Read Isu Dzɛ̂m 3 Bible Online

Dzɛ̂m 3 - Isu bible

Dzɛ̂m 3

¹Awizə̂ yamə, à wày dzə̀ gha dzə̀m, ghà kwu ani liə ani dòʼò nə̀ àtyidè. Ghà kwu ani kəli tsə nə̀ ghəd yə ghè də nəniy nə̀ àtyidè yìy, Zə̀kìy nî ŋge nia tsə ìsə ani saʼ ghəd tsìy fyi aghê liy yə.

²Ŋgaŋ ə dzə̀m zə̂ zəŋə tsə̀ ŋwò àyiə yiy. Abu wù də kwuni zə̀ zəŋə dzə̀ wày ayiə àbɛbə yiy anə ayiə we à dziy yiy, i ghii dè tsə nə̀ ù mə nɛmə, də̀ sòʼo ani yèmì anə uwè u we udzə̀m.

³Abu a kwe kə nəniy fyiə̀ kə̀tsə ə kiy anə idzwə i kə̀ŋkhinyàm, à də̌ nə̀ kə ki zuw bəə ayiə yə a dzîy nəniy nə̀ kə zəŋi. Ŋgà də ani zəŋi nə̀ kə zû anə lòʼo kə ŋgà liə nə̀ kə zû ate.

⁴Mòʼo tsə nənìy mfə̀n kə̀ nè nê kə̀ anə dzwî, yəə kə loʼo ghaʼa nəniy ate, ŋkwùŋì kə̀taw kiy bê kə təŋə kyabə tsə̀, kpaʼa kə ghu baŋə̀ nəniy ate kə tɛbə ŋwò, kwuni zəŋə nə̀ kə zû anə lòʼo kə wù wə̀ ù bàŋə̀ nəniy mfə̀n kìy, ù liə nəniy nə̀ kə zû ate.

⁵À də̀ sòʼò ighəd nə̀ nɛm kiy. Yəə kə tɛbə kə ghii, kə də ŋwô ani zəŋi faŋkwoʼ tə ayiə. Moʼo bə̀ nəniy yə kaw kəntaw kiy ghaʼa nəniy ate, à də̀ kə dzaŋə f-a-gbù fə̀mòʼ fə diyà miʼà nəniy kaw kə ghè kə̀ kə̀dzə̀m.

⁶Nɛm kə wû kìy də sòʼò yəə à də̀ uvələ. Kə də bə̂d kə uwè kə̀ kə zəŋə nəniy ayiə àbɛbə yiy, dzələ mìʼà ùbə̀d uwè ùliy wə ùdzə̀m nə̀ àyiə we àbɛbə yə. Kə də ani kwe na yə̀ uwe u wû anə uvə̀lə̀ u byaʼa nəniy yəə à də̀ uvələ wə Zə̀kìy nî nyìə mfəm ate awò àghè bɛbə.

⁷Aghê mbyi yiy də ŋwô ani nyəli na lelê tə tənyàm tìy, ghu mə nyəli sòʼò lelê tə tənyàm tìy nə̀ ŋwùni, nə̀ nyàm tə̀ tə bwîy nə̀ nìə̀ mìy, nə̀ nyàm tə̀ tə bwîy nə̀ ìfwe yiy nə̀ nyàm tə̀ tə muə nəniy anə dzwî.

⁸Wè lìy kamə kwuni kəli kôʼ dzə̂ dzəd yə ù də ani nìy ìyèmì anə nɛm kə we. Nɛm kiy kwu təŋ kə ayiə àbɛbə. Anə kənɛm à lwe dòʼò təŋ kə àyiə yə a də ani zəŋi nə̀ wù pfə.

⁹Ŋgà nîy kə kə̀nɛm, ŋgǎ kyalə Mwe ə̀ mbyi ate, ŋgǎ kàm nìy kə sòʼò nɛm kə̀ moʼo kiy nyə̀ yə̀ kə̀ntyiə awò àghù yə̀ Zə̀kìy bwam na nəniy nə̀ ghu doʼò tsə yəə à də̀ ighe.

¹⁰Ŋgà kyalə Kə̀zə̀, nyìə̀ sòʼò kə̀ntyiə awò àghù yìy anə idzwə ìmoʼo yiy. Awizə̂ yamə, ŋgà ki zəŋə dzə ayiə ghè yə̀.

¹¹Isə i dzwî ìliy yiy way dzə mwi mə̀ twabə̀ mìy kwuŋə fyiə bə̂ ate, mwi mə̀ ŋwîy mǐy kwuŋə fyiə bə̀ sòʼò ate.

¹²Awizə̂ yamə, kaʼ fə lamə fiy də̀ ŋwoə̀ ani mwu fyi bə̀ utam tə̀biyày moo àŋgəm ə? Moo mwi mə̀ ŋwîy mìy də ŋwô ani fyi bə̀ anə isə i dzwî yə̀ ì kwu nəniy mwi mə̀ twabə̀ mìy ə̀?

¹³Wù də̀ ŋwô anə fwumi kəli ù kwu nəniy utwab wiy, zuw kyilə sòʼò àyiə ə̀? Ù kwu ani dè tsə anə imùə̀ iwe ìdzoŋə̀ yìy nə̀ anə ayiə we àdzoŋə̀ yə̀ ù zəŋə anə uwè ù bvamə wiy nə̀ anə utwab wə u ŋwô bə̂ nəniy awò Zə̀kìy.

¹⁴Abu wò kwuni kwu nəniy ghòʼ kə̀ bɛbə kiy anə fôŋ yiə̀, lia təŋə kə sòʼò ùwe niə̀, kə̀ kwiʼi dzə̀ uwe wiy anə ayiə ghè yə̀, kə̀ twe màʼà dzə̀ iyiə yə i də soʼo ìsoŋə̀ yìy.

¹⁵Zə̀kìy nyiə̀ dzə̀ wày ndzòʼò utwab u ghè wə̀ awò àghù yìy. Ndzòʼò ùtwab u ghè wə̀ à kwu aghee mbyi. Zwàykə̀zwekiy nyiə̀ dzə̀ wày aghê nə̀ ndzòʼò ùtwab wiy. Utwab u ghè wə̀ bè awò ambvə̂ntsə.

¹⁶Abu aghê kwu nəniy ghòʼ kìy, mòʼò təŋə kə sòʼò ìwe i ghu, utswə̂d wǐy də̀ sòʼo awote. Aghee ŋge zəŋə sòʼò lelê tə yiə tə̀ bɛbə tiy.

¹⁷Aghee Kəzə̀ yə̀ ghu kwuni kwu nəniy utwab wə Zə̀kìy nyiə̀ nəniy, ghu kwu fôŋ tə̀ zwe tiy, zəŋə sòʼò nə̀ ibvay yiy ki də. Ghu kwê sòʼò tə̀fòŋ nə̀ àghè liy yiy, zəŋə sòʼò ùfwu nə̀ àghè liy yiy. Ghu ŋge kwu iliə azoŋə̀ àghè liy yiy. Iliə ighè yə̀ zəŋə sòʼò nə̀ ghu si faʼa yə ayiə àdzoŋə̀ yìy. Ghu koʼò kè dzə̀ wày aghê liy yiy, ŋwamə zəŋə sòʼò wày.

¹⁸Aghû yə̀ ghu zəŋə nəniy nə̀ aghê ki muə anə ibvay, ghu ghii fìy ghu nə̀ ghu mùə̀ tsə anə ibvay nə̀ àghè àdzə̀m. Ghu də tsitsi anə sə k-a-zə̀.