Read Isu 1 Pità 3 Bible Online

1 Pità 3 - Isu bible

1 Pità 3

¹Yəə aghě kəfàʼ yìy nyiə̀ yə̂ nəniy iwee i ghu yiy awò nə̀ mwe ufàʼ u ghu, à də̀ ighəd Gha iyəŋi yə ghà nîy nəniy aŋəmə, ghà kwu ani nyiə yəə iwee nəli yiy awò àŋəm ghii yiy, tə̀ bəə àliy yiy də nə̀ ghu zuw way awò Zə̀kìy, umwamə ghii wiy də ani zəŋi tsə nə̀ ghu kaʼ yə̂ ani zuw â Zə̀kìy nə̀ ghà ə kə̀ bôʼ naʼà nəway ntwùm ə̀ Kə̀zə̀ awò ghu anə idzwə.

²Aŋwòə ghu koʼò bə̀ umwamə ghii wə u zwe nəniy, nə̀ yəə ghà nyiə̀ nəniy ŋkwiʼi miy ate awò ghu.

³Ghà kə kaʼi zəŋi təŋ dzə̀ ufoŋ wiy anə gùw tə iwè yəə à də̀ ùtuw ùbyiə wiy, nə̀ ani dzə̀ŋì ufyiə ùdzəŋə wə̀ ghu zəŋi anə̀ gôl, moo ndzwu tə̀ dzoŋə̀ tə̀ ghà dzə̀ŋə̀ nəniy.

⁴Idzwâb ghii yiy kwuni kwu ani ŋwò bə̀ anə fôŋ təli. À yìy də̌ ndzòʼò ìdzwàb yə̀ i də kwunə kòʼò tsə̀ dzə̀ wày. Idzwâb i ghè yə̀ ŋwò bə̀ anə ayiə yə ghà bvamə nəniy iwe yiy, kwu sòʼò way iwee ì kwoʼo yiy. À yù də̌ ndzòʼò ìdzwàb yə̀ Zə̀kìy nîy nəniy nə̀ à də̀ idzwâb ìsoŋə̀ yìy.

⁵Iyəŋi à zwe səsə yə ghu kə fwulə̀ nəniy Zə̀kìy, gaʼ na soʼò fòŋ tə ghu azoŋə̀ Kə̀zə̀, ghu kə dè idzwàb ighu anə ndzòʼò dzəd yə ghi nə̀ ghu nyiə̀ yə̀ iwe i ghu awo àŋəmə ghu yiy.

⁶Sèla kə də̀ sòʼo dzòʼò wìyəŋi wə, u zuw yə̀ awò Ablàhâm, tyoŋə sòʼò we nə̀ nə̀ ù də̀ mwe awò we. Ghà də sòʼò yəə à də̀ awa Sèla iyəŋi, abu ghà zəŋə yə̂ ayiə àdzoŋə̀ yìy nə̀ ghà tsəŋə way iyiə ìliy yiy.

⁷Ighəd soʼo nə̀ ghà iŋə̀mə̀ yə̀ ghà nîy nəniy aghiy yiy, ghà kwu ani mùə̀ tsə anə ayiə dzoŋə̀ yìy nə̀ àghiy ghii yiy. Ghà kəli tsə soʼò nə̀ aghiy ghii yiy taw dzə̀ wày yəə à də̀ gha iŋə̀mə̀. Ghà ki nyiə tsə soʼo ghu nə̀ ŋkwiʼi miy aŋwòə Zə̀kìy kî nyìə̀ sòʼò ŋwòə ghu nə̀ ìmùə̀ itsà yìy anə yiə yə kə kî nyìə̀ nəniy gha. Ghà ki zəŋə yəə ghii tə̀ fyiə kə̀li kiy ki də wày ani tyàlì màʼà ìgwùŋì ghii.

⁸Ani dzày kəd tsə, gha dzə̀m kwu ani dòʼò tsə anə dzə̀ ìmòʼ. Ghà ki kwoʼo tsə nə̀ mwuli kiy, ghà kəli tsə iliə anə iwè yə̂ də̀ àwizə̂. Ghà ki zəŋə yə soʼo ayiə àdzoŋə̀ yìy anə iwè nəli, bvamə tsə sòʼò ìwe.

⁹Ghà kə tsə dzwoŋi dzə̀ ibɛb yiy anə ibɛb, moo ghà kə nyaʼì dzə̀ aghû yə̀ ghu nyaʼà nəniy gha. Ghà kwuni kwu ani lwì yə̀ àghù yə̀ ghu zəŋə gha nə̀ àyiə àbɛbə yiy, aŋwòə lwì kìy də fyiə kə Zə̀kìy kə tɛb na nəniy ani nyə̀ awò ghà anə sòŋə fə ù kə sây kə nəniy gha.

¹⁰I twâ dòʼò anə ŋwàʼà k-a-zə̀ nə̀, “Bəə ghà liə nəniy ani mùə ìmùə̀ ìdzoŋə̀ yìy, liə sòʼò ani muə dzwàb ntsuk indzə̀m, ghà ə kwu ani bwi na ani dziy ayiə àbɛbə Ghà kwu dzə̀ way ani dziy soʼo ayiə àguw yiy.

