Read Isu Dzɛ̂m 1 Bible Online

Dzɛ̂m 1 - Isu bible

Dzɛ̂m 1

¹À ŋwàʼà kə̀ twà bə̀ mìə̀, Dzɛ̂m, wè kə̀fàʼ ə Kə̀zə̀ we nə̀ Mwê ə̀ mbyi Yesù Kə̀litò. Mə twoŋə zuw bə̀ àghě Kəzə̀ yə̀ ghu salì doʼò kyabi tsə̂ àdzə̀m anə mbyi.

²Awizə̂ yamə̀, ghà si dyoʼo abu ntswə̀d mìy tsəm kwi kə gha anə ndə̀m.

³Aŋwòə ghà kwu ŋwoə̀ nə̀ abu ghà təmi taw tsə anə ibɛmə ghii anə məntswə̀d i kî zəŋə tsə ŋwò nə̀ ghà ki də wày ani bvə̀.

⁴Kaw tsə nə dzəd ani kòʼ tsə nə̀ ghà nɛmə yə̂ anə ayiə yə ghà də ani təmi dòʼò taw tsə ate ani zəŋi tsə nə̀ ghà doʼò mâ tsə aghee dzoŋə̀ yə̀, ghu də kwu way udzə ùliy wiy, làʼà sòʼò wày fyiə kə̀ liy kiy ani nɛmə yə̀ yəə à də̀ awa Kəzə̀.

⁵Bəə wù də anə fwumi kəli nə̀ ù kwu way utwab wiy, u ŋwa yə̀ â Zə̀kìy. Zə̀kìy ki nyiə̀ yə̂ we nə̀ utwab wiy aŋwòə Zə̀kìy bvaa ŋwò nə̀ wo kiy ani nyiə̀ ùtwab awò àghè àdzə̀m ghu ŋwa yə̂ nəniy awò we. Ù nyìə̀ anə dzəd yə ì dè nəniy nə̀ ù liə ŋwô ŋgaŋ, yèmə̀ sòʼò azoŋə̀ ŋgàŋ.

⁶Abu wù ŋwa yə̂ nəniy fyiə kiy â Zə̀kìy anə igwùŋì, ù kwuni kwu ani kəli tsə ibɛmə nə̀ ù sə̀mə̀ dzə̀ wày, aŋwòə wù wə̀ ù sə̀mə̀ nəniy, ù də̀ yəə à də̌ mbuw kə dzwî ŋkwùŋì kìy byoʼò kyabə tsə̂ nəniy.

⁷Wù wə̀ ù sə̀mə̀ nəniy, ù kwu dzə̀ way ani mòʼ nə̀ ghe kî kyilə ŋwò fyiə kə̀ liy kiy â Mwe ə̀ mbyi.

⁸Ndzòʼò wù ù ghè wə̀ dzàw na ŋwoə fòŋə̀ we, ù kə̀ təmi doʼò taw dzə̂ anə ayiə yə ù zəŋə nəniy.

⁹Wù wə̀ ù bɛmə nəniy Zə̀kìy nə̀ ù la ŋwò, ù kwu ani səaŋə aŋwòə Zə̀kìy kî zəŋə ŋwò nə̀ ghu doʼò àghè soŋə̀ yìy.

¹⁰Akwuni bû wù wə̀ ù bɛmə nəniy Zə̀kìy nə̀ ù kwumə ŋwò, ù kwu ani nìy tswi tsə uwee aŋwòə ikwum i we yiy kî mìì ŋwò yəə ubwələ wiy nì fyiə kə ù zwum ŋwò yə̀.

¹¹Abu inyi yiy fyi kwoʼ bə̂, i taw zù anə ubwə̀lə u fəkàʼ, u pfə ŋwò yə̀, tswaʼi ŋwò fyi tswi bə̀ sòʼò. U kàmə̀ dzwàbə̀ sòʼò wày anə ayiə yə u kə dzwàbə tsə̂ nəniy ate. À də̀ sòʼò ighəd nə̀ àghè kwumə yiy. Yəə ghu fàʼà kyabə kə fàʼ kə ghu kiy, ghu nî pfə nia səə i kum i ghu yəə à də̀ ubwələ uŋkàʼ.

¹²Zə̀kìy kî lwì ŋwò wù wə̀ ù kì tyimə taw tsə nəniy anə ibɛmə i we anə soŋə fə ù də nəniy anə məntswə̀d aŋwòə abu ù kì də ani tsìy anə ndzòʼò ìmwàm kòʼ yə̀, Zə̀kìy ki namə we nə̀ imùə̀ yə̀ ù tɛb na nəniy awò àghu yə̀ ghu liə nəniy we.

¹³Abu wù tsìy nəniy anə məntswə̀d, ù kwu dzə̀ way ani dzày nə̀, “À də̀ Kəzə̀ ù mwàmə̀ koʼò nəniy miə nə̀ mə zəŋi ayiə àbɛbə yiy.” Aŋwòə wè lìy wày dzə ani mwàmə̀ kòʼ Kə̀zə̀ nə̀ ù zəŋi ayiə àbɛbə yiy. Zə̀kìy way dzə ani zəŋi nə̀ imwâm kòʼ yìy bû azoŋə̀ wù tə̀ ù zəŋi iyiə ibɛbə yiy.

