Read Isu 1 Dzwan 5 Bible Online

1 Dzwan 5 - Isu bible

1 Dzwan 5

¹Ghà kwu nə̀, wù wə ù bɛmə nəniy nə̀ Yesù də̌ wù wə̀ Zə̀kìy sûw na nə̀ ù dòʼò kə̀dòŋ, wù ù ghè wə̀ ndzə̀m də̌ wà Kə̀zə̀. Wù wə̀ ù liə nəniy Təli, ù liə sòʼò ŋwô Wà we.

²Awò ŋgàŋ ani kəli tsə nə̀ ŋgà liə ŋwô àwa Kəzə̀ yìy à də̀ abu ŋgà liə nəniy Zə̀kìy zəŋə yə̀ sòʼò àyiə yə ù dzìy nəniy.

³Ani dè tsə nə̀ ŋgà liə ŋwoə Zə̀kìy, à də̀ abu ŋgà zəŋə yə̂ nəniy ayiə yə ulâŋ u we wiy dzîy. Ulâŋ u we wiy taw sòʼò wày â ŋgàŋ ani dzwùmì.

⁴I ghii də̌ aŋwòə awa Kəzə̀ à dzə̀m mə taw tsìy fyi ayiə àbɛbə yə fə anə mbyi. Ŋgà taw tsìy daʼa kə ayiə mbyi yiy kwu nəniy abidzɛ̀mə̀ ìbɛmə yə ŋgà kwu nəniy awò Zə̀kìy.

⁵À də̌ ndiə ani taw tsìy fyi daʼa kə ayiə mbyi yiy kwu nəniy? À də̌ wù wə̀ ù kwu nəniy ibɛmə yiy nə̀ nə̀ Yesù də̌ Wà Kə̀zə̀.

⁶Yesù Kə̀litò də̌ wù wə̀ ù kə bû nəniy fə anə mbyi nə̀ ù ŋwò bə̀ akə̀lə̀ Kə̀zə̀, Ghu nyə̀ tsə we nə̀ mwi m-à-zə̀ mìy anə dzwî. Ù kə kə̀ kaʼi dê dzə̂ nə̀ ghe də wè mbyi anə ayiə yə ù kə nîy nəniy mwi m-à-zə̀ mìy anə dzwî. Ù kə dè sòʼò nə̀ ghe də wè mbyi anə soŋə̀ fə ghu kə wiy tsə nəniy we, kâŋ tǐy kwuŋ fyiə bə̀ azoŋə̀ we. Zwàykə̀zwekiy dê bə̀ ŋwò awò ŋgàŋ nə̀ ayiə yə̀ də̌ àsòŋə̀ yìy aŋwòə ù dzìy tsə̀ kə àyiə àsoŋə̀ yìy.

⁷À də̀ utsəe ùti u dê bə̂ nəniy nə̀ Yesù kə ndzə̀m də̌ wè mbyi.

⁸Utsəe u ghè wə̀ də̌ Zwàykə̀zwekiy, nə̀ mwi m-à-zə̀ mə̀ Yesù kə nìy nəniy anə dzwî, nə̀ kàŋ tə̀ tə kə kwuŋ fyi bə̂ azoŋə̀ we. Ghu dzəŋə dè kə iyiə ì moʼo yiy.

⁹Aghê dzîy bə̀ àyiə awò ŋgàŋ, kwùmə̀ yə̀ nə̀ ayiə yə ghu kwu nəniy, ŋgà ə bɛmə nyə̀ yə̀ awò ghu, ayiə yə Zə̀kìy dzîy a kwuni tsìy fyi ŋwô ayiə yə wù mbyi dzîy nəniy. Ù mə dzày àyiə yiy awò ŋgàŋ kwùmə̀ yə̀ nə̀ Wà wa. I dê tsə nə̀ ŋgà kwu ani bɛmə ayiə yə ù dzìy nəniy.

¹⁰Wù wə̀ ù bɛmə nəniy â Wà Kə̀zə̀, ù mə ghii bɛmə ayiə yə Zə̀kìy dzây nəniy kùmə̀ yə̀ nə̀ Wà we. Wù wə̀ ù də kə̀ kwuni bɛmə nəway ayiə yə Zə̀kìy dzây nəniy, ù ghii dzìy nə̀ Zə̀kìy də wù ùgûw wìy aŋwòə ù kə̀ bɛmə dzə̂ nəway ayiə yə Zə̀kìy dzây nəniy kwùmə̀ yə̀ nə̀ Wà we.

