Read Isu 1 Dzwan 2 Bible Online

1 Dzwan 2 - Isu bible

1 Dzwan 2

¹Awa yamə, mə twâ bə̀ ŋwàʼà kə̀ awò ghà. Mə twâ bə̀ awò ghà aŋwòə mə liə dzə̀ way nə̀ ghà zəŋi ibɛb. Abu wù kwuni zəŋi tsə nəniy ibɛb yiy, ŋgà kwu ŋwô wè lìy, ù bwoʼo təŋə tsə̂ wo kiy awò Zə̀kìy anə utuw u ŋgàŋ. Wù ù ghè wə̀ də̀ Yesù Kə̀litò, ù zəŋə təŋə tsə̂ nəniy ayiə yə a də nəniy tsitsi.

²Kə̀litò kə pfə ani nìy ŋwò mfəm yə ŋgà kə kwu ani kəli bòʼ àyiə ŋgàŋ àbɛbə yiy. Ù kə kə̀ kaʼi pfə dzə̂ anə bɛb təli, ù kə kwuni pfə sòʼò ani nìyzə̀ bɛb tə ghè dzə̀m anə mbyi.

³Ŋgà kwu ani na tsə ulâŋ u Kəzə̀, ani dè tsə nə̀ ŋgà kwu ŋwoə we.

⁴Abu wù dzìy nəniy nə̀ ghe liə ŋwoə we kwunə nia way ulâŋ u we wiy, ù ghî də̀ wù ù gûw wə̀ ù də kə̀ bɛmə nəway iyiə ìsoŋə̀ yə̀ ù dzày nəniy.

⁵Wù wə̀ ù kwuni zəŋə yə̂ àyiə yə Kə̀litò kə dzây na nəniy, i dè tsə nə̀ ù ndzə̀m liə ŋwoə Zə̀kìy. Abu ù zəŋi nəniy ghi, ù ki də ani kəli tsə nə̀ ghe də ŋwô anə fyiə kəmòʼ nə̀ Zə̀kìy.

⁶Wù wə̀ ù dzìy nəniy nə̀ ghe təm doʼò fwumi nə̀ Zə̀kìy, ù kwu ani mùə̀ tsə ighəd anə yiə yə Kə̀litò kə muə nəniy ate.

⁷Afwu yamə àsoŋə̀ yìy, mə twâ dzìy bə̀ dzə̀ wày lâŋ kə fyiə kiy awò ghà, à nam də̀ kə lâŋ kə̀ wiy kə ghu kə nyiə̀ na nəniy awò ghà anə wo-à-wiy kə. Lâŋ kə̀ wiy kə ghè kə̀ də̌ ntwum yə ghà zuw nəniy.

⁸Iyiə ìfyiə yiy kwuni də̀ ŋwô anə làŋ kə̀ mə twâ bə̂. Imuə i Yesù yìy dê bə̀ awò ŋgàŋ nə̀ lâŋ kə̀ də̌ kə̀fyiə kiy. Muə̀ təli tiy dê bə̀ sòʼò ŋwò nə̀ lâŋ kə ghè kə̀ də̌ kə̀fyiə kiy. Imùə̀ i Kə̀litò yìy dê bə̀ ŋgàŋ nə̀ ìyiə ìsoŋə̀ yə̀ i də nəniy kwùmə yə̀ nə̀ Zə̀kìy. I də ghii aŋwòə ayiə àbɛbə yə ghà kə zəŋə nəniy a nə kələm a nyiə̀ tee ŋwò yə̀ kàʼì tə̀ tə mwâ nəniy dè fyiə bə̀ ìyiə ìsoŋə̀ yìy.

⁹Abu wù dzîy nəniy nə̀ ghe də anə asə ə zwe yiy aŋwòə ghe zuw ŋwò awò Zə̀kìy, kwuni bà aghê liy yiy, wù ghè wə̀ ghii də̀ yəə ù mùə̀ anə kələm.

¹⁰Abu wù kwuni liə yə̂ nəniy àzə̀ we, ù ghi də̀ anə asə ə zwe yiy. Yəə ù də nəniy anə asə àzwe yiy, fyiə kə̀li kiy way dzə anə uwè uwe kə də ani kàm zəŋi nə̀ wù lìy wìy zəŋi ibɛb.

