Read Isu 1 Pità 1 Bible Online

1 Pità 1 - Isu bible

1 Pità 1

¹À ŋwàʼà kə̀ twà bə̀ mìə̀, Pità, wè ntwùm ə̀ Yesù Kə̀litò. Mə twâ bə̀ ŋwàʼà kə̀ awò àghù yə̀ Zə̀kìy sây na nə̀ ghu də aghee ighe, ghu tuu doʼò anə ndə̀mə̀ ndə̀mə̀ tə tə lòʼò, dòʼò yə̀ aghě tə twùmə̀ anə mbwòʼ ə̀ Pontùs nə̀ a Gàlatìyà nə̀ a Kàpàdosìyà nə̀ a Esìyà nə̀ a mbwòʼ ə̀ Bìtinìyà.

²Tè ŋgàŋ, Kə̀zə̀, kə ghî sày ghà anə itsə̀m i we nə̀ ghà doʼò tsə àghě we. Zwàykə̀zwekiy zəŋi tsə nə̀ ghà doʼò tsə aghee zwe yiy. Zəŋi tsə nə̀ ghà si zuw yə awò Yesù Kə̀litò, zəŋi tsə sòʼò ghà nə̀ ghà zwu doʼò tsə anə kàŋ tə Yesù Kə̀litò. Mə gwùŋə̀ nə̀ Zə̀kìy ŋge dê bə̂ ghà nə̀ fòŋ ìdzoŋə̀ yìy, ù nyə̀ sòʼò ghà nə̀ ìbvay yiy.

³Ŋgà nyiə̀ ùkali awò Zə̀kə̀ kə də nəniy Tè Mwe ə̀ mbyi ə ŋgàŋ Yesù Kə̀litò. Ù mə dè ŋgaŋ nə̀ mwuli kə̀ soŋə̀ kìy yəə ù zɛ̀m ŋwò dzwoŋi kə nəniy Yesù Kə̀litò anə ipfə. Ù mə nyə̀ ŋgaŋ nə̀ ìmùə̀ ìfyiə yiy, nyiə̀ sòʼò ŋgàŋ nə̀ ìmòʼ yìy anə imùə̀ yə̀ i doʼò təŋ nəniy.

⁴I mə zəŋi ŋgaŋ nə̀ ŋgà ki lyimə ufyiə ùsoŋə̀ wə̀ Zə̀kìy na nəniy awò àghě we yiy. Ufyiə u ghè wə̀ ù na nəniy awò ghà, u də an-a-vələ anə lòʼo kə u də wày dzə ani fwày moo kəli udzə moo lù sòʼò.

⁵U də awò ghà, gha yə Zə̀kìy kyiŋə̀ ghà anə daʼa kə we bòʼ ìbɛmə yə ghà kwu nəniy azoŋə̀ we. Ù kì zəŋə kə ghii ani zù kwùm soŋə fə ù nì bii fyiə nəniy gha ate anə sòŋə fə Yesù nì dzwəŋə bə̂ nəniy ate.

⁶Ayiə yə Zə̀kìy zəŋi àdzə̀m, a kwu ani nyə̀ ghà nə̀ dwiʼi kiy, yəə i boʼò də kə nə̀ ghà kwu ani tsìy anə ndə̀mə̀ ndə̀mə̀ tə məntswə̀d anə kə̀mə̀ fə fəsòŋə.

⁷Sələ kə iyiə kə ntswə̀d mə̀ bè nəniy azoŋə̀ ghà, à də̀ ani mwàmkòʼ ìbɛmə ghii nə̀ à də̀ kə ŋwô ibɛmə ìsoŋə̀ yìy yə̀. Gôl yə̀ ì də nəniy ani bɛb, ghu mwâmə̀ kòʼò tsə̀ anə uvə̀lə̀ ani zəŋi tsə nə̀ ì zwu tsə. À də̀ sòʼò ighəd ntswə̀d mìy bê nəniy azoŋə̀ ghà ani bù mwàmkòʼ ìbɛmə ghii ani zəŋi tsə nə̀ ibɛmə ghii yiy ki taw aŋwòə ibɛmə i ghà yə̀ tsìy fyi ŋwô gôl. Abu ghà təmi taw tsə nəniy, ghà ki dyaŋi də ani kəli ukali nə̀ ŋkwiʼi miy anə ntsuk fə Yesù Kə̀litò nì bè dzwəŋə nəniy ate.

