ wày dzə fə anə mbyi.

¹²Ù kə kə̀ tsîy nyi dzə̂ anə lòʼo kə̀ zwêzwe kə nə̀ kàŋ tə təbyi tiy, nə̀ tə təmbòŋ tìy ani sà nyə̀ yə̀ awò Zə̀kìy, Ù kə tsìy nyi kwoʼ təŋ yə̀ inyi mòʼ a lòʼo kə zwêzwe kə nə̀ kàŋ tə we tiy. U bii fyi bə̀ ŋgàŋ, ani zəŋi tsə nə̀ ŋgà kə kâm dòʼò sòʼò yəə à də̀ aghee ndàw ntsaʼ.

¹³Abu aghû yə̀ ghu dzəə nəniy kə də ani zwu dòʼò nə̀ à də̀ kâŋ tə təbyi nə̀ tə təmbòŋ tìy, nə̀ ùdzə̀m u nyàm tə̀ ghu kə sâ nəniy awò Zə̀kìy,

¹⁴ghà kôʼ tsə nə̀ kâŋ tə Kə̀litò tə̀ fàʼ tsìy fyi ŋwô. À kə də̀ abidzəmə̀ Zwàykə̀zwekiy Kə̀litò kə nyiə̀ yə̂ ùwee u we wiy awò Zə̀kìy yəə à də̀ fyiə kə kə də kwu way gə̂ŋ kə udzə kiy ani sà anə bɛb tə ŋgàŋ. Kâŋ tə we tə̀ sùw myàʼà fòŋ tə ŋgàŋ zəŋə sòʼò nə̀ ŋgà kə kâm fàʼ sòʼò ayiə yə ŋgà kə faʼà tsə̂ mòʼò kə nə̀ à də̀ aghe a də ani zəŋi nə̀ Zə̀kìy bɛmə nə̀ ŋgà də tsitsi. U kə fàʼ aghii ani zəŋi tsə nə̀ ŋgà ki fwulə Zə̀kə̀ kə muə nəniy.

¹⁵À yù də ighe Kə̀litò də nəniy wù ntemə̀ntèmə̀ wìy anə uzə u ŋgàŋ nə̀ Zə̀kìy anə tɛb kə̀ fyiə kə, tə̀ aghû yə̀ ù sày kə ghu, ghu nì də ani bù nyi itsa yə ù kə tɛb na, aŋwòə Kə̀litò kə pfə ani bii fyi ŋgaŋ anə bɛb tə ŋgà kə zəŋi anə tɛb kə səsə kə.

¹⁶Ghà kwu ŋwô nə̀ awò tɛb kiy ani dòʼò kə̀tɛb ghu kwu ani dè bə̀ dzə̀ nə̀ wù wə̀ ù kə zəŋi nəniy tɛb kə ghè kə̀ mə pfə,

¹⁷aŋwòə tɛb kə wû kìy kyilə tsə kə kə̀daʼa nə̀ ù mə pfə, tɛb kiy kam way dzə ani fàʼ nə̀ wù wə̀ ù tɛb nəniy tɛb kə ghà kə̀ nam də̌ ùtaw wìy.

¹⁸À yù də ighe Zə̀kìy kə byemə nə̀ wù mə fàʼ dzwàb anə ŋkà mə̀ səsə mə nə̀ wù sà tsə dzə̀ kàŋ tə tənyàm.

¹⁹Yəə Musîs kə toŋə dzây mà yə̂ ulâŋ u Kə̀zə̀ wìy, kə̀moʼ, kəmòʼ awò aghè àdzə̀m, u nìy kə kâŋ tə wa təmbòŋ, nə̀ kàŋ tə təbyi tiy, u ŋwàmì dzəŋi kə nə̀ mwi, wəd kyabi yə̀ anə ŋwàʼà kə̀ ulâŋ wìy kə twâ dòʼò nəniy ate, u wəd kyabi yə̀ sòʼò azoŋə̀ àghè dzə̀m, nə̀ ù nìy kə ŋwû tə tənyàm tə̀ baŋə tìy nə̀ ŋkwè kə kàʼ fə̀liy fiy ghu kə tyoŋə nə̀ à də Haysòp.

²⁰Yəə ù kə wələ yə̂ nəniy u dzìy tsə nə̀, “À yù də̀ kâŋ tə̀ tə zəŋi tsə nə̀ Tɛb kə̀ ki taw, toŋə tɛb kə Zə̀kə̀ tsây lâŋ kìy nə̀ gha kwu ani na.”

²¹U nìy kə təkâŋ ighəd, wəd kyabi yə̀ sòʼò anə utàw nə̀ ùfyiə wə ùdzə̀m awote ghu kə fwulə̀ nəniy Zə̀kìy ate.

²²I də nə̀, anə làŋ kə Musîs nə̀, ufyiə udzə̀m ù dyoʼò kə ùzwe wiy nə̀ ghu dza tsə dzə̀ tə̀kàŋ ate. Abu ghu də kə̀ dza nəway kâŋ tìy, Zə̀kìy wày dzə ani nìyzə̀ tə̀bɛb.

²³Ghu kə kwu ŋwô ani nìy kàŋ tə tə nyàm ghu sûw maʼà utaw wə nə̀ ùfyiə wə ùdzə̀m u kə də nəniy ate aŋwòə ufyiə ughè wə̀ kə də̀ tsəe kə ufyiə wə u də nəniy an-a-vələ. Ghu kə kwuni kwu ani sùw màʼà ùfyiə wə u də nəniy an-a-vələ anə kàŋ tə̀ tə tsîy fyi nəniy kâŋ tə tə nyàm tìy.

²⁴Kə̀litò kə kə̀ nyi kwoʼ dzə̂ anə lòʼo kə̀ zwêzwe kə à zəŋi wù mbyi, utaw wə̀ kə màŋ də̀ kə tsəe kə lòʼo k-a-zə̀ an-a-vələ. Kə̀litò kə ba nyi kwoʼ yə̀ anə kəvələ, anə lòʼo kə ù də nəniy nyiə ate bwoʼo kə̀wo â Zə̀kìy anə utuw u ŋgàŋ.

²⁵Ù kə kə̀ nyi kwoʼ dzə̂ anə kəvələ ani tsəŋə kamə saa kwunə kə uwee u we wiy ndə̀mə̀ nsòŋə, yəə wù ùlwaʼà ùnè wìy kə nyiə kwoʼo tsə̂ a lòʼo kə̀ zwêzwe kə soŋə fə mòʼ an-a-ŋə̀m nə̀ kàŋ tə tə nyàm tìy nə̀ à kwuni wày tə we tiy.

²⁶Bəə i kə də ani dòʼò aghi, Kə̀litò ə kə tsəŋ kwu kə ani fii anə ndə̀mə̀ nsòŋə anə wokə mbyi kə kaʼ nəniy. Abû nyiə mbyi dziy bû mây, Kə̀litò kə bù ani bù nìy ŋwò ibɛb, nə̀ ù bù sà yə̀ ùwee u we soŋə fəmòʼ.

²⁷I də nə̀ wù kwu ani pfə soŋə fəmòʼ, Zə̀kiy dyaŋi saʼ we.

²⁸A də̀ sòʼò ighəd, Kə̀litò maa sà nyə̀ təŋ uwee u we wiy soŋə fəmòʼ ani nìy ŋwò yə̀ bɛb tə ndə̀mə̀ àghù. Ù kì kàmə̀ bè dzwəŋə ŋwò, à ki kaam way dzə ani bù pfə fəli anə bɛb tə ghù, à ki kwuni də ani bù bii fyi aghû yə̀ ghu lyimə we.