Read Isu 2 Pità 2 Bible Online

2 Pità 2 - Isu bible

2 Pità 2

¹Səsə, aghee kə də̀ ŋwô anə uzə u ghě ntwùm ə̀ Kə̀zə̀ ghu kə niʼa nəniy ntwùm ə̀ ìguw yìy. Aghû yə̀ ghu tyi dê nəniy ayiə àguw yiy, ghu kî də̀ sòʼò ŋwô anə uzə ghii. Ghu ki bû anə dzə̀d ìtwabə̀ yìy, ghu tyi dê ndzòʼò àyiə yə a də wày tsitsi a də nəniy ani byɛbi màʼà àghù. Nə̀ àtyi dè àguw ghè yə̀ ki twe maʼà Mwe ə̀ mbyi wə ù kə zwe dzwoŋi ghu ani fày fyi ghu anə daʼa kə ibɛb yiy kə kwu nəniy azoŋə̀ ghu. I ki zəŋi tsə nə̀ Zə̀kìy ki zəaŋì byɛbi maʼà soʼò ghu

²Ndə̀mə̀ àghù ni dzwumì yə̂ ndzòʼò mwàmə mə̀ bɛbə̀ mə̀ ghu mə. Ayiə yə ghu zəŋə nəniy ani zəŋi tsə nə̀ aghê liy yiy dzây nə̀ ntwùm ìdzòŋə̀ yə̀ də̌ ì gûw yìy.

³Nə̀ àtyi dè àguw yə ni liə ani kəli ndə̀mə̀ ndə̀mə̀ tə ufyiə, ghu ni byiə tsə nzə̀zə̌ miy, dzìy awò ghà. Zə̀kə̀ kə də nəniy wù wə̀ ù saʼa nəniy ghu, də̀ sòʼo wù wə̀ ù nì byɛbə myaʼà nəniy ghu, ù maa kwu byay na uwe u we wiy, lia kə àsə ani nyə̀ ghu nə̀ mfəm.

⁴Ghà kwu ani kəli tsə nə̀ Zə̀kìy maa nyìə mfəm awò tsə̀təndii tə we tə ghu kə zəŋi nəniy ibɛb yiy. U nìy kwù tsə ghu màʼà yə̀ ghu anə ntswam k-a-bwòʼ an-a-ləm. Ù nyə̀ lyimə kə̂ ntsuk fə ù nì saʼa nəniy ghu ate.

⁵A tsuk ù Nuwà, Zə̀kǐy nyìə̀ mfəm awò àghě mbyi àbɛbə yə ghu kə də zuw way awò we. U wiy màʼà ghu anə mwi, kwuni na sə tsə kə Nuwà, nə̀ àghè liy yiy àsèmbe. Nuwà kə nìʼà nə̀ aghê si zəŋə yəə ayiə yə a də nəniy tsitsi anə sə k-a-zə̀ kə.

⁶Zə̀kìy kə nyiə̀ sòʼò mfəm awò àghù yə̀ ghu kə də nəniy anə inaʼ i Sodòm nə̀ ìnaʼ i Gòmolà yìy. U pyə̀ màʼà ghu anə uvə̀lə̀, ghu fwu fə̀d tsə anə udzə̀m ani zəŋi tsə nə̀ ghu doʼò tsə kətsəe anə iyiə yə i nî fyiə nəniy nə̀ àghù yə̀ ghu də zuw way awò Zə̀kìy.

⁷U fày fyi kə Lôt aŋwòə Lôt kə də̌ wù tsitsi anə sə kə we. Aghê Sodòm yìy kə nia way ulâŋ u Kəzə̀ wìy. Ghu zəŋə dzə̀ dzə̀ tə ayiə. Ayiə ghè yə̌ zəŋə nə̀ Lôt ŋge mwe.

⁸Wù ùdzòŋə̀ wə̀, tyoŋə Lôt kə mùə̀ tsə anə uzə u ghè àbɛbə ghè yə̀. U zuw àyiə bɛbə yə ghu zəŋə nəniy kòʼò sòʼò. Ayiə ghè yə̀ ə zəŋə nə̀ ù ki ŋge mwe aŋwòə ù kə də̌ wù ùdzòŋə̀ wìy.

