Read Isu 1 Dzwan 3 Bible Online

1 Dzwan 3 - Isu bible

1 Dzwan 3

¹Ghà kôʼ tsə iliə ìsoŋə̀ yə̀ Tè ŋgàŋ kwu nəniy azoŋə̀ ŋgàŋ, ndòʼò tyoŋə ŋgaŋ nə̀ ŋgà də awa we. Ŋgà ndzə̂m də̀ awa we! Aghû yə̀ ghu kwuni liə nəniy ayiə mbyi yiy, ghu koʼò kyilə dzə̀ wày nə̀ ŋgà də awa Kəzə̀ aŋwòə ghu kwu dzə̀ way Zə̀kìy.

²Awizə̂ yam àsoŋə̀ yìy, ŋgà nyiə̀ də̀ awa Kəzə̀, Zə̀kìy kamə kə̀ zəŋi dzə̂ nə̀ ŋgà kəli fyiə kə ŋgà kî dyoʼò nəniy ghe kiy isə. Ŋgà kwuni kwu ŋwô nə̀ ani bu Kə̀litò nì bù nəniy, ŋgà ni də yəə à də̌ we aŋwòə ŋgà nî kòʼò ŋwǒ we anə ayiə yə ù ndzə̀m də nəniy ate.

³Wù wə̀ ù kwu nəniy ani dòʼò yəə à də̌ Kə̀litò, ù kwu ani mùə̀ tsə imuə̀ ìzwe yiy aŋwòə Kə̀litò də̀ sòʼo wù ùzwê wìy.

⁴Wù wə̀ ù zəŋə nəniy ayiə àbɛbə yiy, ù ghii zaʼa làŋ k-a-zə̀ aŋwòə wù zəŋə ìbɛb abu ù zəŋə nəniy ayiə yə lâŋ k-a-zə̀ kìy twe nəniy.

⁵Ghà kwuni kwu ŋwô nə̀ Yesù kə bù ani bù nìy ŋwò mfəm yə ŋgà kə kwu ani kəli bòʼ ayiə àbɛbə yə ŋgà kə zəŋə nəniy. Ù kamə zəŋi kôʼ soʼò ìyiə ìbɛbə ìliy yiy.

⁶Yəə i də nəniy ghii, wù wə̀ ù təm doʼò fwumi nəniy nə̀ we, ù kàm kwu dzə̀ way ani zəŋi ayiə àbɛbə yiy. Wù wə̀ ghu kwuni tsəŋə̀ zəŋə kə ayiə àbɛbə yiy, ù kwu dzə̀ way we. Ù kamə kə̀ zuw kəli soʼo wù wə̀ Yesù də nəniy we.

⁷Awa yam àsoŋə̀ yìy, kəə ghà nə̀ byemə nia nə̀ wè lìy nɛb màʼà ghà. Wù wə̀ ù zəŋə nəniy ayiə yə a də nəniy tsitsi anə sə k-a-zə̀, ù də̌ wè tsitsi ighəd, yəə Kə̀litò də nəniy tsitsi.

⁸Wù wə̀ ù zəŋə nəniy ayiə yə a bɛbə nəniy, ù ghii də̌ wè àmbvə̂ntsə aŋwòə àmbvə̀ntsə kə kaʼ bə̀ ani zəŋi ibɛb awò Zə̀kìy ani zəŋi mbyi. Sələ kə iyiə kə Wà wù kə bû nəniy, à kə də̀ ani bù byɛbi màʼà fàʼ kə àmbvə̀ntsə.

⁹Wù wə̀ ù də nəniy wà Kə̀zə̀, ù kwu dzə̀ way ani tsəŋə zəŋə kə ayiə àbɛbə yiy aŋwòə Zə̀kìy mə nyiə̀ we nə̀ ìmùə̀ ìfyiə yiy nə̀ ù dòʼò fyiə kəmòʼ nə̀ we. Ù kàm wày dzə ani tsəŋə zəŋə yə kə ayiə àbɛbə yiy aŋwòə Zə̀kìy də Tè we.

¹⁰Ì yû dè tsə nə̀ ŋgà də ŋwô ani kòʼ kəli aghû yə̀ ghu də nəniy awa Kəzə̀ yìy nə̀ àghù yə̀ ghu də nəniy awa àmbvə̂ntsə yiy. Aghû yə̀ ghu də mùə̀ way imùə̀ yə̀ i də nəniy tsitsi anə sə k-a-zə̀, ghu də kwu sòʼò way iliə yiy azoŋə̀ àghè liy, ghu way dzə aghee Kə̀zə̀.

¹¹Ghà kwu ŋwô nə̀ ntwùm ə̀ Kə̀zə̀ yə̀ ghà kə zuw nəniy anə wo-à-wiy kə, ì kə dzìy nə̀ ŋgà kwu ani kəli tsə iliə azoŋə̀ àghè dzə̀m.