¹¹Abu wù kwuni bâ nəniy àzə̀ ə̀ we wə ù bɛmə nəniy Zə̀kìy, ù ghii mùə̀ yəə à də̀ aghû yə̀ ghu muə nəniy a dəŋə kələm. Ù bwìy nəniy ate kwu way loʼò kə ù zè nəniy aŋwòə ləmkiy mə fə̀b na asə ə we yìy.

¹²Awa yamə, mə ghi twà bə̀ àyiə yə awò ghà aŋwòə Zə̀kìy mə nìyzə̀ bɛb təli tiy bòʼ àyiə yə Kə̀litò kə zəŋə nəniy.

¹³Mə twâ bə̀ â ghà, gha nə̀ tě wa aŋwòə ghà maa kəli Kə̀litò anə wo-à-wiy kə. Mə twâ bə̀ awò ghà, awa fəghàŋ, aŋwòə ghà mə təm nyi Satàn.

¹⁴Mə twâ bə̀ a ghà a nîsə̂ yamə aŋwòə ghà kwu ŋwô Tà. Mə twâ bə̀ â ghà a nə̀ tě wa aŋwòə ghà kwu ŋwô wù wə̀ ù kə də â mbyi ani kaʼ bə̀. Mə twâ bə̀ â ghà a ghâŋ fìy aŋwòə ghà taw dzwàbə̀ ŋwò. Ghà təmi dòʼò taw ŋwoə̀ anə iyiə i Kəzə̀, ghà mə təm nyi sòʼò Satàn.

¹⁵Ghà kə kəli dzə̀ ìliə yiy anə ayiə àbɛbə yə mbyi liə nəniy. Ghà kə kəli sòʼò iliə yiy anə ufyiə mbyi. Abu ghà liə nəniy ufyiə u mbyi wiy, ghà ki də wày dzə ani kəli iliə awò Tè ŋgàŋ, Kə̀zə̀.

¹⁶Ayiə bɛbə yə àdzə̀m, a də nəniy fə anə mbyi, yəə à də̀ ani liə ani zəŋi ayiə gùw ùwè liə nəniy, moo ani kəli tsə iliə ani kəli ufyiə wə ùdzə̀m wò kòʼo moo ani kwoʼo uwe wiy. Ayiə yə àdzə̀m, a kə̀ ŋwô bə̂ dzə̂ awò Tà, a ŋwò bə̀ anə iliə yə aghê kwu nəniy fə anə mbyi. Ufyiə wə u də nəniy fə anə mbyi, aghê gaʼ na nəniy fôŋ tìy ate, ŋge fwi na asə ate, kwoʼo sòʼò ìwe ate, u kə̀ ŋwô bə̂ dzə̂ awò Təli. À də̀ ufyiə u mbyi.

¹⁷Mbyi yə nə̀ ùfyiə wə u də nəniy fə ate ùdzə̀m aghê liə nəniy, u nî mìy ŋwò. A kwuni bû wù wə̀ ù zəŋə nəniy ayiə yə zə̀kìy liə, ù nî muə dyoʼò təŋə ŋwò anə nsòŋə indzə̀m.

¹⁸Awa yamə, fə kəmə̀ mbyi mây. Ghà maa zuw nə̀ wù wə̀ ù dzwəə nəniy nə̀ Kə̀litò, ù nì bè ŋwò. Aghê liy yiy ghu bâ nəniy Kə̀litò mə bù fyi. Ì yû dè tsə awò ŋgàŋ nə̀ fəkəmə̀ mbyi mây.

¹⁹Aghee ghè yə̀ kə bòʼ də̀ tsə̀ anə dzəŋə kə ŋgàŋ, ghu kə kamə kə̀ kwuni bɛmə dzə̂ â Kə̀litò yəə à də̀ ŋgaŋ. Bəə ghu kə də nəniy aghee Kə̀litò yìy yəə à də̀ ŋgaŋ, ghu mə də fwumi nə̀ ŋgàŋ. Ghu mə kwuni ŋwò ani dè tsə nə̀ ghu kə kə̀ ndwâm bɛmə dzə̂ â Kə̀litò.

