Read Isu 1 Dzwan 4 Bible Online

1 Dzwan 4 - Isu bible

1 Dzwan 4

¹Awizə̂ yam à soŋə̀ yìy, ghà kə bɛmə dzə̀ aghû yə̀ àdzə̀m ghu dzîy nəniy nə̀ ayiə yə ghu dzîy a ŋwô bə̀ â Zwày k-a-zə̀ kìy. Ghà kwu ani kaw kəli fyi kə dzə̀ nə̀ ayiə yə ghè niʼà bə̂, nə̀ ì ndzə̂m ŋwò bə̀ kə ŋwò awò Zwàykə̀zwekiy yə̀ aŋwòə ndə̀mə̀ àghě ntwùm ə̀ ìguw yìy də loʼo tədzə̀m fə anə mbyi.

²Dzəd yə ghà də nəniy ani kòʼ kəli ate nə̀ Zwày k-a-zə̀ kìy də ŋwô nə̀ wù, à də̀ bəə wù ù ghè wə̀ bɛmə kə nəniy nə̀ Yesù kə bù anə mbyi anə uwè u wù mbyi. À ki də nə̀ Zwày k-a-zə̀ kìy də ŋwô nə̀ wù ù ghè wə̀.

³Abu wè lìy dzìy nəniy nə̀ ghe də wè ntwùm ə̀ Kə̀zə̀, kwuni twe myàʼà iyiə ìsoŋə̀ yə̀ i də nəniy kwùmə̀ yə̀ nə̀ Yesù, i dè tsə nə̀ Zwày k-a-zə̀ kìy way dzə azoŋə̀ wù ù ghè wə̀. Usîy wə̀ ù kwu nəniy, u ŋwò bə̀ awò wù wə̀ ù dzwəə nəniy nə̀ Kə̀litò. Ghà maa zuw nə̀ wù wə̀ ù dzwəə nəniy nə̀ Kə̀litò kwu ani bù fə̀ anə mbyi, u mə bù nyiə anə mbyi.

⁴Awa yam àsoŋə̀ yìy, ghà də aghee Kəzə̀, ghà mə təm nyi aghee ntwum ìgûw yə̀ aŋwòə Zwày k-a-zə̀ kə̀ kə də nəniy azoŋə̀ ghà, kə mə taw tsìy fyi daʼa kə Satàn wə̀ ù saʼa nəniy aghee mbyi yə ghu də kwu way Zə̀kìy.

⁵Aghee ntwùm ə̀ ìguw yə̀ də̀ aghee mbyi, à də̀ ighe ghu tyi dê nəniy ayiə yiy anə utwab u wû mbyi. Aghû yə̀ ghu də kwu way ibɛmə yiy azoŋə̀ Kə̀litò, ghu byemə sòʼò àyiə yə ghu tyi dê nəniy.

⁶À ghə̀d twum bə̀ Kə̀zə̀. Wù wə̀ ù dzə̀m kwu nəniy Zə̀kìy, ù byemə ŋwòə ntwum yə ghè niʼà nəniy. Wù wə̀ Zə̀kìy də kə̀ twum nəway we, ù byemə dzə̀ wǎy ntwum yə ghè niʼà. À yù də̌ ndzòʼò àyiə yə a zəŋə nəniy nə̀ ŋgà kəli tsə nə̀ wù kwu Zwày k-a-zə̀ kə̀ kə dzîy nəniy ayiə àsoŋə̀ yìy moo ù kwu usîy wə̀ u dzîy nəniy ayiə àguw yiy.

⁷Awizə̂ yam àsoŋə̀ yìy, ŋgà liə tsə aghê dzə̀m aŋwòə iliə yiy ŋwò bə̀ awò Zə̀kìy. Wù wə̀ ù kwu nəniy iliə yiy, ù də̌ wà Kəzə̀. Ù kwu sòʼo ŋwoə Zə̀kìy.

⁸Wù wə̀ ù də kwu way iliə yiy, ù kwu way Zə̀kìy aŋwòə Zə̀kìy liə aghê dzə̀m.

⁹Zə̀kìy kə dè bə̀ nə̀ ghe liə ŋgaŋ, u twum bə̀ kə̀lə̀kə̀lə̀ kə Wà we anə mbyi nə̀ ŋgà ə nə̀ kyilə imùə̀ yìy abidzəmə̀ we.

¹⁰À yù ba də̀ iliə ìsoŋə̀ yìy, à wày dzə nə̀ ŋgà kə liə Kəzə̀. Àkwuni də̌ nə̀ ù kə liə ŋgaŋ. U twum bə̀ Wà we nə̀ ù bù dòʼò dzəd yə ù də ani nìyzə̀ àyiə ŋgàŋ àbɛbə yiy ate.

