Read Isu Dzɛ̂m 2 Bible Online

Dzɛ̂m 2 - Isu bible

Dzɛ̂m 2

¹Awizə̂ yamə, yəə ghà bɛmə nəniy â Mwe ə̀ mbyi ə ŋgàŋ ùsoŋə̀ wìy, Yesù Kə̀litò, ghà kwu dzə̀ way ani kòʼ kè aghè liy yiy moo kòʼ ŋgwiʼi àliy yiy.

²Abu wù ù kwumə̀ wìy bù nəniy anə dzəŋə kəli nə̀ ù mə dzə̀ŋì kəli ntee fə ufyiə ùtsə ùsoŋə̀ wìy, nə̀ ndzwu tə̀dzoŋə̀ tìy, wù ù la wìy bù soʼò nəniy awote nə̀ ù mə dzə̀ŋì kəli usaʼ u tə ndzwu wiy,

³ghà kwu dzə̀ way ani dzày â wù ù kwùmə̀ wə̀ a we nə̀, “Kwe kə̀ dzoŋə̀ kìy də fə bǔ dòʼo ate.” Ghà kwuni dzây yə̂ â wù ù la wə̀, a we nə, “Təmi dòʼo yə̀ fiiy, moo a we dòʼo tsə a mbvə̀d akə̀lə̀ ìfwe yam.”

⁴Abu ghà zəŋi nəniy ghii, à ghii də̌ nə̀ ghà mə kòʼ kè wù ù lâ wìy, ghà ki də soʼo aghû yə̀ ghu saʼa nəniy aghê anə mòʼ tə̀bɛbə tiy.

⁵Awizə̂ yamə, ghà ə zwəli dzwâb tsə ayiə yə mə dzîy bə̂ â ghà. Zə̀kìy mə sày na aghê la yiy fə anə mbyi nə̀ ghu dòʼò tsə aghê kwumə yiy anə ibɛmə i ghu, zəŋi na tsə sòʼò ghu nə̀ ànì kyilə ghu loʼo kə ghe saʼa nəniy ate, anə ayiə yə ù kə tɛb na nəniy awò àghù yə̀ ghu liə nəniy we.

⁶Ghà kwuni kòʼò kê nəniy aghê la yiy. À də̌ nə̀ ndìə̀ ghu fyia nəniy anə utuw ghəli, sè zè sòʼò nə̀ ghà akə̀lə̀ àghù yə̀ ghu saʼa nsaʼ tiy yə? À də̀ aghê kwumə.

⁷À də̌ ghu, ghu dzîy nəniy ayiə àbɛbə kwùmə̀ yə̀ nə̀ Yesù wə̀ Zə̀kìy kə nyiə̀ nəniy gha awò wè nə̀ ghà doʼò àghě we.

⁸Abu ghà ndzə̂m na tsə nəniy lâŋ kə̀ kə tsîy fyi nəniy ulâŋ ù dzə̀m anə ŋwàʼà k-a-zə̀, kə dzîy nəniy nə̀, “Liə tsə wù ùmoʼumòʼ yəə wò liə nəniy uwe niə̀ wìy ate”, à ki də nə̀ ghà zəŋə àyiə yə a də nəniy tsitsi.

⁹Abu ghà kwuni koʼò kê aghê liy yiy, kòʼò ŋgwoʼo à liy yiy, ghà mə ghii zəŋi bɛb. Lâŋ kìy ki saʼ bɛb soʼò ghà yəə à də̀ aghû yə̀ ghu zaʼ nəniy lâŋ kìy.

¹⁰Aŋwòə wù wə̀ ù na nəniy ulâŋ wə̀ ùdzə̀m, kwuni zaʼ tsə lâŋ kə̀mòʼ, ù mə ghii bvə̀ mà ulâŋ u ghè wə̀ ùdzəm udzə̀m.

¹¹I də ghii aŋwòə Zə̀kìy kə dzày tsə nə̀, “Ghà kə nəŋì dzə̀ nə̀ wìy wù moo nə̀ ŋə̀mə̀ wù,” à nam də̀ kə we ù dzày tsə sòʼò nə̀, “Kə̀ wiy dzə wù.” Abu ghà də kə̀ nəŋì kə nəway nə̀ wìy wù moo nə̀ ŋə̀mə̀ wù, kwuni wiy tsə wù, ghà mə bvə̀ ulâŋ u Kə̀zə̀ wìy ùdzə̀m.

¹²Ghà ki dziy tsə ayiə yiy, fàʼà kyoŋə yə̀ sòʼò àyiə ghè yə̀ yəə à də̀ aghû yə̀ Zə̀kìy nî saʼa ghu anə ulàŋ wə̀ ù kə fây fyi nəniy ghu ate.

¹³Ghà kwu ani zəŋə yə ghii aŋwòə Zə̀kìy nî kwoʼ wày nə̀ mwuli kiy a ntsuk fə isaʼ azoŋə̀ àghû yə̀ ghu kə də kə̀ kwoʼo soʼò nəway nə̀ mwuli kiy azoŋə̀ àghè liy yiy. Wù wə̀ ù kwuni kwu nəniy mwuli kə̀ kwoʼo kiy azoŋə̀ àghè liy, Zə̀kìy nî saʼ wiy dzə̀ wày we.

¹⁴Awizə̂ yamə, à dzwàbə̀ nyiə tsə kìə̀ bəə wù kwoʼo nəniy uwe wiy nə̀ ghè kwu ibɛmə kwuni fàʼà yə̀ wày ayiə àdzoŋə̀ yìy ə? Ndzòʼò ìbɛmə i ghè yə̀ də̀ ŋwô ani bii fyi we yə̀?