²⁰Akwuni bû gha, Kə̀litò mə lwì gha nə̀ Zwàykə̀zwekiy. À də̀ ighe ghà kwu nəniy iyiə yə i də nəniy ìsoŋə̀ yìy.

²¹Mə ndoʼò kàm kwu dzə̀ way ani twà dzày bə̀ ghà nə̀ àyiə kwùmə̀ yə̀ nə̀ ìyiə ìsoŋə̀ yìy, aŋwòə ghà kwu ŋwô ìyiə ìsoŋə yìy. Ghà kwu ŋwô nə̀ iguw ìliy yiy way dzə ani fyi bə̀ dzə̀ anə iyiə ìsoŋə̀ yìy.

²²Wù ù gûw nyə̀ ba də̀ ndiə? À də̌ wù wə̀ ù dzìy nəniy nə̀ Yesù wày dzə̀ wù wə̀ Zə̀kìy sûw kyili na. Ndzòʼò wù ù ghè wə̀ də̌ wù wə̀ ù dzwəə nəniy nə̀ Kə̀litò, twe myàʼà sòʼò Təli nə̀ Wa.

²³Wù wə̀ ù twe maʼà nəniy Wa, ù mə ghi twe màʼà sòʼò Təli. Abu ù kwuni dzîy nəniy nə̀ ghe bɛmə ŋwoə Wa, à ghî də̌ nə̀ ù mə bɛmə sòʼo Təli.

²⁴Yəə i də nəniy ghii, ghà kwu ani kòʼ tsə nə̀ ghà kwi na yə̂ ntwùm ə̀ Kə̀zə̀ yə̀ ghà kə zuw nəniy anə wo-à-wiy kə ghà kə zuw nəniy anə fòŋ təli. Abu ghà muə nəniy anə yiə yə ntwùm ə̀ ìghè yə̀ kə dzây nəniy, ghà ki doʼò anə fyiə kəmòʼ nə̀ Tə̀li, ghà doʼò soʼò nə̀ Wà anə fyiə kəmòʼ.

²⁵Kəli tsə nə̀, Wà ùghè wə̀, à də nəniy Kə̀litò kə tɛb na ŋgaŋ nə̀ ìmùə̀ i tsà yìy.

²⁶Mə ŋwàʼà kə̀ twà bə̀ ani tswù na bə̀ ghà kwùmə̀ yə̀ nə̀ àghù yə̀ ghu liə ani niyebi ŋwò nə̀ ghà anə iyiə yə i də nəniy ìsoŋə̀ yìy.

²⁷Akwuni bû gha, Kə̀litò mə lwì gha nə̀ zwàykə̀zwekiy. Zwày kə ghè kə̀ də̀ nyiə azoŋə̀ ghà. Wù lìy kàm wày dzə ani bù tyi dè ghà nə̀ ìyiə yə i də nəniy ìsoŋə̀ yìy aŋwòə Zwàykə̀zwekiy tyi dè ŋwò gha nə̀ àyiə yə àdzə̀m ghà kwu nəniy ani kəli. Ayiə yə ù tyi dê nəniy awò ghà, a də àsoŋə̀ yìy, à wày dzə àguw yiy. Yəə i də nəniy ghii, ghà kwu ani zuw yə̀ àyiə yə Zwàykə̀zwekiy tyi dê nəniy awò ghà. Ghà doʼò soʼò anə fyiə kəmòʼ nə̀ Kə̀litò.

²⁸Awa yamə, ghà bvami təm doʼò fwumi yə kə nə̀ Kə̀litò tə̀ abu ù bù dzwoŋi nəniy, ŋgà ni də wǎy nə̀ ùtuw ùdələ wiy ani təmi yə̀ anə sə kə we. Ŋgà ni də wày soʼo ani zù nù dòʼò we.

²⁹Ghà mgbaŋ kwu ŋwô nə̀ Kə̀litò də̀ tsitsi anə ayiə yə ù zəŋə nəniy. Ghà kwu ani kəli tsə sòʼò nə̀ wù wə̀ ù zəŋə nəniy ayiə yə a də nəniy tsitsi, ù də̌ wà Kə̀zə̀.