¹⁴Imwâm kòʼ yìy kwuni bè azoŋə̀ wù abu ù kwu nəniy iliə yiy anə ibɛb, i niyebə yə̀ we nə̀ ù zəŋi bɛb.

¹⁵Abu wù kəli tsə nəniy iliə yiy ani zəŋi iyiə ìbɛbə yiy, i nɛmə zù anə ibɛb. Abu ibɛb yiy nɛmə kə nəniy, i zəŋi tsə wù te wiy pfə dòʼò yə̀ anə sə k-a-zə̀.

¹⁶Yəə i də nəniy ghii awizə̂ yamə, kəə wè lìy nə̀ nɛbə nyiə̀ nəniy gha.

¹⁷Ufyiə ùdzoŋə̀ wə̀ nə̀ ùfyiə wə u də kwu dzə̀ way udzə wiy, u ŋwòə bə̀ an-a-vələ awò Zə̀kə̀ kə kə nyiə̀ nəniy kaʼì tìy. Ù kwunə kòʼò tsə̀ dzə̀ wày yəə à də̀ uzəəŋi u sə̀kə̀ tsə̂ nəniy.

¹⁸Ù kə tsə̀m tsə ani nyiə̀ ŋgàŋ nə̀ ìmùə̀ ìfyiə yiy ani zəŋi tsə nə̀ ŋgà doʼò tsə awa wè abidzəmə̀ ntwùm ìsoŋə̀ yə̀ ani zəŋi tsə nə̀ ŋgà doʼò tsə kəsə anə ufyiə wə̀ ùdzə̀m ù kə zəŋi nəniy.

¹⁹Awizə̂ yamə, ghà kwu ani kəli tsə nə̀ wù ùmoʼ umòʼ kwu ani nìy tsə iyɛmì anə dzəd yə ù zwulə nəniy ayiə yiy ate. Ù kwu dzə̀ way ani zəaŋə dziy ayiə yiy, ù kwu dzə̀ way ani zəaŋə ŋəmə sòʼo nə̀ fòŋ.

²⁰I də ghii aŋwòə abu wù kwu fòŋ ì ŋəmə̀ yìy, ù wày dzə ani zəŋi iyiə ìdzoŋə̀ ìliy yiy Zə̀kìy liə nə̀ ù zəŋi.

²¹Yəə i də nəniy ghii, ghà kwu ani nyəli maʼa tsə ayiə mwàmə mə̀ dzəə mìy nə̀ mwàmə mə̀bɛbə̀ mìy soʼo. Ghà bvami tsə sòʼò ìwe nəli, ghà bɛmə kə soʼò ntwùm ə̀ Kə̀zə̀ yə̀ ì də nəniy anə fôŋ təli, ì də nəniy ani bii fyi gha.

²²Ghà kə mâŋ zuw màʼà dzə̀ ayiə yə ntwùm ə̀ Kə̀zə̀ dzìy nəniy, à ki də nə̀ ghà nɛbə ìwe nəli. Ghà kwu ani zəŋə yə ayiə yə ntwùm ìghè yə̀ dzìy bə̂ nəniy â ghà.

²³Abu wù zuw nəniy ntwùm ìghè yə̀, kə̀ kwuni zəŋi nəway ayiə yə ì dzìy nəniy, ù ki də yəə à də̂ wù wə̀ ù fwə̀lə̀ nyiə yə̂ uwee uwe wiy anə fyiə kə̀ tii kəsə kiy, kòʼ nyi yə̀ yəə ù də nəniy ate.

²⁴Abu ù kòʼ nyi yə̂ dzə̂ uwee uwe wiy anə fyiə kə̀ tii kə sə kiy, u ŋwò yə̀, dyaŋi nìyzə̀ yə̀ yəə ù də nəniy ate.

²⁵Abu wù kwuni na tsə isə yiy anə ayiə ulâŋ wə̀ u fîy fyiə nəniy aghû yìy, zəŋə yə sòʼò àyiə yə ulâŋ u ghè wə̀ dzìy nəniy, nə̀ ù màŋə̀ zuw myàʼà dzə̀ wày ayiə ghè yə̀ u nìyzə̀ dyaŋi yə̀, Zə̀kiy kî nyiə̀ ŋwòə we nə̀ lwì kìy anə ayiə we yə ù zəŋə nəniy àdzə̀m.

²⁶Abu wù lìy mòʼo nə̀ ghe fwulə̀ Kə̀zə̀ nə̀ ù kwuni yèmə̀ wày anə idzwə iwe, à ki də nə̀ ù maŋə̀ nɛbə ùwee uwe. À ki də soʼo nə̀ ù fwùlə̀ Kə̀zə̀ kə̀ŋwôŋwò.

²⁷Dzə̀d ì fwulə̀ Kə̀zə̀ yə̀ ìzwe nəniy də̀ sòʼò nə̀ ì kwu way gə̂ŋ kə udzə kiy, à də̌ ani nìy ìyèmì azoŋə̀ àwa mpfənsə yiy, nə̀ azoŋə̀ ise mpfənsə yiy anə ifii yə ghu fyaʼa nəniy ate. À də̀ sòʼò ani nìy ìyèmì nə̀ àyiə àbɛbə yə fə anə mbyi nə̀ a kə fwəd wô.