¹¹Iyiə yə Zə̀kìy dzây â ŋgàŋ i də nə̀ ghe mə nyə̀ ŋgaŋ nə̀ imùə̀ itsà yìy i ŋwô bə̂ nəniy awò Wà we.

¹²Wù wə̀ ù təm doʼò fwumi nəniy nə̀ Wà Kə̀zə̀, ù kwu ŋwô imùə̀ itsà yìy, Wù wə̀ ù də kə̀ təm doʼò fwumi nə̀ Wà Kə̀zə̀, ù kwu dzə̀ way imùə̀ itsà yìy.

¹³Mə twâ bə̀ àyiə yə awò ghà, gha yə ghà kwu nəniy ibɛmə yiy azoŋə̀ Yesù, Wà Kə̀zə̀. Mə liə nə̀ ghà kəli tsə nə̀ ghà kwu ŋwò imuə itsà yìy.

¹⁴Ghè tsəŋə dzə̀ wày ani təmi yə̀ anə sə k-a-zə̀, aŋwòə ghè kwu təŋ ŋwô nə̀ abu ghè ŋwaa yə̂ fyiə kiy anə dzəd yə ù liə nəniy, ù kì nyìə̀ ŋwò ghəd nə̀ fyiə kə ghè kə̀.

¹⁵Abu ŋgà kwu soʼo nə̀ Zə̀kìy taw zuw tsə ŋwò igwuŋì i ŋgàŋ yìy, abu ŋgà ŋwà yə̂ nəniy fyiə kiy â we, ŋgǎ kəli tsə sòʼò nə̀ ù ki nyìə̀ ŋwò ŋgaŋ nə̀ fyiə kə ŋgà ŋwa yə̂ â we.

¹⁶Abu wò kòʼ tsə nəniy àzə̀ yiə̀ ùlìy wìy, ù zəŋə nəniy iyiə ìbɛbə yiy yə i də wày ani bù we nə̀ ìpfə yiy, wò kwu ani gwùŋì, Zə̀kìy ki nyiə̀ soʼò we nə̀ ìmùə̀ itsà yìy. Ibɛb ìliy kwuni də̀ ŋwô, i də ani bù nə̀ ìpfə yiy, mə dzîy dzə̀ wày nə̀ wò kwu ani gwùŋì awò àghù yə̀ ghu zəŋə nəniy ndzòʼò ìbɛb i ghè yə̀.

¹⁷Ŋgwali tə ayiə tə aghê zəŋə tə̀dzə̀m, à də̀ ibɛb anə sə k-a-zə̀. Bɛb tə̀liy tiy kwuni də̀ ŋwô tə də wày ani nìy bù dzə̀ wù nə̀ ìpfə yiy.

¹⁸Ŋgà kwu ŋwô nə̀ awa Kəzə̀ àdzə̀m way dzə ani tsəŋə zəŋə yə kə ayiə àbɛbə yiy. Wà Kə̀zə̀ kyìŋə̀ ŋwòə ghu. Satàn wày ani zəŋi dzə̀ ghu nə̀ ìyiə ìbɛbə yiy.

¹⁹Ŋgà kwu təŋ ŋwô nə̀ ŋgà də awa Kəzə̀, kwu sòʼo nə̀ aghee mbyi àdzə̀m kwuni də̀ anə daʼa kə àmbvə̀ntsə.

²⁰Ŋgà kwu ŋwô nə̀ Yesù Kə̀litò, Wà Kə̀zə̀ mə bù nyə̀ ŋgaŋ nə̀ ùtwab wiy nə̀ ŋgà kəli tsə Zə̀kə̀ kə də nəniy kə̀soŋə̀ kìy. Ŋgà nyiə̀ də̀ anə fyiə kəmòʼ nə̀ Zə̀ kə̀ soŋə̀ kə̀ aŋwòə ŋgà də anə fyiə kəmòʼ nə̀ Yesù Kə̀litò Wà we. À də̀ kə we Zə̀kə̀ soŋə̀ kə̀ kə nyiə̀ nəniy aghû yìy nə̀ imuə̀ itsà yìy.

²¹Awa yam àsoŋə̀ yìy, ghà nyəli maʼà ani fwùlì mwòʼo miy.