Read Isu 1 Pità 2 Bible Online

1 Pità 2 - Isu bible

1 Pità 2

¹Yəə i də nəniy ghii, ghà bwi na tsə ani zəŋə ayiə àbɛbə, ghà nyəli maʼà ani nɛb aghù. Ghà nyəli maʼà ani ŋwamə zəŋə, ghà ki ghoʼo dzə aghù yìy moo dzìy àyiə àbɛbə yiy azoŋə̀ àghè liy yiy.

²Ghà kwuni doʼò tsə yəə à də̀ awa à bwi yiy, ghà liə yə̂ ani nyi ufânyiə wə Zwàykə̀zwekiy nyiə̀ nəniy, tə̀ gha ki nɛmə kpe tsə awò Zə̀kìy ani bii fyi gha.

³Ŋwàʼà k-a-zə̀kìy dzîy nə̀, “Ghà mə mwàm kòʼ idzwâb i Mwe ə̀ mbyi yìy, ghà kwu ŋwô nyiə nə̀ ù fàʼà ŋwò ayiə àdzoŋə̀ yìy.”

⁴Ghà bû akə̀lə̀ Mwe ə̀ mbyi, Ù də̀ yəə à də̀ itay yə i muə nəniy, aghê bwamə təndaw kə twe maʼà nəniy dzìy nə̀ i kwu way fàʼ kìy. Zə̀kǐy kwuni sày kə dzìy nə̀ i kwu ŋwò fàʼ kìy.

⁵Ghà də nyiə yəə à də̀ atay yə a muə nəniy Zə̀kìy byiə nəniy ndàw we ate[1]. Ghà faʼà nəniy yəə à də̀ aghê àlwaʼa à zwe yiy, sà nyìə̀ ùfyiə wə Zə̀kìy bɛmə na nəniy abidzɛ̀mə̀ Yesu.

⁶Zə̀kìy mə dzày anə ŋwàʼà kə we nə̀, “Mə sî kə ìtay ìsoŋə̀ yìy, mə na tsə yəə à də itay ibvu i ndaw a Zayòn. Wù wə̀ ù kì byemə nəniy awò we ù nì kəli kòʼ wày tuw kə̀dələ kiy.”

⁷Gha yə ghà bɛmə nəniy awò we, à yù də̀ itay ìsoŋə̀ yìy awò ghà. A kwuni bû aghû yə̀ ghu də kə̀ bɛmə nəway awò we, i də awò ghu anə yiə yə ŋwàʼà k-a-zə̀kìy dzîy nə̀, “Itay yə aghee bwamə tə ndaw kə twe maʼà nə̀ i kwu way fàʼà kìy, à kàm də̀ ighe i də nəniy itay ìsoŋə̀ yìy anə atay yə à dzə̀m.”

⁸Ŋwàʼà k-a-zə̀ kìy mə dzày sòʼò nə̀, “À yù də̀ itay yə̀ i nî zəŋə nə̀ aghê tyaŋì, à də̀ sòʼò na kə kə nî zəŋə tsə aghû yìy nə̀ ghu bvə̂.” Ghu kə tyàŋì aŋwòə ghu kə kə̀ bɛmə nəway dzə̀ ə̀ Kə̀zə̀. À də̀ ayiə yə Zə̀kìy kə liə nəniy nə̀ i fyi nə̀ ghu.

⁹Ghà kwuni də̀ aghû yə̀ Zə̀kìy sây kə nəniy. Ghà də aghê lwaʼa yə̀ ghu faʼà nəniy awò Zə̀kìy, dòŋ kə ŋgàŋ. Ghà də yəə à də̀ inaʼi aghè zwe yiy, ghà nyiə̀ də̌ aghě Kəzə̀, ù nìy ŋwô fyi bə̂ nəniy gha anə kələm, na fyi bə̀ ghà anə asə ə̀ zwe à soŋə̀ yìy nə̀ ghà naʼà yə̂ mali tə yiə tə tə̀dzə̀m ù zəŋə nəniy.

¹⁰Səsə, ghà kə wày dzə aghê Kəzə̀. Akwuni bû nyiə̀, ghà də aghê Kəzə̀. Səsə, Zə̀kìy kə kwu dzə̀ way mwuli kə̀ kwoʼo kiy azoŋə̀ ghà. Akwuni bû nyiə, Zə̀kìy mə̀ kwoʼ nə̀ mwuli kiy azoŋə ghà.

¹¹Awizə̂ yam à soŋə yìy, Mə bwoʼo gha nə̀ wokiy, yəə à də̀ aghû yə̀ ghu màŋ bwîy nyi bə̂ nəniy anə mbyi, nə̀ aghù yə̀ ghu tuu dòʼò nəniy ntswə̀d mìy fə anə mbyi, nə̀ ghà kə ŋwô yə̀ dzə̀ ani zəŋə ayiə yə gûw tə iwè təli tiy liə nəniy nə̀ ghà si zəŋə. Ndzòʼò àyiə ghè yə̀ ŋwà nə̀ àyiə yə a də nəniy àdzoŋə̀ yìy anə fôŋ təli.

