Read Isu 1 Pità 4 Bible Online

1 Pità 4 - Isu bible

1 Pità 4

¹Yəə Kə̀litò kə fii nəniy anə gûw ùwè, gha kwu ani byay na tsə iwe nəli ani kəli tsə sòʼò ndzòʼò ùmwamə wə Kə̀litò kə kwu, ghà byay na tsə soʼò ìwee ani fii, aŋwòə wù wə̀ ù fyaʼa nəniy anə gûw ùwè bòʼ Kə̀litò, u də̀ yəə ù kàm wày dzə̀ ani zəŋi ìyiə ìbɛbə yiy.

²Ani nìy ŋwò tsə nyiə, ghà kwu ani mùə̀ tsə imuə̀ ghii fə anə mbyi anə ayiə yə Zə̀kìy liə, à wày dzə anə ayiə yə gùw ùwè liə nəniy.

³Ghà mə ŋge nyàb soŋə fiy anə imùə̀ ghii, zəŋə àyiə àbɛbə yə aghû yə̀ ghu də wày aghee Dzû zəŋə nəniy. Ghà kə zwàdə̀ tsə̀ yəə à də̀ təbvu, ghǎ kwu sòʼò təfôŋ ani zəŋi ayiə àbɛbə yiy, muə kee mə̀nlwù, liə ani zee anə udzəŋə wə aghê muə kee nlwù mìy ate zəŋə zwùnì zwùnì tə ayiə, fwùlə̀ sòʼò mə̀mwòʼo nə̀ à də̌ bɛ̀bə̀bɛ̀b tə ayiə yə Zə̀kìy də liə dzə̀ way.

⁴Adzwə zwumə àghù yə̀ ghà kə zəŋə ayiə yə nə̀ ghu nyiə, bəə ghà də təmə fwumə yə̀ wày nə̀ ghu anə ndzwad kə imùə̀, ghu nyàʼà tsə̀ ghà bòʼ àyiə ghè yə̀.

⁵Ghu kî kwuni kwu ani tyi dzày yə̀ àyiə yə ghu zəŋi nəniy nə̀ iwe i ghu yiy awò Zə̀kə̀ kə byay na təŋ nəniy uwe wiy ani saʼ aghû yə̀ ghu nam də à taw yiy nə̀ à yù ghu pfə dzə̂.

⁶À yù də̀ iyiə ighè yə̀ ghu kə naʼà nəniy ntwùm ə̀ ìdzoŋə̀ yə̀ awò àghù yə̀ ghu pfə doʼò nəniy nyiə. Yəə ghu kə bôʼ kwu kə ani pfə yəə à də̀ aghê dzə̀m. Ghu muə nyiə nə̀ Zə̀kìy anə nsòŋi ndzə̀m.

⁷Fəkəmə̀, mbyi bû mây nə̀ àyiə yə a fyiə nəniy nyiə. Yəə i də nəniy ghii, ghà ki kwi tsə iwee yiy, bya tsə̂ fòŋ təli anə nsòŋ indzə̀m, anə yiə yə ghà də ani gwùŋì.

⁸Iyiə ìsoŋə̀ yìy ba də nə̀, ghà kwu ani tsəŋ kwu kə iliə yiy azoŋə̀ wù ùmoʼ umòʼ, aŋwòə abu ghà ndzəmə̀ liə nəniy wù ùmoʼumòʼ, ghà ki də ani zə̀àŋì nìyzə̀ ayiə ghu àbɛbə yiy.

⁹Ghà ki gwamə nia tsə nə wù moʼ umoʼ anə ndaw təli nə̀ ghà ŋwuŋə dzə̀ŋə̀ dzə̀ wày.

¹⁰Wù ùmoʼ umòʼ kwu ani nìy kə namə kə Zə̀kìy nyiə̀ nəniy â we, ù ki fiiy yə̀ wù umoʼ umòʼ ate. Wù ùmoʼ umòʼ ki faʼa yə anə namə kə we anə dzəd yə i də nəniy tsitsi.

