Read Isu Dzɛ̂m 5 Bible Online

Dzɛ̂m 5 - Isu bible

Dzɛ̂m 5

¹Gha, aghê kwumə yiy, ghà ə zuw tsə ayiə yə mə dziy dzây! Ghà kwu ani diy, kyemi yə̀ iwe bòʼ àyiə àfyia yə a kwu ani bù fyi azoŋə̀ ghà.

²Ikwum ghii yiy kâm kwu dzə̀ way fàʼ kìy. Ususoʼo wiy mə fwu ŋwò sòʼo ndzwu təli tiy.

³Ghà mə ŋge byay na ŋkhiy miy nyiə ani fàʼ ate anə nsòŋə mə̀ ìbàmə̀. Ŋkhiy məli miy mə dzè dòʼò. Idzê ighè yə̀ dè bə̀ yəə ghà bɛbə nəniy ate. I nî bè fwuə ŋwò kə sòʼò ìwe nəli yəə à də̀ uvələ.

⁴Ghà kamə tsə dzə̂ nəway ŋkhiy mə̀ àghù yə̀ ghu kə fâʼ nəniy anə iswum ghii. Zuw nənìy, ghu dîy nə̀ ghǎ kə̀ zəŋi dzwâb dzə̂ nə̀ ghu. Idîy i ghù yə ghu dîy nəniy, i mə zù kwùm anə utswùŋì u Kəzə̀, Mwe ə̀ mbyi wə ù kwu nəniy udaʼa wiy ùdzə̀m.

⁵Yəə ghà kə muə nəniy anə mbyi ghà kə mòʼò təŋə kə ani nyi iwe anə ufyiə ùsoŋə̀ wìy, kyilə sòʼò ùfyiə ùdzoŋə̀ wìy, də̀ sòʼò anə yiə àdzoŋə̀ yìy. Ghà mə fyi na iwee nəli yiy ndòʼò ghaʼ dòʼò dzwàb tsə, ghà nyiə̀ lyimə kə ntsuk fə isaʼ fə Zə̀kìy nî wiy nəniy ghà ate.

⁶Ghà mə saʼ wiy aghû yìy, wiy màʼà sòʼò àliy yiy kə̀ŋwôŋwò nə̀ ghu də tsitsi. Ghu kə̀ bôʼ ŋwây dzə̂ nə̀ ghà anə dzə̀lə̀ ìlìy yiy.

⁷Awizə̂ yamə, ghà kwû tsə kə tə̀fòŋ ani ləmə Mwe ə̀ Mbyi ani zù kwùm anə sòŋə fə ù nì bè nəniy ate. Ghà kwû tsə kə tə̀fòŋ anə ayiə yə wù ùswum kwê nəniy fòŋ ani ləmə iwe ìfyiə yiy nə̀ i niə̀ tsə anə uswum u we tə̀ ufyiə wiy nɛmə dzwâb kə anə uswum ani zù kwùm soŋə fə ù kì kpîy nəniy ufyiə u we wiy ate.

⁸Ghà kwu sòʼò ani kwù tsə təfôŋ, ghà təmi taw tsə soʼò anə ibɛmə ghii ani ləmə Mwe ə̀ Mbyi aŋwòə soŋə fə we fə̀ bee fiy mə swəd.

⁹Awizə̂ yamə, kə̀lə̀ â ghà, kə ŋwuŋi dzə̀ŋì dzə̀ anə iwè tə̀ Zə̀kìy ki də kə̀ saʼ soʼò gha. Ghà kwu ani kəli tsə nə̀ wù ù saʼa wìy mə swəd, fəkəmə̀ ù kaʼ ani saʼ aghû.

¹⁰Awizə̂ yamə, ghà dzwumì yə̂ wuu kə ibwìy kə aghee ntwùm ə̀ Kə̀zə̀ yə̀ ghu kə niʼa nəniy ntwùm ə̀ Mwe ə̀ mbyi. Ghu kə kwè tsə tə̀fòŋ abu utswə̂d wìy kə tsəm kwi kə ghu ŋwô.

¹¹Ŋgà kwu ŋwô nə̀ Zə̀kìy lwî àghù yə̀ ghu kwê nəniy fôŋ tìy anə ibɛmə i ghu. Ghà mə̀ zuw yəə Dzôb kə kwû nəniy fòŋ ate kòʼ sòʼò àyiə yə Mwe ə̀ mbyi kə fây nəniy we ate. Mwe ə̀ mbyi dê mwuli kə̀ kwoʼo kiy awò àghù yìy, kwu sòʼo fòŋə̀ ìdzoŋə̀ yìy azoŋə̀ àghù yìy.

