Read Isu 3 Dzwan 1 Bible Online

3 Dzwan 1 - Isu bible

3 Dzwan 1

¹À ŋwàʼà kə̀ à twà bə̀ mìə̀, Dzwan, wè kə̀tuw anə dzəŋə kə ghě Kə̀zə̀. Mə twâ bə̀ â wò, Gayòs, fwu wam ùsòŋə̀ wìy, mə liə nəniy aŋwòə ŋgà bɛmə dzəŋi anə iyiə yə i də nəniy ìsoŋə̀ yìy.

²A fwu wam ùdzòŋə̀ wìy, mə gwuŋə̀ nə̀ ayiə yiə̀ ki bwiy dzwabə yəə, wò ki taw dzwabə soʼo nə̀ fyiə kə̀li kiy zəŋə dzə̀ wày wô anə yiə yə mə kwu nəniy nə̀ wò taw dzwàbə̀ ŋwò anə fôŋ[1] yiə̀.

³Mə kə ŋge dwiʼi ŋwô anə yiə yə aghee Kəzə̀ àliy yiy kə bû dzày bə̂ nəniy â mìə̀ nə̀ wò kwu ibɛmə ìsòŋə̀ yìy. Ghu dzày bə̀ nə̀ wò tsə̀ŋ mùə̀ kə anə ayiə yə Zə̀kìy liə nə̀ wò mwùə̀ ate. Dzwùmə̀ yə̀ iyiə yə i də nəniy ìsoŋə̀ yìy.

⁴Fyiə kə̀li kiy kə wày dzə ani zəŋi miə nə̀ mə ki ŋge dyoʼo tsìy fyi â mìə̀ ani zuw nə̀ awa ndàw Kə̀zə̀ yamə tsə̂ŋ dzwùmə̀ yə̀ kə àyiə yə a də nəniy àsoŋə̀ yìy.

⁵A fwu wam ùsòŋə̀ wìy, wò fàʼà fàʼ kə̀ dzoŋə̀ kìy awò àghè liy yə ghu bɛmə nəniy Zə̀kìy, fììy dyaŋə àghě Kəzə̀ àliy yə ghu bwîy bê nəniy.

⁶Ghu mə dzày àyiə yiy fə anə dzəŋə kə aghě Kəzə̀ kwùmə̀ yə̀ nə̀ ìliə yə wò kwu nəniy â ghu. Mə bwoʼo kə̀wo nə̀ wò fày kə ghu ani zəŋə tsə nə̀ ghu zû dyaŋi anə lòʼo tə ghu zê nəniy ate anə ayiə yə fòŋə̀ Kə̀zə̀ də ani dzwàb ate.

⁷Aŋwòə ghu fyi bə̀ ìbwìy i ghu ani fàʼ fàʼ kə Kə̀litò nə̀ ghu nîy dzə̀ wày ifây ìliy yiy awò àghù yə̀ ghu də kamə kə̀ bɛmə nəway Zə̀kìy.

⁸Ŋgaŋ aghee Kəzə̀, a kwu ani dè tsə iliə awò ndzòʼò àghù yə̀ ghii ani zəŋi tsə nə̀ ŋgà ə nì də ani təm fwumi yə̀ nə̀ ghu yəə ghu niʼà nəniy ntwùm ə̀ ìsoŋə̀ yìy.

⁹Mə kə bòʼ twà nyiə̀ bə̀ kə̀ŋwàʼà awò dzəŋə kə aghě Kəzə̀ yìy, Dìyotefès wə ù kwuni liə nəniy ani dòʼò kə̀sə, u kə̀ kwuni na nəway isə yiy anə ayiə yə mə kə dzây.

¹⁰A ki bu mə bû nəniy, mə ki nîy kwoʼ bə̂ àyiə yə àdzə̀m ù zəŋə tsə̂ nəniy nə̀ àyiə àguw yə ù dzìy nia tsə̂ nəniy azoŋə̀ mìə̀. Ù twe ani ŋgwam na nə̀ nə̀ àtyi dè yə̀ ghu bwîy bə̂ nəniy, twe sòʼò nə̀ aghê liy yiy kə ghu fây dzə̀. Abu aghee fày yə̂ nəniy nə̀ àtyi dè yə̀ ghu bwîy bû nəniy, u dzwùm ŋwò fyi ghu anə dzəŋə kə aghě Kəzə̀.

¹¹A fwu wam ùsòŋə̀ wìy, kə̀ kôʼ nìy dzə̀ ayiə àbɛbə yə aghê zəŋə nəniy, i kwuni koʼo niy yə kə ayiə àdzoŋə̀ yìy. Kəli tsə nə̀ wù wə̀ ù zəŋə nəniy ayiə àdzoŋə̀ yìy, ù dè bə̀ nə̀ ghe də wè Kə̀zə̀. Wù wə̀ ù zəŋə nəniy ayiə àbɛbə yiy, ù dè bə̀ nə̀ ghe kwu dzə̀ way Zə̀kìy.

¹²Aghê dzə̀m dzîy àyiə dzoŋə̀ yìy kwùmə̀ yə̀ nə̀ Dèmetìyùs. Ntwùmə̀ ìdzoŋə̀ yə̀ ù tyi dê nəniy nə̀ àyiə yə àdzə̀m ù zəŋə nəniy a dê bə̀ ŋwò nə̀ ù dzwùmə̀ àyiə yə a də nəniy àsòŋə̀ yìy. Ghè dzîy sòʼò àyiə àdzoŋə̀ yìy kwùmə̀ yə̀ nə̀ we, ghà kwu sòʼò ŋwô nə̀ ayiə yə ghè dzîy nəniy nə̀ à də̀ ayiə àsoŋə̀ yìy.

¹³Mə kwu ndə̀mə̀ àyiə ani dzày â wò, mə kwuni liə dzə̀ wày ani nìy kə̀ŋwàʼà nə̀ dzaŋ k-a-ŋwàʼà kìy mə twâ twum bə̂.

¹⁴Mə moʼò ani kwùlì bù kòʼ wò, tə̀ ŋgà dzəŋì fwumi.

¹⁵Mə gwùŋə̀ nə̀ Zə̀kìy nyiə̀ wò nə̀ ìbvay yiy. Afwu yiə̀ yìy twoŋə zuw bə̀ wò. Mə bwoʼ kəwo, twoŋə zuw yə wù ùmòʼ umòʼ anə afələ ŋgàŋ.