¹²Ghà muə̀ tsə imuə̀ ìdzoŋə̀ yìy anə uzə u ghù yə̀ ghu də wày aghě Dzû yìy. Yəə i də nəniy ghii, abu ghu boʼò dzìy kə nə̀ ghà zəŋə àyiə bɛbə, ghu ki kôʼ tsə nə̀ ghà də aghê àdzoŋə̀, ani bu a ntsukə fə isaʼ, ghu ni də ani nyə̀ mə̀ŋkwiʼi awò Zə̀kìy.

¹³Bòʼ Mwe ə̀ mbyi, ghà ki zuw yə awò aghù yə̀ ghu də nəniy utuw wiy àdzə̀m. Yəə à də̌ dòŋ kə̀ kə saʼa nəniy aghê dzə̀m,

¹⁴moo, aghě kətuw yə anə təmbwòʼ ù nìy na kə nəniy nə̀ ghu ki nyiə mfəm awò aghù yə̀ ghu zəŋə nəniy ayiə àbɛbə yiy, ghu kali soʼò àghù yə̀ ghu zəŋə ayiə àdzoŋə̀.

¹⁵Zə̀kìy liə nə̀ ayiə àdzoŋə̀ yə̀ ghà zəŋə nəniy, a fê na yə̂ àdzwə aghè àliʼa yə ghu dzîy nia nəniy ayiə yə ghu də kwu way anə utuw ghii.

¹⁶Ghà muə̀ tsə yəə à də̀ aghû yə̀ ghu də wày ukwə̂d wìy. Ghà kə kwuni nìy yə̀ dzə̀ nə̀ à də̀ kəbwôʼ â ghà ani zəŋi ayiə àbɛbə. Ghà muə̀ tsə yəə à də̀ aghe kəfàʼ ə Kəzə̀.

¹⁷Ghà ki nyiə tsə aghê àdzə̀m nə̀ ŋkwiʼi miy, ndzə̀mə̀ liə àghù yə̀ ghu bɛmə nəniy awò Zə̀kìy. Ghà ki tsəŋə tsə Zə̀kìy, nyìə̀ tsə sòʼò mə̀ŋkwiʼi awò dòŋ kə̀ kə saʼa nəniy gha.

¹⁸Gha yə ghà faʼà a təŋə̀ aghù yìy, ghà kwu ani zuw yə̀ awò mwe u fàʼ ghii, nyə̀ ŋkwiʼi mə ghà kwu ani nyə̀ â ghu. Ghà kə zuw təŋ dzə̀ awò nə̀ mwe yə ghu zəŋə nəniy ayiə àdzoŋə̀ yìy, zuw kyilə sòʼò ghà, ghà ki zuw yə sòʼò awò nə̀ mwe yə ghu ŋgay nəniy.

¹⁹Zə̀kìy kî dyoʼo ŋwòə ghà, abu ghà kwû tsə nəniy fôŋ tìy, tsìy yə̀ anə ifii yə ghà ə mə̀ də kwu way ani tsìy ate, aŋwoə gha ndzə̂m kwu ŋwô ayiə yə Zəkìy liə nəniy.

²⁰Ghà way dzə ani kəli namə kə̀ liy kiy, abu ghà kwê nəniy fòŋ, fyaʼa anə iyiə ìbɛbə yə ghà zəŋi nəniy, abu ghà kwuni fyaʼa nəniy kwè fòŋ anə iyiə ìdzoŋə̀ yə̀ ghà zəŋi nəniy, Zə̀kìy ki dyoʼo nə̀ ghà.

²¹À yù də̀ sələ kə iyiə kə Zə̀kìy kə sây kə nəniy gha ate, aŋwòə Kə̀litò nə̀ ùwee u we wiy kə fii anə iyiə ghii, dè na bə̀ ghà nə̀ tsəe kiy ani zəŋi tsə nə̀ ghà ki dzwùmi bə̂ wuu kə ighe kiy.

²²Kə̀litò kə kə̀ zə̀ŋi kôʼ dzə̂ iyiə ìbɛbə ìliy yiy, ù kə kə̀ guw kôʼ sòʼò wè lìy.

²³Abù aghê nyaʼì nəniy we, u kə̀ nyaʼì dzwoŋi dzə̂ ghu. Abù ù fyaʼa nəniy, u kə̀ bvumi dzə̂ nəway aghû yə̀ ghu kə zəŋə nə̀ ù fii. Ù kə kwuni na yə̀ kə fòŋə̀ we azoŋə̀ Zə̀kə̀ kə saʼa nəniy tsitsi.

²⁴Kə̀litò nə̀ uwe u we wiy maa fii anə ibɛb i ŋgàŋ, ghu ba yə̀ we anə kàʼ fə tənzəd. À yù də̀ ighe ŋgà kwu nəniy ani nyəli màʼà ìbɛb, ŋgà ə kaʼ tsə ani muə̀ ìmuə̀ i tsitsi yiy. Afoŋ yə ù kə kəli nəniy, a mə zəŋi taw gha.

²⁵Ghà maa làʼ này yəə à də̀ təndzù. Zə̀kìy mə kwuni nìy dzwoŋi bə̀ ghà nyiə̀ nə̀ ghà dzwùmì àbàʼàtə̀ndzù ghi à də nəniy wù wə̀ ù yèmə̀ nəniy anə mùə̀ təli.