Read Isu 2 Pità 1 Bible Online

2 Pità 1 - Isu bible

2 Pità 1

¹À ŋwàʼà kə̀ twà bə̀ mìə̀, Simùn Pità. Mə də wè kə̀fàʼ ə Yesù Kə̀litò, də̀ sòʼo wè ntwùm ə̀ we. Mə twâ bə̀ ŋwàʼà kə̀ awò ghà yə̀ Zə̀kìy zəŋi tsə nəniy nə̀ ghà bɛmə awò Kə̀litò anə ayiə yə ù kə zəŋi soʼò nə̀ ghə̀d. Zə̀kìy mə zəŋi nə̀ ŋgà bɛmə â Yesù Kə̀litò wə̀ ù də nəniy Zə̀kìy, də̀ sòʼò tsitsi, də̀ sòʼo wù wə̀ ŋgà fwulə̀ nəniy, də̀ sòʼo wù wə̀ ù bii fyiə nəniy ŋgaŋ.

²Mə gwuŋə̀ nə̀ Zə̀kìy dê ghà nə̀ fòŋə̀ we ìdzoŋə̀ yìy, ù nyiə̀ sòʼò ghà nə̀ ìbvay ìsoŋə̀ yìy, anə ayiə yə ghà kî zwəʼə kyilə fyiə kə ndə̀mə̀ ndə̀mə̀ tə yiə tiy kwùmə̀ yə̀ nə̀ Zə̀kìy, kwùmə̀ yə̀ sòʼò nə̀ Yesù Mwe ə̀ mbyi ə̀ ŋgàŋ.

³Zə̀kìy mə nyə̀ ŋgaŋ nə̀ ùfyiə wə ù dzə̀m u də nəniy anə daʼa kə we, ani fày ŋgàŋ nə̀ ŋgà muə̀ ate anə ayiə yə ù liə. I ghii də̀ aŋwòə ŋgà mə kəli wù wə̀ Zə̀kìy də nəniy we. Zə̀kìy twoŋə tsə ŋgaŋ anə daʼa kə we nə̀ fòŋə̀ we ìdzòŋə̀ yìy nə̀ ŋgà doʼò àghě we.

⁴À yù də̌ dzəd yə ù nyə̀ nəniy ŋgaŋ ate nə̀ ùfyiə ùsoŋə̀ wə̀ ù kə tɛb na nəniy ani zəŋi tsə nə̀ umwamə wə ù nyiə̀ nəniy, u nì də ani fày ghà nə̀ ghà tu ŋwô fyi ani zəŋə ayiə àbɛbə yə gûw tə iwè tə ŋgàŋ tìy liə nə̀ ŋgà ki zəŋə fə anə mbyi. Ghà bû doʼò tsə soʼò àghè zwe yiy anə ayiə yə Zə̀kìy də.

⁵Ì yû dè tsə nə̀ ghà kwu ani kaw tsə dzəd ani təmi taw tsə anə ibɛmə ghii, ghà ki faʼa yə soʼo ayiə àdzoŋə̀, fàʼà yə̀ sòʼò anə utwab ani zəŋə ayiə àdzoŋə̀ yìy.

⁶Kə̀ kaʼi kəli dzə̀ utwab wiy anə ayiə yə Zə̀kìy liə, ghà kwu ani kwi tsə iwee nəli, ghà kə kaʼi kwi dzə̀ iwee yiy, ghà kwù sòʼò ani kyibə kə ŋwô, ghà kə kaʼi kyìbì dzə̀, ghà kwu sòʼò ani nyə̀ yə̀ ìmùə̀ ghii idzə̀m ani faʼa yə ayiə yə Zə̀kìy liə nəniy nə̀ ghà fâʼ.

⁷Ghà kə kaʼi nyə̀ dzə̀ iwee yiy anə ayiə yə Zə̀kìy liə, ghà kwu ani na tsə sòʼò ìsə azoŋə̀ wù ùmoʼ umòʼ. Ghà kə kaʼi na dzə̀ isə yiy azoŋə̀ wù ùmoʼ umòʼ, ghà kwu ani liə yə̀ sòʼò àghè liy.

⁸À yù də̌ ndzòʼò ùmwamə wə ghà kwu ani kəli. Abu ghà nɛmə yə̂ anə umwàmə u ghè wə̀, utwab wə ghà kwu nəniy kwùmə̀ yə̀ nə̀ Mwe ə̀ mbyi ŋgàŋ, ghà ki də ani fàʼ yə̀ àyiə yə a də nəniy tsitsi anə sə k-a-zə̀.

⁹Abu ghà kwuni də kwu way ndzòʼò ùmwamə wə, ghà ki də yəə à də aghû yə̀ ghu mâŋ də nəniy ani kòʼ iyiə yə i kwulì də nəniy, moo yəə à də̌ wù wə̀ ù fɛ̀b doʼò nəniy. À ki də soʼo nə̀ ghà mə nìyzə̀ nə̀ Zə̀kìy ma sùw màʼà ìbɛb yə ghà kə kwuu zəŋi na nəniy.

¹⁰Yəə i də nəniy ghii awizə̂ yamə ghà toʼò də̀m tsə nə̀ daʼakiy ani dè tsə nə̀ Zə̀kìy mə twoŋə gha, sày kə sòʼò ghà nə̀ ghà doʼò àghě we. Bəə ghà zəŋə yə̂ ayiə àdzoŋə̀ yə̀ Zə̀kiy liə nəniy ghà ki də kə̀ bvə̂ nyi tswi anə ibɛb.