¹¹Ghà kwu ani nyəli màʼà àyiə àbɛbə yiy, ghà ki zəŋə yə ayiə àdzoŋə̀ yìy, Ghà kwu ani ŋwày tsə anə yiə yə ghà kəli kwûm ani kòʼ tsə nə̀ ibvay yiy si də anə fwumi kəli,

¹²aŋwòə à də̀ Mwe ə̀ mbyi ù lia nəniy aghû yə̀ ghu də nəniy tsitsi anə sə kə we, Ù zuw sòʼò ìgwùŋi i ghù yə̀ ghu də nəniy tsitsi Zə̀kìy kwuni nyìə̀ dzə̀ wày utwûmusə wiy awò àghù yə̀ ghu zəŋə nəniy ayiə àbɛbə yiy.”

¹³À də̌ ndiə ani zəŋi gha nə̀ ìyiə ìbɛbə yiy abu ghà kwu nəniy ighaa yiy ani zəŋi iyiə ìdzoŋə̀ yìy?

¹⁴Bəə ghà kwuni kwu kə ani fii anə iyiə ìdzoŋə̀ yə̀ ghà zəŋə nəniy, Zə̀kìy kî lwì ŋwò gha. Ghà kə tsəŋ dzə̌ wè lìy, ghà kə fyimi sòʼò iwe nəli yiy kwùmə̀ yə̀ nə̀ àyiə yə aghê də ani zəŋi nə̀ ghà.

¹⁵Ghà kwuni kwu kə ani tsəŋə yə Kə̀litò nyiə̀ yə̀ mə̀ŋkwiʼi awò we anə fòŋ təli, aŋwòə ù də̀ Mwe ə̀ mbyi ghii. Ghà kwu ani byay na tsə iwee nəli anə sòŋə indzə̀m ani bə̀lì yə̀ wù wə̀ ù kì dzîy bə̂ awò ghà nə̀ ghà tyi dzây bə̂ ndzòʼò imòʼ yə̀ ghà kwu nəniy yəə ghà gaʼ na nəniy fôŋ təli tiy azoŋə̀ Kə̀litò,

¹⁶Ghà kwuni kwu ani nìy tswi tsə iwee ani bə̀lì yə̀ ghu nə̀ ŋkwiʼi miy. Zəŋi tsə nənìy anə fôŋ tə̀ zwe tiy, tə̀ bəə ghu nyaʼì nəniy gha, aghû yə̀ ghu dzîy nəniy ayiə àbɛbə yiy anə umwàmə ghii ùdzoŋə̀ wìy aŋwòə ghà dzwumə̀ Kə̀litò, tuw kiy ki kâm də̂d ghu anə umwàmə ùdzoŋə̀ wə̀ ghà kwu nəniy.

¹⁷Abu à də nəniy nə̀ à tsə̀m Kə̀zə̀ nə̀ ghà fii anə ayiə àdzoŋə̀ yə̀ ghà zəŋə nəniy, i dzwâbə̀ ŋwò, ibɛbə â ghà ani fii anə ayiə àbɛbə yə ghà zəŋi nəniy.

¹⁸Kə̀litò kə fii, bù pfə bòʼ àyiə àbɛbə ŋgàŋ à dzə̀m. U pfə soŋə fə mòʼ ù nì kàm pfə, kòʼ dzə̀ wày, ù kə də̌ wù tsitsi wiy, u pfə nyə̀ àsə ə aghè àbɛbə, ani nìy bù nə̀ àghè akə̀lə̀ Kə̀zə̀. Aghee wiy màʼà tsə kə gùw uwè wə̀, Zwàykə̀zwekiy kwuni zəŋi tsə u dòʼò dzwoŋi bə̀ ùtaw.

¹⁹Zwàykə̀zwekiy fày sòʼò we, u ŋwò zù nàʼà yə̀ ntwùm ə̀ Kə̀zə̀ awò àghù yə̀ ghu də nəniy anə inaʼ ipfə yəə à də̀ aghee ndàw ntsaʼ, ghu lyimə nəniy ntsuk fə isaʼ fiy.

²⁰Aghû yə̀ ghu kə də nəniy anə inaʼ i pfə à kə də̀ aghû yə̀ ghu kə də kə̀ zuw nəway awò Zə̀kìy asòŋə fə Nuwà kə kwamə nəniy mfə̀n kìy Zə̀kìy kwè fòŋ lyimə kè nə̀ ghu kwuni. À kə də̀ kə aghê àfamə ate an-a-mfə̀n, Zə̀kìy kə bii fyi ghu abidzəmə̀ mwi.

²¹Mwi mə̀ ghè mə̀ kə də̀ kətsəe kə dê bə̀ nəniy mwi m-à-zə̀ mə̀ ghà nîy nəniy ìn bii fyiə sòʼo nəniy gha nyiə. À wày dzə ani màŋ sùw màʼà fyi tswi bə̀ ùdzə anə uwè, à kwuni də̀ kətɛb ghà nyiə̀ yə̂ awò Zə̀kìy anə fòŋ ìdzòŋə̀ yìy. Tɛb kə ghè kə̀ bii fyiə ghà abidzəmə̀ ayiə yə Zə̀kìy kə zɛ̀mə̀ ŋwò dzwoŋi bə̀ Yesù Kə̀litò anə ipfə.

²²Kə̀litò nyə̀ də̌ an-a-vələ anə ukwe u Kəzə̀ ùnyiə wiy, anə lòʼo kə məŋkwiʼi, ù saʼa tsə̀təndii t-a-zə̀ tìy tə̀dzə̀m, saʼa sòʼo ùfyiə wə u kwu nəniy udaʼa wiy.