⁹Ayiə yə Zə̀kìy kə zəŋi nəniy, a dê bə̀ ŋwò nə̀ Mwe ə̀ mbyi kwu ŋwô ani fày fyi aghû yə̀ ghu zuw nəniy awò we anə ntswə̀d mə̀ ghu tsîy nəniy ate. Ù kwu sòʼò ŋwô ani na aghê àbɛbə yiy, zù kwùm ntsuk fə ù nì nyìə̀ nəniy ghu te nə̀ mfəm anə ntsuk fə isaʼ.

¹⁰Aghû yə̀ Zə̀kìy nî ba ŋge nyiə mfəm awò ghu à də̀ àghù yə̀ ghu dzwumə̀ yə̂ nəniy ayiə àbɛbə yə gûw tə iwè tə ghu tiy liə nə̀ ghu ki zəŋə, kòʼò kè sòʼò àghù yə̀ ghu də utuw wiy. Ndzòʼò nə̀ àtyi dè àguw yə̀ liə iwee ìkwoʼo yiy, ŋwunə sòʼò. Ghu nyiə̀ wǎy ŋkwiʼi miy awò ùdaʼa ùzwe wə u də nəniy idoŋ. Tsəŋə way ani nyiʼà ùdaʼa ughè wə̀.

¹¹Tsə̀təndii t-a-zə̀ tìy taw ŋwò, bòʼ kwu sòʼò kədaʼa tsìy fyi nə̀ àtyidè à guw yiy, ghu kwuni wày dzə ani nyàʼì ùfyiə wə u kwu nəniy daʼa kiy an-a-vələ bəə ghu tiy nəniy anə sə kə Mwe ə̀ mbyi.

¹²Nə̀ àtyi dè yə̀ kwuni dzìy àyiə àbɛbə yiy kwùmə̀ yə̀ nə̀ àyiə yə ghu də kə̀ zuw kəli nəway. Ghu zəŋə àyiə yəə à də̀ nyâm tə mbvən tiy nə̀ ghu kwu way utwab wiy. Zə̀kìy zəŋi na nyâm tə mbvən tiy nə̀ aghê si kwi wiy. Zə̀kìy nî wiy myàʼà nə̀ àtyi dè àguw yə yəə ghu də nyâm tə mbvən tiy.

¹³Ghu mə zəŋi ibɛb yiy azoŋə̀ àghè liy yiy, Zə̀kìy nî kwuni tsəə dzwəŋə ghu soʼo anə ibɛb. Ghu liə ani zəŋə ndzòʼò àyiə yə gûw tə iwè tə ghu tiy liə nə̀ asə àzwe yiy, ghu də yəə à də̀ udzə u də nəniy anə fyiə kə̀ zwe kiy, zəŋə nə̀ aghê ki dələ nə̀ ùtuw wiy azoŋə̀ ghà.

¹⁴Ghu moʼò təŋ kə ani nə̀ŋì nə̀ àŋəmə ghù yìy moo nə̀ àghiy ghù yìy. Ghu tsə̂ŋ kwu kə fôŋ tə̀ swəə tiy ani zəŋi ayiə àbɛbə yiy. Ghu fwələ myàʼà sòʼò àghù yə̀ ibɛmə i ghu yiy də taw way. Ghu zəŋi na sòʼò fòŋ tə ghu ani kəli mà ùfyiə udzə̀m. Zə̀kìy byay na mfə̀m ə̀ ghu.

¹⁵Ghu mə nyəli màʼa dzəd yə ì də nəniy tsitsi, ŋwò yə̀ anə dzə̀lə̀ ìbɛbə̀ yìy. Ghu faʼà ndzòʼò àyiə bɛbə yə Balàm, wà Bezà kə fâʼ nəniy. Balàm kə liə ùkhiy wə ghu tsə nəniy we ate nə̀ ù zəŋi yə̀ àyiə àbɛbə yiy.