¹⁵Abu àzə̀ yiə̀ ù lìy wìy də nə̀ ù kwu way ndzwu tiy ani dzə̀ŋì, moo ù də kwu way fyiə kə̀nyiə kiy,

¹⁶ghà kwu dzə̀ way ani dzày nə̀, “Zə̀kìy lwî wò, kə zəŋi tsə nə̀ loʼo tiy ki ŋəmə dzwabə azoŋə̀ wò, kə nyiə̀ soʼò wò nə̀ ùfànyiə wiy, wò ki nyiə kwe tsə.” Ayiə yə̀ kwu fàʼ kə̀ kìə̀ â wò ani dzày nə̀ wò nyìə̀ yə̀ dzə̀ wǎy ghu nə̀ ùfyiə wə u də nəniy ani fày ghu anə imùə̀ i ghu?

¹⁷Abu wò kwu nəniy ibɛmə yiy, kwuni fàʼà wày ayiə dzoŋə̀ yìy, i dê tsə nə̀ ibɛmə i ghè yə̀ pfə dòʼò ŋwò.

¹⁸Wè lìy nyə̀ ni dziy nə̀ ghe kwu ibɛmə â Kə̀litò, wù lìy dzìy nəniy nə̀ ghe fàʼà àyiə dzoŋə̀ yìy. Mə ki kwuni bəlì kə a we nə, “Dě bə̀ miə nə̀ wù wə̀ ù kwu ibɛmə yiy nə̀ ù zəŋə yə̀ wày ayiə àdzoŋə̀ yìy, mə ki kwuni dê yə̂ we nə̀ wù wə̀ ù kwu ibɛmə yiy fàʼà yə̀ sòʼò àyiə àdzoŋə̀ yìy.”

¹⁹Wò bɛmə ŋwô nə̀ Zə̀kìy də kə̀mòʼ. À də̀ iyiə ìdzoŋə̀ yìy. Nsìy mə̀bɛbə̀ mìy bɛmə sòʼò ŋwò nə̀ Zə̀kiy də kə kə̀mòʼ. Iyiə i ghè yə̀ zəŋə soʼò nəniy ghu nə̀ ghu ki tsəəŋə awò ìtsəŋ yiy.

²⁰Ghà də aghê àlyiʼa yiy, ghà liə ŋwô nə̀ mə dê bə̂ â ghà nə̀ ibɛmə yiy kwu dzə̀ way fàʼ kìy, abu ghà də kwuni fàʼà yə̀ wày ayiə àdzoŋə̀ yìy ə̀?

²¹Zə̀kìy kə kòʼ mə̀yə nə̀ tè ŋgàŋ, Ablàhâm, də̀ tsitsi anə sə kə we ə? À kə də̀ abidzəmə̀ àyiə àdzoŋə̀ yə̀ ù kə zəŋə nəniy anə sòŋə fə ù kə nîy kə nəniy wà we Ayzìk, gaʼ na kwoʼ kə anə kətà ani sà nyə̀ awò Zə̀kìy.

²²Ghà kôʼ tsə nə̀ ibɛmə i we yə ù kə kwu i kə fàʼà fwumə kyoŋə yə̀ ŋwò nə̀ àyiə we àzəŋə à dzoŋə̀ yìy. Ayiə we àdzoŋə̀ yə̀ ù kə zəŋə nəniy a dè bə̀ nə̀ ù ndzə̀m kwu ibɛmə awò Zə̀kìy.

²³Ayiə yə bù fyi kə àsoŋə̀ yìy anə yiə yə i twâ doʼò nəniy anə ŋwàʼà k-a-zə̀ nə̀, “Ablàhâm kə bɛmə kə Kəzə̀, bòʼ ìbɛmə i we, Zə̀kìy nìy we nə̀ à də̌ wè tsitsi.” À yù də̀ yəə Ablàhâm kə bû dòʼò nəniy fə̀lə̀ Kə̀zə̀ ate.

²⁴Ghà kôʼ tsə nə̀ à də̌ fàʼ kə̀ wù fàʼà nəniy, nə̀ ibɛmə yə wù kwu nəniy i zəŋə nəniy nə̀ Zə̀kìy bɛmə nə̀ ù dòʼò tsə tsitsi anə sə k-a-zə̀, à kaʼi wày dzə ibɛmə yə wù kwu.

²⁵À kə də̀ sòʼò ighəd nə̀ kpàlə̀ kə̀ ghu kə tyoŋə nəniy nə̀ à də̀ Lahàb. Zə̀kìy kə nìy we nə̀ ù də̀ tsitsi abidzəmə̀ fàʼ kə̀ ù kə fâʼ bòʼ ibɛmə i we anə yiə yə ù kə ŋgwam na nəniy aghee Islàel yə̀ ghu kə dziy zû tsê kôʼ tə̀ loʼo, u fày kə sòʼò ghu nə̀ ghu tu ŋwô fyi anə dzə̀d i ŋwò yìy.

²⁶Yəə i də nəniy nə̀ wù wə̀ ù də zwìy wày ù ghii pfə dòʼò ŋwò. I dê tsə sòʼò nə̀ wù wə̀ ù dzìy nəniy nə̀ ghe kwu ibɛmə nə̀ ù fàʼà yə̀ wày ayiə àdzoŋə̀, ibɛmə i we yiy ghii pfə dòʼò sòʼò ŋwò.