¹²Awizə̂ yamə, ghà kə kâ dzə̀ anə izəd i kəbyiwuŋ, moo anə izəd i kəmbvə̀dintsə moo anə izəd i fyiə kə̀li kiy. Zəŋi tsə nə̀ abu wò byemə kə nəniy ìny, a də̌ nə̀ wò ndzə̀mə̀ myìŋə̀ ìny. Abu wò twe tsə soʼò nə̀ hǎy, a də̌ nə̀ wò ndzə̀mə̀ myìŋə̀ hǎy. Abu à də wày aghii, Zə̀kìy kî saʼa wiy ŋwò gha.

¹³Wè lìy kwu ŋwô utswə̂d wìy anə uzə ghii ə̀? U gwùŋì yə̀ awò Zə̀kìy. Wè lìy səaŋə ŋwò anə uzə ghii ə̀? U zɛm yə̀ ndzàŋə tə tə kyalə nəniy Zə̀kìy.

¹⁴Wè lìy dzàŋə̀ ŋwò anə uzə ghii yə̀? U dzày nə̀ ghu toŋə nyiə̀ tsə aghû yə̀ ghu də nəniy utuw wiy anə dzəŋə kə aghě Kəzə̀. Ghu ki gwuŋì tsə anə tuw kə we, ghu kyili tsə mbvu mə̀ Olìf azoŋə̀ we anə izəd i Mwe ə̀ mbyi.

¹⁵Aghû yə̀ ghu kwu nəniy ibɛmə yiy, bəə ghu gwùŋì tsə nəniy, idzâŋ yìy kî nyilə myàʼà ŋwǒ wù. Mwe ə̀ mbyi Kə̀zə̀ kì zəŋə tsə ŋwò nə̀ wù ù ghè wə̀ taw kə. Bəə à də soʼo nə̀ wù ùghè wə̀ mə zəŋi ayiə àbɛbə, Zə̀kìy kî nìyzə̀ ə̀ sòʼò ŋwòə we.

¹⁶Yəə i də nəniy ghii, ghà kwu ani diiy dziy yə bɛb təli tiy awò wù umoʼ umòʼ gwùŋə̀ yə̀ sòʼò azoŋə̀ wù umoʼ umòʼ tə̀ Zə̀kǐy nì də ani zəŋi taw kə gha. I gwuŋì wù wə̀ ù də nəniy tsitsi anə sə k-a-zə̀ i kwu kədaʼa ani fàʼ àyiə.

¹⁷Èlaydzà kə də̌ wù soʼo yəə à də̀ ŋgaŋ, u tsə̀ŋ kwu kə ani gwùŋi nə̀ daʼa kiy nə̀ iwe yiy kə niə dzə̀. Iwe yiy dòʼò yə̀ kə̀ niə tswi bə̂ dzə̂ ambvə̀dintsə anə təŋə̀mə̀ ìti nə̀ boʼ kiy Zə̀kiy zəŋi tsə sòʼò nə̀ iwe yiy kə niə̀ dzə̀.

¹⁸Èlaydzà ə kàm gwùŋi fəli yə̀ â Zə̀kìy nə̀ ù twum bə̀ ìwe, Zə̀kiy zəŋi tsə sòʼò iwe yiy nìə̀ fyi tswi bə̀ ambvə̀d, ufyiə wiy nɛmə fyi kə, boŋ dzwàb kə sòʼò.

¹⁹Awizə̂ yamə, abu wè lìy nyəli maʼà tsə nəniy ayiə àsoŋə̀ yìy, làʼ này yə̀, wù lìy nìy dzwoŋi bə̂ nəniy we nə̀ ù kàm kəli dzwoŋi tsə ibɛmə anə ntwùm ə̀ ìdzòŋə̀ yə̀ a də̌ nə̀ wù ù ghè wə̀ mə fàʼ dzwàb.

²⁰Ghà kəli tsə nə̀ abu wù fày fyi kə nəniy wù ùbɛbə̀ wìy anə ayiə we àbɛbə yiy, ù mə ghii bii fyi wù ù ghè wə̀ anə ipfə, fày fyi sòʼò we nə̀ Zə̀kìy nîyzə̂ ndə̀mə̀ àyiə we àbɛbə yiy.