⁸Yəə ghà də kamə kə̀ kôʼ kôʼ kə nəway Yesù, ghà liə ŋwoə we. Yəə ghà də bòʼò kòʼò sòʼò wǎy we nyiə̀, ghà kwu ŋwô ìbɛmə yiy azoŋə we. À də ighe ghà kwu nəniy dwiʼi kə̀soŋə̀ kìy anə ayiə yə wu də bòʼ wày ani tyi dè anə idzwə.

⁹Bòʼ ìbɛmə yə ghà kwu nəniy azoŋə̀ Yesù, ghu nyiə̀ bii fyiə mùə̀ təli.

¹⁰Aghee ntwùm ə̀ Kə̀zə̀ kə nìy tsə fəsoŋə ani kaw kəli fyi kə yəə Zə̀kìy nî bii fyiə aghee ate. Ghu dzày na zìì bə̀ yəə Zə̀kìy byay na ani bii fyi gha ate.

¹¹Ghu ndyimə ìwee ani kaw kəli fyi kə sòʼò soŋə fə nə̀ dzəd yə ayiə ghè yə̀ nì fyiə nəniy ate. Zwày kə Kə̀litò kìy kə də̌ azoŋə̀ ghu, kə dzày na zìì yə̀ â ghu yəə Kə̀litò nì kwě fòŋ anə ifii, ù bù kəli ŋkwiʼi mə̀ sòŋə̀ mə̀ Zə̀kìy nî nyìə̀ awò we ibàm.

¹²Zə̀kìy kə dè nyə̀ tsə awò àghě ntwùm ə̀ we nə̀ fàʼ kə̀ ghu faʼà nəniy, ghu faʼà dzə̀ wày anə iwe i ghu, ghu kə kwuni fàʼà awò ghà. Ghu kə dzìy ayiə yə ghà zuw yə̂ awò aghù yə̀ ghu niʼà ntwùm ə̀ ìdzòŋə̀ yìy nyiə. À də̌ Zwàykə̀zwekiy kə Zə̀kìy twum bə̂ nəniy an-a-vələ kə nyiə̀ nəniy ghu nə̀ daʼa kiy nə̀ ghu nàʼà ntwùm ìdzoŋə̀ yə̀. Tsə̀təndii t-a-zə̀ tìy kə mbòʼò mbvùŋə̀ sòʼò ŋwò ani zuw kəli tsə ndzòʼò ayiə yə.

¹³Yəə i də nəniy ghii, ghà kwu ani byay na tsə fôŋ təli tee à də̀ aghû yə̀ ghu dziy zû fâʼ. Ghà ki kwi tsə iwee yiy, nia yə̀ kə ìmòʼ ghi ìdzə̀m anə fòŋə̀ ìdzòŋə̀ yə̀ Zə̀kìy nî dè nəniy awò ghà anə ntsuk fə Yesù Kə̀litò nì bè dzwoŋi nəniy ate.

¹⁴Ghà ki zuw yə awò Zə̀kìy. Kəə ghà nə̀ mùə̀ dzə̂ anə yiə yə iwee nəli tiy dzîy nəniy, yəə ghà kə də tsə nəniy səsə anə sòŋə fə ghà kə də kam kwu way Zə̀kìy.

¹⁵Ghà kwuni kwu ani də aghê zwe yiy anə ayiə ghii àzəŋə yiy àdzə̀m. Ighəd soʼo anə ayiə yə Zə̀kə̀, kə kə toŋə tsə nəniy gha zwe nəniy ate.

¹⁶I twâ dòʼò anə ŋwàʼà k-a-zə̀ nə̀, “Ghà doʼò tsə aghee zwe yiy aŋwòə mə zwe ŋwò.”

