Read Isu 1 Dzwan 1 Bible Online

1 Dzwan 1 - Isu bible

1 Dzwan 1

¹Miə Dzwan, mə twâ bə̀ ŋwàʼà kə̀ awò ghà kwùmə̀ yə̀ nə̀ wù wə̀ ù kə də tsə nəniy awò mbyi ani kaʼ bə̀. Ù də̌ wù wə̀ ù nyìə̀ nəniy imùə̀ itsà yìy. Ù də̌ wù wə̀ ghəd, aghee ntwùm ə̀ Kə̀zə̀ kə zuw nəniy ayiə yə ù kə tyi dê nəniy. Ghě kòʼ sòʼò we nə̀ asə ghələ yiy, Ìsoŋə̀ ìsoŋə yìy, mwàm sòʼò we nə̀ àwo ghələ yiy!

²Wù wə̀ ù nyìə̀ nəniy imùə̀ yìy, ù maa bù fə anə mbyi. Ghè maa kòʼ we. À də̀ ighe ghè dzîy bə̂ nəniy awò àghè àdzə̀m, nìʼà yə̀ sòʼò awò ghà nə̀ ù də̌ wù wə̀ ù nyìə̀ nəniy imùə̀ itsà yìy. Ù kə də̀ tsə̌ nə̀ Tà, Kə̀zə̀, Zə̀kìy zəŋi tsə nə̀ bù mùə̀ sòʼò nə̀ ŋgàŋ.

³À yù də̀ ighe ghè dzîy bə̂ nəniy ayiə yiy awò ghà kwùmə̀ yə̀ nə̀ wù wə̀ ghè kə kôʼ nəniy zuw sòʼò àyiə yə ù kə dzîy. Ghè də anə fyiə kəmòʼ nə̀ Tà, Kə̀zə̀ nə̀ Yesù Kə̀litò Wà we. Ghè liə sòʼo nə̀ ghà doʼò tsə anə fyiə kəmòʼ yəə à də̀ ghəd tə̀ ghà gaʼ na yə̂ kə fòŋ təli azoŋə̀ we.

⁴Ghè twâ bə̀ àyiə yə â ghà ani zəŋi tsə nə̀ ŋgà kəli tsə dwiʼi kə kə kwoʼ kpe doʼò nəniy abu ghà doʼò tsə nəniy anə fyiə kəmòʼ nə̀ we.

⁵Ntwum yə ghè kə zuw nəniy awò Yesù Kə̀litò, à də̀ ntwùm ə̀ ìghè yə̀ ghè niʼà bə̂ nəniy awò ghà. Ntwùmə̀ ì ghè yə̀ də̌ nə̀ Zə̀kìy mwâ yəə à də̀ təkaʼì tə də kwu dzə̀ way ləm kə̀ liy kiy.

⁶Abu ŋgà dzîy nəniy nə̀ ŋgà də anə fyiə kəmòʼ nə̀ we, kwuni mùə̀ anə ayiə kələm, ŋgà ghii guw ŋwò, kwu sòʼò way ayiə àsoŋə̀ yìy.

⁷Abu ŋgà kwuni zəŋə yə̂ àyiə yə a də nəniy tsitsi, à ki də yəə ŋgà muə anə asə ə zwe yiy anə yiə yə ù də nəniy asə àzwe yiy, à ki də nə̀ ŋgà təm dòʼò fwumi nə̀ àghè àdzə̀m. Kâŋ tə Wà we Yesù tìy ki sûw maʼà ŋgàŋ anə ayiə ŋgàŋ àbɛbə yiy àdzə̀m.

⁸Abu ŋgà dzîy nəniy nə̀ ŋgà kamə kə̀ zəŋi kôʼ nəway ibɛb yiy, ŋgà ghii nɛbə ìwe i ŋgàŋ, twe sòʼò ani bɛmə nə̀ dzə̀ ə̀ Kə̀zə̀ də̌ ìsòŋə̀ yìy.

⁹Abu ŋgà kwuni dîy dzày fyi bə̂ nəniy nə̀ ŋgà mə zəŋi bɛb â Zə̀kìy, ù kì nìyzə̀ ŋwò ŋgaŋ, ù sùw màʼà sòʼò ŋgàŋ anə ayiə àbɛbə yə ŋgà zəŋi nəniy à dzə̀m. Zə̀kìy də̀ tsitsi aŋwòə ù zəŋə təŋə tsə̀ àyiə yə à dzə̀m ù dzày na nə̀ ghe kî zəŋə ŋwò.

¹⁰Abu ŋgà dzîy nəniy nə̀ ŋgà kamə kə̀ zəŋi kôʼ nəway ibɛb yiy, ŋgà ghii dzìy nə̀ Zə̀kìy də wù ùgûw wìy. I dê tsə sòʼò nə̀ ŋgǎ kə̀ bɛmə dzə̂ ayiə we à dziy yiy.