¹¹À yù də̌ dzəd yə Zə̀kìy kî nyìə̀ nəniy gha nə̀ daʼa kiy ani zù anə lòʼo kə Mwe ə̀ mbyi ŋgàŋ, Yesù Kə̀litò saʼa nəniy ate anə nsòŋə indzə̀m. Ù də̌ wù wə̀ ù bii fyi nəniy ŋgaŋ.

¹²Yəə i də nəniy ghii, mə tsə̂ŋ kwu kə ani zə̀ŋì bə̀ ghà anə ayiə yə nə̀ ghà mgbaŋ kwu ŋwô àyiə ghè yə̀, Kwu sòʼò ibɛmə nə̀ à də̀ ayiə àsoŋə̀ yìy.

¹³Mə moʼò nə̀ i dzwàbə̀ ŋwò awò mìə̀ ani kwu kə ani ŋwùmì ntwab məli anə ayiə ghè yə̀, ani zù kwùm anə ntsuk fam fə̀ pfə fiy.

¹⁴Mə kwu təŋ ŋwô nə̀ mə kî kwùlə̀ pfə ŋwò anə yiə yə̀ Mwe ə̀ ŋgàŋ Yesù Kə̀litò kə zəŋi nəniy nə̀ mə kəli na tsə.

¹⁵À yù də̀ ighe mə dəmə̀ nəniy ani kòʼ nə̀ wù ùmoʼumòʼ anə uzə̀ ghi si tsəŋ kwu kə ani mòʼ àyiə ghè yə̀ anə nsòŋə indzə̀m abu mə tsəb pfə yə̂ kə ŋwô.

¹⁶Yəə ghè kə dzîy nəniy ayiə yiy â ghà kwùmə yə̀ nə̀ daʼa kə Yesù kìy, nə̀ yəə ù kì bê dzwəŋə nəniy ate, ghè kə dzîy dzə̀ wǎy nzə̀zə̌ mə̀ gûw mə̀ aghê mâŋ byiə kə nəniy anə ntwab mə̀ ghu, ghè kə kwuni dzìy bə̀ àyiə yə ghè kə kôʼ nəniy nə̀ àsə ghələ yiy nə̀ Mwe ə̀ mbyi Yesù də̌ wù ùsòŋə̀ wìy.

¹⁷Ghè kə də̌ nə̀ we anə sòŋə fə Zə̀kə̀ kə kwu nəniy daʼa kiy tsìy fyi ufyiə udzə̀m, kə nyiə̀ nəniy we nə̀ ŋkwiʼi miy nyə̀ sòʼò we nə̀ daʼakiy. Dzə̀ kə foŋ fyi tswi bə̀ an-a-vələ, dzày tsə nə̀, “À yù də̌ Wa nam ùtsukə̀ wìy, ù zəŋə miə, mə dyoʼò.”

¹⁸Ghè kə də̀ awote anə ukàʼ ùzwe wiy nə̀ Yesù, ghě zuw yə̀ dzə̀ ìghè yə̀ dzə̀ŋə̀ fyiə tswi bə̂ an-a-vələ.

¹⁹Ghè kwu sòʼò ŋwoə ntwùm ə̀ Kə̀zə̀ yə̀ aghe ntwùm ə̀ Kə̀zə̀ yìy kə naʼà nəniy. Ntwùmə̀ ìghè yə̀ dè bə̀ nə̀ ayiə yə də̌ àsoŋə̀ yìy. Ghà kwu ani toʼò kwumi tsə utuw anə ntwum yə aŋwòə ì də̀ yəə à də̀ təkaʼì, tə mwâ nəniy anə lòʼo k-a-ləm, mwà zù kwùm nə̀ ùtsuk ùzwe wiy. Ghà kwu ani tsìy yə̀ kə nə̀ səkiy ani moʼo ndzòʼò ayiə yə. Kaʼì tə Kə̀litò tìy dyaŋi kaʼ yə̀ ani mwà anə fòŋ təli ighəd anə ayiə yə sǐbələ̀ fə utsuk ùzwe fiy mwâ bə̂ nəniy kaʼì tə we tiy ate anə mbyi.

²⁰Ghà kəli tsə nə̀ ntwùm ə̀ Kə̀zə̀ yə̀ aghee ntwùm ə̀ Kə̀zə̀ yìy kə twâ na nəniy anə ŋwàʼà k-a-zə̀, wù lìy wày dzə ani tyi dzày àyiə yə aghee ntwùm ə̀ Kə̀zə̀ kə twâ nəniy anə utwab u wè mbyi nə̀ Zwày k-a-zə̀ kǐ kə̀ fây nəway we.

²¹Aghee ntwum ə Kəzə̀ yìy kə kə̀ mâŋ dzây dzə̂ àyiə yə we mbyi kə liə nəniy nə̀ ghu dzây anə fòŋ tə ghu. Zwàykə̀zwekiy kə kwuni zəŋi tsə nə̀ ghu dzây bə̂ àyiə yə Zə̀kìy dzây bə̂ nəniy. Ayiə yə ghu kə dzây nəniy à kə də̌ dzə̀ ə̀ Kə̀zə̀.