¹¹Awizə̂ yam àsoŋə̀ yìy, yəə Zə̀kìy kə ŋge liə tsə nəniy ŋgaŋ ghii, ŋgà kwu ani liə tsə sòʼò àghè dzə̀m.

¹²Wè lìy kamə kə̀ kôʼ kôʼ dzə̂ nəway Zə̀kìy, Abu ŋgà kwuni liə tsə nəniy aghê dzə̀m, à ki də nə̀ ŋgà də fyiə kəmòʼ nə̀ Zə̀kìy. Iliə i we yiy ki kwoʼ kpe doʼò tsə soʼò azoŋə̀ ŋgàŋ.

¹³Zə̀kìy mə nyiə̀ ŋgaŋ nə̀ Zwàykə̀zwekiy ani dè tsə nə̀ ŋgà də anə fyiə kəmòʼ nə̀ we, ù də soʼo anə fyiə kəmòʼ nə̀ ŋgàŋ.

¹⁴Ani dzày kwe fwuli tsə, ghè mə kòʼ ə Wà Kə̀zə̀ nə̀ àsə ghələ yiy, ghè nyiə̀ dzìy bə̀ sòʼò ŋwò nə̀ Tà kə twum bə̀ Wà we nə̀ ù bù dòʼò wù wə̀ ù bii fyiə nəniy aghû yìy fə anə mbyi.

¹⁵Wù wə̀ ù dzìy nəniy nə̀ Yesù də̌ Wà Kə̀zə̀, ù də̀ anə fyiə kəmòʼ nə̀ Zə̀kìy, Zə̀kìy də soʼo anə fyiə kəmòʼ nə̀ we.

¹⁶Ŋgà kwu ŋwoə ndzòʼò iliə yə Zə̀kìy kwu nəniy azoŋə̀ ŋgàŋ. Ŋgà mə gaʼ na sòʼò fôŋ tə ŋgàŋ tìy anə iliə yə Zə̀kìy kwu nəniy azoŋə̀ ŋgàŋ. Zə̀kìy liə àghè àdzə̀m. Wù wə̀ ù kwu soʼo nəniy iliə yiy, ù də̀ anə fyiə kəmòʼ nə̀ Zə̀kìy, Zə̀kìy də soʼo anə fyiə kəmòʼ nə̀ we.

¹⁷Abu ŋgà də nəniy anə fyiə kəmòʼ nə̀ Zə̀kìy, iliə i ŋgàŋ yìy ki nɛmə kwoʼ kpe tsə nə̀ i kwu dzə̀ way utswə̂d wìy. A ki bu i doʼò tsə nəniy ghii, ŋgà ki də kwu dzə̀ way itsəŋ yiy anə tsuk fə isaʼ aŋwòə ŋgà muə yəə à də̀ Yesù fə anə mbyi.

¹⁸Ŋgà kwu dzə̀ way ani tsəŋ aŋwòə ŋgà kwu ŋwô nə̀ Zə̀kìy liə ŋgaŋ. Ndzòʼò ìliə yə Zə̀kìy kwu nəniy azoŋə̀ ŋgàŋ, i zəŋə nə̀ ŋgà kə kəli dzə̀ itsəŋ yiy. Bəə wù kwu nəniy itsəŋ yiy anə fôŋ, à ghii də̌ wù wə̀ ù mòʼò nəniy nə̀ Zə̀kìy kî nyiə̀ ŋwò ighe nə̀ mfəm. Ì yû dè tsə sòʼò nə̀ ù kamə kə̀ kəli dzə̂ yəə Zə̀kìy liə nəniy we ate.

¹⁹Ŋgà liə Kəzə̀ nə̀ àghè àliy aŋwòə Zə̀kìy ma dè ŋgaŋ nə̀ ìliə yiy isə.

²⁰Abu à də kə ndiə, ù dzìy nəniy nə̀ ghe liə ŋwoə Zə̀kìy kwuni bà àghè àliy yiy, wù ù ghè wə̀ də̌ wù ùgûw wìy. Aŋwòə abu wù də wày ani liə àzə̀ ə̀ we wə̀ ù koʼò yə̂ nəniy, ù kì də̌ mə̀yə ani liə yə̀ Kə̀zə̀ nə̀ ù kòʼò wǎy we yə.

²¹Zə̀kìy mə nyə̀ ŋgaŋ nə̀ làŋ kìy kə dzîy nəniy nə̀, “Wù wə̀ ù liə nəniy Zə̀kìy, ù kwu sòʼò ani kəli tsə iliə azoŋə̀ àwizə̂ aghu yiy.”