¹⁶Zə̀kìy kwuni zəŋi tsə nə̀ ndzàkâs kìy dzây yə̂ awò Balàm a we nə̀ ù zuw way awò Zə̀kìy. Ùndzàkâs wìy dzə̀ŋə̀ dzə̀ wày, kə ghè kə̀ ə kwuni dzə̀ŋì fyi bə̀ yəə à də̌ wù. Bwi na yə̀ Balàm nə̀ ù kə kâm zəŋi dzə̀ ayiə uzə̀ u we u ghè wə̀.

¹⁷Aghû yə̀ də̀ yəə à də̀ isə i dzwî yə̀ i də kàm kwu way mwi. Ghu də sòʼò yəə à də təmbàʼ zoŋ tyiŋə kyabə tsə̂ anə ayiə yə ghu də wày ani zəŋi nə̀ iwe yiy nìə̀. Zə̀kìy mə zəŋi na loʼo kə̀ləŋə kiy, ləm kiy də nəniy awote awò ghu ani dòʼò ate.

¹⁸Ghu kwoʼo ìwe anə ayiə ghu àlyiʼa yə ghu dzîy nəniy, dzìy nə̀ aghe si zəŋə yə ayiə àbɛbə yə gûw tə iwè tə ghu tiy dzîy nə̀ ghu si zəŋə. Ghu niɛbə ŋwò àghù yə̀ ghu kwulì bɛmə kə nəniy Zə̀kìy, liə ani nìy zù nə̀ ghu anə uzə u ghù yə̀ ghu zəŋə nəniy ayiə àbɛbə yiy.

¹⁹Nə̀ àtyi dè à guw yə nyìə̀ kə̀tɛb awò àghù yìy anə ayiə ghu àtyi dee yiy nə̀ Zə̀kìy zəŋə ŋwò nə̀ ghu kə kâm dòʼò dzə̀ yəə à də̀ ukwə̂d. Də̀ ghii nə̀ ghu ba də̀ yəə à də̀ ukwə̂d awò àyiə àbɛbə yə a kî byɛbə myàʼà nəniy ghu. Aŋwòə bəə fyiə kə̀li kiy kwu nəniy daʼa kiy azoŋə̀ wù, wù ù ghè wə̀ də̀ kəkwə̂d awò fyiə kə ghè kə̀.

²⁰Bəə wù bɛmə kə nəniy awò Mwe ə̀ mbyi ə̀ ŋgàŋ Yesù Kə̀litò wə̀ ù bii fyiə nəniy ŋgaŋ, ayiə àbɛbə yə fə anə mbyi a kàm kwu dzə̀ way daʼa kiy azoŋə̀ we aŋwòə ù kàmə̀ zəŋə dzə̀ wày ayiə àbɛbə yə a zəŋə nə̀ aghê doʼò àghè àbɛbə yiy. Bəə ù kwuni kâm kaʼ dzwoŋi tsə ani zəŋi ayiə àbɛbə yiy, ayiə àbɛbə ghè yə̌ kwu kədaʼa azoŋə̀ we. U kàm bɛb tsìy fyi tsə yəə ù kə bôʼ də nəniy ate nə̀ ù kamə bɛmə nəway â Mwe ə̀ mbyi.

²¹A mə ba də nə̀ ù kə kə̀ kəli dzə̂ nəway dzə̀lə̀ ìmùə̀ yə̀ ì də nəniy tsitsi anə sə k-a-zə̀ tsìy fyi â we ani kəli kwuni nia way lâŋ k-a-zə̀ kə̀ zwe kə ghu kə nyiə̀ â we.

²²Ayiə yə a kə fyi nəniy nə̀ ghu, a dê bə̀ nə̀ idzəŋì yə̀ də̌ ìsoŋə̀ yìy nə̀, “Bvu zâ tsə ŋwò, i dzwoŋi zù nyi kə fyiə kə ì zà maʼà nəniy.” Nə̀ ìdzə̀ŋì yə̀ soʼo i dzîy nəniy nə̀, “Ghu sû kə kəmfə̀libiə, kə zù dzwoŋi an-a-tsaʼ.” Idzəŋì yə̀ tyi dè bə̀ ndzòʼò àyiə yə a fyiə nəniy nə̀ nə̀ àtyidè àguw yiy.