¹⁷Abu ghà gwuŋə̀ nəniy, ghǎ tyoŋə tsə Kə̀zə̀ nə̀ à də̌ Təli wə ù saʼa nsaʼ tə aghee dzə̀m tìy tsitsi anə ayiə yə ghu zəŋə nəniy. Yəə i də nəniy ghii, ghà kwu ani nìy kə soŋə fə ghà muə nəniy nyiə fə ate anə mbyi yəə à də̀ aghee kətwum, ani nyə̀ mə̀ŋkwiʼi â Zə̀kìy.

¹⁸Ghà mgbaŋ kwu ŋwô nə̀ fyiə kə Zə̀kìy kə tsə nəniy ani zwe dzwoŋi gha anə ndzwad kə imùə̀ kə̀ ghà kə zwiʼi nîy kə awò nə̀ təli ghii asəsə yiy, à kə wày dzə sivà, moo gôl, ì də nəniy ani bɛb.

¹⁹Zə̀kìy kə zwe dzwoŋi gha anə kwab kə tə kàŋ tə Kə̀litò, ù kə də yəə à də̌ Wà ndzù yə̀ ì kə də kwu way gə̂ŋ kə udzə kiy anə uwè

²⁰Â Zə̀kìy ani zəŋi mbyi, à kə də̌ nə̀ ù mə sǎy Kə̀litò. Nyiə anə ntsukə mə̀ ìbàm mə̀, Zə̀kìy mə kwuni dè bə̌ Kə̀litò awò àghě mbyi yiy. Ù kə zəŋi tsə ghi ani fày ghà.

²¹Ghà mə gaʼ na fôŋ tìy azoŋə̀ Zə̀kìy abidzəmə̀ Kə̀litò. Zə̀kìy kə zɛ̀m ŋwò dzwoŋi kə we anə ipfə, nyə̀ tsə we nə̀ daʼa kə̀soŋə̀ kìy. À yù də ighe ghà kwu nəniy ibɛmə yiy nə̀ imòʼ yìy azoŋə̀ Kə̀zə̀.

²²Ghà mə zəŋi iwe nəli yiy mə zwu dòʼò dzwàb anə ayiə yə ghà zuw yə̂ nəniy ntwùm ə̀ Kə̀zə̀ ìsòŋə̀ yìy. À yù də̀ ighe ghà kwu nəniy iliə ìsoŋə̀ yìy awò àghè liy yə ghu bɛmə nəniy Zə̀kìy. Ghà zû kə nə̀ səkiy ani dè iliə ìsoŋə̀ yìy awò àghè dzə̀m nə̀ fòŋ təli tiy tə̀dzə̀m.

²³I də ghi, aŋwòə Zə̀kə̀ kə də nəniy utaw wiy, ù mə zəŋi gha ghà nyiə̀ də̀ yəə à də̀ àghû yə̀ ghu byi kwunì dzə̂ ghu, anə dzə̀ we yə ì nyə̀ nəniy imuə̀ yìy, də̀ sòʼò fyiə kə kə də bɛbə way, dzə̀ ighè yə̀ dòʼò təŋ nəniy soʼo. Dzə̀ yə̀ kə̀ ŋwô bə̂ dzə̂ awò nə̀ təli ŋgàŋ yə̀ ghu də nəniy ani pfə, ì ŋwò bə̀ awò Zə̀kə̀ kə doʼò təŋ nəniy.

²⁴I twâ dòʼò anə ŋwàʼà k-a-zə̀ nə̀, “Aghee mbyi ə dzə̀m də yə à də̌ uzuu, Imwây i ghu yiy də yəə à də̌ ubwələ uŋkàʼ a mbvən. Uzuu wiy zwumə tsə ŋwò, ubwələ u ghu wiy tswaʼi tsə sòʼò ambvə̀d.

²⁵A kwuni bû dzə̀ ə̀ Mwe ə̀ mbyi ì nì dyoʼò təŋə ŋwò.” Dzə̀ yə̀ də̌ ntwùm ə̀ ìdzoŋə̀ yə̀ ghu kə naʼà nəniy awò ghà.