Read Isu Dzɛ̂m 4 Bible Online

Dzɛ̂m 4 - Isu bible

Dzɛ̂m 4

¹Awizə̂ yamə, à zəŋə tsə kiə̀ nə̀ ghà ki ŋwaa anə iwè zwàʼà sòʼo? Ghà ŋwâ anə iwè zwàʼà sòʼò aŋwòə ayiə yə iwe nəli yiy liə ani zəŋə, a khu dzəd ani kəli tsə kədaʼa anə iwè nəli.

²Ghà liə ani kəli ufyiə, ghǎ kwuni də̀m kè yəə ghà də ani kəli ufyiə u ghè wə̀. Ghǎ dyaŋi byay tsə iwe ani wiy màʼà wù wə̀ ù kwu nəniy tə̀ ghà nîy ŋwô fyiə kə ù kwu. Ghà ndzə̂m liə ani kəli ufyiə, ghà kwuni wày ani kəli ufyiə u ghè wə̀. À də̀ ighe ghà zwaʼà, ŋwà kwùnə̀ sòʼò anə iwè. Ghà kwu way ufyiə wə ghà liə nəniy ani kəli aŋwòə ghà ŋwa yə̀ wày awò Zə̀kìy.

³Abu ghà ŋwa yə̂ soʼò fyiə kiy â Zə̀kìy, u twe ani nyə̀ aŋwòə sələ kə iyiə kə ghà ŋwa yə̂ nəniy fyiə kə ghè kə̀ ate à də̌ kə̀ bɛbə kiy. Ghà liə ani fàʼ yə̀ anə ufyiə wə ghà ŋwa anə yiə yə iwee nəli yiy liə.

⁴Ghà də aghû yə̀ ghu muə nəniy yəə ghu kwu way ibɛmə yiy awò Zə̀kìy. Ghà ndzə̂m kwu kə ŋwô nə̀ abu ghà kwu iliə yiy anə ufyiə u mbyi, à ki də nə̀ ghà ghî dzwəə nə̀ Zə̀kìy ə̀. Abu wù tsə̀m tsə nəniy ani dòʼò ùfwu nə̀ ùfyiə u mbyi wiy anə ndzòʼò dzəd yə ghii, ù ghii dzwəə nə̀ Zə̀kìy.

⁵Ghà moʼò nə̀ ayiə yə ŋwàʼà k-a-zə̀ kìy dzîy à də̀ iguw ə̀? Kə dzîy nə̀, “Fòŋ swəə ŋwòə Zə̀kîy ani yèmì azòŋə zwày kə we kə ù kwe na nəniy azoŋə̀ ŋgàŋ.

⁶Zə̀kìy kwuni dè ŋgàŋ nə̀ fòŋə̀ we ì dzòŋə̀ yìy.” Anə yiə yə i twâ doʼò nəniy anə ŋwàʼà k-a-zə̀ kìy nə̀, “Zə̀kìy zəŋə tsə nə̀ ayiə yə aghê kwoʼo iwè yìy byay na nəniy a kə doʼò dzə̀ anə ayiə yə ghu byay nəniy ù kwuni dè fòŋə ìdzòŋə̀ yìy awò àghù yə̀ ghu də kwoʼo way iwe yiy.”

⁷Ghà ki zuw yəə awò Zə̀kìy, ghà twe maʼà tsə àmbvə̂ntsə, ù kì tu ŋwò tsə a kə̀lə̀ ghà.

⁸Ghà bû a kə̀lə̀ Kə̀zə̀, tə̀ Zə̀kìy ki bû doʼò soʼò nə̀ ghà. Gha, aghê àbɛbə yiy, ghà zəŋi tsə nə̀ muə̀ təli tiy doʼò tsə tə̀ zwe tiy. Gha, aghû yə̀ ghu ŋwamə zəŋə nəniy, ghà kəli tsə soʼò fòŋ tə̀ zwe tiy.

⁹Ghà kəli tsə mwuli kə̀ kwoʼo kiy, ghà ki diy yə. Ghà kə tsoʼ dzə̀, ghà ki kwuni mwe yəə. Ghà kə dwiʼi, ghà kwuni kəli tsə iwe ìdələ yiy.

¹⁰Ghà nîy tswi tsə nəniy iwe nəli yiy akə̀lə̀ Mwe ə̀ mbyi, ù kî zəŋi tsə nə̀ ghà doʼò tsə aghê àsoŋə̀ yìy.

¹¹Awizə̂ yamə, ghà ki dziy dzə ayiə àbɛbə yiy azoŋə̀ àghè liy yiy ghu bɛmə nəniy Zə̀kìy. Abu ghà dzîy nəniy ayiə àbɛbə azoŋə̀ ghu, i ki dee nə̀ ghà mə saʼ wiy màʼà lâŋ k-a-zə̀ kə̀ kə dzîy nəniy nə̀ ŋgà kəli tsə iliə azoŋə̀ àghè dzə̀m. Abu ghà saʼ wiy nəniy lâŋ kə ghè kə̀, i ki də nə̀ ghà ndzəmə̀ twe ŋwò ani na lâŋ kə ghè kə̀. I ki dee soʼo nə̀ ghà də sòʼò aghû yə̀ ghu saʼa nəniy lâŋ kə ghè kə̀.

¹²À mày kə Kə̀zə̀ kə nyiə̀ nəniy ulâŋ wìy də̀ sòʼò wù wə̀ ù saʼa nəniy aghû yìy. Ù də̌ wù wə̀ ù kwu nəniy daʼa kiy ani bii fyi aghû, ù də̀ sòʼo wù wə̀ ù kwu nəniy daʼa kiy ani byɛbi màʼà àghù. Wò də̌ fə̀ndìə̀ ani saʼ wè lìy yə?

¹³Ghà zuw tsə ayiə yə mə dziy dzây. Gha yə ghà dzîy nəniy nə̀ “Zii, moo tswutswu, ghè kwu ani zù anə inaʼ yə moo anə inaʼ yiy, ghè zû doʼò tsə kəŋə̂m awote, ghè ki zəŋə yə bekəivən kiy awote kyilə ndə̀mə̀ ùkhiy ate.”

¹⁴Ghà boʼò kwu way yəə imuə̀ ghii yiy kî dyòʼò nəniy ate tswutswu. Ghà də yəə à də̀ kədzək kə fyiə kə nəniy anə kə̀mə̀ fə fə sòŋə, kə kàm saŋ ŋwò tsə.

¹⁵Ghà kwuni kwu ani dzày tsə nə̀, “Abu Mwe ə̀ mbyi liə nəniy, ghè kî də̀ ŋwô ani mùə̀, ghè ki zəŋə yə iyiə yə moo zəŋə yə̀ ìyiə yiy.”

¹⁶A kwuni bû nyìə̀, ghà ŋwunə ŋwò kwoʼo sòʼò ìwe. À wày dzə iyiə ìdzoŋə̀ yìy ani kwiʼi iwe anə ndzòʼò ìyiə yiy.

¹⁷Yəə i də nəniy ghii, abu wù də kə̀ zəŋi nəway iyiə yə ù kwu nə̀ i dzwàbə̀ ŋwò, ù mə ghii zəŋi ibɛb yiy.