¹¹Aghû yə̀ ghu niʼà nəniy ntwùm ə̀ Kə̀zə̀, ghu kwu ani niʼà yəə kə ayiə yə Zə̀kìy dzîy nəniy. Aghû yə̀ ghu faʼà nəniy, ghu kwu ani fàʼ yə̀ anə daʼa kə Zə̀kìy nyiə̀ nəniy awò ghu, ani zəŋi tsə nə̀ aghê nì də ani nyə̀ ùkali awò Zə̀kìy anə ayiə adzə̀m abidzəmə̀ Yesù Kə̀litò. À kwu we daʼa kiy nə̀ ŋkwiʼi miy anə nsòŋə indzə̀m. I də kə ghii.

¹²Awizə̂ yamə, kəə idzwə yiy nə̀ zwumə gha abu ghà zuw nəniy ifwabi yiy i bê nəniy ani imwàmkòʼ ìbɛmə ghii yəə à də̀ iyiə ìfyiə yiy i fyiə nəniy nə̀ ghà.

¹³Ghà kwuni kwu kə ani kəli tsə kədwiʼi kə̀soŋə̀ kìy, aŋwòə ghà fyaʼa sòʼò yə Kə̀litò kə fii nəniy, tə̀ ghà ni də ani kəli dwiʼi kə̀soŋə̀ kìy, abu ù nì bù dzwoŋi anə imwày iwe ìsoŋə̀ yìy.

¹⁴Dwiʼi kiy də awò ghà abu ghu nyaʼà nəniy gha nə̀ ghà də aghê Kə̀litò. Ì yù dè tsə nə̀ imwây i Zwày k-a-zə̀ kìy də nə̀ ghà.

¹⁵Abu ghà kwuni fyaʼa nəniy, i kə doʼò dzə̀ nə̀ ghà wiy aghù, moo nə̀ ghà tsoŋ fyiə kə̀li kiy, moo nə̀ ghà zəŋə̂ ŋgwali tə yiə, moo nə̀ gha kwe àdzwə anə ayiə ghè liy yiy.

¹⁶Abu ghà kwuni fyaʼa nəniy bòʼ nə̀ ghà də aghee Kə̀litò, ghà kwu dzə̀ way ani də̀d nə̀ tuw kiy. Ghà fə̀d nyìə̀ kə̀zòŋə̀ awò Zə̀kìy nə̀ aghê tyoŋə gha nə̀ ghà də aghee Kə̀litò.

¹⁷Soŋə fiy mə kpe awò Zə̀kìy ani kaʼ ani saʼ aghû. Aghe Kəzə̀ yìy də aghee səsə yiy â Zə̀kìy ani saʼ. Yəə i də nə̀ Zə̀kìy nî tàzaʼ way aghě we yiy isə ani saʼ, Isaʼ i we yiy nî ba ŋge fyà ŋwò awò aghù yə̀ ghu də kə̀ bɛmə nəway ntwùm ə̀ ìdzoŋə̀ yə̀ ì kə ŋwô bə̂ awò Zə̀kìy.

¹⁸I twâ dòʼò anə ŋwàʼà k-a-zə̀ nə̀, “Abu i də nə̀ aghû yə̀ ghu də nəniy tsitsi anə sə k-a-zə̀ nə̀ ghu nî də̀mə̀ tsə ŋwò awò Zə̀kìy ani bii fyi ghu, Aghû yə̀ ghu də kə̀ bɛmə nəway ntwùm ə̀ ìdzoŋə̀ yìy ghu nî tsìy tsə yə awò Zə̀kìy ə?”

¹⁹Yəə i də nəniy ghii, aghû yə̀ ghu fyaʼa nəniy anə ayiə yə Zə̀kìy liə, ghu kwu ani nyə̀ mà yə̀ ìwee i ghu ani fàʼ àyiə àdzoŋə̀ yìy, ghu zû kə nə̀ səkiy ani nyə̀ yə̀ sòʼò iwee ighu awò Zə̀kə̀ kə kə bwam nəniy ghu, ù də wày ani bvə̀ màʼà kòʼ tɛb kə we. Ghu kwu ani tsəŋə zəŋə yəə ayiə àdzoŋə̀ yìy.