¹²Ŋgà kwu dzə̀ way ani doʼò dzə̀ yəə à də̀ Kên. Kên kə də̂ wè àmbvə̀ntsə, u wiy màʼà tsə àzə̀ we, twoŋə Ebèl. Kên kə ba wiy màʼà Ebèl bòʼ kìə̀? Ù kə wiy màʼà aŋwòə ayiə we à zəŋə yiy kə də̌ àbɛbə yiy. Ayiə yə àzə̀ we, Ebèl, kə kwuni zəŋə nəniy, a kə də̀ tsitsi.

¹³Yəə i də nəniy ghii awizə̂ yamə, kəə idzwə yiy nə̀ zwumə dzə̂ gha, bəə aghû yə̀ ghu də nəniy fə anə mbyi bâ nəniy gha.

¹⁴Ŋgà ndzə̂m kwu ŋwô nə̀ ŋgà kâm wày dzə yəə à də̀ aghû yə̀ ghu pfə doʼò nəniy. Ŋgà də aghû yə̀ Zə̀kìy nyiə̀ dzə̂ nəniy ghu nə̀ ìmùə̀ yìy aŋwòə ŋgà kwu iliə azoŋə̀ àwizə ŋgàŋə̀. Bəə wè lìy də liə way awizə we yiy, ù nam də̌ wù ù pfə̂ wìy anə sə k-a-zə̀.

¹⁵Wù wə̀ ù bà nəniy aghê liy yiy, ù də̌ wù wə̀ ù wiy nəniy aghû yìy. Ghà kwu ŋwô nə̀ wù wə̀ ù wiy myaʼà nəniy aghê liy yiy, ù kwu dzə̀ way imuə̀ itsà yìy anə fòŋ ə̀ we.

¹⁶Dzəd yə ŋgà də ani kəli tsə fyiə kə iliə yiy də nəniy ghe kiy à də̀ ani mòʼ tsə nə̀ Kə̀litò kə sà yə̀ ìmùə̀ i we awò ŋgàŋ. Ŋgà kwu sòʼo ani sà yə̀ mùə̀ tə ŋgàŋ awò àghè liy yiy.

¹⁷Abu wù kwu nəniy ufyiə wiy, kòʼ yə̀ àghè liy yiy ghu də̀mə̀ kê nəniy, ù də kwuni fìy yə̀ dzə̀ wày ghu nə̀ ùfyiə wə ù kwu nəniy, ù də̀ ani dzày tsə mə̀yə nə̀ ghe liə ŋwoə Zə̀kìy ə?

¹⁸Awa yam àsoŋə̀ yìy, ŋgà kə dzây təŋ dzə̀ anə idzwə nə̀ ŋgà kwu iliə. Ŋgà kwuni ndzə̂m dê tsə nə̀ ŋgà kwu ŋwô ìliə yiy azoŋə̀ àghè lìy anə ayiə ŋgàŋ àzəŋə.

¹⁹Abu ŋgà ndzə̂m kwu nəniy iliə yiy azoŋə̀ àghè dzə̀m, ŋgà ki də ani kəli tsə nə̀ ŋgà ndzə̂m də̀ aghee Kəzə̀ ŋgà zəŋə nəniy ayiə yə a də nəniy àsoŋə̀ yìy. Ì yû kì zəŋə tsə nə̀ ŋgà bû anə sə k-a-zə̀ nə̀ ŋgà kwu way itsəŋ yiy.

²⁰Abu fôŋ tə ŋgàŋ tìy saʼa wiy kə nəniy ŋgaŋ, ŋgà kə tsəŋ dzə̀ aŋwòə Zə̀kìy də wù ùsòŋə̀ wìy tsìy fyi fôŋ tə ŋgàŋ. Ù kwu sòʼò ŋwô àyiə dzə̀m.

²¹Yəə i də nəniy ghii awa yam àsoŋə̀ yìy, bəə fôŋ tə ŋgàŋ tìy də kə̀ saʼ wiy nəway ŋgaŋ, ŋgà ə kwu fôŋ tə̀ taw tiy anə sə k-a-zə̀.

²²Ù kì nyìə̀ ŋgàŋ nə̀ fyiə kə ŋgà ŋwa yə̂ nəniy awò we aŋwòə ŋgà zuw ŋwò â we zəŋə sòʼò àyiə yə ù liə nəniy.

²³Iyiə yə Zə̀kìy dziy nə̀ ŋgà kwu ani zəŋi, i də nə̀ ŋgà kəli tsə ibɛmə azoŋə̀ wà we Yesù Kə̀litò, ŋgà kəli tsə soʼò ìliə azoŋə̀ àghè dzə̀m ighəd anə ayiə yə Kə̀litò dzày nəniy.

²⁴Ghà kwu nə̀, aghû yə̀ ghu zəŋə nəniy ayiə yə Zə̀kìy dzìy nəniy, ghu muə anə fyiə kəmòʼ nə̀ Zə̀kìy, Zə̀kìy muə soʼo anə fyiə kəmòʼ nə̀ ghu. Ŋgà kwu nə̀ ù mùə nə̀ ŋgàŋ aŋwòə Zwàykə̀zwe kə ù kə twum bə̂, kə muə azoŋə̀ ŋgàŋ.